ኪታ 8

ሳኦል አማንያ አሳ የደርሴዳ

1ሳኦል እስጽፋኖሰ ሀይቁ ሎአ ግ አኬዳ። ሄ ጋላስ የሩሳላመን ደእያ አማንያዋንቱ ቦላ ዎልቃማ የደርሱ ደንዴዳ፤ የሱስ ኪቴዳዋንቱፐ አትን፥ አማንያዋንቱ ኡባቱ ይሁዳ ጋድያንነ ሳማርያ ጋድያን ላለቴድኖ። 2ጾሳ አሳቱ እስጽፋኖሳ ሞጌድኖ፤ ቃይ አዉ ዳሮ ዬኬድኖ። 3ሽን ሳኦል አማንያ አሳ ይሳናዉ ባጸቴ፤ ኡባ ጎልያ ገል ገሊደ፥ አቱማ አሳነ ማጫ አሳ ጎች ጎቺደ፥ ቃሾ ጎለ የዴ።

ዎንጋላ ምሽራቹ ሳማርያን ኦደቴዳ

4ላለቴዳ አማንያዋንቱ ቃላ ኦዲደ፥ ኡባሳ ቤድኖ። 5ፕልጶስ ሳማርያ ካታማ ዎደ፥ ክርስቶሳባ አሳዉ ኦዴዳ። 6ጮራ አሳይ ፕልጶስ ጌዳዋ ዳርስ አኬኪደ ስሴዳ፤ እ ኦያ ማላታካ በኤዳ። 7አያዉ ጎፐ፥ ኢታ አያናቱ ኮሻ ቁ ኦ ሃሳዪደ፥ ጮራ አሳፐ ከሴድኖ፤ ቃይ ጮራ ስሌዳዋንቱነ ዎባቱ ፓጼድኖ። 8ሄ ካታማን አሳይ ዳሮ ናሸቴዳ።

9ሽን ስሞና ጌተትያ እት ብታኒ ካሰ፥ ባረና ዎልቃማ ግ ካዪድ፥ ሳማርያ አሳ፥ “ላ ሀዌ አይበ ኦራቤ” ጊሲደ ሄ ካታማን ደኤዳ። 10ጉተፐ ዶሚደ፥ ዎጋተ ጋካናዉ፥ አሳይ ኡባይ፥ “ጾሳ ዎልቃይ ዳሮ ዎልቃማይ ሀዋ” ጊደ አባ ስሴ። 11ዳሮ ዎድያፐ ዶሚደ፥ ካዩዋን ሳማርያ አሳ “ላ ሀዌ አይባ ኦራቤ” ጊሴዳ ድራዉ፥ አሳይ አባ ስሴ። 12ሽን ፕልጶስ ጾሳ ካዉተባነ የሱስ ክርስቶሳ ሱንባ አቱማዋንቶነ ማጫዋንቶ ምሽራቹዋ ኦዲደ፥ ኡንቱንቱ አባ አማኒደ ጻማቀቴድኖ። 13ቃይ ስሞንካ ባረ ሁጰዉ አማኒደ ጻማቀቴዳዋፐ ጉይያን፥ ፕልጶሳና እትፐ ደኢደ፥ ኦሰትያ ማላታነ ጾሳይ ኦዳ ዎልቃማ ማላታ በኢደ ማላለቴዳ።

14የሱስ ኪቴዳ የሩሳላመን ደእያዋንቱ፥ ሳማርያ አሳይ ጾሳ ቃላ አኬዳዋ ስሴዳ ዎደ፥ ጰጽሮሳነ ዮሃንሳ ኡንቱንቱኮ የዴድኖ። 15ጰጽሮስነ ዮሃንስ ዎደ፥ አማንያዋንቱ ጌሻ አያና አካና ማላ፥ ኡንቱንቶ ጾሳ ዎሴድኖ፤ 16አያዉ ጎፐ፥ ሳማርያ አሳቱ ጎዳ የሱሳ ሱንን ጽንቃታ ጻላላ ጻማቀቴዳዋፐ አትን፥ ኡንቱንቱፐ እቱዋ ቦላንነ ጌሻ አያናይ ዎቤና። 17ሄ ዎደ ጰጽሮስነ ዮሃንስ ባረንቱ ኩሽያ ኡንቱንቱ ቦላ ዎዋፐ ጉይያን ኡንቱንቱ ጌሻ አያና አኬድኖ።

18የሱስ ኪቴዳዋንቱ ባረንቱ ኩሽያ ኡንቱንቱ ቦላ ዎና፥ ኡንቱንቶ ጌሻ አያናይ እመቴዳዋ ስሞን በኤዳ ዎደ፥ ጰጽሮሳስነ ዮሃንሳዉ ሚሻ አሂደ፥ 19“ታንካ ታ ኩሽያ ዎያ ኡባይ ጌሻ አያና አካና ማላ፥ ሀ ማታ ታዉካ እሜርክቴ” ያጌዳ።

20ሽን ጰጽሮስ አዉ ሀዋዳን ያጌዳ፤ “ኔን ጾሳ እሞታ ሚሻን ሻማናዉ ቆፔዳ ድራዉ፥ ነ ሚሻይ ኔናና ጮ ዮ። 21ነ ዎዛናይ ጾሳ ስንን ሱረ ግደና ድራዉ፥ ነዉ ሀዋን ግሹ ባዋ። 22ያቶዋፐ ጉይያን ሀ ነ ዎዛና ኢታ ቆፋ ድራዉ፥ ናጋራፐ ስማ፤ ኦን ኤር ነ ዎዛናን ደእያ ኢታ ቆፋ ጾሳይ አቶ ጋነንቶነ ጾሳ ዎሳ። 23አያዉ ጎፐ፥ ኔን ዳሮ ቃናትያ ኦይቃደ ናጋራ ቃሹዋን ደእያዋ ታን በአይ” ያጌዳ።

