ማቶሳ ምሽራቹዋ 21
21
የሱስ ዎልቃማ ቦንቹዋን የሩሳላመ ገሌዳ
(ማር. 11:1-11፤ ሉቃሳ 19:28-40፤ ዮሃ. 12:12-19)
1ኡንቱንቱ የሩሳላመ ማቲደ፥ ደብረ ዛይተ ጌተትያ ደርያ ላንቂያን ደእያ ቤተፋገ ጌተትያ ቄር ካታማ ጋኬድኖ፤ የሱስ ባረና ካልያዋንቱፐ ላኡዋ ስንዉ ኪቲደ፥ 2ኡንቱንታ ሀዋዳን ያጌዳ፤ “ህንተንቱፐ ስንን ደእያ ቄር ካታማ ቢተ፤ ሄዋን እት ሀራታ ቃሹዋን ደኤዉኖ እዝ ማራና ህንተንቱ ብ ስሞ ሳንካ ደማንታ፤ ኡንቱንታ ብሊደ፥ ታዉ አክ ዪተ። 3ኦንነ ህንተንታ ኦቾፐ፥ ‘ጎዳይ ሀዋንታ ኮዬ’ ያግተ፤ ኤለካ እ ኡንቱንታ የድ አጋናዋ።”#21:3 ጎዳይ፦ ሀራቱዋ ጎዳ ጉሳ። 4-5ትምቢትያ ኦድያ ናቢ፥
“ጽዮነ ካታማ አሳዉ፥
‘በአ፥ ነ ካቲ አሽከ ግዲደ፥
ሀርያ ቦላ፥ ሀረ ማራ ቦላ ኡቲደ፥
ኔኮ ዬ’ ያግተ”
ያጊደ ሃሳዬዳዌ ፖለታና ማላ፥ ሀዌ ሃኔዳ።#ዛካ. 9:9
6አ ካልያዋንቱ ቢደ፥ የሱስ ባረንታ አዛዞዋዳን ኦድኖ። 7ሀራቶነ ሀረ ማራ አሂደ፥ ባረንቱ ማዩዋ ኡንቱንቱ ዞክያን ዎድኖ፤ ሄዋፐ ስምና የሱስ ቶጌዳ። 8ሄ ጮራ አሳፐ ዳርያ ባጋይ ባረ ማዩዋ ኦግያን ሂጼዳ፤ ቃይ ሀራንቱ ም ሀይ ካር ካሪደ፥ ኦግያን የጌድኖ። 9የሱሳፐ ስንና ሀመትያ ጮራ አሳይነ ቃይ አ ጌዱዋ ካልያ ጮራ አሳይ፥ ባረንቱ ኮሻ ቁ ኦደ፥
“ዳዊታ ናአይ ጋላተቶ!
ጎዳ ሱንን ይያዌ አንጀቴዳዋ!
ጾሳይ ጋላተቶ!”
