ማርቆሳ ምሽራቹዋ 16

የሱስ ሀይቁዋፐ ደንዴዳ

(ማቶሳ 28:1-8፤ ሉቃሳ 24:1-12፤ ዮሃ. 20:1-10)

1ሳምባታይ አዳዋፐ ጉይያን፥ ማግዳላ ካታማፐ ዬዳ ማይራማ፥ ያቆባ ዳያ ማይራማነ ሳሎማ ቢደ፥ የሱሳ አሃ ኦካናዉ ሽቱዋ ሻሜድኖ። 2ዎጋ ጋላስ ዎንቱማ ዳሮ ጉራን ጻልቂ ከስሽን፥ ሄ ጎንጎሉዋ ቤድኖ። 3ኡንቱንቱ ባረንቱ ግዶን እቱ እቱዋና፥ “ጎንጎሉዋ ዶናፐ ኑዉ ሹቻ ኦኔ ጎንዶርሲደ ድጋናዌሻ?” ያጊደ ሃሳዪኖ።

4ኡንቱንቱ ጼልያ ዎደ፥ ሄ ዳሮ ዎልቃማ ሹቻ ጎንዶርስድጌዳዋ በኤድኖ። 5የሱስ ሞገቴዳ ጎንጎሉዋ ግዶ ገልያ ዎደ፥ እት ዎዳላ ብታኒ ቦ ማዩዋ ማዪደ፥ ኡሸቻ ባጋና ኡቴዳዋ በኢደ ዳጋሜድኖ።

6ሽን እ ኡንቱንታ፥ “ዳጋሞፕተ። ማስቃልያ ቦላ ካቀቴዳ ናዝሬትያ የሱሳ ህንተንቱ ኮይያዋ ኤራይ። እ ሀዋን ባዋ፤ ደንድ ድጌዳ። ኡንቱንቱ አ ዎዳሳ ሀዋ በእተ። 7ሽን ቢደ የሱስ ባረና ካልያዋንቶነ ጰጽሮሳዉ፥ ‘የሱስ ህንተንቱፐ ካሰቲደ ጋሊላ ቤ፤ እ ህንተንቶ ኦዴዳዋዳንካ ህንተንቱ አ ያን በአና’ ያጊደ ሀዋ ኦድተ” ያጌዳ።

8ማጫ አሳቱ ያሻን ኮኮሪደ፥ የሱስ ሞገቴዳ ጎንጎሉዋፐ ከሲደ ባቃት አጌድኖ፤ ቃይ ኡንቱንቱ ያዬዳ ድራዉ፥ አሳዉ ሄዋ ኦስነ አይነ ኦድበይክኖ።

ማጫ አሳቱ ቢደ፥ ባረንቶ ኦደቴዳባ ኡባ ጰጽሮሳዉነ አናና ደእያዋንቶ ቃንን ኦዴድኖ፤ ሄዋፐ ጉይያን፥ የሱስ ባረ ሁጰዉ ባረና ካልያዋንቱ ቦላ፥ መናዉ አሽያ ላመተና ጌሻ ምሽራቹዋ ቃላ፥ አዋይ ሞክያሳፐ ዉልያሳ ጋካናዉ ኪቴዳ።

የሱስ ማግዳላ ማይራምዉ ቤቴዳ

(ማቶሳ 28:9-10፤ ዮሃ. 20:11-18)

9የሱስ ሀይቁዋፐ ደንዴዳዋፐ ጉይያን፥ ዎጋ ጋላስ ጉራ፥ ላፑ ኢታ አያናቱዋ ከሴዳ ማግዳላ ካታማፐ ዬዳ ማይራምዉ ካሰቲደ ቤቴዳ። 10እዛ ባደ ካሰ አናና ደእያዋንቶ፥ ቃረቲድነ ዬኪደ ኡቴዳዋንቶ ኦዳዱ፤ 11ሽን የሱስ ፓጻ ደእያዋነ እዝዉ ቤቴዳዋ ኡንቱንቱ ስሴዳ ዎደ፥ እዝ ኦዱዋ ቱማ ግበይክኖ።

