Exode 7

Zhiklè a tsi kokwar Egypte a matakwan 10

1A Ndo nzi pèc pècèk a ngaɗa na Moise: Na haha i ge ka a Zhiklè a sam Pharaon, a Aaron ndo nhadka ma ngaya. 2Ka da gada na Aaron ma tèlèba man i njè ka, a Aaron a da menda na Pharaon, a va ta civèɗ a ndohi Israel a ta jè-keɗa kokwar na. 3Aman i woy a i sassaya ndav Pharaon, a i ngredè skwi nrkedi kumba te kokwar Egypte. 4Pharaon a da cinè ma kinè azɓai. Te deɓaʼa i woy a i tara ta ri a di a ndohi Egypte, a i de ta ndohi Israel mɓicaʼa, ndohi ga, auda te kokwar Egypte, a kita mbiaʼa man i ga ta ndohi Egypte. 5A ndohi Egypte ta da suna, i Ndo nzi pècpèc pècèk, aman i tèr ri a gèɗ kokwar Egypte, a i helka ta ndohi Israel auda te ndev tengaʼa. 6Te deɓaʼa Moise a Aaron ta gu arsa, ta gau ara man Ndo nzi pèc pècèk a gada ta. 7Mvi Moise 80, mvi Aaron 83, aman ta goɗ ngèdè a Pharaon.

Gada a ngwèdè va na a zhüzhok

8Te deɓaʼa Ndo nzi pèc pècèk a ngaɗa ta a nda Moise a Aaron: 9Aman Pharaon a nda gada kinè: Va-ngray skwia dai! Ka da gada na Aaron: Co gada ngaya a ka kalda a sam sak Pharaon; a ndi na zhü-zhok. 10A Moise a Aaron to do a sam Pharaon, a ta gu ara man Ndo nzi pèc pècèk a gada ta: Aaron a nkalda gada a sam sak Pharaon a golahi nengaʼa; a nde na zhüzhok. 11Aman Pharaon a mbaha ta ndohi maya a ndohi mʼmbèh skwi ba; a tengaʼa ba, ndohi mʼmbèh skwi te kokwar Egypte, ta gau lèmèlèmè a maya mbèh skwi tengaʼa. 12Staɗ staɗ a nkalda gada na a hai, a ta ngwoda va ta a zhü-zhokihai. A gada Aaron a nseɗkeda gada tengaʼa a ma. 13Aman Pharaon a nsassaya ndav na, a ntsena ngèdè tengaʼa bai, ara man Ndo nzi pèc pècèk a goɗ a matsa.

Iyam a ngwèdè va na a Pombaz

14A Ndo nzi pèc pècèk a ngaɗa na Moise: Ndav Pharaon nsassaya, a woya a va ta civèɗ a ndohi azbai. 15Angoslèm a prèk te gai, do a sam Pharaon, aman a dè dè a ma woyam. Do a kin da zli gèɗ a vna, a ma woyam Nil, gada man a ndi a zhü-zhok te rai, 16a ka gada na: Ndo nzi pèc pècèk, Zhiklè ndohi Hébreu, a nzlinde-kayè a sam ngaya, a gada ka: Va ta civèɗ a ndohi ga, a ta dè a ta da slébèrdyè tʼhè-shèkèɗ. Ha patsna ka ndè zlembaɗ ngaya. 17A géɗ nengaʼa Ndo nzi pèc pècèk a gada: Ka shinèʼa, i Ndo nzi pèc pècèk, te skwi haha: A gada te ri ga a haha, i tsi iyam te woyam, a ndi na a Pombaz. 18Klèfhi te woyam ta da bèzl ta, iyam a da zhkè dukedukeʼa, a ndohi te kokwar Egypte tèlèba ta slaha ta si iyamaʼa ɓai.

19A Ndo nzi pèc pècèk a ngaɗa na Moise: Gada na Aaron: Co gada, tor ri a géɗ iyam tèlèba te kokwar Egypte, a géɗ woyam, a géɗ wurrihai, drav iyamhai, thalhai, a ndi na a Pombaz tèlèba. Te duzlak a torok Egypte tèlèba, iyam da ngwoda va na a Pombaz te pa. 20A Moise a Aaron ta gu ara man Ndo nzi pèc pècèk a gada ta: Aaron a nzlatseda gada, a ntseda iyam a sam di Pharaon, a golahi nengaʼa, a iyam te woyam Nil, iyam tèlèba, a ngwoda va na a Pombaz. 21Klèfhi te woyam ta bazl ta, iyam te woyam a zhkè dukedukeʼa, a ndohi Egypte ta slaha ta si iyam bai. Pombaz a zhè te kokwar Egypte tèlèba. 22A ndohi mʼmbèh skwai te kokwar Egypte ta gu lèmèlèmè arsa, a maya mbèh skwi tengaʼa, a nsassaya ndav Pharaon genè, a ntsena ma tengaʼa bai, ara man Ndo nzi pèc pècèk a goɗ a matsa. 23A Pharaon a mʼmen na a deɓa a ngwai, nhera skwa ɓai. 24Ndohi Egypte tèlèba ta kèl iyam a zlazlar woyam, aman ta siaʼa; iyam te woyam Nil tèlèba, ta slaha ta sia bai. 25A gu arsa mʼmèn 7, te deb man Ndo nzi pèc pècèk a ntsu woyam Nil.

Kudofihai

26Te deɓaʼa Ndo nzi pèc pècèk a ngaɗa na Moise: Do a sam Pharaon, a ka gada na: Ndo nzi pèc pècèk a goɗkoɗa ar haha: Va ta civèɗ a ndohi ga, a ta da slébèrdyè. 27Aman ka da va ta civèɗ azɓai, na haha i prokodi kudofìhai a kokwar tèlèba. 28Woyam Nil ngerɓetsaʼa a kudofihai. Ta shkè a ta dè a gi ngaya, a gi mʼmènè ngaya, a sam mʼmènè ngaya, a gi golahi ngaya, a rèwèc ngaya, a shiɗèf gufa ngaya. 29A kudofihai ta tivè a va ngaya, a va ndohi ngaya, a va golahi ngaya.

Currently Selected:

Exode 7: MOF89

Highlight

Copy