Jean 11

Mʼmetsi Lazare

1Ndo ngiɗè, nzlembaɗ na Lazare, te kokwar Béthanie, mʼmana tʼhai, mbelakaɓai, a sam Marie a Marthe, demamhi na. 2Marie, nengaʼa man a mfada na mbar a va Bai, a ntokwola na sak a gwots gèɗ na. Lazare, kramam na, mbelakaɓai. 3A ta zlündo ndo a sam Yèsu, a ta gaɗa na: Bai, na haha, ndo man ka woyaʼa, nengaʼa mbelakaɓai. 4Aman Yèsu a ntsenaʼa, a ngaɗa: Matakwan nengaʼa a géɗ a mʼmetsi ka ɓai. A gu aman ta shin nʼnjèl Zhiklè, a ta slébèrdè kra Zhiklè. 5Yèsu a woy Marthe a demam na, a Lazare, a ndav na. 6Aman a ntsenaʼa, Lazare mbelakaɓai, a nʼnza te deɓa mʼmèn cèw. 7Te deɓaʼa a ngaɗa ta golahi nengaʼa: Ngo-dokoya a deɓa a kokwar-bi Judée! 8A golahi nengaʼa ta gaɗa na: Rabbi, adatsuta ndohi Juif ta woy a ta kal ka a kwa, a ka woy a ka minè a deɓa a samaʼa dè? 9A Yèsu a ngaɗa: Te pats staɗ, lʼheure 12 ka ɓi dè? Ndo man a shè-wèlè a pats, kwa a tsama na sak azɓai, te man a rka skwi nhél sam herkeda. 10Ndo man a dè a vaɗ, kwa a tsama na sak, te man skwi nhèl sam az a sam na ɓai. 11A ngaɗa ta ma haha. Te deɓaʼa a ngaɗa ta: Lazare, mandal nga, a nzhuna. Aman i dè a i da piɗèkwuda. 12A golahi nengaʼa ta gaɗa: Bai, aman a nzhuna, daraʼa. 13Aman Yèsu a goɗ a géɗ mʼmetsi nengaʼa. A tengaʼa ta huro, a goɗ a géɗ nzhunè ambalai. 14A Yèsu a ngreda ta tsarayaʼa. Lazare a mʼmets na ma! 15I wuffè a géɗ kinè, te man iyè az a pa ɓai, a i do tsam tsam ɓai, aman kin dè cè a ndav kinè. Aman ngodokoya a sam nengaʼa! 16A Thomas, man ta baha na tsakalai, a ngaɗa ta golahi Yèsu: Ngo-dokoya, a nga da metsi a va nengaʼa!

Yèsu, nslambaɗkaɗauda te mʼmetsai a nshèffè

17A Yèsu a mshkè, a nʼngots Lazare, mʼmèn faɗ te vèvèɗ. 18Kokwar Béthanie ndul ndul a ma kokwar Jérusalem, a gi km 3. 19A ndohi Juif kumba kumba ta shkè a sam Marthe a Marie, aman ta ga ta cèka a géɗ kramam ta.

20Aman Marthe a ntsenaʼa, Yèsu a mshkè, a mdo man ta zli gèɗ a vna. Aman Marie a nʼnza te ngwai. 21Marthe a ngaɗa na Yèsu: Bai, aman a matsa ka zhè, ar kramam ga mʼmetsa ɓai. 22Aman antanta ba i suna, skwi ko mèmè ka jhèɗè te ri Zhiklè, Zhiklè a da va ka.

23Yèsu a ngaɗa na: Kramam ngaya a di a slambaɗkaɗauda. 24A Marthe a ngaɗa na: I suna, a da slambaɗkaɗauda a sam nslambaɗkaɗ ndohi auda te mʼmetsai, a pats nʼndikèma skwai. 25A Yèsu a ngaɗa na: Iye, nslambaɗkaɗ ndo, a nshèffè. Ko wawa man a ciyè a ndav na, a nzi a nshèffè, ko a mʼmets na. 26Ko wawa man a nzi a nshèffè, a ciyè a ndav na, a da metsi azɓai a mèdèp. Ka co a ndav ngaya arsa ɗè? 27A nengaʼa a ngaɗa na: Halau, a Bai, i co a ndav ga, ka Kristi, kra Zhiklè, man a shkè a herkeda.

