ሉቃሳ ምሽራቹዋ 11
11
የሱስ ዎሳባ ታማርሴዳ
(ማቶሳ 6:9-13፤ 7:7-11)
1እት ጋላስ የሱስ እትሳን ዎሳ ዎስ ደኤ። ዎሳ ዉርሶዋፐ ጉየ አ ካልያዋንቱፐ እቱ፥ “ጎዳዉ! ዮሃንስ ባረና ካልያዋንታ ዎሳ ታማርሶዋዳን፥ ኑናካ ኔን ዋግ ዎሳነንቶ ታማርሳ” ያጌዳ።
2እካ ኡንቱንታ፥ “ጾሳ ዎሲደ ያግ ዎስተ:
“ ‘ሳሉዋን ደእያ ኑ አቦ፥
ነ ሱንይ አንጀቶ፤
ነ ካዉተይ ዮ፤
ነ ሸኒ ሳሉዋን ሀኖዋዳን ሳንካ ሀኖ፤
3ጋላሳን ጋላሳን ኮሽያ ቁማ፥
ኑዉ ሀቼ እማ፤
4ኑን ኑና ናቄዳዋንቱዋ፥
ኡባ አቶ ጎዋዳን፥
ኔንካ ኑ ናቁዋ አቶ ያጋ፤
ኑና ኢታፐ ናጋፐ አትን፥
ፓጭያን ገልሶፓ’
ያግተ” ያጌዳ።
5ቃይካ የሱስ ባረና ካልያዋንታ፥ “ህንተንቱፐ እቶ ሲቆ ላጊ ደእንቶ ግዶ ብላህያን አኮ ዪደ፥ ‘ታ ሲቆ ላገዉ፥ ታዉ ሄዙ ሶሉዋ ታልአ፤ 6አያዉ ጎፐ፥ እት ታ ላገይ ዪና አ ምዝያዋ ያድ’ ያግ ዎሴዳ ጎይተ። 7ባረ ጎለን ደእያ አ ሲቆ ላጊ ሶይፐ ሃሳዪደ፥ ‘ታና መቶፓ፤ ፐንጊ ቃሸቴዳ፤ ታናናይካ ታናና ግሴድኖ፤ ሄዋ ድራዉ ታን ደንዳደ ነዉ አይነ እማናዉ ዳንዳይከ’ ጋናዌ? 8ታን ህንተንቶ ኦድያዌ አዬ ጎፐ፥ እ አዉ ሲቆ ላግያ ግዶ ድራዉ፥ እመነንቶኔካ ኡንኤ ድራዉ እ ኮይያዋ ኡባ እሜ። 9ሀዋ ድራዉ፥ ‘ዎስተ፥ ህንተንቶካ እመታናዋ፤ ኮይተ፥ ደማንታ፤ ካርያ ዪደ ጼስተ፥ ህንተንቶ ዶየታናዋ’ ያጋይ። 10ጋሱካ፥ ዎስያ ኡባይ አካናዋ፤ ኮይያ ኡራይካ ደማናዋ፤ ካርያ ዪደ ጼስያ ኡራዉ፥ ፐንጊ ዶየታናዋ።
11“ህንተንቱ ግዶፐ ባረ ናአዉ፥ ሞልያ ዎስና ሾሻ፥ ቁማ እማ ጊና ሹቻ እምያ አዉ ደኢ? 12ዎይ ቁቁልያ ዎስና ሶጉዋ እምዬ? 13ህንተንቱ ኢታ ግድ ደኢደ ህንተንቱ ናናዉ ሎኦባ እምያዋ ኤሮፐ፥ ያትና ሳሉዋን ደእያ ህንተንቱ አዉ ባረና ዎስያዋንቶ አያና ጌሻ ዎት ዳርሲደ እማንዴሻ?” ያጌዳ።
የሱሳነ ብኤል-ዘቡላ
(ማቶሳ 12:22-30፤ ማር. 3:20-27)
14እት ጋላስ የሱስ እት ብታንያፐ ዱድስያ አያና ከሶዋፐ ጉየ ዱደ ብታኒ ሃሳያ ዶምና፥ አሳይ ማላለቴዳ። 15ሽን ኡንቱንቱፐ እቱ እቱ፥ “ጋሌናቱዋ ካፑዋ ብኤል-ዘቡል አዉ ዎልቃ እምና ጋሌናቱዋ ከሴ” ያጌድኖ።#ማቶሳ 9:34፤ 10:25
