ሉቃሳ ምሽራቹዋ 6

የሱሳ ካልያዋንቱ ሳምባታን ትሻ ዱድኖ

(ማቶሳ 12:1-8፤ ማር. 2:23-28)

1ሳምባታ ጋላስ የሱስ ባረና ካልያዋንቱና እትፐ እት ጎሻ ግዱዋና አያ ዎደ አ ካልያዋንቱ ዛርጋፐ ትሻ ዱደ ባረንቱ ኩሽያን ሽገቺደ ሙሳ ዶሜድኖ። 2ፓርሳዋቱዋ ግዶፐ፥ “ሳምባታ ጋላሳን ኦናዉ ዎጋ ግደናዋ አያዉ ኦቴ?” ያጌድኖ። 3የሱስ፥ “ካትያ ዳዊተነ እትፐ ደእያዋንቱ ኮሻቴዳ ዎደ ኦዳዋ ናባብ በይክቴ? 4ዳዊተ ጾሳ ጎልያ ገሊደ ቄሳቱዋፐ አትን ሀራ አሳይ ሜናዳን ድገቴዳ፥ ጾሳዉ ያርሸቴዳ ቁማ ሜዳ። እትፐ ደእያዋንቱካ እ እምናደ ሜድኖ” ያግ ዛሬዳ።#ዎጋ 24:9

5ሀዋፐ ካሊደ የሱስ፥ “አሳ ናአይ ሳምባታዉ ጎዳ!” ጌዳ።

የሱስ ኩሺ ጉንዴዳ ብታንያ ፓዳ

(ማቶሳ 12:9-14፤ ማር. 3:1-6)

6ሀራ ሳምባታ ጋላሳን የሱስ አይሁዳቱዋ ዎስያ ጎልያ ገሊደ ታማርስ ደኤ። ሄዋንካ ኡሸቻ ኩሺ ስሌዳ ብታኒ ደኤ። 7ህግያ ታማርስያዋንቱነ ፓርሳዋቱ የሱሳ ሞትያ ጋሱዋ ደማናዉ እ ሳምባታን አሳ ፓፐ በአና ጊደ ናግ ደኢኖ። 8እካ ኡንቱንቱ ቆፋ ኤሪደ ኩሺ ስሌዳ ብታንያ፥ “ደንዳ አሳ ግዱዋን ኤቃ” ያጌዳ። ብታኒካ ደንድ ኤቄዳ።

9ሄዋፐ ስሚደ የሱስ፥ “ሀንንቶነ ሳምባታ ጋላሳን ሎኦባ ኦናዉ በሲዬ ኢታባ ኦናዉ በሲ? ሸምፑዋ አሻናዉ በሲዬ ዎናዉ በሲ?” ያጌዳ። 10የሱስ ባረ ዩሹዋን ደእያ አሳ ኡባ ጼሎዋፐ ጉይያን ብታንያ፥ “ነ ኩሽያ ምጫ!” ያጌዳ። እካ ምጪደ ፓጼዳ።

11ኡንቱንቱ ሎይ ሀንቄቲደ የሱሳ ቦላ ኦናዋ ባረንቱ ግዶን ማቀቴድኖ።

የሱስ ታማነ ላኡ ኪተቴዳዋንታ ዶሬዳ

(ማቶሳ 10:1-4፤ ማር. 3:13-19)