Yèsu a kuɗai

28Aman a ngoɗ ma haha, a mdo, a mbaha na Marie, demam na, a metsar, a ngaɗa: Ndo njèngè a zhè, a baha ka. 29A nengaʼa man a ntsenaʼa, a nslambaɗa tsam tsam, a ndo a sam na. 30Aman Yèsu a mshkè a kokwar di ɓai, aman a zhè a sam man ta zlü gèɗ a Marthe. 31Ndohi Juif te gi nengaʼa, aman ta shkè a ta ga na cèka, ta rka ara man a slambaɗa tsam tsam, a nʼndo auda, a ta dzodzor te deɓa, a ta gaɗa: Marie a dè a gi dzavai, man a da kuɗi a pa. 32Aman Marie a ndikè a sam Yèsu, a nrkaʼa, a nkalahai a deɓ sak nengaʼa, a ngaɗa na: Bai, aman a matsa ka zhè, ar kramam ga mʼmetsa ɓai. 33A Yèsu, a nrkaʼa ara man a kuâai, a ndohi Juif man ta shkè a verzi nengaʼa ta kuɗai, a kuda a nckoɗai, 34a ngaɗa: Kin rda a ma? A ta gaɗa na: Bai, washkè a ka da rkaʼa. 35A Yèsu a nkuɗau, kuda a dai. 36A ndohi Juif ta gaɗa: Na haha, a woyaʼa kumba! 37Matrhiaʼa te ndev ta, ta gaɗa: Nengaʼa man a va na di a ndo mandazlai, wuɗi na azɓi dè, aman Lazare a mʼmetsi ɓai?

Lazare a nʼngots nshèffè

38A Yèsu a kuɗi te ndav, a shkè a ma gi dzavai a vèvèɗ te za, a ngezlambar mbiaʼa mpizlè te ma gi dzavai. 39A Yèsu a ngaɗa: Va-ca na ngezlambar auda! A Marthe, demam ndo mʼmetsaʼa, a ngaɗa na: Bai, nckondo a zhkè ani ma! Mʼmèn faɗ te pa! 40A Yèsu a ngaɗa na: I gaɗa ka bi dè, aman ka co a ndav, a di ka rka nʼnjèl Zhiklè? 41A ta cama na ngezlambar auda te ma gi dzavai. A Yèsu a mpu di a zhiklè, a ngaɗa: Bab ga, i shida ka gèɗ, aman ka co ma ga. 42Aman i suna, ka cè ma ga pèc pècèk. Aman a gèɗ ndohi man ta zlatsa haha, i gèɗè ma ar haha; aman ta cè a ndav ta, ka, ka nzlindekayè. 43Aman a ngoɗ ma ar haha, a mboho a wuɗai: Lazare, washkè auda! 44A ndo mʼmetsaʼa a mshkè auda, mbè te maslaka ara nckondo, a mberzledai. Yèsu a ngaɗa ta: Va-pra na maslaka auda a va, aman a dè.

Vhè ma a géɗ Yèsu

(Mt. 26,1-5; Marc 14,1-2; Luc 22,1-2)

45Ndohi Juif kumba man to do a sam Marie, ta rka skwi man Yèsu a gau, a ta co a ndav ta. 46Aman matrhiaʼa ngiɗè to do a sam ndohi pharisie, a ta ngreda ta skwi teleba man Yèsu a gau. 47A ndohi mvi skwi a Zhiklè mbibihiaʼa a ndohi pharisie ta ɓica va, a ta cèmma, a ta gaɗa: Nga da gi ma kè? Ndo haha a gi nrkedi kumba. 48Aman nga jèkeda arsa, ndohi tèlèba ta da cè a ndav, a ngomnahi te Rome ta da shkè, a ta duma sam nga nkezlaʼa, a ndohi tèlèba. 49Aman staɗ te va tengaʼa, Caiphe, man a vi sa bi ndohi mvi skwi a Zhiklè, a ngaɗa ta: Kin sun skwa ɓai! 50Dara a sam kinè, aman ndo staɗ a metsi na, te di man a ndohai, dara nengaʼa a gèɗ ndohi tèlèba man ta gédèsh ta. 51Ma haha a goɗ te gèɗ na ka ɓai. Aman a hodko ma haha, te man nengaʼa bi ndohi mvi skwi a Zhiklè a vi sa, ara man Yèsu sèi a metsi ndèzl a gèɗ ndohi Juif, 52a gèɗ ndohi Juif genè ka ɓai; aman a da ɓic ta ndohi Zhiklè tèlèba man ta venda gèɗ ta. 53A ta hüno a pats nasa, a ta woy maya ara man ta kéɗèʼa.

54A Yèsu a shèwèlè ambali a sam di ndohi Juif azɓai. A ndo a ma, a kokwar ngiɗè, a ma hèshèkèɗ, nzlembaɗ na Ephraim, a nʼnza a pa, a nda golahi nengaʼa.

55Ngolala Pâque ndohi Juif ndul ndul, a ndohi kumba a samaʼa ta slambaɗa, a to do Jérusalem, aman ta til ndav ta nga ngolala Pâque. 56Ta zhè, a ta woy Yèsu te pa, a ta goɗ a va ta te gi Zhiklè: Kin hur kè: a da shkè a sam ngolala azɓi dè? 57A ndohi mvi skwi a Zhiklè mbibihiaʼa a ndohi pharisie ta fa ta ma a gèɗ a ndohi kokwar: Aman ndo ngiɗè a sun sam man a nzi a pa, da ngreda, aman nga gshèʼa.

Currently Selected:

Jean 11: MOF89

Highlight

Copy