ኪታ 10

ጰጽሮሳነ ቆርነልዮሳ

1ቂሳርያን “ጻላቱዋ ኦላ አሳቱዋ” ጌተትያ ኦላንቻቶ እት ጼታቱዋ ካፑ ቆርነልዮሳ ግያዌ ደኤ። 2ቆርነልዮስ ጾሳ ሎይደ አማንያ አሳነ፥ ባረ ሶይ አሳ ኡባና እትፐ ጾሳዉ ጎይንያ አሳ፤ አይሁዳ ህዬሳካ እ ዳሮ ማዴ፤ ቃይ ጾሳ ኡባ ዎደ ዎሴ። 3እት ጋላስ ኡዱፑ ሳትያ ሄራን፥ “ቆርነልዮሳ” ጊደ ጼስያ ጾሳ ኪታንቻይ ባረኮ ገልሽን፥ ቆርነልዮስ ሳጻን ጌሺደ በኤዳ።

4ቆርነልዮስ ያዪደ፥ ኪታንቻ ጫድ ጼሊደ፥ “ታ ጎዳዉ፥ እ አዬ?” ያጌዳ።

ኪታንቻይ ዛሪደ፥ ሀዋዳን ያጌዳ፤ “ነ ዎሳይነ ኔን ህዬሳ ማድያዌ ጾሳ ስንን ሀሳየታናዉ ሳሉዋ ቤዳ። 5ሀእ ዮጰ አሳ ኪታደ፥ ጰጽሮሳ ጌተትያ ስሞና አህሳ። 6ጰጽሮስ አባ ዶናን ደእያ ጋልባ ቃጭያ ስሞና ጎለን እማተን ኡቴዳ፤ ኔን ኦናዉ በስያዋ እ ነዉ ኦዳናዋ” ያጌዳ።

7ቆርነልዮስ ባረዉ ኦዴዳ ኪታንቻይ ቢና፥ ባረ ቆማቱዋፐ ላአቱዋነ ጾሳዉ ጎይንያ ባረፐ ሻከተና ዎታዳራቱዋፐ እቱዋ ጼሲደ፥ 8ኡንቱንቶ ኡባባ ኦዲደ፥ ኡንቱንታ ዮጰ ኪቴዳ።

9ዎንተ ጋላስ ኡንቱንቱ ቢደ፥ ዮጰ ካታማኮ ማትሽን፥ ጰጽሮስ ኡሱፑን ሳትያ ሄራን ጎልያ ቦላን ደምባዪደ ኦዳሳ ጾሳ ዎሳናዉ ከሴዳ። 10ቃይ ኮሻቲደ፥ ቁማ ማናዉ ኮዬዳ፤ ሽን ቁማይ ካእሽን፥ ሳፃ በኤዳ። 11ሳሉ ዶየትና፥ ዎልቃማ ማዩዋ ማላትያባይ ኦይዱ ባጋና ኦይቀቲደ፥ ሳኣን ዎሽን፥ ጰጽሮስ በኤዳ። 12ሄዋን ኦይዱ ገድያና ደእያ መሂ፥ ዶአይ፥ ሾሻይ፥ ዛሪነ ካፉ ኡባይ ደኤ። 13“ጰጽሮሳ፥ ደንዳ ኤቃደ ሹካ ማ” ግያ ቃላይ አኮ ዬዳ።

14ሽን ጰጽሮስ፥ “ታ ጎዳዉ፥ ሀነና! ታን ቱናባነ ሸነይያባ ኡባካ ማ ኤርከ” ያጌዳ።

15ቃይ ላኤንዋ፥ “ጾሳይ ጌሼዳዋ ኔን ቱንሶፓ” ግያ ቃላይ አኮ ዬዳ። 16ሄዙ ገደ ሄዋዳን ጌዳ፤ ሄዋፐ ጉይያን፥ ኤለካ ሄ ዎልቃማ ማዩዋ ማላትያዌ ፑደ ሳሉዋ አከት አጌዳ።

17ጰጽሮስ ባረ በኤዳ ሳፃ ብለይ አያ ግዳንዴሻ? ያጊደ፥ ባረ ዎዛና ግዶን፥ “ላ ሀዌ አዬ?” ጊሽን፥ ቆርነልዮስ ኪቴዳ አሳቱ ስሞና ጎሊ ደኢያሳ ኮዪደ፥ አ ፐንግያን ኤቄድኖ። 18ባረንቱ ኮሻ ቁ ኦደ፥ “ጰጽሮሳ ጌተትያ ስሞና ግያ እማይ ሄዋን ደኢ?” ያጊደ ኦቼድኖ።

