Jean 21

Yèsu a ngudoko ta va a dai a golahi nengaʼa 7

1Te deɓ nengaʼa, Yèsu a nʼngreda ta va na a golahi nengaʼa a ma woyam Tibériade, a nʼngreda ta va na arsa: 2Simon Pierre, a Thomas, man ta baha na tsakalai, a Nathanael, man a shkè te kokwar Cana te Galilée, a wudahi Zébé-dée, a golahi nengaʼa ngiɗè cèw, ta nza a vna. 3A Simon Pierre a ngaɗa ta: I dè pèr klèf di mènè! A ta gaɗa na: Nga ba, nga dè a verzi ngaya. A to do, a to do a wurom. A vaɗ pats nasa ta ngatsa skwa ɓai. 4A prèk te gai, Yèsu nzlatsa a ma woyam. A golahi nengaʼa ta suna, ta gaɗa nengaʼa Yèsu ɓai. 5A Yèsu a ngaɗa ta: Wudahai, kin ngatsa skwa ɓi dè? A ta gaɗa na: Aʼai! 6A nengaʼa a ngaɗa ta: Va-wusheda lata te wurom, a civèɗ ri mandai, a kin ngècèʼa. A ta wusheda lata, a ta slaha ta ngozlkoɗa deɓa ɓai, nʼndha a klèf. 7A gol matsa, man Yèsu a woyaʼa a ndav na, a ngaɗa na Pierre: Nengaʼa Bai! A Simon Pierre, man a ntsenaʼa, nengaʼa Bai, a mfeda maslaka a va, aman nengaʼa adai, a nkalda va na a iyam. 8A golahi ngiɗè ta shkè a wurom (ta dra a ma dzah ka ɓai a tsi ri 200), a ta ngozlkoɗi lata a klèf te pa. 9Aman ta shkè auda a dzah, ta rka ndazli vogwa, a klèf a movar a géɗèʼa. 10A Yèsu a ngaɗa ta: Va-helka te va klèf man kin porkoɗi antanta! 11A Simon Pierre a mdo, a ngozlkoâi lata man nʼndha a klèf mbiaʼa, 153, a herkeda. Ko klèf kumba te pa, lata nkuratsa ɓai. 12A Yèsu a ngaɗa ta: Vo-washkè, va-ndau skwi nʼndai! A golahi ta gu zlau aman ta jhèɗèʼa: Ka wa? Aman ta suna, nengaʼa Bi Yèsu. 13A Yèsu a mshkè, a nco movar, a mva ta. Lèmèlèmè klèf.

14Arsa Yèsu a ngudoko ta va a di a golahi nengaʼa mamakaraʼa, te deɓ man a slambaɗkaɗauda te mʼmetsi ma.

War tambakihi ga!

15Aman ta ndau skwi nʼndi ma, Yèsu a ngaɗa na Simon Pierre: Simon, kra Jonas, ka woy iyè a ndav ngaya, a fena ndohi haha dè? A nengaʼa a ngaɗa na: Halau, Bai, ka suna, i woy ka. 16A Yèsu a ngaɗa na: War wud tambakihi ga! A ngaɗa na macecèwaʼa: Simon, kra Jonas, ka woy iyè a ndav ngaya dè? A nengaʼa a ngaɗa na: Halau, Bai, ka suna, i woy ka. A ngaɗa na: War tambakihi ga! 17A ngaɗa na mamakaraʼa: Simon, kra Jonas, ka woy iyè dè? A Pierre a kuɗi te ndav na, a géɗ man a ndzhoɗo mamakaraʼa: Ka woy iyè dè? A ngaɗa na: Bai, ka sun skwi tèlèba, ka suna, i woy ka. A Yèsu a ngaɗa na: War tambakihi ga! 18A vava, a vava, i gaɗa ka: Te va man ka gola dai, ka mana skwi deɓ ngaya a ri ngaya, a ko do a sam man ndav ngaya a woya a ndè a pa. Aman ka hala ma, ka da Pelaha ri ngaya, a ndo ngiɗè a da mana ka skwi deɓ ngaya, a de ka a sam man ka woya a ka dè a pa ɓai. 19Ma haha a ngaɗa na, aman a ngreda na mʼmetsi na, man a di a slébèrdè Zhiklè a vna. Te deɓ nengaʼa a ngaɗa na: Dzadzarkayè!

Gol Yèsu man Yèsu a woy holholaʼa

20A Pierre a mpu di a deɓa, a nrka gol ngiɗè, man a dzodzora, gol man Yèsu a woya a ndav na, man ta ndi skwi dakwaɗ a ndüngodo va a va Yèsu, man a ngaɗa na: Bai, nda ga ka ri a gèɗ wa? 21Aman Pierre a nrka nengaʼa, a ngaɗa na Yèsu: Bai, aman nengaʼa kè? 22A Yèsu a ngaɗa: Aman i woya a nʼnzai, ha pats man i shkè a deɓa, ma ngaya dè? Sèi ka dzadzarkayè! 23A kramamhi ta zlèzlè-mè ma haha: Gol matsa a da metsi azɓai. Yèsu a ngaɗa na, a da metsi azɓi, ɓai. Aman a ngaɗa: Aman i woya a nʼnzai, ha pats man i shkè a deɓa, ma ngaya ɗè?

24Nengaʼa gol Yèsu, man a ngreda skwi haha tèlèba, nengaʼa man a windo ma haha. A nga suna, malwuɗi nengaʼa nzuraʼa.

25Aman skwi ngiɗè tsaɗ tsaɗ a zhè, man Yèsu a gau. Aman ta woy a ta windè staɗ staɗ tèlèba, i huro, a gi kumba; herkeda sata tèlèba a slra man a ta mpi ɗèlèwèraʼa a pa ɓai.

Currently Selected:

Jean 21: MOF89

Highlight

Copy