ሉቃሳ ምሽራቹዋ 9
9
የሱስ ባረና ካልያ ታማነ ላአቱዋ ኪቴዳ
(ማቶሳ 10:5-15፤ ማር. 6:7-13)
1የሱስ ታማነ ላኡ አ ካልያዋንታ እትፐ ባረኮ ጼሲደ፥ ጻላህያ ኡባ አሳፐ ከሳናዉነ ሀርግያዋንታ ፓና ማላ ዎልቃነ ማታ እሜዳ። 2ጾሳ ካዉተባ ኦዳናዉነ ሀርጋንቻቱዋ ፓና ማላ ኡንቱንታ ኪቴዳ። 3እ ኡንቱንታ ኪቲደ፥ “ኦግያ ቢደ፥ ጻምኣ ግድናካ፥ ዎይ ቃርጪትያ፥ ዎይ ቁማ፥ ዎይ ሚሻ ግድናካ አያነ ኦይቆፕተ፤ ላኤንያ ማዩዋካ ኦይቆፕተ።#ሉቃሳ 10:4-11 4ህንተና አሳይ ሀቃን ሞኮፐነ፥ ሄዋፐ ከሳና ጋካናዉ፥ ህንተንቱ ገሌዳ ጎልያን ጋምእተ። 5ሄ ካታማ አሳይ ህንተና ሞከናን እጾፐ፥ ሄዋፐ ከሲደ፥ ኡንቱንቱ ህንተና ሞከናን እጾዎ ማርካ ግዳና ማላ፥ ህንተንቱ ገድያፐ ባና ሾጭ ድጊደ ቢተ” ያጌዳ።
6አ ካልያዋንቱ ቢደ፥ ቄር ካታማ ኡባን ምሽራቹዋ ቃላ ኦዲደነ ሀርጋንቻ ፓደ ዩዬድኖ።
ሄሮድሰ ኦዳባ
(ማቶሳ 14:1-12፤ ማር. 6:14-29)
7ሀእ ጋሊላ ቢታ ካትያ ሄሮድሰካ ሀኔዳ የዉዋ ስሲደ ያት ጌዳ። ጋሶተይነካ እት እት አሳይ፥ “ዮሃንስ ሀይቁዋፐ ደንዴዳ” ያጌ። 8ሀራ አሳይ፥ “ኤላስ ከሲደ ቤቴዳ” ያግያ ዎደ፥ ሀራንቱ ቃይ፥ “በን ናባቱዋፐ እቱ ሀይቁዋፐ ደንዴዳ” ያጊኖ። 9ሄሮድሰካ፥ “ታን ዮሃንሳ ቆያ ቃንጽሳ ድጋድሽን፥ ሀዋዳን አሳይ ሃሳይያ ብታኒ ኦኔ?” ያጊደ፥ የሱሳ በአናዉ ኮዬዳ።
የሱስ እቼሹ ሻአ አሳ ምዚደ ካልሴዳ
(ማቶሳ 14:13-21፤ ማር. 6:30-44፤ ዮሃ. 6:1-14)
10የሱስ ኪቶዋንቱ ስሚደ፥ ኡንቱንቱ ኦዳዋ ኡባባ የሱሳዉ ኦዴድኖ። እካ ኡንቱንታ አኪደ፥ ቤተሳይዳ ያገትያ ካታማ ማታን ደእያ ታካሳ ቤዳ። 11አሳይ እ ደኢያሳ ኤሪደ ካልና፥ ኡንቱንታ ሞክ አኪደ ጾሳ ካዉተባ ኦዴዳ፤ ሀርግያፐ ፓጻናዉ በስያዋንታካ ፓዳ።
12ሳአይ ኦማርስያ ዎደ፥ የሱሳ ካልያ ታማነ ላአቱ አኮ ዪደ፥ “ሀ አሳይ ኡባይ ኑ ዩሹዋን ደእያ ሄራ ግዶነ ቄር ካታማቱዋ ግዶ ቢደ፥ አቅያሳነ ቁማ ደማና ማላ ሞይዛ፤ አያዉ ጎፐ ኑን ሀዋን አሳይ ባይናሳን ደኤቶ” ያጌድኖ።
13ሽን የሱስ ኡንቱንታ፥ “አሳዉ ሜተትያባ ህንተንቱ እምተ” ያጌዳ።