ያጌዳ።#ማዝ. 118:25፣ 26
10የሱስ የሩሳላመ ካታማ ገሌዳ ዎደ፥ ካታማን ደእያ አሳይ ኡባይ፥ “ሀዌ ኦኔ?” ያጊደ ሻቢረቴድኖ።
11አሳይ፥ “ሀዌ ጋሊላን ደእያ ናዝሬተ ጌተትያ ካታማፐ ዬዳ ናብያ የሱሳ” ያጌዳ።
የሱስ ጌሻ ጎልያ ገሌዳ
(ማር. 11:15-19፤ ሉቃሳ 19:45-48፤ ዮሃ. 2:13-22)
12የሱስ ጌሻ ጎልያ ገሊደ፥ ሄዋን ዛልእያዋንታነ ሻምያዋንታ ኡባ ካረ የደርሴዳ፤ ቃይ ሚሻ ላምያዋንቱ ጻራጴዛነ ዶጎሙዋ ዛልእያዋንቱ ኦይድያ ጉጵ የጊደ፥ 13ኡንቱንታ፥ “ጾሳ ማጻፋን፥ ‘ታ ጎሊ ጾሳ ዎስያ ጎልያ ጌተታና’ ያገቲደ ጻፈት ኡቴዳ፤ ሽን ህንተንቱ አ ቦንቂያዋንቱ ቆሰትያ ጎንጎሉዋ ከሴድታ” ያጌዳ።#ኢሳ. 56:7፤ ኤር. 7:11
14ቆቃቱነ ገዲ ስሌዳዋንቱ የሱሳኮ ጌሻ ጎልያ ዪና፥ እ ኡንቱንታ ፓዳ። 15ሽን ቄሳቱዋ ካፓቱነ ህግያ ታማርስያዋንቱ የሱስ ኦያ ኦራባ በኤዳ ዎደነ፥ ጉ ናናይ ጌሻ ጎልያን ባረንቱ ኮሻ ቁ ኦደ፥ “ዳዊታ ናአይ ጋላተቶ” ያግያዋ በኤዳ ዎደ ሀንቀቴድኖ።
16ያቲደ የሱሳ፥ “ሀዋንቱ ግያዋ ስሳይ?” ያጌድኖ።#ማዝ. 8:2
የሱስ፥ “ኤ ስሳይ፤ ጾሳ ማጻፋይ፥ ‘ጉ ናናይነ ምያ ናናይ ኔና ጋላታና ማላ፥ ኡንቱንታ ኤርሳዳ’ ያግያዋ ኡባካ ናባብ በይክቴ?” ያጌዳ። 17የሱስ ኡንቱንታ አጊደ፥ ሄ ካታማፐ ቢታንያ ጌተትያ ካታማ ቢደ፥ ያን አቄዳ።
አይፊ ዬዳ ባላስያ ምቶ
(ማር. 11:12-14፣ 20-24)
18የሱስ ዎንታ ጉራና ካታማ ቤዳ ድራዉ ኮሻቴዳ። 19ኦግያ ዶናን እት ባላስያ ጌተትያ ምቶ በኢደ፥ ኢኮ ቤዳ፤ ብ ጋክያ ዎደ ሄ ምትን ሀይ ጻላላፐ አትን፥ አይፍያ አይነ ደምቤና፤ እዞ፥ “ላኤንዋ መናዉካ አይፎፓ” ያግና፥ ሄ ባላሳታ ኤለካ መላ አጋዱ።
20አ ካልያዋንቱ ሄዋ በኢደ ማላለቲደ፥ “ሀ ባላሳታ ዋናደ እት ኩን መላ አጋዴ?” ያጌድኖ።
21የሱስ ዛሪደ፥ “ታን ህንተንቶ ቱሙዋ ጋይ፤ ህንተንቱ አማኑ ደእያዋንታነ ስናዋንታ ግዶፐ፥ ሀ ባላሳቶ ታን ኦዳዋ ማላ ጻላላ ኦክታ፤ ሽን ሀራይ አቶ ህንተንቱ ሀ ደርያ፥ ‘ደንዳደ አባን ኩንዳ’ ግንቶካ ሀናና፤ 22ህንተንቱ አማኒደ ጾሳ ዎስያዋ አያ ግድንቶካ አካና” ያጌዳ።