16እቱ እቱ ቃይ የሱሳ ፓጫናዉ ሳሉዋፐ ማላታ በሳናዳን አፐ ኮዬድኖ።#ማቶሳ 12:38፤ 16:1፤ ማር. 8:11 17ሽን የሱስካ ኡንቱንቱ ቆፋ ኤሪደ ኡንቱንታ ሀዋ ያጌዳ: “ባረ ግዶን ሻከትያ ካዉተይ ኡባይ ያናዋ፤ ሻከትያ ጎሊካ ኩንዴ። 18ያትና ሴጻና ካዉተይ ባረ ግዶን ሻከቶፐ አ ካዉተይ ዎት ኤቃናዌ? ህንተንቱ ታና፥ ‘ጻላህያ ካፑዋ ብኤል-ዘቡል ነዉ ዎልቃ እምና ከሳ’ ያግ ሃሳዪታ። 19ስም ታን ብኤል-ዘቡላ ዎልቃን ጋሌናቱዋ ከስያዋ ግዶፐ ህንተንቱ ናናይ ኦ ዎልቃን ከሳናዋንቴ? ሀዋ ግድያ ድራዉ፥ ኡንቱንቱ ህንተንቱ ቦላን ፕርድያዋንታ ግዳናዋንታ። 20ሽን ታን ጋሌናቱዋ ከስያዌ ጾሳ ዎልቃና ግዶፐ፥ ስም ጾሳ ካዉተይ ህንተንቱኮ ዬዳዋ ኤርተ።
21“ዎልቃማ አሳይ በስያዋዳን ምኒደ ባረ ጎልያ ናጎፐ፥ አ ሻሉ ሎይ ናገታናዋ። 22የዉዋን ቃይ አፐ ምኑዋ ዳርያዌ ዪደ አ ቆሆፐነ ጾኖፐ እ አማነቴዳ ቶራነ ጎንዳልያ አፐ ዎ አኪደ፥ አዉ ደእያ ሚሻ ግሸት አኬ።
23“ታ ባጋ ግደናዌ ታናና ኤቀቴ፤ ታናና ሺሽ ቤናዌካ ላሌ።#ማር. 9:40
ቱና አያናይ ካሰ የግ ቤዳ አሳኮ ስሚደ ይያ ጋሱዋ
(ማቶሳ 12:43-45)
24“ቱና አያናይ አሳፐ ከሴዳ ዎደ፥ ባረዉ ሸምፕያ ሳ ኮዪደ፥ ሃይ ባንታሳና አ ቤ። ሸምፕያ ሳ ደመናን አቶፐ፥ ‘ታን ካሰ የጋ ከሴዳ ታ ጎልያ ስማና’ ያጌ፤ 25ስምያ ዎደካ ጎሊ ፕተቲደ ጊጎዋ ደሜ። 26ሄዋፐ ካላ፥ ቢደ ሀራ አፐ ኢታ ላፑ ቱና አያናቱዋ አክ ያ ገሊደ፥ ሄዋን ደኢኖ፤ ሄ ብታንያ ደኡ ኮይሮዋፐ ካላዌ ኢቶዋ ግዴ” ያጌዳ።
27የሱስ ሀዋ ሃሳይ ደእሽን፥ እት ምሽራታ ጮራ አሳ ግዶፐ ባረ ኮሻ ቁ ኦደ፥ “ኔና የሌዳዉናነ ንዳ ነ ዳያ አንጀቴዳዉኖ” ያጋዱ። 28የሱስ ቃይ፥ “አንጀቴዳዋንቱ ጾሳ ቃላ ስሲደ አዛዘትያዋንታ” ያግ ዛሬዳ።
ጾሳፐ ኦሰቶ ማላታ
(ማቶሳ 12:38-42፤ ማር. 8:12)
