ሉቃሳ ምሽራቹዋ 19

የሱሳነ ዛክዮሳ

1የሱስ ህን እያርኮ ካታማ ገሊደ፥ ሄዋና አ ደኤ። 2ሱንይ ዛክዮሳ ጌተትያ እት ዱረ ብታኒ ሄዋን ደኤ። እካ ቃራጽያዋንቶ ካፑዋ። 3ዛክዮስ የሱሳ ጌተትያዌ ሀቃዌንቶ በአናዉ ኮይሽን ቃን ግዴዳዋ ድራዉ፥ አሳ ጮራተፐ ደንዶዋን በአናዉ ዳንዳይቤና። 4የሱስ ሄ ኦግያና አያ ድራዉ፥ ስንዉ አደ እት ቦእያ ቦላ ከሴዳ።

5የሱስ ሄ ሳኣ ጋኪደ፥ ቁ ግ ፑደ ጼሊደ፥ “ዛክዮሳ፥ ሀቼ ነ ጎለን ፔሻናዉ በስያ ድራዉ ኤለ ዎ” ያጌዳ። 6እካ ኤሌል ቦእያፐ ዎደ፥ ናሸቻን የሱሳ ሞኬዳ። 7ሄዋን ደእያ አሳ ኡባይ ሀዋ በኢደ፥ “ሀዌ ናጋራንቻ ጎለን ገሊደ እማ ግዲደ ሾበታና ሀኔ” ጊደ ኡባቱካ ዙዙን ዶሜድኖ።

8ዛክዮስካ ቃይ ኤቂደ ጎዳ፥ “ጎዳዉ፥ ስም ታዉ ደእያዋ ኡባፐ ባጋ ህየሳቶ እማና፤ ኦፐነካ ዎርዱዋን አኬዳዋ ግዶፐ፥ ኦይዱ ዳኩዋ ኡዳደ ዛራና” ያጌዳ።

9የሱስካ ዛክዮሳዉ ኦዲደ፥ “ኔንካ አብራሃሞ ሼሻ ግድያ ድራዉ፥ ሀቼ አቶተይ ሀ ጎለ አሳዉ ዬዳ። 10አያዉ ጎፐ፥ አሳ ናአይ ባዬዳዋ ኮያናዉነ አሻናዉ ዬዳ” ያጌዳ።#ማቶሳ 18:11

ታሙ ቆማቱዋ ሌምሱዋ

(ማቶሳ 25:14-30)

11አሳይ ሀዋ ስሲደ ደእሽን የሱስ፥ ህን የሩሳላመ ጼቱዋ ድራዉነ ኡንቱንቶ ጾሳ ካዉተይ ሀእካ ቆንጭያዋ ማላቶ ድራዉ ሌምሱዋ ኦዴዳ።#ማቶሳ 25:14-30 12ሀዋዳን ያግ ዶሜዳ፤ “እት ዎልቃማ ብታኒ ባረዉ ካዉተ ቦንቹዋ አኪደ ስማናዉ፥ ህን ሃኮ ጋድያ ቤዳ። 13ባረ ቆማቱዋ ግዶፐ ታሙዋ ጼሲደ፥ ኡንቱንቶ ታሙ ሚና#19:13 ሚና፦ ሚና ጌተትያዌ፥ ግሪከ ቃላን ምናሰ ግያዋ። ሀዋ ብለይ፥ ሄ ዎደ ደእያ ኦሳንቻ አሳዉ እመትያ ሄዙ አገና ድርጉዋ። ጌተትያ ሚሻ እሞዋሽን፥ ‘ታን ስማደ ያና ጋካናዉ፥ ሀ ሚሻን ዛልእሽተ’ ያጌዳ።

14“ሽን አ ጋድያ አሳይ አ እጾ ድራዉ፥ ‘ሀ ብታኒ ኑ ቦላ ካተታናዳን ኑን ኮዮኮ’ ያጊደ፥ ጉየና እ ደኢያሳ አሳ ኪቴድኖ። 15ግዶፐ አትን፥ ሀ ብታኒ ካተ ግዲደ ህን ባረ ጋደ ስሜዳ። ሄ ቆማቱ ሁጲያን ሁጲያን እ እሞ ሚሻን ዛልኢደ አይ ኬና ዎሴድኖንቶ ኤራናዉ ጼስሴዳ።