12ሄ ዎድያን የሱስ ደርያ ቦላ ዎሳናዉ ከሴዳ፤ ሄዋንካ ቃማ ኩመን ጾሳኮ ዎሲደ አቄዳ። 13ሳአይ ዎንቶዋን ባረና ካልያዋንታ ጼሴዳ። ሄዋንቱፐካ ታማነ ላአቱዋ ዶሪደ፥ “ኪተቴዳዋንታ”#6:13 ኪተቴዳዋንታ፦ ሀዋ ጉሳይ ታማነ ላኡ የሱስ ኪቴዳ ሀዋራቱዋ ጉሳ። ያጊደ ሱንዳ። 14ኡንቱንቱ ሱንይካ: ጰጽሮሳ ጊደ እ ሱንዳ ስሞና፥ አ እሻ እንድራሳ፥ ያቆባ፥ ዮሃንሳ፥ ፕልጶሳነ ባርታላሞሳ፥ 15ማቶሳ፥ ቶማሳ፥ እልፕዮሳ ናኣ ያቆባ፥ ባረ ጋደዉ ሴለትያ ስሞና፥ 16ያቆባ ናኣ ይሁዳነ የሱሳ አ እሜዳ አስቆሮቱ ይሁዳ።#6:16 አስቆሮቱ፦ ሀዋ ጉሳይ አይሁዳ ጋድያን ደእያ አስቆሮቱ ጌተትያ ጋድያፐ ዬናን አተና ጉሳ። ሀ ሱን ብለይ፥ “ዎርዳንቻ”። ቃይካ፥ “ሀይቆ አ እምያዋ” ጉሳ።

የሱስ ጮራ አሳ ታማርሴዳነ ፓዳ

(ማቶሳ 4:23-25)

17የሱስካ ኡንቱንቱና እትፐ ደርያፐ ዎደ ደምባሳን ኤቄዳ። አ ካልያዋንቱፐካ ጮራ አሳይ ሄዋን ደኤ። ቃይካ አፐ ስሳናዉነ ባረንቱ ሀርግያፐ ፓጻናዉ ይሁዳ ጋድያፐ፥ የሩሳላመ ካታማፐ፥ አባ ማታን ደእያ ጺሮሳፐነ ሲዶናፐ ዬዳ ጮራ አሳይ ሄዋን ደኢኖ። 18ሀ አሳይካ አ ስሳናዉነ ባረንቱ ሀርግያፐ ፓጻናዉ ዬድኖ። ቱና አያናን ኦይቀቲደ መቶትያዋንቱካ ፓጼድኖ። 19ዎልቃይ አፐ ከሲደ ኡባ ፓያ ድራዉ አሳይ ኡባይ አ ቦቻናዉ ኮዬ።

አንጁዋባነ መቱዋባ

(ማቶሳ 5:1-12)

20ባረና ካልያዋንታ ጼሊደ ያጌዳ:

“ህንተንቱ ማንቃቱ አንጀቴዳዋንታ፤

አያዉ ጎፐ፥ ጾሳ ካዉተይ ህንተንቱዋ።

21ህንተንቱ ሀእ ኮሻትያዋንቱ አንጀቴዳዋንታ፤

ግድን ካላንታ፤ ህንተንቱ ሀእ ዬክያዋንቱ

አንጀቴዳዋንታ፤

ግድን ሚጫንታ።

22“አሳ ናኣ ድራዉ ህንተንታ አሳይ እጽያ ዎደነ ቶችያ ዎደ፥ ህንተንቱ ሱንካ ኢታን ደንያ ዎደ፥ አንጀቴድታ። 23ሳሉዋን ህንተንቱ አካና ዎይታይ ዳራ ግድያ ድራዉ ሄ ጋላስ ናሸቻን ጉፕተ፤ ጋሱካ ካሰ ህንተንቱ አዎቱ ናባቱዋ ቦላን ሀዋዳን ኦደ ደኤድኖ።

24“የዉዋን ቃይ፥ ዱረ አሳቶ ህንተንቶ አየ፤

ህንተንቱ እሻሎ ደኡዋን ደኤድታ።

25ህንተንቶ ሀእ ካሌዳዋንቶ አየ፤

ግድን ኮሻታንታ፤

ህንተንቶ ሀእ ሚጭያዋንቶ አየ፤

ግድን ካዮታንታነ ዬካንታ።

26አሳይ ኡባይ ህንተንቱ ሎኦተባ ሃሳይያ ዎደ፥

ህንተንቶ አየ፤

ካሰ ህንተንቱ አዎቱ ዎርዶ ናባቶ፥

ሀዋዳን ኦድኖ።

ሞርክያ ሲቃናዉ በሴ

(ማቶሳ 5:38-48፤ 7:12)