ኡንቱንቱ ዛሪደ፥ “አነ ቢደ፥ ሀ ኡባ አሳዉ ቁማ ሻመናን ዮፐ ኑዉ እቼሹ ሶሉዋፐነ ላኡ ሞልያፐ ሀራይ ባዋ፤ ሄዎ ኑን ሀ ጮራ አሳዉ ቁማ ሻማና ማላ ኮያይ?” ያጌድኖ። 14(ጋሱካ፥ ሄዋን ደእያ አሳይ እቼሹ ሻኣ ኬና።)#9:14 እቼሹ ሻአ፦ እስራኤልያ ዎጋን ማጫዌነ ቄር ናናይ ፓይደተና ድራዉ፥ እቼሹ ሻኣ ጉሳይ ማጫዋነ ቄር ናና ፓይደናን ኩሜዳዋ። ሀ ፓይዱ ደእያ ኮይሮ ማራይ በን ማጻፋ እቱዋ እቱዋን ባዋ።
የሱስ ባረና ካልያዋንታ፥ “እሻታሙ እሻታሙ አሳ ጭታን ጭታን ሻክ ሻክ ኡትስተ” ያጌዳ።
15ኡንቱንቱካ እ ጎዋዳን ኡባ አሳካ ኡትሴድኖ። 16የሱስካ እቼሹ ሶሉዋነ ላኡ ሞልያ ኦይቂደ፥ ፑደ ሳሉዋ ቦንጎት ጼሊደ ጾሳ ጋላቴዳ፤ ዱደ፥ አሳዉ ግሻና ማላ አ ካልያዋንቶ እሜዳ። 17አሳይ ኡባይካ ሚደ ካሌድኖ። ኡንቱንቱፐ አቴዳ ዶካ፥ ታማነ ላኡ ሳምፓ ኩሜዳዋ ደንድኖ።
ጰጽሮስ የሱሳባ አዋዬዳ
(ማቶሳ 16:13-19፤ ማር. 8:27-29)
18እት ጋላስ የሱስ ባረካ ዎስያ ዎደ፥ አ ካልያዋንቱካ አናና እትፐ ደእሽን፥ “አሳይ ታና ኦና ጊኖ?” ጊደ ኡንቱንታ ኦቼዳ።
19ኡንቱንቱ ዛሪደ፥ “አሳይ ኔና ጻማቅያ ዮሃንሳ ያጌ፤ ሀራ አሳይ ቃይ ኤላሳ#9:19 ኤላሳ፦ ሀ ናቢ እ ሀይቆደፐ ዳሮ ዎደፐ ጉየ፥ የሱስ ክርስቶስ ቢታ ቦላን ታማርሲደ ደርያ ቦላ ዎሳዉ ከሲደ ላመት ቦጼዳዋፐ ጉየ ባጋን አናናነ ሙሴና ሃሳዬዳ። ሄዋ ጉሳይ ሀይቂ ስሚደ ዳሮ ጮራ ዎድያፐ ጉየ ፓጻ ቆንጬዳ ጉሳ። ያጌ፤ ሀራይ ቃይ በን ናባቱዋፐ እቱ ደንዴዳ ያጌ” ያጌድኖ።#ማቶሳ 14:1፣ 2፤ ማር. 6:14፣ 15፤ ሉቃሳ 9:7፣ 8
20የሱስ ኡንቱንታ፥ “ህንተሽ፥ ታና ኦና ጊቴ?” ያጌዳ።#ዮሃ. 6:68፣ 69
ጰጽሮስካ ዛሪደ፥ “ኔን ጾሳይ ኦኬዳ ክርስቶሳ” ያጌዳ።
የሱሳ ካልያዋንቱ ሀናናዉ በስያባ
(ማቶሳ 10:38-39፤ 16:24-26፤ ማር. 8:34-38፤ ሉቃሳ 14:26-27)
21የሱስካ ኡንቱንታ፥ “ሀዋ ኦስነ ኦዶፕተ” ያግ ምንስ አዛዚደ፥ 22“ታን፥ አሳ ናአይ፥ ዳሮ መቱዋ አካናዉ በሴ፤ ጭማቱዋን፥ ቄሳቱዋ ካፓቱዋንነ ሙሴ ህግያ ታማርስያዋንቱን እጸታናዉ ኮሼ፤ ኡንቱንቱ ታና ዎናዋንታ፤ ታንካ ሄዘን ጋላስ ሀይቁዋፐ ደንዳናዉ በሴ” ያጌዳ።
