ኪታ 6
6
ዎሳ ጎልያ ማድያ ላፑ አሳቱ ዶረቴድኖ
1ሄ ዎደ፥ ካልያዋንቱ ፓይዱ ዳር ዳር ቢሽን፥ ግሪከ ቃላ ሃሳይያ አይሁዳቱነ ይሁዳን ደእያ አይሁዳቱ ዋላቀቴድኖ፤ አያዉ ጎፐ፥ ግሪከ ቃላ ሃሳይያ አይሁዳቱ፥ “ኡባ ጋላስ ግሸትያ ቁማን ኑ አስናይ ሀይቆ ማጫዋንቱ ናቀቲኖ” ያጌድኖ። 2የሱስ ኪቴዳ ታማነ ላአቱ ዎሳ ጎለ አሳ ኡባ ጼሲደ፥ ሀዋዳን ያጌድኖ፤ “ኑን ጾሳ ቃላ ኦድያዋ አጊደ፥ ቁማ ግሻናዉ ኑዉ በሰና። 3እሻቶ፥ ሎአ ጌተትያዋንታ ጌሻ አያናይነ አ ኤራተይ ኩሜዳ ላፑ አሳቱዋ ህንተ ግዶፐ ዶርተ፤ ኑን ቃይ ኡንቱንታ ሀ ኦሶ ሱንና። 4ሽን ኑን ጾሳ ዎሳንነ ቃላ ኦዱዋን ምናና” ያጌድኖ።
5የሱስ ኪቴዳዋንቱ ሃሳዬዳ ሃሳያይ አሳ ኡባ ናሸቼዳ፤ ሄዋፐ ጉየ፥ አማኑነ ጌሻ አያናይ ኩሜዳ እስጽፋኖሳ፥ ፕልጶሳ፥ ጵሮኮሮሳ፥ ንቃሮና፥ ጽሞና፥ ጳርሜናነ አይሁዳቱዋ አማኑዋን ገሌዳ አንጾክያ ኒቆላዎሳ ዶሬድኖ። 6ያቲደ የሱስ ኪቴዳዋንቱ ስንን ኡንቱንታ ኤስና፥ የሱስ ኪቴዳዋንቱ ጾሳ ዎሴዳዋፐ ጉይያን፥ ባረንቱ ኩሽያ ኡንቱንቱ ቦላ ዎድኖ።
7ጾሳ ቃላይ አክ አክ ቤዳ፤ ካልያዋንቱ ፓይዱዋን የሩሳላመን ዳርስ ዳር ዳር ቤዳ፤ ቃይ ጮራ ቄሳቱካ አማኔድኖ።
ዎሳ ጎልያ ካለያ እስጽፋኖስ ኦይቀቴዳ
8አ ኬካተይነ ዎልቃይ ኩሜዳ እስጽፋኖስ፥ አሳ ግዶን ኦራባነ ዎልቃማ ማላታ ኦ። 9አይለተፐ ከሴዳ አሳ ግያ አይሁዳ አማንያዋንቱፐ፥ ቀሬናፐ፥ እስክንድርያ አሳቱዋፐ፥ ክልቂያፐነ ኢስያፐ ዬዳ እት እት አሳቱ ደንዲደ፥ እስጽፋኖሳና ፓሉመቴድኖ። 10ሽን እስጽፋኖስ አ ኤራተንነ አያናን ሃሳይያዋ ድጋናዉ ዳንዳይበይክኖ።
11ሄ ዎደ ኡንቱንቱ፥ “ሙሴ ቦላነ ጾሳ ቦላ እ ቦርያ ቃላ ሃሳይሽን ስሴዶ” ግያ ዎርዶ አሳቱዋ ሻሜድኖ። 12አሳ ኡባ፥ ጭማቱዋነ ሙሴ ህግያ ታማርስያዋንታ ሀንቀድኖ፤ እስጽፋኖሳኮ ዪደ አ ኦይቂደ፥ ሺቄዳ አሳኮ አህና፥ 13አ ቦላ ጼሴዳ ዎርዶ ማርካቱ፥ “ሀ ብታኒ ሀ ጌሻ ጎልያነ ሙሴ ህግያ ቦርያዋ አዉደነ አገና። 14አያዉ ጎፐ እ፥ ‘ሀዌ ናዝሬትያ የሱስ ሀ ጌሻ ጎልያ ኮላና፤ ሙሴ ኑዉ እሜዳ ህግያካ ላማና’ ያግሽን፥ ኑን ስሴዶ” ያጌድኖ።
15ሺቁዋን ኡቴዳ አሳይ ኡባይ እስጽፋኖሳ አኬኪደ ጼልያ ዎደ፥ አ ሶምእ ኪታንቻ ሶምእያ ማላቴ።
Currently Selected:
ኪታ 6: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
