ዶመ 31
31
ያቆብ ላባፐ ባቃቲደ ቤዳ
1ያቆብ ላባና ናናይ ባረና፥ “ያቆብ ኑ አዉዋ ኡባ አክ ድጌዳ፤ ሀ ዱረታ ኡባ ኑ አዉዋፐ ደሜዳ” ግያዋ ስሴዳ። 2ያቆብ ላባና ሶምእ ባረዉ ካሰዋ ማላ ግደናዋ በኤዳ።
3ሄ ዎደ መና ጎዳይ ያቆባ፥ “ኔን ነ አዎቱዋ ጋድያ፥ ነ ዳቦቱዋኮ ጉየ ስማ፤ ታን ኔናና ግዳና” ያጌዳ።
4ያቆብ ራሄሎነ ልዮ ባረ ዉዲ ደእያ ሳኣ ደምባ ያና ማላ ኪቲደ ጼስሴዳ። 5እ ኡንቱንታ፥ “ህንተንቱ አዉዋ ሶምእ ታዉ ካሰዋ ማላ ግደናዋ ታን በአይ፤ ሽን ታ አዉዋ ጾሳይ ታናና ደኤ። 6ታን ታ ዎልቃ ኡባን ህንተንቱ አዉ ኦዳዋ ህንተንቱ ኤሪታ፤ 7ሽን ህንተንቱ አዉ ታና ጭሚደ፥ ታ ድርጉዋ ታሙ ገደ ላሜዳ። ግዶፐነ ጾሳይ ታና እ ቆሄናዳን ድጌዳ። 8እ፥ ‘ፑንጫረቱ ነ ድርጉዋ ግዳና’ ጊና፥ ዉዲ ኡባይ ፑንጫርያ የሌዳ፤ ቃይ እ፥ ‘ሻቻቱ ነ ድርጉዋ ግዳና’ ጊና፥ ዉዲ ኡባይ ሻቻ የሌዳ። 9ጾሳይ ሀዋዳን ህንተንቱ አዉዋ መህያ ዎ አኪደ ታዉ እሜዳ።
10“መሄቱ ካህያ አግናን፥ ታን እት አኩሙዋ አኩመታድ፤ ሄ አኩሙዋን ታን ጼልያ ዎደ፥ ዉድያ ብራስያ ዴሻ ኮለቱ ዳንጫ፥ ፑንጫረነ ጋዛ። 11ጾሳ ኪታንቻይ አኩሙዋን ታና፥ ‘ያቆባ’ ያጌዳ፤ ታን፥ አቤ ያጋደ ኮያድ። 12ታና እ፥ ቁ ጋደ ዉድያ ጻልያ ዴሻ ኮልያ ኡባ ሻቻ፥ ፑንጫርያነ ጋዛ በአ፤ አያዉ ጎፐ፥ ላብ ነ ቦላ ኦያዋ ኡባ ታን በኣድ። 13ኔን ኤሴዳ ሹቻ ኦካደ፥ ታዉ ሺቀቴዳ ቤቴለ ጾሳይ ታና ሀእ ደንዳ፤ ሀ ቢታፐ ከሳ፤ ጉየ ነ የለታ ጋድያ ስማ ያጌዳ” ያጌዳ።#ዶመ 28:18-22
14ሄዋፐ ጉየ፥ ራሄላነ ልያ ሀዋዳን ያጊደ ዛሬድኖ፤ “ኑ አዉዋፐ ኑና ጋካናባይ አዬ? 15እ ኑና አላጋዳን ጼሌ ግደኔ? እ ኑና ዛልእ አኬዳ፤ ዛልኢደ አኬዳዋካ ም ይሴዳ። 16ጾሳይ ኑ አዉዋፐ ዎ አኬዳ ማጹ ኡባይ ቱሙካ ኑዋነ ኑ ናናዋ። ሄዋ ድራዉ ጾሳይ ነዉ ኦዴዳዋ ኡባ ኦ” ያጌድኖ።