23የሱስካ አሳ ኡባ፥#ማቶሳ 10:38፤ ሉቃሳ 14:27 “ታና ካላናዉ ዶስያዌ ደኦፐ፥ ባረ ሁጲያ ካዶ፤ ባረ ማስቃልያ#9:23 ማስቃልያ፦ ሀዋ ጉሳይ፥ እት አሳይ ባረ ላይ ኡባን ጾሳ ካሊደ ሻከተናን ቶካናዉ በስያ መቱዋነ ዋይያ። ጋላሳን ጋላሳን ቶኪደ ታና ካሎ። 24ባረ ሸምፑዋ አሻናዉ ዶስያዌ ኡባይ ባይዜ፤ ሽን ታ ድራዉ ባረ ሸምፑዋ ባይዝያዌ ኡባይ አሼ። 25እት ኡራይ ሀ አላምያባ ኡባ አሺደ ባረ ሸምፑዋ ባይዞፐ ዎይ ባረዉ ፓጭሶፐ፥ አያ ማዲ? 26አሳይ ታናንነ ታ ቃላን ዬላቶፐ፥ ታን አሳ ናአይ፥ ታ ቦንቹዋናነ ጌሻ ኪታንቻቱዋ ቦንቹዋና ይያ ዎደ አን ዬላታናዋ። 27ታን ህንተንቶ ቱሙዋ ያጋይ፤ ሀዋን ደእያ አሳፐ፥ ጾሳ ካዉተ በአና ጋካናዉ ሀይቁዋ ሀይቀናዋንቱ እቱ እቱ ደኢኖ” ያጌዳ።
የሱሳ ማላይ ላመቴዳ
(ማቶሳ 17:1-8፤ ማር. 9:2-8)
28የሱስ ሀዋ ጎዋፐ ጉይያን፥ እት ሳምንታ ኬና ጋምኢደ፥ ጰጽሮሳነ ዮሃንሳ፥ ያቆባካ አኪደ፥ ዎሳናዉ ደርያ ሁጲያ ከሴዳ።#2 ጰጽ. 1:17፣ 18 29እ ዎስሽን፥ አ ዴሙዋ ማላይ ላመቴዳ፤ አ ማዩካ ቦጺደ ጶልቄዳ። 30ቆፐናን ላኡ አሳቱ፥ ሙሴነ ኤላስ ከስ ቤቲደ፥ የሱሳና ሃሳይ ደኢኖ። 31ኡንቱንቱ ቦንቹዋን ቆንጭ ቤቲደ፥ የሱስ ጾሳ ቆፋ ፖላናዉ የሩሳላመን ሀይቃናዋ#9:31 ሀይቃናዋ፦ ግሪከ ማጻፋ ቆፋን ሀዋ ጉሳይ፥ “የሱስ ሳሉዋ ብያዋ”፤ ሀዌ ቃይ እ ሀይቁዋፐ ደንድያዋነ ያቲደ ሳሉዋ ብያዋ ኡባ ሺሽ ኦይቄዳ ቆፋ። አናና ሃሳዬድኖ። 32ጰጽሮሳነ አናና እትፐ ደእያዋንታ ገምእሹ ጌሮዬዳሽን፥ ኤለካ ቤጎቲደ አ ቦንቹዋነ አናና ጋ ኤቄዳ ላኡ አሳቱዋ በኤድኖ። 33ሄ ላኡ አሳቱ፥ የሱሳ ምይያፐ ሻከትያ ዎደ፥ ጰጽሮስ የሱሳ፥ “ጎዳዉ፥ ሀዋን ደእያዌ ኑዉ ሎአ ግድያ ድራዉ፥ ሄዙ ዳስያ እቱዋ ነዉ፥ እቱዋ ሙሴዉ፥ እቱዋ ኤላሳዉ ኬጻና” ያጌዳ።
34ጰጽሮስ ሄዋ ሃሳይ ደእሽን፥ ሻሪ ዪደ ኡንቱንታ ካም አግና የሱሳ ካልያዋንቱ ያዬድኖ። 35ሻርያፐካ፥ “ታን ዶሬዳ ታ ናአይ ሀዋ፤ እ ግያዋ ስስተ” ያግያ ቃላይ ዬዳ።