የሱስ ላኡ ባረና ካልያዋንቶ ቤቴዳ

(ሉቃሳ 24:13-35)

12ሄዋፐ ጉይያን፥ ኡንቱንቱፐ ላአቱ ካታማፐ ከሲደ ቢሽን፥ ኦግያን የሱስ ኮይሮዋፐ ዱማቲደ፥ ኡንቱንቶ ቤቴዳ። 13ኡንቱንቱ ጉየ ስሚደ፥ ሀራቶ ኦዴድኖ፤ ሽን ሄዋንቱ ኡንቱንቱ ኦዱዋ ቱማ ግበይክኖ።

የሱስ ታማነ እት ባረና ካልያዋንቶ ቤቴዳ

(ማቶሳ 28:16-20፤ ሉቃሳ 24:36-49፤ ዮሃ. 20:19-23፤ ኪታ 1:6-8)

14ጉየፐ ታማነ እት የሱሳ ካልያዋንቱ ቁማ ሚሽን፥ የሱስ ኡንቱንቶ ቤቴዳ። ኡንቱንቶ አማኑ ባይና ድራዉ፥ እ ኡንቱንታ ሴሬዳ፤ ቃይ ሀይቁዋፐ እ ደንዴዳዋ በኤዳዋንቱ ኡንቱንቶ ኦድና፥ ኡንቱንቱ አማነናን እጼዳ ድራዉነ ኦድና ስሰናዋንታ ግድያ ድራዉ፥ እ ኡንቱንታ ሴሬዳ።

15እ ኡንቱንታ ሀዋዳን ያጌዳ፤ “አላምያ ኡባ ቢደ፥ አሳ ኡባዉ ዎንጋላ ምሽራቹዋ ቃላ ኦድተ። 16አማኖዌነ ጻማቀቶዌ አታና፤ ሽን አማነናዋ ቦላ ጾሳይ ፕርዳና። 17ታናን አማንያዋንቱ ሀ ማላታቱዋ ኦናዋንታ: ኡንቱንቱ ታ ሱንን ኢታ አያናቱዋ ከሳናዋንታ፤ ቃይ ኡንቱንቱ ዱማ ዱማ ኦራ ቃላን ሃሳያናዋንታ። 18ኡንቱንቱ ሾሻ ኦይቆፐካ፥ ዎይ አያነ ዎያ ማርዝያ ኡሽንቶካ ኡንቱንታ ቆሄና። ቃይ ኡንቱንቱ ባረንቱ ኩሽያ ሀርጋንቻቱዋ ቦላ ዎና፤ ሄ ሀርጋንቻቱ ፓጻና” ያጌዳ።

የሱስ ሳሉዋ ፑደ ከሴዳ

(ሉቃሳ 24:50-53፤ ኪታ 1:9-11)

19ጎዳ የሱስ ባረና ካልያዋንቱና ሃሳዬዳዋፐ ጉይያን፥ ጾሳይ አ ፑደ ሳሉዋ አፍና፥ ጾሳፐ ኡሸቻ ባጋና ኡቴዳ። 20አ ካልያዋንቱ ቢደ፥ ኡባ ሳን ዎንጋላ ምሽራቹዋ ኦዴድኖ። ጎዳይካ ኡንቱንቱና እትፐ ኦ፤ ኡንቱንቱ ኦድያ ቃላይካ ቱማ ግዴዳዋ ኡንቱንቱ ኦያ ማላታቱዋን ኤርሴዳ።#16:20 እት እት በን ጌሻ ማጻፋቱዋን ሀ ፓይዳቱ ባዋ።

Currently Selected:

ማርቆሳ ምሽራቹዋ 16: DFBE

Highlight

Copy