پیدأیش ۱۵
۱۵
خودا عهد ابرامٚ اَمرأ
1 اَ ایتفأقأنٚ بوبوسته پٚسی، خوداوند رویأ میأن ابرامَ اَطؤ بوگفته: «اَی ابرام نوأترسِئن، چونکی من ایتأ سٚپرٚ مأنستَن تی جَا حیفأظت کونٚم و ایتأ پیله پأدأش تٚرَه فأدم.»
2 ولی ابرام جوأب بٚدأ: «اَی خوداوند یهوه، تی اَ پأدأش مِرِه چی فأیده دأره، چونکی من ایتأ زأی نأرم و می اَ غولأم العازار کی دمشقٚ شین ایسٚه، می مأل و مینألَ صأب بِه. 3 تو ایتأ نتأج مٚرَه نٚبخشِئی، پٚس می غولأم می وأرث بِه.»
4 بأزون خوداوند اونَ بٚفرمأسته: «اَ غولأم تی وأرث نیبه، چونکی تو پٚسرَ صأب بی و اون تومأمٚ تی مأل و مینألَ ارث بٚره.»
5 خوداوند شبٚ رِه ابرامَ دؤخأده خأنه بیرونٚ ور و اونَ بٚفرمأسته: «آسمأنٚ ستأره‌یأنَ فأندر و بیدین تأنی اوشأنَ بیشمأری؟ تی نتأجم هطؤیی زیأدَ بِه کی نشأ اوشأنَ ایشمأردن.» 6 بأزون ابرام خوداوندَ ایطمینأن بوکوده و خوداوند اونی ایمأنٚ وأسی، اونَ ایتأ عأدیلٚ آدم بیشمأرده.
7 خودا ابرامَ بٚفرمأسته: «من هو خوداوند ایسٚم کی تٚرَه اورٚ کلدانیأنٚ شهرٚ جَا بأوٚردٚم بیرون کی اَ سرزیمینَ تٚرَه فأدم.»
8 ولی ابرام جوأب بٚدأ: «خوداوند یهوه، چوطؤ ایطمینأن بٚدأرم کی تو اَ سرزیمینَ فأدی مٚرَه؟»
9 خوداوند اونَ بٚفرمأسته: «ایتأ سه سأله مأده مَنده، ایتأ سه سأله مأده بوز، ایتأ سه سأله قوچ، ایتأ قومری و ایتأ کوتٚر بأوٚر مِرِه.» 10 ابرام تومأمٚ اَشأنَ بأوٚرده خوداوندٚ ورجأ و هرتأنَ جٚه بوجؤر تأ بیجیر دو نیمه بوکوده و هرتأنٚ پأرَه لأشه‌یَ بٚنأ کس‌کسٚ روبرو؛ ولی پرنده‌یأنَ دو نیمه نوکوده 11 و هر چی دأل کی او حیوأنأنٚ خوردنٚ وأسی اوشأنٚ لشأنٚ سٚر نیشتیدَ، فرأنِیی.
12 غروب دٚمٚ رِه، ابرامَ ایتأ جولفٚ خأب بٚسرأ شؤ. خأبٚ میأن، ایتأ وأشتنأکٚ ظولومأت اونٚ دؤرَ بیگیفته بو کی آدمَ وأشٚت گیفتی. 13 بأزون خوداوند ابرامَ بٚفرمأسته: «حتم بٚدأر کی تی نتأج چأرصد سألٚ رِه ایتأ غریبٚ مملکتٚ میأن غولأمی کونٚده و اوشأنٚ رو ظولم و ستم بِه. 14 ولی من او قومَ کی اَشأنَ اسیرَ کونٚه، تِنبیه کونٚم و آخرپٚسی تی نتأج خٚیلی مأل و مینألٚ اَمرأ جٚه اویَه اَیٚده بیرون. 15 تونم پیری دورون آرأمٚشٚ میأن میری و بیگیلَ بی، تی پِئرأنَ دوچوکی. 16 اوشأن چأرتأ نتأج بوبوسته پٚسی، وأگردٚده اَ سرزیمینٚ میأن، چونکی اموری قومٚ شرورٚ کأرأن کی اَیِه زٚندیگی کودأندرد، هنو اوندر زیأدَ نوبوسته کی جٚه بین بٚشٚد.»
17 او وخت کی آفتأب غروب بوکوده و هوا تأریک دکفته، ایتأ تنور کی دودٚ جَا پور ایسٚه و ایتأ پور نورٚ مشعل جٚه حیوأنأنٚ لشأنٚ میأن دٚوأرٚسته. 18 او روج خوداوند ابرامٚ اَمرأ عهد دٚوٚسته و بٚفرمأسته: «من اَ سرزیمینَ مصرٚ مرزٚ جَا تأ فرأتٚ روخأن تی نتأجَ بٚخشم، 19 ینی قینی، قِنِزّی، قَدمونی، 20 حیتّی، فِرزّی، رِفایی، 21 اَموری، کنعأنی، جِرجاشی و یِبوسی قؤمأنٚ سرزیمینَ.»
Currently Selected:
پیدأیش ۱۵: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org