27“ሽን ታን ኦድያዋ ስስያዋንቶ ያጋይ: ህንተንቱ ሞርከቱዋ ዶስተ፤ ህንተና እጽያዋንቶ፥ ሎኡዋ ኦተ፤ 28ህንተና ሸቂያዋንታ አንጅተ፥ ህንተና ናቂያዋንቶ፥ ዎስተ። 29እት ባጋ ሻይያ ባቂያዎ፥ ላኤንዋካ በሳ፤ ኦንነ ነ ኮትያ አክያዎ፥ ነ ሻምጭያካ ድጎፓ።

30“ነዉ ደእያዋ ኔና ዎስያዎ፥ እማ፤ ነዋ አኬዳዋ፥ ዛራ ጋደ ኦቾፓ። 31አሳይ ህንተንቶ ኦና ማላ ህንተንቱ ዶስያዋዳን፥ ህንተንቱካ ሀራዉ ሀዋዳን ኦተ።

32“ህንተንታ ዶስያዋንታ ጻላላ ዶሶፐ አይ ጋላታይ ደኢ? ሀዋ ግዶፐ ናጋራንቻቱካ ባረና ዶስያዋንታ ዶሲኖ። 33ህንተንቶ ሎኦባ ኦያዋንቱ ጻላላዉ ህንተንቱ ሎኦባ ኦፐ ሄዎ አይ ጋላታይ ደኢ? ናጋራንቻቱካ ሀዋዳን ኦኖ። 34ታልኢደ ህንተዉ ዛራናዉ ዳንዳይያዋንቱ ጻላላዉ ታልኦፐ አይ ጋላታይ ደኢ? ባረ ታልኤዳዋ ዛሪደ አካናዉ ናጋራንቻቱካ ባረንቱ ጋርሳን ታልኤቲኖ። 35ሽን ህንተንቱ፥ ህንተንቱ ሞርክያ ዶስተ፤ ኡንቱንቶካ ሎኦባ ኦተ፤ ህንተንቱፐ ታልኦዋ ዛሪድ አካናዉ ቆፖፕተ። ሀዋ ህንተንቱ ፖሎፐ ህንተንቶ ጋቲ ዳራናዋ። ቃይ ህንተንቱ ኡባፐ ቦላ ጾሳ ናና ግዳንታ። እ ኢታቶነ ጋላተናዋንቶካ ኬካ። 36ህንተንቱ አቡ ማርያዋ ግዶዋዳን ህንተንቱካ ማርያዋንታ ግድተ።

ሀራ አሳ ፕርዳናዉ በሰና

(ማቶሳ 7:1-5)

37“ኦ ቦላንካ ፕርዶፕተ፥ ህንተንቱ ቦላንካ ፕርደተና፤ ሀራ ቦላ ኩናንያ ኦፕተ፤ ህንተንቱ ቦላንካ ኩናን ኦሰተና። አቶ ጊተ፤ ጾሳይ ህንተንቶ አቶ ጋና። 38እምተ፤ ህንተንቶ እመታና። ህንተንቱ ማኬዳ ማካን ህንተንቶ ማከታና። ባቂ ናቂና ሲል ኩም ፓላህ ላለትያ ማካ ህንተንቱ ክዉዋን እድንና” ጌዳ።

39ቃይካ የሱስ ሀዋፐ ካልያ ሌምሱዋ ኦዴዳ፤ “ቆቃይ ቆቃ ካለናዉ ዳንዳዪ? ቆቃይ ቆቃ ካለፐ ላአቱካ ኦይቀቲደ ኦላን ኩንድክኖ?#ማቶሳ 15:14 40ታማርያዌ ባረና ታማርስያዋፐ አና፤ ታማርያዌ ምን ታማሮፐ ባረና ታማርሶዋ ማላ ግዳናዉ ዳንዳዬ።

