ዶመ 26
26
ይሳቃነ አብመሌካ
1ሄ ጋድያን ካሰ አብራሃመ ዎድያን ደእያ ኮሻ ቦላ ሀራ ኮሻይ ደንዴዳ፤ ያትና ይሳቅ ፕልስጼማ ካትያ አብመሌከኮ ጋራራ ቤዳ። 2መና ጎዳይ ይሳቃዉ ቆንጪደ ሀዋዳን ያጌዳ፤ “ግብጼ ጋድያ ዱገ ቦፓ፤ ታን ነዉ ኦዴዳ ጋድያን ደአ። 3ሀ ጋድያን አማሬዳዋ ታካሻ፤ ታን ኔናና ግዳና፤ ኔና አንጃና፤ አያዉ ጎፐ፥ ሀ ቢታ ኡባ ታን ነዉነ ነ ዘረዉ እማና፤ ታን ነ አዉዋ አብራሃመዉ ጫቄዳ ጫቁዋ ምንሳና።#ዶመ 22:16-18 4ነ ዘረ ሳሉዋ ጾልንትያዳን ዳርሳና፤ ሀ ቢታ ኡባ ታን ኡንቱንቶ እማና፤ ሳኣ ካዉተ ኡባይ ነ ዘረ ባጋና አንጀታና። 5አያዉ ጎፐ፥ አብራሃመ ታ ቃላ ስሴዳ፤ ታ ፕርዳቱዋነ ታ አዛዙዋ፥ ታ አዋዮቱዋነ ታ ህግያ ናጌዳ” ያጌዳ። 6ሄዋ ድራዉ ይሳቅ ጋራራን ኡቴዳ።
7ሄ ቢታ አሳይ ርብቅባ ደንደ ይሳቃ፥ “ሀና ነዉ አዬ?” ያጊደ ኦቼዳ።
እ፥ “ሀና ታዉ ምቻቶ” ያጌዳ። አያዉ ጎፐ፥ እ ርብቃ ዳሮ ፑላንቻ ግድያ ድራዉ፥ “ታን፥ ‘እዛ ታ ማቻቶ ጎፐ’፥ ሀ ጋደ አሳይ እዝ ጋሱዋን ታና ዎነንቶነ” ያግ ቆፒደ ያዬዳ።#ዶመ 12:13፤ 20:2 8ይሳቅ ሄዋን ዳሮ ዎድያ ደኦዋፐ ጉየ፥ ፕልስጼማ ካቲ አብመሌክ ማስኮትያና ዱገ ጼሊደ፥ ይሳቅ ባረ ማቻት ርብቅና ጋከትሽን በኤዳ። 9ሄዋ ድራዉ አብመሌክ ይሳቃ ጼሲደ፥ “ሄኮ እዛ ቱሙ ነ ማቻቶ! ኔን አያዉ፥ ‘እዛ ታ ምቻቶ’ ጋዲ?” ያጊደ ኦቼዳ።
ይሳቅ፥ “ ‘እዛ ታ ማቻቶ ጎፐ’፥ እዝ ጋሱዋን አሳይ ታና ዎና ጋደ ጋድ” ያጌዳ።
10አብመሌክ፥ “ሀዌ ኔን ኑ ቦላን ኦዳባይ አዬ? ታ አሳፐ እት አሳይ ነ ማቻትና ግስ ድጌዳሽን፤ ኔን ኑ ቦላን ጎምያ አሃዳሽን” ያጌዳ። 11ሄዋ ድራዉ አብመሌክ ባረ አሳ ኡባ፥ “ሀ ብታንያ ዎይ አ ማቻቶ ቦችያ ኦንነ ቱሙ ሀይቃና” ያጊደ አዛዜዳ።
12ይሳቅ ሄ ጋድያን ካ ዘሪደ፥ ሄ ላይን ጼቱ ኩሽያ ጫኬዳ፤ አያዉ ጎፐ፥ መና ጎዳይ አ አንጄዳ። 13እ ዱረቴዳ፤ ዱረታ ቦላ ዱረታይ አዉ ዳር ዳር ቤዳ። 14ይሳቃዉ ዶርሳ ዉዲ፥ ሚዛ ዉዲነ ቆማቱ ሎይ ዳሬዳ ድራዉ፥ ፕልስጼማ አሳቱ አ ቃናቴድኖ። 15ሄዋ ድራዉ፥ አ አዉዋ አብራሃመ ዎድያን፥ አ አዉዋ ቆማቱ ቦኬዳ ሃ ኦላ ኡባ ፕልስጼማ አሳቱዋ ቢታ ዛሪደ ባሬድኖ።
16ሄ ዎደ አብመሌክ ይሳቃ፥ “ኑፐ ሻከታደ ባ፤ ኔን ኑፐ አ ምናዳ” ያጌዳ። 17ይሳቅ ሄዋፐ ደንዲደ፥ ጋራራ ዎምባ ቢደ ያን ኡቴዳ። 18ይሳቅ ባረ አዉዋ አብራሃመ ዎድያን ቦከቴዳ ሃ ኦላቱዋ፥ አብራሃመ ሀይቄዳዋፐ ጉየ፥ ፕልስጼማ አሳቱ ባሬዳዋንታ ዛር ቦክ ከሲደ፥ አ አዉ ሱንዳ ሱንን ኡንቱንታ ጼሴዳ።