29ጮራ አሳይ ሺቆ ዎደ የሱስ፥ “ሀ የለታይ ኢታ፤ ኦራ ማላታ ኮዬ፤ ሽን ናብያ ዮናሳ ማላታፐ ሀራይ እመተና።#ማቶሳ 16:4፤ ማር. 8:12 30ጋሱካ ዮናስ ነነዌ ካታማ አሳዉ ማላታ ግዶዋዳን፥ ታን፥ አሳ ናአይካ፥ ሀ የለታዉ ማላታ ግዳና።#ዮናሳ 3:4 31አዋይ ሞክያሳ ጼልያ ዎደ፥ ኡሸቻ ዱገ ባጋና ደእያ ጋድያ ካታታ ሶሎሞነዉ ደእያ አ ኤራተ ስሳናዉ ቢታ ጋጻፐ ዬዳ ድራዉ፥ ፕርዳ ዎደ ሀ የለታን ደንዳደ ፕርዳናዉኑ፤ በእተ፥ ሶሎሞነፐካ አያዌ ሀዋን ደኤ።#1 ካታ. 10:1-10፤ 2 ኦዱዋ 9:1-12 32ነነዌ አሳይ ፕርዳ ዎደ ህንተንቱ ቦላ ደንዲደ ፕርዳናዋንታ፤ አያዉ ጎፐ፥ ኡንቱንቱ ዮናስ ኦዶዋ ስሲደ ባረንቱ ናጋራ ፓጽ ስሜዳ ድራሳ፤ በእተ፥ ዮናሳፐ አያዌ ሀዋን ደኤ።#ዮናሳ 3:5
ቦላ ፖእስያ ጾምፕያ
(ማቶሳ 5:15፤ 6:22-23)
33“ሶይ ገልያ አሳዉ ፖአናዳን፥ ጾምፕያ ጾምፒደ ቃሳን ዎናፐ አትን፥ ጌማሳን ዎይ ፖኡዋ ካምያ የዉዋፐ ጋርሳና ዎያዌ ኦንነ ባዋ።#ማቶሳ 5:15፤ ማር. 4:21፤ ሉቃሳ 8:16 34ነ አሳተዉ ነ አይፊ ጾምፕያ ማላ፤ ነ አይፊ ፓጻ ግዶፐ ነ ኩመን አሳተይካ ፖኡዋ ደሜ፤ ሽን ነ አይፊ ሀርጎፐ ነ ኩመን አሳተይካ ማ። 35አኬካ፤ ሄዋ ግድያ ድራዉ፥ ነ ጋርሳን ደእያ ፖኡ መናዳን ናገታ። 36ስም ነ አሳተይ ኡባይ ፖኡዋን ኩሜዳዋ ግዶፐነ፥ ሜዳ አሳተይ ኔናን ባይናዋ ግዶፐ፥ ነ አሳተይ ኡባይ፥ ጾምፒ ባረ ፖኡዋ ነ ቦላን ፖእስያዋዳን፥ ነ ቦላን ዋጋጋ ፖኡዋ ግዳናዋ” ያጌዳ።
የሱስ ፓርሳዋቱዋነ ሙሴ ህግያ ታማርስያዋንታ ኩናኔዳ
(ማቶሳ 23:1-36፤ ማር. 12:38-40፤ ሉቃሳ 20:45-47)
37የሱስ ሃሳያ ዉርሶዋፐ ካላ፥ እት ፓርሳዌ ብታኒ ባረ ጎለን ቁማ ማናዳን አታሌዳ፤ የሱስካ እትፐ ገሊደ ጋይታን ኡቴዳ።#11:37ጋይታን ኡቴዳ፦ ቁማ ማናዉ ኡቴዳ ጉሳ። 38ፓርሳዊካ የሱሳ ቁማ ማናፐ ካስያን ኩሽያ ሜጨት ቤናዋ በኢደ ማላለትና፥ 39ጎዳይካ፥ “ህንተንቶ ፓርሳዋቶ፥ ጹኣነ ሻታ ቦላ ባጋ ጌሺታ፤ ሽን ህንተንቱ ጋርሳይ ኡዝያንነ ኢታተን ኩሜዳ። 40ህንተንቶ ኤያቶ! ቦላ ባጋ መዳዌ ጋርሳ መቤኔ? 41ሽን ህንተንቱ ጹኣንነ ሻታ ጋርሳን ደእያዋ ህዬሳቶ እምተ፤ ሄ ዎደ ኡባባይካ ህንተዉ ጌሻ ግዳናዋ።
42“ሽን ህንተንቶ ፓርሳዋቶ፥ ህንተዉ አየ! አያዉ ጎፐ፥ አኑጋፐነ ጻሎትያፐ፥ አጉፕያ ዶኡዋፐ፥ ታሙ ኩሽያፐ እት ኩሽያ ጾሳዉ እሚታ፤ ሽን ቱሙ ፕርዳነ ጾሳ ሲቅያዋ ህንተንቱ አጊታ። የዉዋን ቃይ ሄዋ አገናን ሀዋ ኦናዉ በሴ።#ዎጋ 27:30
