Jean 18

Ta gshè Yèsu

(Mt. 26,47-56; Marc 14,43-50; Luc 22,47-53)

1Aman Yèsu a nʼndeva ma haha, to do a golahi nengaʼa a wud woyam Cédron. Gi lak te pa. A to do a pa a golahi nengaʼa. 2Aman Judas ha, man a nga na ri a gèɗ Yèsu, a sun samaʼa, te man pats ngiɗè pats ngiɗè Yèsu a nda golahi nengaʼa ta ɓicada va a pa. 3Aman Judas a mbaha ta golahi bihi ndohi mvi skwi a Zhiklè, a ndohi pharisie, a ta shkè a pa, a pitirla, a skwi ntiv vogwa, a skwi var.

4Yèsu a sun skwi tèlèba, man a da ga na, a nda ta ma, a ngaɗa ta: Kin woy wa? 5A ta gaɗa na: Yèsu, ndo Nazareth. Yèsu a ngaɗa ta: Na iyè! A Judas ba, man a nga na ri a gèɗ, a nzlatsa a sam tengaʼa. 6Aman Yèsu a ngaɗa ta: Na iyè! to do a deɓa a deɓa a ta wush ta hai.

7A Yèsu a ndzhad ta zaʼa: Kin woy wa? A ta gaɗa na: Yèsu, ndo Nazareth. 8A Yèsu a mʼmbeɗa ta a ma: I gaɗa kinè, iyè, i nengaʼa! Aman kin woy iyè, va-jèke ta ndohi haha! 9Aman a gi ara ma nengaʼa man a gaɗa: te va ndohi man ka payè, ko staɗ i zede ɓai.

10Simon Pierre, kafahi gwèsh na a zhè, a mprokoɗauda, a ntsahama na zlembaɗ civèɗ ri mandai a ɓèl bi ndohi mvi skwi a Zhiklè. Nzlembaɗ ɓèl matsa Malchus. 11A Yèsu a ngaɗa na Pierre: Ciɓda kafahi gwèsh a gi na! Kokwi man Bab ga a vayè, a i siaʼa, i siaʼa azɓi ɗè?

Yèsu a sam bi ndohi mvi skwi a Zhiklè

(Mt. 26,57-58; Marc 14,53-54; Luc 22,54)

12Nhèyè ndo a bi sojè a golahi ndohi Juif ta gso Yèsu, a ta dzawaʼa, 13a ta daʼa nshèlèkuraʼa a sam Anne. Caiphe, baki dem na, a vi sa, bi ndohi mvi skwi a Zhiklè. 14Nengaʼa ndo man a ngaɗa ta ndohi Juif: Dara ndo staɗ a metsi na te di man a ndohi tèlèba.

Pierre a cèkèlma a géɗ Yèsu

(Mt. 26,69-70; Marc 14,66-68; Luc 22,55-57)

15A Simon Pierre a ndzodzor Yèsu, ta a gol ngiɗè. A bi ndohi mvi skwi a Zhiklè a sun gol ngiɗè, a nengaʼa a ndo a gala bi ndohi mvi skwi a Zhiklè a nda Yèsu. 16A Pierre a nzlatsa a dalmagai. A gol ngiɗè, man bi ndohi mvi skwi a Zhiklè a suna, a nʼndo auda, a ta goɗa a ngwoz mɓer ntamagai, te deɓaʼa a nʼnda Pierre a gai. 17A ngwoz mɓer ntamagai, a ngaɗa na Pierre: Ka ba ka te va golahi ndo haha ka ɓi ɗè? A Pierre a ngaɗa: I a te va ɓai. 18A sojè a ɓèlèlihi ta vatsa vogwa a vovar, mtasl a gai, a ta dzi vogwa. A Pierre ba nzlatsa a nda tengaʼa, a dzi vogwa.

Bi ndohi mvi skwi a Zhiklè a jhèɗè Yèsu

(Mt. 26,59-66; Marc 14,55-64; Luc 22,66-71)