36ቃላይ ስሰቶዋፐ ጉይያን፥ የሱስ ባረ ጻላላ ግዲደ ቤቴዳ፤ ኡንቱንቱካ የዉዋ ባረንቱ ዎዛናን ኦይቂደ ሄ ዎድያን ኦንነካ አያነ ኦድቤና።
የሱስ ኢታ አያናን ኦይቀቴዳ ላኡ አሳቱዋ ፓዳ
(ማቶሳ 17:14-18፤ ማር. 9:14-27)
37ዎንተ ጋላስ፥ የሱስነ ሄዙ አ ካልያዋንቱ ደርያፐ ዱገ ዎያ ዎደ፥ ጮራ አሳይ የሱሳና ጋከቴዳ። 38ሄ ዎደ አሳፐ እት ብታኒ ባረ ኮሻ ቁ ኦደ፥ “ታማርስያዎ፥ ታዉ ደእያዌ እት ናኣ ግዶ ድራዉ፥ ኔን አ በአና ማላ ኔና ዎሳይ፤ 39ቃይ ኢታ አያናይ ዎዛና አናን ደንዲደ አ ዋስሴ፤ ዶናና ፓሮያና ጋካናዉ አ ኮኮርሲደ፥ ኡባ ጋላስ መቶያዋፐ አትን፥ አ ኤለ የደና። 40ኔና ካልያዋንቱ ሄ ኢታ አያና ከሳና ማላ፥ ታን ኡንቱንታ ዎሳድ፤ ሽን ዳንዳይበይክኖ” ያጌዳ።
41የሱስ ዛሪደ ኡንቱንታ፥ “አማነና ሀ ዎድያ ደሻ አሳዉ፥ ታን ህንተናና አዉደ ጋካናዉ ደአኔ? ቃይ ህንተንቱባ አዉደ ጋካናዉ ዳንዳያኔ? ነ ናኣ ሃ አካያ” ያጌዳ።
42ናአይ ዪደ ደእሽን፥ ኢታ አያናይ አ ሳኣን ኦሊደ ኮኮርሴዳ፤ የሱስ ኢታ አያና አጋ ግ ናኣ ፓደ አ አቦ ዛሪደ እሜዳ። 43አሳይ ኡባይካ ጾሳ ዎልቃማ ዎልቃፐ ደንዶዋን ማላለቴድኖ።
የሱስ ባረ ሀይቁዋባ ላኤንዋ ኦዴዳ
(ማቶሳ 17:22-23፤ ማር. 9:30-32)
44“ታና አሳ ናኣ፥ አሳይ አሳ ኩሽያን አደ እማናዋ፤ ህንተንቱ ሀ የዉዋ ዶጎፕተ” ያጌዳ። 45ሽን እ ግያዋ ኡንቱንቱ አኬክበይክኖ። ኡንቱንቶ ገለና ማላ ኡንቱንቱፐ ጌሜዳ ድራዉ፥ ሀ የዉዋ የሱሳ ኦቻናዉ ያዬድኖ።
ኡባፐ አያዌ ኦኔሻ? ያግያ ኦሻ
(ማቶሳ 18:1-5፤ ማር. 9:33-37)
46አ ካልያዋንቱ፥ “ኑ ግዶፐ ዳርያዌ ኦኔ?” ያጊደ ፓሉመቴድኖ።#ሉቃሳ 22:24 47የሱስ ኡንቱንቱ ዎዛና ቆፋ ኤሪደ፥ ጉ ናኣ አሂደ፥ ባረ ማታን ኤሲደ፥ 48“ሀ ጉ ናኣ ታ ሱንን ሞክያዌ ኦንነ ታና ሞኬዳ፤ ቃይ ታና ሞክያ ኡባይ፥ ታና ኪቴዳ ታ አባ ሞኬ። ህንተንቱ ኡባፐ ጉጽያዌ ኡባፐ ዳራ” ያጌዳ።
ህንተንቱ ግያዋ ጳልቀና ኡራይ ህንተንቱ ባጋ
(ማር. 9:38-40)