43“ህንተንቶ ፓርሳዋቶ፥ ህንተዉ አየ! አያዉ ጎፐ፥ አይሁዳ አሳ ዎሳ ጎለን ቦንቾ ኡቱዋ፥ ገያ ግዶንካ ቦንቾ ሳሮታ ኮዪታ።
44“አሳይ ኤረናን ቦላና ሀመትያ ቤተና ዱፉዋ ማላትያ ድራዉ ህንተዉ አየ!” ያጌዳ።
45ሙሴ ህግያ ታማርስያዋንቱፐ እቱ፥ “ታማርስያዎ፥ ኔን ሀዋ ያጋ ሃሳዮ ድራዉ ኑና ቦራዳ” ያግ ዛሬዳ።
46የሱስ፥ “ህንተኖ ህግያ ኤርያዋንቶ፥ ሄንተዉ አየ! አያዉ ጎፐ፥ አሳይ ቶኪደ ዳንዳየና ዴጾ ቶኩዋ ሀራ ቶሲታ፤ ሽን ህንተንቱ ህንተ ሁጰዉ ብራያንካ ቦችክታ።
47“ህንተንቱ አዎቱ ዎዳ ናባቱዋ ዱፉዋ ሎይያ ድራዉ ህንተዉ አየ! 48ስም ህንተንቱ አዎቱ ናባቱዋ ዎና፥ ህንተንቱ ኡንቱንቱ ዱፉዋ ቦላን ጎልያ ኬጽያ ድራዉ፥ ናባቱዋ ኦሱ ሎአ ያጊደ፥ ኡንቱንቱዋ ማርካቲታ። 49ሀዋ ድራዉ፥ ጾሳ አ ኤራተይ፥ ታን ናባቱዋነ የሱስ ኪቶዋንታ ኡንቱንቱኮ ኪታና፤ ኡንቱንቱካ ሄዋንቱፐ እቱዋ እቱዋ ዎናዋንታ፤ እቱዋ እቱዋ መቶናዋንታ ያጌዳ። 50ሀዋ ግድያ ድራዉ፥ ሀ አላሚ መቶደፐ ዶሚደ ጉኬዳ ናባቱዋ ሱዉ ሀ የለታይ ኦሸቴ። 51አቤላፐ ዶሚደ ያርሹዋሳፐነ ጌሻ ጎልያፐ ግዱዋን ጉኬዳ ዛካራሳ ሱ ጋካናዉ ኮየቴ።#11:51 አይሁዳቱዋ ማጻፋቱዋ ጋርሳን ዶመ ማጻፋይ ኮይሮ ማጻፋ። እካ፥ አቤል አሳ ኡባፐ ኮይሩዋን እሻይ አ ዎዳዋ ኦዴ። አይሁዳቱዋ ጌሻ ማጻፋቱዋን ዉርሰ ማጻፋይ ላኤንያ ኦዱዋ ማጻፋ። ሄ ማጻፋን ዛካራስ ዉርሰን ሀይቄዳዋ ኦድያ ድራሳ ሉቃስ አቤላፐ ዛካራሳ ጋካናዉ ጌዳዌ። ኤ! ታን ጋይ፤ ሀ የለታይ ሀዎ ኦሸትያዋ።
52“ህንተንቶ ሙሴ ህግያ ኤርያዋንቶ፥ ህንተዉ አየ! አያዉ ጎፐ ኤራ ፐንግያ ዶይያ ቁልፕያ አኬድታ። ህንተንቱ ህንተ ሁጰዉካ ገልበይክታ፤ ቃይ ገላናዉ ኮይያዋንታካ ድጌድታ” ያጌዳ።
53የሱስ ሄዋፐ ከሶዋፐ ጉይያን፥ ህግያ ታማርስያዋንቱነ ፓርሳዋቱ አ ኦሻን ኡርጉንሳነ ኤቀቱሳ ዶሜድኖ። 54አ ዶናፐ ሎኤናባይ ከሶፐ ኦይቃናዉ ጌዲኖ፤ ሽን ደምበይክኖ።
Currently Selected:
ሉቃሳ ምሽራቹዋ 11: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