19ይሳቃ ቆማቱ ዎምባን ቦኪደ፥ ፑልትያ ሃ ኦላ ያን ደሜድኖ። 20ሽን ጋራራ ሄንንቻቱ ይሳቃ ሄንንቻቱዋና፥ “ሃይ ኑዋ” ያጊደ ዋላቀቴድኖ። ኡንቱንቱ አናና ፓሉመቴዳ ድራዉ፥ ይሳቅ ሄ ሃ ኦላ፥ “ፓሉምያ” ጊደ ሱንዳ።
21ሄዋፐ ጉየ፥ ኡንቱንቱ ሀራ ሃ ኦላካ ቦኬድኖ፤ ሽን ኡንቱንቱ ሄ ሃ ኦላ ጌዱዋን ዋላቀቴድኖ፤ ሄዋ ድራዉ እ ሄ ሃ ኦላ “ሞርከቲታ” ጊደ ሱንዳ። 22ሄዋፐ ጉ ዛርዳኢደ፥ ሀራ ሃ ኦላ ቦክሴዳ፤ አ ጋሱዋን ኦንነ ዋላቀትቤና፤ “ጾሳይ ሀእ ኑዉ አሴዳ፤ ኑን ሀ ጋድያን ጮራና” ጊደ አ፥ “አኮ ሳኣ” ጊደ ሱንዳ።
23ሄዋፐ ደንዲደ፥ ፑደ በርሳበሄ ቤዳ። 24ሄ ቤዳ ጋላስ ቃማ መና ጎዳይ አዉ ቆንጪደ አ፥ “ታን ነ አዉዋ አብራሃመ ጾሳ፤ ታን ኔናና ደእያ ድራዉ፥ ኔን ያዮፓ፤ ታን ኔና አንጃና፤ ታ ቆማ አብራሃመ ድራዉ ነ ዘረ ታን ጮርሳና” ያጌዳ። 25ይሳቅ ሄዋን ያርሽያ ሳኣ ኬጺደ፥ መና ጎዳ ሱን ጼሴዳ። ያን እ ባረ ዱንካንያ ጌዳ፤ ቃይ ያን አ ቆማቱ ሃ ኦላ ቦኬድኖ።
26ሄዋፐ ጉየ፥ አብመሌክ ባረና ዞርያ አሁዛታነ ባረ ዎታዳራቱዋ ካፑዋ ፕኮላ አኪደ፥ ጋራራፐ ይሳቃኮ ዬዳ።#ዶመ 21:22 27ይሳቅ ኡንቱንታ፥ “ህንተንቱ ካሰ ታና እጺደ፥ ህንተንቱ ቢታፐ ከስ የዴድታ፤ ሀእ ቃይ ታኮ አያ አካና የድቴ?” ያጌዳ።
28-29ኡንቱንቱ አ፥ “መና ጎዳይ ኔናና ደእያዋ ኑን ቆንጭያን በኤዶ። ሄዋ ድራዉ ጫቆ ጫቁ ኑ ግዶንነ ነ ግዶን ደአና ኮሼ ያገቶ። ኑን ኔና ቦችበይኮ፤ ሽን ኑን ነዉ ኬካተ ጻላላ ኦደ፥ ኔና ሳሮተን ሞይዝ የዴዶ። ሄዋዳንካ ኔን ኑ ቦላ ኢታባ ኦና ማላ፥ አነ ኔናና ጫቁዋ ጫቀቶይተ። ሀእ ኔን መና ጎዳይ አንጄዳዋ” ያጌድኖ። 30ሄ ዎደ ይሳቅ ኡንቱንቶ ባላ ጊግስና፥ ሜድኖነ ኡሼድኖ። 31ዎንተ ጋላስ ዎንታ ጉራን ደንዲደ፥ ኡንቱንቱ እቱ እቱዋና ጫቀቴድኖ። ይሳቅ ኡንቱንታ ሞይዝና፥ ኡንቱንቱ አፐ ሳሮ ሻከቲደ ቤድኖ።
32ሄ ጋላስ ይሳቃ ቆማቱ ዪደ፥ ባረንቱ ቦኬዳ ሃ ኦላባ አዉ ኦዴድኖ፤ “ኑን ሃ ደሜዶ” ያጌድኖ። 33እ ሄ ሃ ኦላ ሳበህ ጊደ ሱንዳ፤ ሄዋ ድራዉ ሄ ካታማ ሱንይ ሀቼ ጋካናዉ በርሳበህ#26:33 በርሳበሄ፦ ሀ ሱን ብለይ እብራዌዋን፥ “ጫቁዋ ሃ ኦላ” ግያዋ (ጉጃ ጼላ 21:31) ጌተቴ።
ኤሳይ ሂተቱዋ ማቻቱዋ አኬዳ
34ኤሳ ላይይ ኦይታሙዋ ግድያ ዎደ፥ ሂትያ ብኤዶ ናቶ ዮድቶነ ሂትያ ኤሎና ናቶ ባሰማቶ አኬዳ። 35ኡንቱንቱ ይሳቃነ ርብቆ ካዮዪደ ደኤድኖ።
Currently Selected:
ዶመ 26: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