16“ኮይሮ ቆማይ ሺቂደ፥ ‘ጎዳዉ፥ ኔን ታዉ እሜዳ ታሙ ሚና ዎያ ታሙዋ ደማድ’ ያጌዳ። 17አ ጎዳይ አ፥ ‘ሀያናሾ! ኔን ሎኦ ቆማ፤ ኔን ጉ የዉዋን አማነቴዳዋ ግዳደ ቤቶ ድራዉ፥ ታሙ ካታማቱዋ ቦላን ማታይ ነዉ እመቴዳ’ ያጌዳ።

18“ላኤንያዌካ ሺቂደ፥ ‘ጎዳዉ፥ ኔን ታዉ እሜዳ እቼሹ ሚና ጌተትያ ሚሻይ እቼሹዋ ዎዳ’ ያጌዳ። 19አ ጎዳይካ አ፥ ‘ነዉ እቼሹ ካታማቱዋ ቦላን ማታይ እመቴዳ’ ያጌዳ። 20ሀራ ሄዘንያ ቆማይ ሺቂደ፥ ‘ጎዳዉ፥ ጩርቃን ጻጻ ዎዳ ነ ሚሻ ሀዋ በአ። 21አያዉ ጎፐ፥ ኔን ዎቤናሳፐ አክያዋ፤ ዘራቤናዋ ቆይጭያ መቀ ባይና አሳ ግድያ ድራዉ፥ ነዉ ያያድ’ ያጌዳ።

22“ጎዳይካ፥ ‘ሀ ኢታ ቆማይ፤ ኔን ሃሳዮ ቃላን ነ ቦላ ታን ፕርዳና። ዎቤናዋ አክያዋ፥ ዘራቤናዋ ቆይጭያ መቀ ባይና አሳ ግድያዋ ኤሮፐ፥ 23ታን ያደ ታ ሚሻ ዎያና አካና ማላ፥ አያዉ ዎስያዋንቶ እማበይኪ?’ ያጌዳ።

24“ጎዳይካ፥ ሄዋን ኤቆዋንታ፥ ‘ሀ ሚሻ አፐ ዎ አኪደ ታሙ ሚናይ ደእያዎ እምተ’ ያጌዳ። 25ኡንቱንቱካ፥ ‘ጎዳዉ፥ አዉ ታሙ ሚናይ ደኤ’ ያጌድኖ።

26“እካ፥ ‘ታን ህንተንቶ ኦድያዌ፥ ደእያዎ ኡባዉ ጉጀታናዋ፤ ባይናዋፐ ቃይ ሄ ደእያዌካ አከታናዋ።#ማቶሳ 13:12፤ ማር. 4:25፤ ሉቃሳ 8:18 27የዉዋን ቃይ ታን ኡንቱንቱ ቦላን ካዉተናዳን ኮዬዳ ታ ሞርካቱዋ ታኮ አሂደ ታ ስንን ሹክተ’ ጌዳ” ያጌዳ።

የሱስ ዳሮ ቦንቹዋን የሩሳላመ ገሌዳ

(ማቶሳ 21:1-11፤ ማር. 11:1-11፤ ዮሃ. 12:12-15)

28የሱስ ሀዋ ጎዋፐ ካላ ህን የሩሳላመ ከሳናዉ ባረና ካልያዋንቱፐ ስንቲደ ቤዳ። 29ደብረ ዛይተ ጌተትያ ደርያ ማታን ደእያ ህን ቤተፋገን ቢታንያ ጌተትያ ሄራ ካታማቱዋኮ ሺቄዳ ዎደ ባረና ካልያዋንቱፐ ላአቱዋ፥ 30“ህንተንቱፐ ስንን ደእያ ቄር ካታማቱዋ ቢተ፤ ያ ህንተንቱ ገልያ ዎደ፥ ኦንነ ብሮ ኡትቤና ሀረ ማራይ ቃሸት ኡቴዳዋ ደማንታ፤ አ ብሊደ ሃ አክ ዪተ። 31ኦንነ ህንተንታ፥ ‘ሀዋ አያዉ ብሊቴ?’ ጊደ ኦቾፐ፥ ‘እ ባረ ጎዳዉ#19:31 ጎዳዉ፦ ሀዋን ጎዳዉ ጌተቶዌ፥ ሀረ ማራ ጎዳፐሽን፥ ጾሳ ግደና። ኮሽያ ድራሳ’ ያግተ” ያጌዳ።