49ዮሃንስካ ዛሪደ፥ “ጎዳዉ፥ እት አሳይ ነ ሱንን ኢታ አያናቱዋ ከስያዋ ኑን በኢደ፥ ኑ ባጋ ግደና ድራዉ፥ አ ድጌዶ” ያጌዳ።
50ሽን የሱስ አ፥ “ህንተንቱ ግያዋ ጳልቀናዌ ህንተንቱ ባጋ ግድያ ድራዉ፥ አ ድጎፕተ” ያጌዳ።
ሳማርያ ካታማ አሳቱ የሱሳ ሞካናዉ ኮይበይክኖ
51የሱስ ሳሉዋ ብያ ዎዲ ማትና፥ ባረ ዎዛና ቆፋ የሩሳላመኮ ዛሬዳ። 52ባረፐ ስንዉ ኡባ የዉዋ ጊግሳና ማላ፥ ኪተትያ አሳ ሳማርያ ካታማ ኪቴዳ። 53ሽን እ የሩሳላመ ባናዉ ደንዴዳ ድራዉ፥ አሳይ አ ሞክበይክኖ። 54አ ካልያዋንቱ ያቆብነ ዮሃንስ ሄዋ በኢደ፥ “ጎዳዉ፥ ኑን ኤላስ ኦዋዳን፥#9:54 ኤላስ ኦዋዳን፦ እት እት ጌሻ ማጻፋ ብለን፥ “ሀ አሳ ዉርሳናዉ” ያጌ። ታማይ ሳሉዋፐ ዪደ ኡንቱንታ ማናዳን ጼሳና ማላ ኮያይ?” ያጌድኖ።
55ሽን የሱስ ጉየ ስሚደ፥ ኡንቱንታ ሴሬዳ።#9:55 ኡንቱንታ ሴሬዳ፦ እት እት ጌሻ ማጻፋን ደእያ ብለይ፥ “ኔን አይ ማላ አያነንቶ፥ ኔና ኤርኪ? አሳ ናአይ አሳ ሸምፑዋ አሻናዉ ዬዳፐ አትን፥ ባይዛናዉ ይቤና” ያጌ። 56“ታን፥ አሳ ናአይ፥ አሳ ሸምፑዋ አሻናዉ ዮዋፐ አትን፥ ባይዛናዉ ያበይከ” ያጌዳ። ኡንቱንቱ ሀራሳን ደእያ ቄር ካታማ ቤድኖ።
የሱሳ ካልያዋንታ ጋክያ ፓጭያ
(ማቶሳ 8:19-22)
57ኡንቱንቱ ኦግያና ቢሽን፥ እት ብታኒ የሱሳ፥ “ጎዳዉ፥ ኔን ብያሳ ኡባ ታን ኔና ካላና” ያጌዳ።
58የሱስ አ፥ “ዎራካናቶ ኦላይ፥ ሳሉዋ ካፋቶካ ጎሊ ደኤ፤ ሽን ታን፥ አሳ ናአይ፥ ገላ ሸምፓ አክያ ሳአይ ታዉ ባዋ” ያጌዳ።
59የሱስ ሀራ ኡራ፥ “ታና ካላ” ያጌዳ።
ሽን፥ ብታኒ፥ “ጎዳዉ፥ ታን ካስያን ባደ ታ አባ ሞጋና” ያጌዳ።
60የሱስ፥ “ሀይቆዋንታ ባረንቱ ሀይቆዋንቱ ሞግኖ፤ ኔን ባደ፥ ጾሳ ካዉተባ ኦዳ” ያጌዳ።
61ቃይ ሀራ ብታኒ፥ “ጎዳዉ፥ ታን ኔና ካላና፤ ሽን ኮይሩዋን ታ ሶይ አሳ ባደ ሳሮታና” ያጌዳ።#1 ካታ. 19:20
62ሽን የሱስ አ፥ “ቦራ ጎሻናዉ ዶሞዌ ኦንነ ጉየ ጼሎፐ ጾሳ ካዉተዉ በሰና” ያጌዳ።
Currently Selected:
ሉቃሳ ምሽራቹዋ 9: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
