ዮሃንሳ ምሽራቹዋ 2

የሱስ ቃና ካታማ ቡላቻሳ ቤዳ

1ሄዘን ጋላስ ጋሊላ ጋድያን ቃና ጌተትያ ካታማን ቡላቻይ ቡላቼቴዳ፤ የሱሳ ዳያ ሄ ቡላቻን ደአዉ። 2የሱስካ ባረና ካልያዋንቱና እትፐ ሄ ቡላቻ ጼሰቴዳ። 3ዎይንያ ኡሻይ ዉር ድግና፥ የሱሳ ዳያ አ፥ “ኡንቱንቶ ዎይንያ ኡሻይ ዉር ድጌዳ” ያጋ ኦቻዱ።

4የሱስ ዛሪደ፥ “ታ ዳዬ፥ ሀዌ ታ ኦሱዋ ግድያ ድራዉ፥ ነ ያያና ኮሸና። ታ ዎዲ#2:4 ታ ዎዲ፦ ሀዋ ጉሳይ የሱሳ ቱሙ ቦንቹ በኤታናዉ በሴነ እ ጾሳ ናኣ ግዶዌ ኤረታናዉ በሴ ግያዋ። ብሮ ጋክቤና” ያጌዳ።

5የሱሳ ዳያ ኪተትያዋንቶ፥ “እ ህንተንቶ ኦድያዋ አያ ግዶፐነ ኦተ” ያጋ ኦዳዱ።

6አይሁዳቱ ካሰ ኦያ ዶያዳን፥ ሜቻ ዎጋዉ እቱ እቱ ጼቱ ጻራሙስያ ኦይቂያ ኡሱፑን ሹቻ ባቱ ሄዋን ደኢኖ። 7የሱስ ኪተትያዋንታ፥ “ባቱዋን ሃ ኩንተ” ያጌዳ፤ ጌተቶዋዳንካ ኡንቱንቱ ባቱዋን ዶና ጋካናዉ ሃ ኩንድኖ። 8የሱስ ኡንቱንታ፥ “ሀእ ዱቂደ፥ ቡላቻ ካፖ እምተ” ያጌዳ፤ ኡንቱንቱ አዉ አፊደ እሜድኖ።

9ቡላቻ ካፑ ዎይንያ ኡሻ ግዴዳ ሃ ጋንጽ ጼሊደ፥ ሀቃፐ ዬደንቶ ኤርቤና፤ ሽን ሃ ኩንዳ ኦሳንቻቱ ኤሪኖ። ቡላቻ ካፑ ማቻቶ አክያዋ ጼሲደ፥ 10“ኦንነ አይፈ ግዴዳ ዎይንያ ኡሻ እማ አሳ ካሰቲደ ኡሼ፤ ያቲደ አሳይ ዳርስ ኡሼዳዋፐ ጉይያን፥ ቅራርያ ኡሼ። ሽን ኔን አይፈ ግዴዳ ዎይንያ ኡሻ ሀኖ ጋካናዉ ናጋዳ!” ያጌዳ።

11የሱስ ባረ ኦዳ ዎልቃማ ማላታቱዋፐ ሀዋ ኮይሩዋ ጋሊላ ጋድያን ቃና ጌተትያ ሄራን ኦዳ፤ ሄዋን ባረ ቦንቹዋ እ ቆንጭስና፥ አ ካልያዋንቱ አን አማኔድኖ።

12ሄዋፐ ጉይያን፥ የሱስ ባረ ዳይና፥ ባረ እሻቱዋናነ ባረና ካልያዋንቱና እትፐ ቅፍርናሆማ ጌተትያ ካታማ ቢደ አማሬዳ ጋላሳ ታኬድኖ።

የሱስ ጌሻ ጎልያ ግቢያፐ ዛልእያዋንታ ከሴዳ

(ማቶሳ 21:12-13፤ ማር. 11:15-17፤ ሉቃሳ 19:45-46)

13አይሁዳቱ ቦንችያ ፓስጋ ባላ ጋላሳይ ማታትና፥ የሱስ የሩሳላመ ቤዳ። 14ጌሻ ጎልያ ግቢያን ሚዛ፥ ዶርሳነ ዶጎማቱዋ ዛልእያ አሳ ደሜዳ፤ ቃይ ሀራቱ ባረንቱ ኦይድያን ኡቲደ፥ ሚሻ ላምያዋንታ ደሜዳ። 15እ ጎላ ጅራፍያ ዶቂደ፥ አሳ ኡባ ዶርሳናነ ምያና ጌሻ ጎልያ ግቢያፐ ካረዉ ከሲደ የደርሴዳ። ሚሻ ላምያዋንቱ ኦይድያካ አ የጊደ፥ ኡንቱንቱ ሚሻ ላሌዳ። 16ዶጎሙዋ ዛልእያዋንታ እ፥ “ሀ ዶጎማቱዋ ሀዋፐ ከስተ፤ ታ አቡ ጎልያ ገያ ኦፕተ!” ያጌዳ።

17የሱሳ ካልያዋንቱ ጾሳ ማጻፋን፥ “ታን ነ ጎለዉ ሴለትያ ሴላይ ታና ታማዳን ጉዴ” ጌተቲደ ጻፈቴዳዋ ሀሳዬድኖ።#ማዝ. 69:9

18ሄዋፐ ጉየ፥ አይሁደ አሳ አይስያዋንቱ ዛሪደ፥ “ነዉ ሀዋ ኦናዉ ዳንዳይያ ማታይ ደእያዋ ኑና አያ ማላታ በሳኒ?” ያጌድኖ።

19የሱስ፥ “ሀ ጌሻ ጎልያ ኮልተ፤ ታን ሄዙ ጋላሳን ዛራደ ኬጻና” ያጌዳ።

20ቃይካ አይሁደ አሳ አይስያዋንቱ፥ “ሀ ጌሻ ጎልያ ኬጻናዉ ኦይታማነ ኡሱፑን ላይ አኬዳ፤ ሽን ኔን ሄዙ ጋላሳን ኬጻኒ?” ያጌድኖ።

21ሽን እ ሃሳዬዳ ጌሻ ጎሊ ባረ አሳተባ። 22ሄዋ ድራዉ፥ የሱስ ሀይቁዋፐ ደንዴዳዋፐ ጉይያን፥ የሱሳ ካልያዋንቱ እ ሄዋ ጌዳዋ ሀሳዬድኖ። ቃይ ኡንቱንቱ ጾሳ ማጻፋይ ጌዳዋነ የሱስ ሃሳዬዳዋ አማኔድኖ።

23ፓስጋ ባላ ቦንችያ ዎደ፥ የሱስ የሩሳላመን ደእሽን፥ እ ኦዳ ማላታ በኢደ፥ ጮራ አሳይ አ አማኔድኖ። 24ሽን የሱስ አሳ ኡባ ኤርያ ድራዉ፥ ሄዋንታ አማንቤና። 25አሳባ ኦንነ አዉ ማርካታና ማላ ኮይቤና፤ አያዉ ጎፐ፥ አሳ ዎዛናን አዬ ደእንቶ፥ እ ባረ ሁጰዉ ኤርያ ድራሳ።

Currently Selected:

ዮሃንሳ ምሽራቹዋ 2: DFBE

Highlight

Copy