32ኪተቴዳዋንቱካ ቢደ፥ የሱስ ኡንቱንቶ ኦዶዋዳን ሀንና ደሜድኖ። 33ኡንቱንቱ ሀረ ማራ ብልያ ዎደ በኢደ ሀርያ ጎዳይ፥ “ሀረ ማራ አያዉ ብሊቴ?” ያጌዳ። 34ኡንቱንቱካ፥ “ጎዳዉ ሀዌ ኮሼ” ያጊደ፥ 35ሀረ ማራ የሱሳኮ አሄድኖ፤ ባረንቱ ማዩዋ አ ቦላን ዎደ የሱሳ ሀርያ ቶግሴድኖ። 36አሳይካ የሱስ ብያ ኦግያ ቦላ ባረንቱ ማዩዋ ሂጼድኖ።#19:36 ማዩዋ ሂጼድኖ፦ ሀዋ ጉሳይ፥ አይሁዳ አሳ ዎጋን፥ ኤረቴዳነ ቦንቼትያ አሳዉ ኦሰትያ እማ ሞካ ዎጋ።

37እ ደብረ ዛይተ ጌተትያ ደርያ ዱገ አፍያ ኦግያ ማቴዳ ዎደ፥ ዳሮ ጮራ ግዴዳ አ ካልያዋንቱ በኤዳ ጾሳይ ኦዳ ማላታዉ ኡባዉ ናሸቲደ፥ ባረንቱ ኮሻ ቁ ኦደ፥

38“ጎዳ ሱንን ይያ ካቲ፥

አንጀቴዳዋ፤

ሳሉዋን ሳሮታይ ግዶ።

ቃይ ክል ቃ ሳሉዋን ደእያ፥

ጾሳይ ቦንቼቶ”

ያጌድኖ።#ማዝ. 118:26

39አሳ ጋርሳን ደእያ እት እት ፓርሳዋቱ የሱሳ፥ “ታማርስያዎ፥ ኔና ካልያዋንታ ጮኡ ኦርኪ” ያጌድኖ። 40እካ ዛሪደ፥ “ታን ህንተንቶ ኦዳይ፥ ኡንቱንቱ ጮኡ ጎፐ፥ ሹቻይካ ዋሳናዋ” ያጌዳ። 41የሱስ የሩሳላመ ማቴዳ ዎደ፥ ካታማቶ በኢደ፥ ዬኪደ፥ 42“ነ ሳሮታዉ ግድያዋ ኔን ሀቼ ኤራድንቶ ሎአ፤ ሽን ሀእ ሄዌ ነ አይፍያፐ ጌሜዳ። 43አያዉ ጎፐ፥ ነ ቦላ ያና ዎዲ ደኤ፤ ሄ ዎደ ኔና እጽያዋንቱ ነ ዩሹዋን ድርሳ ድሪደ፥ ያፐነ ሃፐነ ዶዲደ፥ ኔና ኡንኤያ ዎዲ ያናዋ። 44ኔናነ ነ ድርሳ ጋርሳን ደእያ ነ አሳ መንሬና። ጾሳይ ኔና በአናዉ ዬዳ ዎድያ ኔን ኤራቤና ድራዉ፥ ኔና እጽያዋንቱ ሹቻ ኡባ እቱዋ እቱዋ ቦላፐ ደንደ ላላናዋ” ያጌዳ።

የሱስ ጌሻ ጎልያን ዛልእያዋንታ የደርሴዳ

(ማቶሳ 21:12-17፤ ማር. 11:15-19፤ ዮሃ. 2:13-22)

45ሀዋፐ ካላ የሱስ ጌሻ ጎልያ ገሊደ፥ ዛልእያዋንታ ሄዋፐ ከሴዳ። 46የሱስ ዛሪደ፥ “ ‘ታ ጎሊ ጾሳ ዎስያ ጎልያ ግዳናዋ’ ጌተቲደ ጾሳ ቃላን ጻፈቴዳ። ሽን ህንተንቱ አ ፓኑዋ ጎንጎሉዋ ኦድታ” ያጌዳ።#ኢሳ. 56:7፤ ኤር. 7:11 47የሱስ ኡባ ዎደ ጌሻ ጎልያን ታማርስ ደእሽን፥ ቄሳቱዋ ካፓቱ፥ ሙሴ ህግያ ታማርስያዋንቱነ አሳ አይስያዋንቱ አ ዎናዉ ኮዪኖ።#ሉቃሳ 21:37 48ሽን አሳይ ኡባይ አ ሃሳያፐ እቱነ አተናን ስስ ኡቶ ድራዉ፥ አ ዎያ ኦግያ ኡንቱንቱ ዬድኖ።

Currently Selected:

ሉቃሳ ምሽራቹዋ 19: DFBE

Highlight

Copy