Genèse 28

Jacob a hi a kokwar Charan

1A Isaac a mbaha na Jacob, a mpshè na ma, a njè na, a ngaɗa na: Ka da co ngwoz te va dalahi Canaan bai! 2Slambaɗa, do a kokwar Paddan-Aram, a gi Béthuel, bab mam ngaya, a ka woy ngwoz te va dalahi Laban, kramam mam ngaya. 3Zhiklè bi wuɗai da pshè ka ma, da gu a ka yi wudahi kumba, da gu a gerzi ngaya a mènè a vata, a ka ndi a ndohi herkeda a vata. 4Da va ka mpshè ma Abraham, a ka a ndohi verzi ngaya, a ka da kwèr herkeda man ka nzi a pa ara mbrok, man Bi Zhiklè a va na Abraham. 5A Isaac a mpra Jacob, a Jacob a mdo a kokwar Paddan-Aram, a sam Laban, kra Béthuel, ndo Aram, kramam Rebecca, mam Jacob a Esau.

6Aman Esau a nrka, Isaac a mpshè na ma a Jacob, a nzlündo a kokwar Paddan-Aram, a ndè cè ngwoz te pa, a mpshè na ma a ngaɗa na: Ka co ngwoz te va dalahi Canaan bai, 7a Jacob a nfu géɗ a ma bab na a mam na, a ndo a kokwar Paddan-Aram, 8Esau a suna, dalahi Canaan ta ambaha Isaac, bab na, bai. 9A Esau a ndo a sam Ismael, a ncka ngwoz a va gwoliaʼa: Mahalath, dem Ismael, kra Abraham, demam Nebajoth.

Nshunè a nkeɗa Jacob te Béthel

10Aman Jacob a njèkeda kokwar Beer-Shéba, a ndo a civèɗ Paddan-Aram. 11A mshkè a sam ngiɗè man a woya a mʼmènè a pa, pats nkala ma. A mco kwa staɗ, a nfu a skwi nfi gèɗ, a mʼmanahi a samaʼa, a nzhun na. 12A nshunè a nkeɗaʼa: A mrka ksal nzlatsa tʼherkeda, gèɗ mɓaraʼa a zhiklè a golahi Zhiklè ta shkèhai, ta tivè a pa. 13Na haha Ndo nzi pèc pècèk a nzlatsa te géɗèʼa, a ngaɗa na: I Ndo nzi pèc pècèk, Zhiklè Abraham, bab ngaya, a Zhiklè Isaac: herkeda man ka mana a pa, i da va ka, a wudahi ngaya. 14Wudahi ngaya ta da gi a vata, ara wyak te woyam. Ka da zlèzlèmè te man a nkèl pats, te man a mvèng pats, te man a tsagi a tsagai, a ndohi herkeda tèlèba ta da ngècè mpshè ma te nzlembaɗ ngaya.

15Anai i zhè a sam ngaya, a i ɓer ka a sam tèlèba man ka dè a pa, a i minde ka a deɓa a kokwar haha. I woy a i jèke ka azɓai, ha a i ga tèlèba man i pasla ka rai. 16Aman Jacob a mpiɗèkwud na, a ngaɗa: A vava Ndo nzi pèc pècèk a zhè a sam haha, a i sun bai. 17A ngu zlau, a ngaɗa: Sam haha a pi zlau a gèɗ a ndo. Na haha gi Zhiklè, ntamagi zhiklè a haha. 18Te mangoslèmaʼa a prèk te gai, Jacob a nco kwa man a nfu a skwi nfi gèɗ na, a nzlatseda, aman a shin samaʼa, a mbada mbar a pa, 19a mbaha na samaʼa: Béthel#Gi Zhiklè.. Halaʼa ta baha na samaʼa Luz. 20A Jacob a ngaɗda ma a hai: Aman Bi Zhiklè a zhè a sam ga, a ɓeryè a civèɗ ga, a vay skwi nʼndai a i ndiaʼa, a maslaka a i vi a va, 21a i shkè a deɓa a gi bab ga a pombai, te deɓaʼa Ndo nzi pèc pècèk, a da gi a Bi Zhiklè ga, 22a kwa haha man i Zlatseda, aman i shin samaʼa, a gi a gi Zhiklè. Te skwi tèlèba man ka vayè, i da va ka skwi staɗ te va kula, zuraʼa.

Currently Selected:

Genèse 28: MOF89

Highlight

Copy