17-18ያቆብ ካናነ ጋድያን ደእያ ባረ አዉዋ ይሳቃኮ ባናዉ ደንዴዳ፤ እ ባረ ናናነ ባረ ማቻቱዋ ጋሉዋ ቶግሴዳ፤ ዉድያ ኡባ ባረፐ ስንና ላጊደ፥ ማስጰጾምያን ደኢደ እ ሺሼዳ ማጹዋ ኡባ አኪደ ቤዳ። 19ላብ ባረ ዶርሳቱዋ እስክያ ቃንጻናዉ ብድጌዶሽን፥ ራሄላ ባረ አዉዋ ሶ ምስለቱዋ ዉኣዱ። 20ቃይ ያቆብ ሶርያ ላባናዉ ባረ ባቃትያዋ ኦደናን ጭሜዳ። 21እ ባረዉ ደእያዋ ኡባ አኪደ ባቃቴዳ፤ ኤፍራጺሳ ሻፋ ፕኒደ፥ ጋላኣደ ግያ ገዝያኮ ስሚደ ቤዳ።
ላብ ያቆባ ካሌዳ
22ሄዘን ጋላሳን፥ ላብ ያቆብ ባቃት ብ ክቼዳዋ ስሴዳ። 23ባረ ዳቦቱዋ ባረናና አኪደ፥ ላፑን ጋላሳ ኦግያ ያቆባ ጌዱዋ ካሊደ፥ ጋላኣደ ገዝያን አ ጋኬዳ። 24ሄ ዎደ ጾሳይ ቃማ ሶርያ ላባናኮ አኩሙዋን ዪደ አ፥ “ኔን ያቆባ ቦላ ኢታ ግድና፥ ሎአ ግድና፥ አይነ ሃሳየናዳን ኔና ኤራ!” ያጌዳ። 25ላብ ጋክያ ዎደ፥ ያቆብ ጋላኣደ ገዝያን ዱንካኒደ ኡቴዳ፤ ቃይ ላብነ አ ዳቦቱ ያን ዱንካኔድኖ።
26ሄዋፐ ጉየ ላብ ያቆባ፥ “ኔን ሀዋዳን አያዉ ኦዲ? ኔን ታና ጭማደ፥ ታ ማጫ ናና ኦላን ኦሞደቴዳዋዳን ላጋደ ከሳዳ። 27ኔን አያዉ ቆሱዋን ታፐ ከሳ አካደ፥ ታና ጭማዲ? ታን ኔና ናሸቻንነ የን፥ ካራቡዋንነ ዲን ሞይዛና ማላ ታዉ አያዉ ኦዳበይኪ? 28ኔን ሀራይ አቶ፥ ታ ናና ናናነ ታ ማጫ ናና ታን የራ አከና ማላ ድጋዳ። ኔን ኤያባ ኦዳ። 29ታን ኔና ገናናዉ ታዉ ዎልቃይ ደኤ፤ ሽን ነ አዉዋ ጾሳይ ዝኖ ቃማ ታና፥ ‘ያቆባ ቦላ ኢታ ግድና፥ ሎአ ግድና፥ አይነ ሃሳየናዳን ኔና ኤራ!’ ያጊደ ታዉ ኦዴዳ። 30ሀእ ግዶፐነ፥ ኔን ነ አዉዋ ሶ ባናዉ ሎይ ላሞቴዳ ድራዉ ከሳዳ። ሽን ታ ሶ ምስለቱዋ ኔን አያዉ ዉኣዲ?” ያጌዳ።
31ያቆብ ላባና፥ “ኔን ነ ናና ታፐ ዎልቃን ዎ አካንንቶነ ጋደ ቆፔዳ ድራዉነ ያዬዳ ድራዉ፥ ሀዋዳን ኦድ። 32ሽን ነ ሶ ምስለቱዋ ኦይቄዳ አሳ ኦናነ ኔን ደሞፐ፥ ሄ ኡራይ ሲፈቶ! ነዋ ግዴዳዌ ታ ማታን ቤትንቶ፥ ኑ ዳባቱዋ ስንን ኮያ፤ ነዋ ግዶፐ አካ” ያጌዳ፤ አያዉ ጎፐ፥ ያቆብ ራሄላ ሄ ሶ ምስለቱዋ ዉኤዳዋ ኤርቤና።
