ዶመ 7
7
1መና ጎዳይ ሄዋፐ ጉየ ኖሀ ሀዋዳን ያጌዳ፤ “ኔን ነ ሶ አሳ ኡባና ማርካብያ ግዶ ገላ፤ አያዉ ጎፐ፥ ታን ሀ ዎድያ የለታ ግዶን ኔን ጽሎ ግዴዳዋ በኣድ። 2-3ኔን ጌሻ ግዴዳ መህያነ ዶኣ ኡባፐ አ ቆሙዋፐ ቆሙዋፐ አቱማዋነ ማጫዋ ላፑኑዋ ላፑኑዋ፥ ጌሻ ግደና መህያነ ዶኣ ኡባፐ አ ቆሙዋፐ ቆሙዋፐ እት አቱማዋነ እት ማጫዋ፥ ቃይ ሳሉዋ ካፉዋፐ አ ቆሙዋፐ ቆሙዋፐ አቱማዋነ ማጫዋ ላፑኑዋ ላፑኑዋ ኦደ፥ ሳኣ ኡባ ቦላን ዱማ ዱማ ዘረይ ሸምፑዋና አታና ማላ ኔናና አካደ ገላ። 4አያዉ ጎፐ፥ ላፑን ጋላሳፐ ጉየ፥ ታን ኦይታሙ ጋላሳነ ኦይታሙ ቃማ ሀ ሳኣ ቦላን እራ ቡክሳና፤ ያታደ ታን መዳ መታ ኡባ ሳኣ ቦላፐ ይሳና” ያጌዳ።
5ኖሄ መና ጎዳይ አ አዛዜዳ ኡባባ ኦዳ።
6ባሻ ሃይ ሀ ሳኣ ቦላ ዬዳ ዎደ፥ ኖሄ ላይይ ኡሱፑን ጼታ። 7ኖሄ፥ አ አቱማ ናናይ፥ አ ማቻታነ አ ናና ማቼቱ ባሻ ሃፐ አታናዉ ማርካብያ ግዶ ገሌድኖ።#ማቶሳ 24:38-39፤ ሉቃሳ 17:27 8ጌሻ መህያፐነ ዶኣፐ፥ ጌሻ ግደና መህያፐነ ዶኣፐ፥ ካፉዋፐነ ቢታና ጎሸትያዋንቱ ኡባፐ 9ጾሳይ ኖሀ አዛዜዳዋዳንካ አቱማዌነ ማጫዌ ላኡዋ ላኡዋ ግድ፥ ኖሄኮ ዪደ ማርካብያ ግዶ ገሌድኖ። 10ላፑን ጋላሳፐ ጉየ፥ ባሻ ሃይ ሀ ሳኣ ቦላን ዬዳ።
11ኖሄ ኡሱፑን ጼቱ ላይ ደእና፥ ላኤን አግናን፥ ታማነ ላፑን ጋላሳን፥ ሄ ጋላሳን ቢታ ግዶን ደእያ ዎልቃማ ጪማ ፑልቱዋ ኡባይ ቂ አጌዳ፤ ሳሉዋን ደእያ ሃ ፐንገቱካ ዶየት ዎድኖ፤#2 ጰጽ. 3:6 12እራይ ሀ ሳኣ ቦላን ኦይታሙ ጋላሳነ ኦይታሙ ቃማ ቡኬዳ። 13ሄ ጋላሳን ኖሄነ አ አቱማ ናናይ፥ ሴመ፥ ካመነ ያፌት፥ ኖሄ ማቻታነ አ ናና ሄዛቱዋ ማቻቱ እትፐ ማርካብያ ግዶ ገሌድኖ። 14ኡንቱንቱነ ዶኣ ኡባፐ ባረ ቆሙዋን ቆሙዋን፥ መህያ ኡባፐ ባረ ቆሙዋን ቆሙዋን፥ ሳኣና ጎሸትያዋንቱ ኡባፐ ባረ ቆሙዋን ቆሙዋን፥ ካፉዋ ኡባፐ ባረ ቆሙዋን ቆሙዋን፥ ኡንቱንቱና እትፐ ገሌድኖ፤ 15ደኡዋ ሸምፑዋና ደእያዋንቱ ኡባይ ላኡዋ ላኡዋ ግድ፥ ኖሄኮ ዪደ ማርካብያን ገሌድኖ፤ 16ጾሳይ ኖሀ አዛዜዳዋዳን፥ መታ ኡባፐ አቱማዋነ ማጫዋ ግዲደ፥ ማርካብያ ግዶ ገል ስሞዋን፥ መና ጎዳይ ማርካብያ ፐንግያ ጎርዴዳ።
17ባሻ ሃይ ኦይታሙ ጋላሳ ሳኣ ቦላን ቡኪደ ጋምኤዳ፤ ሃይ ዳሪደ፥ ማርካብያ ቢታፐ ፑደ ደንዳ። 18ሃይ ቢታ ቦላን ሎይ ዳርና፥ ማርካቢ ሃ ቦላን ቶከቴዳ። 19ሳሉዋፐ ጋርሳና ደእያ ቃ ደረቱ ኡባይ ምተታና ጋካናዉ፥ ሃይ ሀ ሳኣ ቦላን ሎይ ዎልቃፐ ዳሬዳ። 20ሃይ ደረቱዋ ጼራፐ አደ፥ ታማነ እቼሹ ዋ ጋካናዉ ቶኬዳ። 21ያትና ሳኣ ቦላን ሸምፑዋና ቃጽያ መታቱ ኡባይ: ካፉ፥ መሂ፥ ዶአይ፥ ሳኣ ቦላን ሻምእ ግያ መታ ኡባይነ አሳይ ኡባይ ሀይቄዳ። 22ኤ፥ መላ ቢታ ቦላን ደእያ፥ ባረ ሲያን ደኡዋ ሸምፑዋ ሸምፕያ ኡባይካ ሀይቄዳ። 23ሀ ሳኣን ፓጻ ደእያባይ ኡባይ: አሳይ፥ መሂነ ዶአይ፥ ቢታና ጎሸትያ መታቱነ ሳሉዋ ካፎቱ ኡባይካ ሳኣፐ ዬድኖ። ኖሄ ጻላላይነ አናና ማርካብያ ግዶን ደእያዋንቱ አቴድኖ። 24ሄ ሃይ ጼታነ እሻታሙ ጋላሳ ጋካናዉ ሳኣ ቦላን ጋምኤዳ።
Currently Selected:
ዶመ 7: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