የሱሳ ማታይ ዬዳሳ
(ማር. 11:27-33፤ ሉቃሳ 20:1-8)
23የሱስ ጌሻ ጎልያ ዪደ ታማርስሽን፥ ቄሳቱዋ ካፓቱነ አይሁዳ ጭማቱ አኮ ዪደ፥ “ኔን ሀዋ ኦናዉ ነዉ አይ ማታይ ደኢ? ነዉ ሀ ማታ ኦኔ እሜዳዌ?” ያጌድኖ።
24የሱስ ዛሪደ ኡንቱንታ፥ “ታንካ ህንተንታ እትባ ኦቻና፤ ህንተንቱ ታዉ ሄዋ ኦዶፐ፥ ታን ሀዋ አይ ማታን ኦይታንቶ፥ ህንተንቶ ኦዳና፤ 25ዮሃንስ ጻማቅያ ማታይ ሀቃፐ ዬዴ? ጾሳፐ ዬደየ አሳፐ ዬዴ?” ያጌዳ።
ኡንቱንቱ ባረንቱ ግዱዋን ፓሉማ ዶሚደ፥ “ኑን፥ ‘ጾሳፐ ዬዳ’ ያጎፐ እ ኑና፥ ‘ያቶፐ፥ ዮሃንስ ኦዴዳዋ አያዉ አማንበይክቴ?’ ያጋናዋ። 26ሽን ኑን፥ ‘አሳፐ ዬዳ’ ያጎፐ፥ አሳይ ኡባይ ዮሃንስ ናብያ ግዴዳዋ ኤርያ ድራዉ፥ አሳዉ ያዬቶ” ያጌድኖ። 27ኡንቱንቱ የሱሳዉ፥ “ኑን ኤሮኮ” ያጊደ ዛሬድኖ።
የሱስ፥ “ታንካ ሀዋ አይ ማታን ኦይታንቶ፥ ህንተንቶ ኦድከ” ያጌዳ።
ላኡ ናና ሌምሱዋ
28“ሽን ህንተንቱ አያ ቆፒቴ? ላኡ ናናይ ደእያ እት ብታኒ ደኤ፤ ሄ ብታኒ ባይራ ናኣኮ ቢደ፥ ‘ታ ናአዉ፥ ሀቼ ባደ ታ ዎይንያ ቱራ ኦ’ ያጌዳ። 29ናአይ ዛሪደ፥ ‘ቢከ’ ጌዳ፤ ሽን ጉየፐ ባረ ዎዛናን ቆፕ አኪደ፥ ዎይንያ ቱራ ኦናዉ ቤዳ። 30አዉ የኮ ናኣኮ ቢደ፥ ባይራዉ ጌዳዋዳንካ አዉ ጌዳ፤ ቴፋ ናአይ ዛሪደ፥ ‘ሎአ ታ ጎዳዉ’ ያጌዳ፤ ሽን ብቤና። 31ሀ ላኡ ናናፐ ባረ አዉ ኮዬዳዋ ኦዳዌ ሀቃዌ?” ያጌዳ።
ኡንቱንቱ፥ “ባይራ” ያጌድኖ።
የሱስ ኡንቱንታ ሀዋዳን ያጌዳ፤ “ታን ህንተንቶ ቱሙዋ ጋይ፤ ቃራጻ አክያዋንቱነ ዎሹምያዋንቱ ህንተፐ ስንቲደ፥ ጾሳ ካዉተ ገላና። 32አያዉ ጎፐ፥ ጻማቅያ ዮሃንስ ጽሎተ ኦግያ ታማርሲደ፥ ህንተኮ ዪና፥ እ ግያዋ አማንበይክታ። ሽን ቃራጻ አክያዋንቱነ ዎሹምያዋንቱ እ ግያዋ አማኔድኖ፤ ህንተንቱ ሀራይ አቶ ሄዋ በኢደካ፥ ህንተንቱ ናጋራፐ ስሚደ፥ እ ግይያዋ አማንበይክታ” ያጌዳ።
ዎይንያ ቱራ ግዶን ኦያ ጎሻንቻቱዋ ሌምሱዋ
(ማር. 12:1-12፤ ሉቃሳ 20:9-19)