19A bi ndohi mvi skwi a Zhiklè a ndzhoɗo Yèsu a gèɗ golahi nengaʼa, a gèɗ njè-ma nengaʼa. 20A Yèsu a ngaɗa na: I goɗ maʼa a sam di ndohi tèlèba, pèc pècèk. I senda ta te gi njèngè ma Zhiklè, te gi Zhiklè, a sam man ndohi Juif tèlèba ta ɓica va, i goɗa metsar ka ɓai. Ka dzhadyè èhèmè? 21Dzhaɗ ta, man ta tsena ma man i gaɗa ta. Na haha, tengaʼa ta sun skwi man i njè ta. 22Aman a ngoɗ ma arsa, bigol ngiɗè man nzlatsa a pa, a ntsama na bazlazlam, a ngaɗa na Yèsu: Ta mbeɗa na a ma a bi ndohi mvi skwi a Zhiklè ar haha dè? 23A Yèsu a mʼmbeɗa na a ma: Aman i goɗ ambaɓai, ngreday skwi ambaɓia man i goɗ mènè! Aman i goɗ zuraʼa, ka tsyè èhèmè? 24Anne, nengaʼa man a dzawaʼa, a nzlinda a sam Caiphe, bi ndohi mvi skwi a Zhiklè.

Pierre a cèkèlma a géɗ Yèsu zaʼa

(Mt. 26,71-75; Marc 14,69-72; Luc 22,66-71)

25A Simon Pierre nzlatsa, a dzi vogwa. A ta gaɗa na: Ka ba ka staɗ te va golahi nengaʼa ka ɓi dè? A Pierre a ntsokol ma, a ngaɗa: I ka ɓai. 26Staɗ te va ɓèlèlihi bi ndohi mvi skwi a Zhiklè, gwoli ndo man Pierre a ntsahama na zlembaɗ, a ngaɗa: I rka ka a sam gi lak a tsagi nengaʼa ka ɓi dè? 27A Pierre a ntsokol ma zaʼa. A nasa nasa ngarah a ntsu daʼai.

Yèsu a sam Pilate

(Mt. 27,1-2, 11-14; Marc 15,1-5; Luc 23,1-5)

28A ta da Yèsu te gi Caiphe, a gi ngomna, a sam prèk. To do a gi kita ɓai. Ta woy a ta lizhè ndav ta ɓai, a gèɗ man ta da ndi ngolala Pâque. 29A Pilate a ndo auda a sam ta, a ngaɗa ta: 30Kin pün ndo haha a gèa mè? A ta mbeɗa na a ma: Aman ndo haha ndo ambaɓia ka ɓai, ar nga gskoɗi a kita ɗè? 31A Pilate a ngaɗa ta: Vo-co ar kinè, va-gu kita nengaʼa ara ɗèlèwèr ma kita kinè a ngreda kinè! A ndohi Juif ta gaɗa na: Nga slaha a nga keɗe ndo ɓai. 32A ngu ara ma Yèsu man a gaɗa; a ngreda mʼmetsi nengaʼa man a da metsi a gèɗèʼa.

33A Pilate a mdo a deɓa a gala na, a mbaha na Yèsu, a ngaɗa na: Ka bi ndohi Juif dè? 34A Yèsu a mʼmbeɗa na a ma: Ka goɗ ma haha te gèɗ ngaya dè, dè ndohi ngiɗè a ngaɗa ka a géɗ ga dè? 35A Pilate a ngaɗa na: I ndo Juif dè? Ndohi ngaya a ndohi mvi skwi a Zhiklè mbibihiaʼa ta ncka ka a kita a sam ga. Ka ga mè? 36A Yèsu a ngaɗa na: Kokwar-bi ga az tʼherkeda haha ɓai. Aman agassa kokwar-bi ga tʼherkeda haha, ar golahi ga ta gi var, aman ta viyè a kita ndohi Juif azɓai. Aman antanta kokwar-bi ga az tʼherkeda ɓai.

37A Pilate a ngaɗa na: Kos man ar haha, ka bi dè? A Yèsu a ngaɗa na: Ara ngèɗè ngaya; i bai. I shkè a herkeda, aman i gi a ndo malwuɗi ma nzuraʼa. Ndo staɗ staɗ tèlèba, man ndo nzuraʼa, a tsena daʼai ga. 38A Pilate a ngaɗa na: Ma nzuraʼa, na mè?

Ta ngela na kita mʼmetsai a gèɗ Yèsu

(Mt. 27,15-31; Marc 15,6-20; Luc 23,13-25)

Aman a goɗ ma haha, a ndo auda zaʼa a sam ndohi Juif, a ngaɗa ta: I ngatsa mali mʼmetsi a sam na ɓai. 39Aman ara man kin gia pèc pècèk a sam ngolala Pâque, i pra kinè ndo staɗ. Kin woy a i pra kinè bi Juif dè? 40A ndohi tèlèba ta boho a wuɗai: Nengaʼa ka ɓai, sèi Barabbas! Aman Barabbas ndo nked ndo.

Currently Selected:

Jean 18: MOF89

Highlight

Copy