33ሄዋ ድራዉ ላብ ያቆባ ዱንካንያ ግዶ፥ ልያ ዱንካንያ ግዶን ላኡ ቆማቱዋ ዱንካንያ ግዶ ገሌዳ፤ ሽን አይነ ደምቤና። ልያ ዱንካንያፐ ከሲደ፥ ራሄል ዱንካንያ ገሌዳ። 34ራሄላ ሶ ምስለቱዋ አካደ፥ ጋሉዋ ኮራ ጋርሳን ቆሳደ፥ አ ቦላ ኡታዱ። ላብ ዱንካንያን ደእያዋ ኡባ ቡሉቂ ኮዬዳ፤ ሽን አይነ ደምቤና። 35ራሄላ ባረ አዉዋ፥ “ታ ጎዳዉ፥ ታና ሀንቀፓ፤ ታን ነዉ ኤቃና ዳንዳይከ፤ ታዉ ፒላይ ይ ኡቴዳ” ያጋዱ። እ ኮዬዳ፤ ሽን ሶ ምስለቱዋ ደምቤና።
36ያቆብ ላባና ሀንቀቲደ ዎቃሴዳ፤ ያቆብ ላባና፥ “ታን አያ ባይዛድታ? ሀዋ ኔን ታና ካላናዉ፥ ታን ኦዳ ናጋራይ አዬ? 37ሀእ ኔን ታ ሚሻ ኡባ ቡሉቃደ ኮያዳ፤ ነ ሶ ሚሻፐ አያ ደማድ? ኡንቱንቱ ኑ ላኡዋ ግዱዋን ፕርዳና ማላ፥ ታ ዳባቱዋ ስንንነ ነ ዳባቱዋ ስንን ሀዋን ዎ።
38“ታን ኔናና ላታሙ ላይ ኩመን ደኣድ፤ ነ ዶርሳይካ ነ ዴሻይካ ቦሸትቤና፤ ዎይ ነ ዉድያፐ ጻቦትያ ማበይከ። 39ዶአይ መንዳዋነ ነዉ አሀበይከ፤ ሽን ሄዋ ታናን ፓይዳድ። ጋላስ ዉኤቴዳዋ ዎይ ቃማ ዉኤቴዳዋ ታና ጭግሳዳ። 40ጋላሳ ሱሉ፥ ቃማ ሜጉ ታና ቆሄዳ፤ ገምእሹ ታፐ ዬዳ። 41ታን ሀዋዳን ነ ሶን ላታሙ ላይ ደኣድ፤ ታማነ ኦይዱ ላይ ነ ላኡ ማጫ ናና ድራዉነ ኡሱፑን ላይ ነ ዉድያ ድራዉ ነዉ ኦደ ደኣድ፤ ሽን ኔን ታ ድርጉዋ ታሙ ገደ ላማዳ። 42ታ አዉዋ ጾሳይ፥ አብራሃመ ጾሳይ፥ ይሳቅ ያዬዳዌ ታናና ግድቤናዋ ግድንቶ፥ ስ ባይናን ኔን ታና መላ ኩሸ ከሳ የዳዳ፤ ሽን ጾሳይ ታ ቱጋነ ታ ኩሽያ ኦሱዋ በኢደ፥ ዝኖ ቃማ ኔና ሴሬዳ” ያጌዳ።
ያቆብነ ላብ ጫቀቴዳ ጫቁዋ
43ላብ ያቆባ፥ “ማቻቱ ታ ማጫ ናና፤ ናናይካ ታ ናና፤ ዉዲካ ታ ዉድያ፤ ኔን በእያ ኡባይ ታዋ። ሀቼ ሀ ማጫ ናና ታዋንቱ ቦላነ ኡንቱንቱ የሌዳ ናና ቦላ አያ ኦናዉ ዳንዳያይታ? 44ሀእ ሃያ፤ ኔንነ ታን ጫቁዋ ጫቀቶይተ፤ ሄዌ ኔፐነ ታፐ ግዱዋን ማርካ ግዶ” ያጌዳ።