19ጰጽሮስ ሳጻን በኤዳባ አኬካናዉ ቆፋን ሼክደእሽን፥ ጌሻ አያናይ አ፥ “በአ፥ ሄዙ#10:19 ሄዙ፦ እት እት ማጻፋቱ ጮራ ጊኖ፤ እት ማጻፋይ ላኡ ያጌ። አሳቱ ኔና ኮዪኖ፤ 20ደንዳደ ዎ፤ ታን ኡንቱንታ ኪቴዳ ድራዉ፥ ስናን ኡንቱንቱና ባ” ያጌዳ።

21ጰጽሮስ አሳቱዋኮ ዎደ፥ “ህንተንቱ ኮይያዌ ታና። አያ አካና ዬድቴ?” ያጌዳ።

22ኡንቱንቱ፥ “ጾሳዉ ያይያ ጽሉ አይሁዳ አሳ ኡባን ዳሮ ቦንቼቴዳ ጼታቱዋ ካፑዋ ቆርነልዮስ፥ ኔና ባረ ሶይ አፍሲደ፥ ቃላ ኔፐ ስሳና ማላ፥ ጾሳ ጌሻ ኪታንቻይ አዉ ኦዴዳ” ያጌድኖ። 23ጰጽሮስ አሳቱዋ እማ ኦ ሾባናዉ ሶይ ሞኬዳ።

ዎንተ ጋላስ፥ ደንዲደ ኡንቱንቱና ቤዳ፤ ዮጰ ካታማን ደእያ እሻቱዋፐ እቱ እቱ አናና እትፐ ቤድኖ። 24ዎንተ ጋላስ፥ ቂሳርያ ጋኬድኖ፤ ቆርነልዮስ ባረ ዳባቱዋነ ባረ ላገቱዋ እትፐ ጼስ ሺሺደ፥ ጰጽሮሳ ናጌ። 25ጰጽሮስ ገላና ሀንሽን፥ ቆርነልዮስ አናና ጋከቲደ፥ አ ስንን ኩንዲደ፥ አዉ ጎይኔዳ። 26ሽን ጰጽሮስ፥ “ደንዳ! ታንካ ታ ሁጰዉ አሳ” ያጊደ አ ደንዳ።

27ጰጽሮስ ቆርነልዮሳና ሃሳዪደ፥ ሶይ ገሌዳ፤ እ ገልያ ዎደ ጮራ አሳይ ሺቄዳዋ ደሚደ፥ 28አሳ፥ “አይሁዳ አሳይ ሀራ ዛርያና እትፐተን ደአናዉ፥ ዎይ ጋከታናዉ ዎጋ ግደናዋ ህንተ ሁጰዉ ኤሪታ፤ ሽን ታን ኦናነ ቱና ዎይ ሸነይያባ ጌና ማላ፥ ጾሳይ ታና በሴዳ። 29ሄዋ ድራዉ፥ ህንተ ታዉ ኪትና፥ ፓሉማይ ባይናን ያድ። ሀእ፥ ‘ታና አያዉ አህሴድቴ?’ ያጋደ ህንተንታ ኦቻይ” ያጌዳ።

30ቆርነልዮስ ሀዋዳን ያጌዳ፤ “ታን ሀቼ ኦይዱ ጋላሳፐ ካሰ ሀ ሳትያን ኡዱፑ ሳትያ ዎሳ ታ ሶይን ጾሳ ዎስሽን፥ ጶልቂያ ማዩዋ ማዬዳ አሳይ ታ ስንን ኤቂደ፥ 31ታና፥ ‘ቆርነልዮሳ፥ ጾሳይ ነ ዎሳ ስሴዳ፤ ኔን ህዬሳ ማድያዋካ ሀሳዬዳ። 32ስም አሳ ዮጰ ኪታደ፥ ስሞን ጰጽሮሳ ግያዋ ጼስሳ፤ ስሞን ጰጽሮስ ስሞና ግያ ጋልባ ቃጭያዋ ጎለን አባ ዶናን እማተ ኡቴዳ’ ያጌዳ። 33ሄዋ ድራዉ፥ ታን ኔኮ ኤለካ ኪታድ፤ ኔንነ ያደ ሎይዳ፤ ስም ኔን ኑዉ ኦዳናዉ ጾሳይ ኔና አዛዜዳዋ ኡባ ስሳናዉ ሀእ ኑን ኡባይ ሀዋን ጾሳ ስንን ደኤቶ” ያጌዳ።