33ቃይካ የሱስ ሀዋዳን ያጌዳ፤ “ሀራ ሌምሱዋካ ስስተ፤ ዎይንያ ጌተትያ ቱራ ቶኬዳ እት ብታኒ ደኤ፤ ዎይንያ ቱራ ዩሽ አደ ድሬዳ፤ ቃይ ሄ ዎይንያ ጉምእያ ኦላካ ቦኬዳ፤ ሄዋ ናግያ አሳዉ አዱሳ ሹቻ ግምቤዳ። ሄዋፐ ጉይያን፥ ኮ ኦያ አሳዉ እሚደ፥ ሀራ ጋደ ቤዳ።#ኢሳ. 5:1-2 34ዎይንያ አይፍያ ማጽያ ዎዲ ጋክና፥ ባረና ጋክያዋ አኪደ ያና ማላ፥ ባረ ቆማቱዋ ባረ ኮዋቱዋኮ ኪቴዳ። 35ኮዋቱ አ ቆማቱዋ ኦይቂደ፥ እቱዋ ዎድኖ፤ ቃይ የኩዋ ሹቻን ጳልቄድኖ። 36ቃይካ ሄ ብታኒ ካሰዋንቱፐ ዳርያ ሀራ ቆማቱዋ ኪቴዳ፤ ኮዋቱ ሄ ቆማቱዋካ ካሰዋንቱዋዳን ኦድኖ።
37“ሽን ዉርሰን እ፥ ‘ታ ናኣ ኡንቱንቱ ቦንቻናዋንታ’ ያጊደ ባረ ናኣ ኡንቱንቱኮ ኪቴዳ።
38“ሽን ኮዋቱ ናኣ በኢደ፥ ባረንቱ ግዱዋን፥ ‘ጋድያ ላታናዌ ሀዋ፤ ቢደ አ ዎደ፥ ጋድያ ኑን ላታና’ ያጌድኖ። 39ናኣ ኦይቂደ፥ ዎይንያ ቱራ ግዶፐ ጋጻ ከሲደ ዎድኖ።
40“ስም ዎይንያ ቱራ ጎዳይ ይያ ዎደ፥ ሄ ኮዋቱዋ ዎታኔ?” ያጊደ ኦቼዳ።
41ኡንቱንቱ፥ “እ ሄ ኢታ አሳቱዋ ዎ ዉርሲደ፥ ዎይንያ ቱራይ አይፍያ ዎደ ባረና ጋክያዋ ዎድያን ሼያ ሀራ ኮዋቶ እማና” ያጌድኖ።
42የሱስ ኡንቱንታ ሀዋዳን ያጌዳ፤
“ ‘ግምቢያዋንቱ ካደ እጼዳ ሹቻይ፥
ጎዳ ጻጱዋ ምንስያ፥ ኡባፐ አያ ሹቻ ግዴዳ።
ሀዌ ጎዳይ ኦዳዋ፤
ቃይ ኑ ጼላዉካ ማላልስያዋ’
ያግያዋ ጾሳ ማጻፋፐ ኡባካ ናባብ በይክቴ?#ማዝ. 118:22-23
43“ሄዋ ድራዉ፥ ታን ህንተንቶ ኦዳይ፤ ጾሳ ካዉተይ ህንተፐ አከቲደ፥ ሎኦ አይፍያ እምያ አሳዉ እመታናዋ። 44ሄ ሹቻ ቦላ ኩንድያ ኡባይ መኤረታና፤ ቃይ ሄ ሹቻይ አሳ ቦላ ኩንዶፐ፥ ሄ ኩንዴዳ ኡራ ሊቅሳና” ያጌዳ።
45ቄሳቱዋ ካፓቱነ ፓርሳዋቱ የሱስ ኦዴዳ ሌምሱዋ ስሴዳ ዎደ፥ ባረንቱዋ ሃሳይያዋ ኤሬድኖ። 46ኡንቱንቱ የሱሳ ኦይቃናዉ ኮዬድኖ፤ ሽን የሱሳ ዳሮ አሳይ ናብያ ጊደ ቆፕ ኡቴዳ ድራዉ፥ ሄ አሳዉ ያዬድኖ።
Currently Selected:
ማቶሳ ምሽራቹዋ 21: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