45ሄዋ ድራዉ ያቆብ እት ሹቻ አኪደ ቱሳዳን ኤሴዳ። 46እ ባረ ዳቦቱዋ፥ “ሹቻ ሺሽተ” ያጌዳ፤ ኡንቱንቱ ሹቻ ሺሺደ ኬሌድኖ፤ ሄ ኬላ ላንቂያን ሜድኖ። 47ላብ ሄ ኬላ፥ ይጋር-ሳሃዱታ#31:47 ይጋር-ሳሃዱታ፦ ሀ ሱን ብለይ አራማይስጸ ቃላን፥ “ማርካተ ኬላ” ግያዋ። ጊደ ሱንዳ፤ ቃይ ያቆብ አ ጭሜዳ ጊደ ሱንዳ። 48ላብ፥ “ሀ ኬላይ ኔፐነ ታፐ ግዱዋን ሀቼ ማርካ” ያጌዳ። ሄዋ ድራዉ አ ሱንይ ጭሜዳ ጌተቴዳ።
49ቃይ እ ሄ ሹቻ ቱሳ ምጽጳ#31:49 ምጽጳ፦ ሀ ሱን ብለይ እብራዌዋን፥ “ናግያ ሳኣ” ግያዋ። ጊደ ሱንዳ፤ አያዉ ጎፐ፥ ላብ፥ “ኑን እቱ እቱዋፐ ሃኪደ ደእያ ዎደ፥ መና ጎዳይ ነ ግዱዋንነ ታ ግዱዋን ግዲደ ናጎ። 50ኔን ታ ማጫ ናና ናቆፐ፥ ዎይ ኔን ታ ማጫ ናና ቦላ ሀራ ማቻቱዋ አኮፐ፥ ኑናና ሀእ ኦንነ ባይናዋ ግዶፐነ ነ ግዱዋንነ ታ ግዱዋን ጾሳይ ማርካ ግድያዋ ሀሳያ” ያጌዳ።
51ላብ ቃይካ ያቆባ፥ “ኬለቴዳ ሹቻይ ሀዌሽ፤ ቃይ ታን ነ ግዱዋንነ ታ ግዱዋን ኤሴዳ ሹቻ ቱሳይ ሀዌሽ። 52ታን ሀ ኬላፐ ኔና ገናናዉ ኔኮ አናዳን፥ ኔንካ ታና ገናናዉ ሀ ኬላፐነ ሀ ሹቻ ቱሳፐ አናዳን፥ ሀ ኬላይነ ሀ ሹቻ ቱሳይ ማርካ። 53አብራሃመ ጾሳይ፥ ናኮራ ጾሳይ፥ ኡንቱንቱ አዉዋ ጾሳይ፥ ኑ ግዱዋን እ ፕርዶ” ያጌዳ። ያቆብ ባረ አዉ ይሳቅ ያዬዳዋ ሱንን ጫቄዳ። 54ያቆብ ደርያ ቦላን ያርሹዋ ያርሼዳ፤ ባረ ዳቦቱዋካ ቁማ ማናዉ ጼሴዳ። ኡንቱንቱ ሚደ ደርያ ቦላን አቄድኖ።
55ዎንተ ጋላስ ጉራን ላብ ደንዲደ፥ ባረ ናና ናናነ ባረ ማጫ ናና የሬዳ፤ ቃይ ኡንቱንታ አንጄዳ። ባረ ሶ ስሜዳ።
Currently Selected:
ዶመ 31: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