ጰጽሮሳ ሃሳያ

34-35ጰጽሮስ ሃሳያ ሀዋዳን ያግ ዶሜዳ፤ “ጾሳይ አሳ ሶምእያ ጼለና፤ ሽን ጋደ ኡባን ባረዉ ያይያዋነ ጽሎ ኦሱዋ ኦያዋ ጋላትያዋ ታን ቱሙ አኬካድ።#ዛረ. 10:17 36ጾሳይ አሳ ኡባ ጎዳ፥ የሱስ ክርስቶሳ ባጋና፥ ሳሮተ ኦዲደ፥ ሀ ዎንጋላ ምሽራቹዋ እስራኤልያ አሳዉ ኪቴዳዋ ህንተንቱ ኤሪታ። 37ዮሃንስ ቃላ ኦዴዳ ጽንቃታፐ ጉይያን፥ ጋሊላፐ ዶሚደ፥ ይሁዳ ጋድያ ኡባን ሀኔዳዋ ህንተ ኤሪታ። 38ጾሳይ ናዝሬትያ የሱሳ ጌሻ አያናንነ ዎልቃን ኩንዳ፤ ጾሳይ አናና ደእያ ድራዉ፥ ሎኦባ እ ኦድነ ጻላህያ ካፖ ሞደቴዳ ኡባ ፓደ ዩዬዳ።

39“አይሁዳ ጋድያንነ የሩሳላመን እ ኦዳ ኡባባዉ ኑን ማርካ። ኡንቱንቱ ማስቃልያ ቦላ ምስማርያን ሽ ካቂደ፥ አ ዎድኖ። 40ሽን ጾሳይ ሄዘንያ ጋላሳን ሀይቁዋፐ አ ደንደ በሴዳ። 41ጾሳይ ኮይሮ ዶሬዳ ማርካቱዋ ኑና፥ አ በሴዳፐ አትን፥ አሳ ኡባ ግደና፤ ሀይቁዋፐ እ ደንዴዳዋፐ ጉይያን፥ ኑን አናና ሜዶነ ኡሼዶ። 42ጾሳይ ዎንጋላ ምሽራቹዋ አሳዉ ኑን ኦዳናዉነ፥ ፓጻ ደእያዋንቱ ቦላንነ ሀይቄዳዋንቱ ቦላን ፕርዳናዉ እ ሱንዳዌ የሱሳ ግዴዳዋ ኑን ማርካታናዉ ኑና አዛዜዳ። 43ጾሳይ አን አማንያ ኡባ ናጋራ አ ሱንን አቶ ጋናዋ ናባቱ ኡባቱ ማርካቲኖ” ያጌዳ።

አይሁዳ ግደና አሳቱ አማኒደ ጌሻ አያና አኬድኖ

44ጰጽሮስ ብሮ ሄ የዉዋ ኦድሽን፥ ቃላ ስስያ ኡባ ቦላ ጌሻ አያናይ ዎ አጌዳ። 45ጰጽሮሳና ዮጰፐ ዬዳ፥ አማንያ ቃጻረቴዳ አይሁዳ ኡባቱ አይሁዳ ግደናዋንቱ ቦላንካ ጌሻ አያና እሞታይ ጉኬዳ ድራዉ ማላለቴድኖ። 46አያዉ ጎፐ፥ ኡንቱንቱ ዱማ ዱማ ቃላን ሃሳይሺንነ ጾሳ ዳሮተ ሳቢሽን ስሴድኖ።

ሄ ዎደ ጰጽሮስ ዛሪደ፥ 47“ሀዋንቱ ቃይ ኑናዳን ጌሻ አያና አኬዳዋንቱ ጻማቀተናዳን፥ ሃ ኡንቱንታ ድጋናዉ ዳንዳይያዌ ኦኔ?” ያጌዳ። 48ኡንቱንቱ የሱስ ክርስቶሳ ሱንን ጻማቀታና ማላ፥ ኡንቱንታ አዛዜዳ፤ ሄዋፐ ጉይያን፥ ኡንቱንቱ ባረንቱና አማሬዳ ጋላሳ ኡታና ማላ፥ አ ዎሴድኖ።

Currently Selected:

ኪታ 10: DFBE

Highlight

Copy