ማቶሳ ምሽራቹዋ 19

የሱስ ገሉዋባነ አካባ ታማርሴዳ

(ማር. 10:1-12)

1የሱስ ሄ ሃሳያ ዉርሶዋፐ ጉይያን፥ ጋሊላፐ ደንዲደ፥ ዮርዳኖሳ ሻፋፐ ሄፍንን ደእያ ይሁዳ ጋድያ ቤዳ። 2ዳሮ አሳይ አ ካሊደ ቤዳዋ ሄዋን ፓዳ።

3እት እት ፓርሳዋቱ ፓጫናዉ የሱሳኮ ዪደ፥ “እት አሳይ አይ ጋሱዋንነ፥ ባረ ማቻቶ የዳናዉ ኑ ህጊ አዛዚ?” ያጊደ አ ኦቼድኖ።

4የሱስ ዛሪደ፥ ሀዋዳን ያጌዳ፤ “ጾሳይ ኮይሮ ኡንቱንታ መደ፥ አቱማዋነ ማጫዉኖ ኦዳ።#ዶመ 1:27፤ 5:2 5ሄዋ ድራዉ፥ ‘እት አሳይ ባረ አባነ ባረ ዳዮ አጊደ፥ ባረ ማቻትና እትፐ ደኤ፤ ኡንቱንቱ ላኡ እት አሳ ግዲኖ’ ያግያ ቃላ ናባብበይክቴ?#ዶመ 2:24 6ሄዋ ድራዉ፥ ኡንቱንቱ እት አሳ ግድያዋፐ አትን፥ ላኡ አሳ ግድክኖ፤ ሄዋ ድራዉ፥ ጾሳይ እትፐ ደአናዳን ጋዋ አሳይ ሻኮፖ” ያጌዳ።

7ፓርሳዋቱ የሱሳ፥ “ያትና፥ ሙሴ አያዉ እት ኡራይ ባረ ማቻቶ ፕርማ ፔደ የዳና ማላ አዛዜዴ?” ያጌድኖ።

8የሱስ ዛሪደ፥ “ህንተንቱ ህንተንቱ ማቻቱዋ የዳና ማላ፥ ሙሴ ህንተንታ አዛዜዳዌ፥ ህንተንቱ ኦድና ስሰና ጉዙማ ግዶ ድራፐ አትን፥ ኮይሮ ሄዋ ማላ ግደና። 9ታን ህንተንቶ ኦዳይ፤ ባረ ማቻቶ ዎሹመናን ደእሽን የዲደ፥ ሀራሮ አክያ ኦንነ ዎሹሜ፤ ሀራይ የዴዳዉኖ አክያዌካ ዎሹሜ” ያጌዳ።

10የሱሳ ካልያዋንቱ አ፥ “አስና ግዱዋንነ ማቻት ግዱዋን ደእያ ዎጋይ ሄዋ ማላ ግዶፐ፥ አከናንነ ገለናን ደእያዌ ሎአ” ያጌድኖ።

11ሽን የሱስ ኡንቱንታ ያጌዳ፤ “ሄዋ ማላ ትምርቲ ጾሳይ እሞዋንቱሳፐ አትን፥ አሳ ኡባሳ ግደና፤ 12አያዉ ጎፐ፥ ባረንቱ ዳይ ኡሉዋፐ የለትያ ዎደካ፥ ሹፋ ግዴዳዋንቱ ደኢኖ፤ ቃይ አሳይ ቃራትና ሙሬሳ ግዴዳዋንቱ ደኢኖ፤ ቃይ ሳሉዋ ካዉተ ድራዉ፥ ባረንታ ሹፋ ኦዳዋንቱ ደኢኖ፤ ሀ ትምርትያ አካናዉ ዳንዳይያዌ ኦንነ አኮ” ያጌዳ።

የሱስ ቄር ናና ቦላ ባረ ኩሽያ ዎዳ

(ማር. 10:13-16፤ ሉቃሳ 18:15-17)

13የሱስ ሄ ዎደ ባረ ኩሽያ ጉ ናና ቦላ ዎደ፥ ጾሳ ዎሳና ማላ፥ እት እት አሳይ ናና አኮ አሄዳ፤ ሽን የሱሳ ካልያዋንቱ ሄ አሳ አሄና ማላ ሀንቀቴድኖ። 14ሽን የሱስ፥ “ቄር ናናይ ታኮ ይያዋ ድጎፕተ፤ አያዉ ጎፐ፥ ሳሉዋ ካዉተይ ሄዋንቱ ማላሳ” ያጌዳ።

