ሉቃሳ ምሽራቹዋ 21
21
አምአትባነ እዝ እሞታ
(ማር. 12:41-44)
1የሱስ ቁ ጊደ ጼልያ ዎደ፥ ዱረ አሳይ ጌሻ ጎልያን እሞታ ሺሽያ ሚሻ ግዶን ባረንቶ ደእያዋፐ ኡንቱንቱ የግያ ዎደ በኤዳ። 2ቃይካ እት ህዬሳ አምኤ ምሽራታ ላኡ ሰምበርያ ሄዋን የግያ ዎደ በኢደ፥ 3“ታ ህንተዉ ቱሙዋ ጋይ፥ ሀ ህዬሳ አምኤ ምሽራታ፥ ኦፐነ ዳሩዋ እማዱ። 4ሀ አሳይ ኡባይ ባረንቶ ፓላሆዋፐ እሜድኖ፤ ሽን እዛ ባረ ህዬሳተትሃ ዎልቃን ባረዉ ደእያዋ ኡባ እማዱ” ያጌዳ።
ጌሻ ጎሊ ኮለታናዋ የሱስ ካሰቲደ ኦዴዳ
(ማቶሳ 24:1-2፤ ማር. 13:1-2)
5አ ካልያዋንቱፐ እቱ እቱ፥ “ጌሻ ጎሊ ሎኦ ሹቻንነ ባላ ሺቁዋ እሞታን ሎኤዳዋ” ያግ ሃሳይያ ዎደ የሱስ፥ 6“ሀዌ ህንተንቱ በእያዌ ኡባይ ኮለተናን፥ ሹቻይ ሹቻ ቦላን ኬለቲደ አተና ዎዲ ያናዋ” ያጌዳ። 7ኡንቱንቱካ፥ “ታማርስያዎ፥ ስም ሀዌ ሀናናዌ አዉዴ? ቃይካ ሀዌ ሀናናዉ ማላይ አዬ?” ያጊድ ኦቼድኖ።
የሱስ መቱዋ ዎዲነ ናሸቻ ዎዲ ያናዋ ኦዴዳ
(ማቶሳ 24:3-13፤ ማር. 13:3-13)
8እካ፥ “ኦንነ ባለናዳን ናገትተ፤ ጮራ አሳይ፥ ‘ታን ክርስቶሳ’ ያጊደ ቃይካ፥ ‘ዎዲ ማቴዳ’ ያጊደ ታ ሱንን ያናዋንታ፤ ህንተንቱ ቃይ ኡንቱንታ ካሎፕተ። 9ኦላ የዉዋነ አሳ ማካላባ ስስያ ዎደ ዳጋሞፕተ፤ ሀዌ ኮይሮ ሀናናዉ በስያዋ ግዶ ድራፐ አትን ዉርሰይ ብራ” ያጌዳ።
10ሄዋፐ ካሊደ አሳዉ፥ “አሳይ አሳ ቦላ፥ ካዉተይካ ካዉተ ቦላ፥ ደንዳናዋ፤ 11ዎልቃማ ቢታ ቃይ ሀናናዋ፤ ኮሻይነ ሀርጊ፥ ዱማ ዱማሳን መታናዋ፤ ያሽያ የዉነ ኡባካ ዎልቃማ ማላታይ ሳሉዋፐ ሀናናዋ።
12“ሀዌ ኡባይ ሀናናፐ ካስያን ቃይ አሳይ ህንተንታ ኦይቃናዋንታ፥ መቶናዋንታ፤ ህን አይሁዳቱዋ ዎሳ ጎለ አሳዉ አ እማናዋንታ፤ ቃሾ ጎለካ ገልሳናዋንታ፤ ካታቱዋ ስንንነ ሞድያዋንቱ ስንን ሺሻናዋንታ፤ ሀዌ ኡባይ ታ ሱን ጋሱዋን ህንተንታ ጋካናዋ። 13ሀዌካ ማርካታናዉ ህንተዉ ሎኦ ካጫ ግዳናዋ። 14ሀዋ ግድያ ድራዉ፥ አይ ዛሩዋ እማኔ ጊደ ኮይሮቲደ ህንተንቱ ኡንኤተና ማላ ሀዋ ዎዛና አተ። 15ኤቀትያዋንቱ ኡባይ፥ ኤቀታናዉነ ላካናዉ ዳንዳየና ቃላነ አ ጭንጫተ ታን ህንተንቶ እማና።#ሉቃሳ 12:11-12 16ህንተንታ የሌዳዋንቱነ ህንተንቱ እሻቱ፥ ህንተንቱ ዳባቱነ ህንተንቱ ላገቱካ አተናን ህንተንታ አ እማናዋንታ፤ ህንተንቱፐካ እቱዋ እቱዋ ዎናዋንታ። 17ታ ሱን ድራዉ አሳ ኡባ ማታን እጸቴዳዋንታ ግዳንታ። 18የዉዋን ቃይ ህንተንቱ ሁጲያ ብናናፐካ እትናነ ባዩኩ። 19ምን ኤቂደ ህንተንቱ ሸምፑዋ አሺታ።
የሱስ የሩሳላመ ባየባ ኦዴዳ
(ማቶሳ 24:15-21፤ ማር. 13:14-19)
