Genèse 40

Joseph a ngreda nshunè ndohi dangai

1Te deɓaʼa ndo ngsa na zom bai, a ndo nti ɗaf bai te Egypte, ta gu malai a sam bi ta, bi Egypte. 2A Pharaon a ngu ndav a géɗ ndohi mizlinè nengaʼa, a géɗ ndo ngsa na zom nengaʼa mbiaʼa, a ndo nti ɗaf, 3a mpe ta a dangai a ri bi so-jèhai, a dangai man Joseph ba te pa. 4A bi sojèhai a mpe ta a ri a Joseph, aman a ɓer ta. A ta nza a pa kètè. 5A vad ngiɗè, nshunè a nkeɗ ta ndohi ncèw a haha, nshunè a nkeɗe ndo ngsa na zom bai tsaɗ, a nkeɗe ndo nti ɗaf tsaɗ, man ta te gi dangai. 6Aman a prèk Joseph a dè a sam ta, a nrka, ta gshè gèɗ, 7a ndzhaɗ ta ndohi mizlinè Pharaon, man a mɓer ta te dangai bi na: A patsna kin nza a nhér gèɗ èhèmè? 8Ta mbeɗa na a ma: Nshunè a nkeɗ nga, a ndo nʼngra nga verzi nshunaʼa azɓai. A Joseph a ngaɗa ta: Sèi Zhiklè a shin nshunè kinè a haha. Va-ngreday dai! 9A ndo ngsa na zom bai mbiaʼa a ngra na nshunè nengaʼa a Joseph, a ngaɗa na: Nshunè a nkeɗyè, a i rka wof man a yiè, 10wof a dia makar. Aman a tsi ntsatserai, ntsa ma, a wurzhè tsam-tsam langa, a wuda nengaʼa nʼndha ma. 11Iyè a kokwi Pharaon te rai, a i cè nyièʼa, a i ɗatseda a kokwi Pharaon, a i va na kokwi a ri a Pharon. 12Joseph a ngaɗa na: Na haha verzi nshunè ngaya: Ntsatserai makar, mʼmèn makar. 13Njèkè mʼmèn makar, Pharaon a da ce ka auda te dangi zaʼa, a fe ka a mizlinè ngaya zaʼa, a ka va na kokwi a ri a Pharaon ara zlèzlèa zaʼa, te va man ka ndo ngsa na zom. 14Aman ka da nzi amba amba, ka héryè! Aman ka woyè, ka da til ma a géɗ ga a sam Pharaon, a ka takahayè, aman i shkè auda te gi haha. 15Ta cyè a metsar te kokwar Hébreu; a haha ba i ga mali ɓai, man ta vyè a dangai a géɗèʼa.

16Aman ndo nti ɗaf bai mbiaʼa a nrka, Joseph a ngreda skwi man a shkè auda te nshunè, skwi man amba, a ngaɗa na: I ba nshunè a nkeɗyè. I zuɓa gadagar makar a gèɗ, movar nʼndha te pa. 17Te gadagar man a géɗèʼa, skwi nʼndi Pharaon te pa tsaɗ tsaɗ. A ɗiakihai ta ndedama te gadagar man a gèɗ ga. 18A Joseph a mʼmbeɗa na a ma: Na haha verzi nshunè ngaya: gadagar makar, nara mʼmèn makar. 19Te deɓ mʼmèn makar, Pharaon a di a mana teɓa a daʼai ngaya, a ta man ka a wof, a ɗiakihai ta da ndi zluèɗ va ngaya.

20Te mʼmèn mamakaraʼa, a pats nhér nyi Pharaon, Pharaon a ngu skwi nʼndi ngolala a ndohi mizlinè nengaʼa, a nhelka ta ndo ngsa na zom mbiaʼa a ndo nta na ɗaf mbiaʼa auda te dangai. 21Ndo ngsa na zom mbiaʼa, a mfeda a deɓa a sam mizlinè na, aman a va na kokwi a Pharaon zaʼa. 22Aman ndo nti ɗaf mbiaʼa a mʼmanda a wof, ara man Joseph a ngra ta. 23Aman ndo ngsa na zom bi mbiaʼa a nhur Joseph te deɓaʼa asaɓai, mpca na a gèɗ.

Currently Selected:

Genèse 40: MOF89

Highlight

Copy