15ሄዋፐ ስሚደ ባረ ኩሽያ ኡንቱንቱ ቦላ ዎዳዋፐ ጉይያን፥ ሄዋፐ ባሽ ቤዳ።

ያላጋ፥ ዱረ ብታንያ ኦሻ

(ማር. 10:17-31፤ ሉቃሳ 18:18-30)

16እት ብታኒ የሱሳኮ ዪደ፥ “ታማርስያዎ፥ ታን መና ደኡዋ ደማናዉ ሎኦባ አያ ኦ?” ያጌዳ።

17የሱስ አ፥ “ሎኦባይ አየንቶ ታና አያዉ ኦቻይ? እቱዋ ጻላላይ ሎአ፤ ሽን ኔን መናዉ ደአናዉ ኮዮፐ፥ አዛዛቱዋ ናጋ” ያጌዳ።

18ብታኒ፥ “ሀቃዋንታ?” ያጊደ ኦቼዳ።

የሱስ ዛሪደ፥ “ዎፓ፤ ዎሹሞፓ፤ ዉኦፓ፤ ዎርዱዋ ማርካቶፓ፤#ከሳ 20:13-16፤ ዛረ. 5:17-20 19ነ አባነ ነ ዳዮ ቦንቻ፤ ነ ሾሩዋካ ነ ሁጲያዳን ሲቃ” ያጌዳ።#ከሳ 20:12፤ ዛረ. 5:16፤ ዎጋ 19:18

20ሄ ያላጋ ብታኒ የሱሳ፥ “ታን ሄዋ ኡባካ ጉተፐ ዶማደ ናጋድ፤ ያትና፥ ታዉ ፓጭያዌ አዬ?” ያጌዳ።

21የሱስ ብታንያ፥ “ኔን ፖሎ አሳ ግዳናዉ ኮዮፐ፥ ባደ ነዉ ደእያዋ ዛልኣደ፥ ሄ ሚሻ ህዬሳዉ እማ፤ ኔን ሳሉዋን ዱረታና፤ ያታደ ያደ ታና ካላ” ያጌዳ።

22ሽን ሄ ያላጋ ብታኒ ሄዋ ስሴዳ ዎደ፥ እ ዳሮ ዱረ ግድያ ድራዉ፥ ቃረቲደ ባሽ ቤዳ።

23የሱስ ባረና ካልያዋንቶ፥ “ታን ህንተንቶ ቱሙዋ ጋይ፤ ዱረ አሳይ ሳሉዋ ካዉተ ገላናዌ ዳሮ መቶ ግዳናዋ። 24ታን ጉጃደካ ህንተንቶ ኦዳይ፤ ዱረ አሳይ ጾሳ ካዉተ ገላናፐ፥ ጋሉ ማርፕያ ሉኩዋና አናዌ ማታቴ” ያጌዳ።

25አ ካልያዋንቱ ሄዋ ስስ ማላለቲደ፥ “ያትና፥ ኦን አታናዉ ዳንዳዪ?” ያጌድኖ።

26የሱስ ኡንቱንታ ጫድ ጼሊደ፥ “ሀዌ አሳዉ ዳንዳየተና፤ ሽን ጾሳዉ ኡባባይ ዳንዳየቴ” ያጌዳ።

27ጰጽሮስ ሄ ዎደ ዛሪደ የሱሳ፥ “በአ፥ ኑን ኑዉ ደእያ ኡባባ ባሺደ፥ ኔና ካሌዶ፤ ያቲደ ኑን አያ ደማኔሻ?” ያጌዳ።

28የሱስ ኡንቱንታ ሀዋዳን ያጌዳ፤ “ታን ህንተንቶ ቱሙዋ ጋይ፤ ታን፥ አሳ ናአይ፥ ኦራ ጋድያን ታ ካዉተ ኦይድያን ኡትያ ዎደ፥ ታና ካሌዳ ህንተንቱካ ታማነ ላኡ እስራኤልያ ዛራቱዋ ቦላ ፕርዳናዉ፥ ታማነ ላኡ ካዉተ ኦይድያን ኡታንታ። 29ታ ሱን ድራዉ፥ ጎልያ ዎይ እሻቱዋ ዎይ ምቻቱዋ፥ ዎይ አዉዋ ዎይ አቶ ዎይ ማቻቶ፥ ዎይ ናና ዎይ ጋድያ አጌዳ ኦንነ፥ ጼቱ ዳኩዋፐ ዳሩዋ አካና፤ ቃይ መና ደኡዋካ ላታና። 30ሽን ጮራቱ ሀእ ስንቴዳዋንቱ ጉየታናዋንታ፤ ቃይ ጮራቱ ሀእ ጉየን ደእያዋንቱ ስንታናዋንታ።

Currently Selected:

ማቶሳ ምሽራቹዋ 19: DFBE

Highlight

Copy