24ሄዋፐ ጉየ ስሞን ጰጽሮሳስነ ዮሃንሳዉ ዛሪደ፥ “ህንተንቱ ጌዳዋፐ እትባይነ ታና ጋከና ማላ፥ ህንተ ታዉ ጾሳ ዎስተ” ያጌዳ።

25ጰጽሮስነ ዮሃንስ ማርካቴዳዋፐነ ጎዳ ቃላ ኦዴዳዋፐ ጉይያን፥ ጉየ የሩሳላመ ስሜድኖ፤ ያቲደ ሳማርያን ደእያ ዳሮ ቄር ካታማቱዋን ምሽራቹዋ ቃላ ኦዴድኖ።

ፕልጶስ ቶጵያ አሳ ግዴዳ ሹፋ ጻማቄዳ

26ጎዳ ኪታንቻይ ፕልጶሳ፥ “ደንዳደ የሩሳላመፐ ጋዛ አፍያ አስ ባይና መላ ሳኣ ኦግያኮ ባ፤ ሄ ኦጊ አዋይ ከስያሳ ጼልያ ዎደ ኡሸቻ ዱገሃ ባጋና ደኤ” ያጌዳ። 27ፕልጶስ ደንዲደ ቤዳ። ህንደኮ ጌተትያ ቶጵያ ካታትዉ ቢታ ሞድያ እ ሚሻ ኡባካ ናግያ ቶጵያ አሳ ግዴዳ እት ሹፋይ ደእያዌ ጎይናናዉ የሩሳላመ ቤዳ። 28ፓራይ ጎችያ ጋርያን ኡቲደ፥ የሩሳላመፐ ጉየ ስሚደ፥ ናብያ ኢስያሳ ማጻፋ ናባቤ።

29ጌሻ አያናይ ፕልጶሳ፥ “ሄ ጋርያኮ ሺቃደ እትፐ ግዳ” ያጌዳ።

30ፕልጶስ ዎጽ ዪደ፥ ናብያ ኢስያሳ ማጻፋ ሹፋይ ናባብሽን ስሲደ አ፥ “ኔን ናባብያዋ አኬካይ?” ያጌዳ።

31ሹፋይ፥ “ታዉ ኦዲደ አኬክስያ አሳይ ባይናን ዋኒደ አኬከቲ?” ያጌዳ፤ ቃይ ባረናና ጋርያን ከሲደ ኡታና ማላ፥ ፕልጶሳ ዎሴዳ። 32ሹፋይ ናባብያ ማጻፋይ፥

“ዶርሳዳን እ ሹከታናዉ ላገቴ።

ዶርሳ ማራይ ባረ እስክያ

ቃንጽያዋ ስንን ጮኡ ግያዋዳን፥

እካ ባረ ዶና ፖክቤና።

33እ ካዉሼዳዋዳን አዉ ጽሎ ፕርዳይ ዬዳ።

የሱሳ ደኡ ሀ ሳኣፐ ፑደ አከት ድጌዳ ድራዉ፥

አ ዛርያባ ኦኔ ኦዳናዌ?”

ያጌዳ።#ኢሳ. 53:7-8

34ሹፋይ ዛሪደ ፕልጶሳዉ፥ “ናቢ ሀዋ ኦዋ ኦዲ? ባረባ ኦድዬ ዎይ ሀራ አሳባ ኦዲ? ታዉ ኦዳርኪ” ያጌዳ። 35ፕልጶስ ዛሪደ፥ ጾሳ ማጻፋ እ ናባብያሳፐ ዶሚደ፥ የሱሳባ ምሽራቹዋ ቃላ አዉ ኦዴዳ።

36ኡንቱንቱ ኦግያ ኦይቂ ቢደ፥ ሃይ ደኢያሳ ጋኬድኖ፤ ሹፋይ፥ “ሃ ሀዋ በአ፤ ጻማቀትያዋ ታና ድግያዌ አዬ?” ያጌዳ።

37ፕልጶስ አ፥ “ኔን ነ ኩመን ዎዛናፐ አማኖፐ፥ ዳንዳያ” ያጌዳ።

እ ዛሪደ፥ “የሱስ ክርስቶስ ጾሳ ናኣ ግድያዋ ታን አማናይ” ያጌዳ።

38ጋር ኤቃና ማላ ሹፋይ አዛዝና፥ እነ ፕልጶስ ላአቱ ዱገ ዎደ፥ ሃን ገልና ፕልጶስ አ ጻማቄዳ። 39ኡንቱንቱ ሃፐ ጋጻ ከሴዳ ዎደ፥ ጎዳ አያናይ ፕልጶሳ ልጵ ኦደ፥ አፍ አጌዳ፤ ላኤንዋ ሹፋይ ፕልጶሳ በእቤና፤ ሽን ባረ ኦግያ ናሸቲደ ቤዳ። 40ፕልጶስ ባረ ሁጰዉ አዞጾሳን ደእያዋ ኤሬዳ፤ ቃይ ቂሳርያ ያና ጋካናዉካ፥ ካታማ ኡባን ዩዪደ ምሽራቹዋ ቃላ ኦዴ።

Currently Selected:

ኪታ 8: DFBE

Highlight

Copy