41“ነ አይፍያ ግዶን ደእያ ቱሳ ከሰናን ደኣደ ሀራ ነ ላግያ አይፍያ ግዶን ደእያ ሱላ አያዉ ጼላይ? 42ነ አይፍያ ጋርሳን ደእያ ቱሳ በኤናን ሀራ አሳኮ ሺቃደ፥ ‘ታ እሻዉ፥ ነ አይፍያ ጋርሳፐ ሱላ ታ ከሶ?’ ያጋናዉ ዎታ ዳንዳያይ? ሀ ሎኡዋ ማላትያ ኢታዉ፥ ኮይሮታደ ነ አይፍያ ግዶን ደእያ ቱሳ ከሳ። ሄዋፐ ጉይያን ነ እሻ አይፍያ ግዶን ደእያ ሱላ ከሳናዉ ጌሻደ ጼላናዉ ዳንዳያ።

ምቶነ እዛ አይፌዳ አይፍያ

(ማቶሳ 7:16-20፤ 12:33-35)

43“ሎኦ ምይ ኢታ አይፍያ አይፈና፤ ሄዋዳንካ ኢታ ምይ ሎኦ አይፍያ አይፋናዉ ዳንዳየና። 44ምይ ኡባይ ባረ አይፍያ አይፍያዋን ኤረቴ። አጉንፐ ዎደን አይፊ ማጸተና፤ ሀዋዳንካ፥ ጹንዱቂያፐ#6:44 ጹንዱቂያ፦ ሀ ምይ ጎምኦርያ ዛርያ ግዲደ አ አይፊ አያዉነ ማደናዋ። ላድያ አይፍያ ማጻናዉ ዳንዳየተና።#ማቶሳ 12:34 45ሎኦ አሳይ ባረ ሎኦ ዎዛናፐ ሎኦ የዉዋ ሃሳዬ። ቃይ ኢታ አሳይ ባረ ኢታ ዎዛናፐ ኢታ የዉዋ ሃሳዬ። አያዉ ጎፐ፥ አሳይ ባረ ዶናን ሃሳይያዌ ባረ ዎዛናን ኩሜዳዋ ዶናይ ሃሳይያ ድራሳ።

ላኡ ቆሞ ጎልያ ኬጽያ አሳ

(ማቶሳ 7:24-27)

46“ታን ኦዶዋ ኦክታ፥ ሽን አያዉ ጎዳዉ፥ ጎዳዉ፥ ያጊደ ታና ጼጊቴ? 47ታኮ ይያ ኡባይ ታ ቃላካ ስሲደ ኦሱዋን ፔሽያዌ ኦና ማላትንቶ ታ ህንተንታ በሳና፤ 48እካ ጎልያ ኬጺደ ዳሮ ኦላ ቦኪደ ዛላ ቦላ ግንቢደ ኬጼዳ አሳ ማላቴ፤ ድኡ ድኢደ ሄ ጎልያ ሱግናካ፥ ምኖ ዛላ ቦላ ኬጸቶ ድራዉ ቃናዉ ዳንዳይቤና። 49ቃይ ታ ቃላ ስሲደ ኦሱዋን ፔሸና ኡራይ ባሱ ባንታሳ ሻፍያ ቦላን ጎልያ ኬጼዳዋ ማላቴ። ድኡ ድኢደ ሄ ጎልያ ሱጎ ዎደ ኤለካ ኩንዴዳ፤ ሄ ጎሊካ ኢታ ዎዳ ዎዲደ ባዬዳ” ያጌዳ።

Currently Selected:

ሉቃሳ ምሽራቹዋ 6: DFBE

Highlight

Copy