20“የሩሳላመ ኦላ አሳን ዶደቴዳ ዎደ፥ እዝ ባየይ ማቴዳዋ ኤርተ። 21ሄ ዎደ ይሁዳን ደእያዋንቱ ደርያኮ ባቃትኖ፤ ካታማን ደእያዋንቱ ቃይ ሄዋፐ ከስኖ፤ ባላጋርያን ደእያዋንቱካ ያ ካታማኮ ገሎፕኖ፤ 22ጾሳ ቃላን ጻፈቴዳዌ ኡባይ ፖለታናዳን ሀዌ ሀሉዋ ከስያ ዎድያ።#ሆሰ 9:7 23ቢታ ቦላን ዎልቃማ መቱ ሀናናዋ፤ ሀእ ደእያ አሳ ቦላን ሀንቁ ያናዋ፤ ሄዋ ድራዉ ሄ ዎድያን ሻሃሮዋንቶነ ንያዋንቶ አየ! 24አሳይ ኡባይ ማሻን ሀይቃናዋንታ፤ ጾሳ ኤረና ጋድያ ኡባቱካ ኦሞዱዋን ባናዋንታ፤ የሩሳላመካ አይሁዳ ግደናዋንቱ ዎዲ ፖለታና ጋካናዉ፥ ኡንቱንቱን የቴዳዉኖ ግዳናዉኑ።
ክርስቶሳ ላኤን ዩሳ
(ማቶሳ 24:29-31፤ ማር. 13:24-27)
25“አዋ፥ አገናንነ ጾልንትያ ቦላ ማላታይ ሀናናዋ፤ አባፐነ ቤታ ኮሻፐ ደንዶ ጋሱዋን ቢታ ቦላን ደእያ አሳይ ኡባይ ኡንኤታናዋንታ፤ ህርጋናዋንታ።#ኢሳ. 13:10፤ ህዝ. 32:7፤ ኢዩ. 2:31፤ ሳፃ 6:12፣ 13 26ሳሉዋ ዎልቃይ ኡባይ ቃጽያ#21:26 ሳሉዋ ዎልቃይ ኡባይ ቃጼ፦ ሀዋ ጉሳይ፥ በን ዎደ አሳይ፥ ሳሉዋን ደእያ ጾልንቲ ኡባይ አያና ዎልቃና ደኤ ጊደ ቆፔ። ድራዉ አሳይ ያሻንነ አላምያ ቦላ አዬ ያናዌሻ ያጊደ ናጉዋን ዳቡራናዋንታ። 27ሄ ዎደ አሳ ናአይ ዎልቃንነ ዎልቃማ ቦንቹዋን ሻርያን ይያ ዎደ በአናዋንታ።#ዳኔላ 7:13፤ ሳፃ 1:7 28ህንተንቱካ፥ ሀ የዉ ፖለቱሳ ዶምያ ዎደ፥ ዎዙ ጼቱዋ ድራዉ ስት ጊደ ኤቂተ፤ ፑደ ቁ ጊደ ጼልተ” ጌዳ።
ባላስያ ጌተትያ ም ሌምሱዋ
(ማቶሳ 24:32-35፤ ማር. 13:28-31)
29ካሊደካ፥ ሀዋ ያግ ሌምሱዋ ኦዴዳ፥ “ዎደንፐነ ሀራ ም ኡባፐ ጼልተ፤ 30ሀይይ አጭና በእያ ዎደ፥ ሄ ዎደ ቦኒ ማቴዳዋ ህንተንቱ ኤሪታ። 31ሄዋዳንካ ቃይ የዋቱ ፖለትያዋ በእያ ዎደ፥ ጾሳ ካዉተታ ማቴዳዉኖ ኤርተ።
32“ታን ህንተዉ ቱሙዋ ጋይ፤ ሀዌ ኡባይ ፖለታና ጋካናዉ ሀ የለታይ አና። 33ሳሉነ ሳአይ አና፤ ሽን ታ ቃላይ አና። 34ስም ዛዋይ ባይና ደኡዋን፥ ኡሻ ዳሩዋነ ደኡዋባን ኡንኤትሽን ህንተንቱ ዎዛናይ ለፐናዳንነ ሄ ጋላሳይ ጲርያዳን ቆፐናን ህንተና ጋከናዳን ናገትተ፤ 35ሀዌ ቢታ ኡባን ደእያዋንቱ ኡባቱዋ ቦላን ጋካናዋ። 36ስም ይያ ኢታባ ኡባፐ ህንተንቱ አታናዳንነ አሳ ናኣ ስንንካ ኤቃናዉ ዳንዳያና ማላ፥ ኡባ ዎደ ምን ዎስተ” ያጌዳ።
37የሱስ ጋላስ ጋላስ ጌሻ ጎልያን ታማርሲደ፥ ቃማ ቃማ ደብረ ዛይተ ያገትያ ደርያኮ ከሲደ አቄ። 38አሳይ ኡባይ አ ስሳናዉ ጉራን ያ ጌሻ ጎልያ አኮ ዪኖ።
Currently Selected:
ሉቃሳ ምሽራቹዋ 21: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
