Exode 21

Ma Zhiklè a géɗ ɓèlè

1Na haha ma nkwèrè man ka da ngreda ta: 2Aman ka da shum ɓèl Hebreu, da gu mizlinè mvi 6, ambalai. Te mvi matsaraɗaʼa, da praʼa ambalai. 3Aman a shkè a géɗ na, da praʼa a géɗ na. Aman a shkè a ngwoz, da pre ta a ngwoz na. 4Aman babgi nengaʼa a mva na ngwoz, a nya na wudahi a dalahai, ngwoz a wudahai, ta a babgi bèlè. A ta pre ɓèlè a géɗ na. 5Aman bèlè a gada: Babgi ga, a ngwoz ga, a wudahi ga, i woya a skwi ga, ka pryè bai, 6babgi nengaʼa da da a sam Zhiklè. Da da a ntamagai, a tsagi ntamagai, a pa babgi nengaʼa da tuma na zlembaɗ a vatak, te deɓaʼa a ndi a ɓèlè a mèdèp.

7Aman ndo ngiɗè a mpreda dem nengaʼa a ma, ta da prè nengaʼa ara ɓèlèlihi ngiɗè ka bai. 8Aman a mʼmana a vna ma, te deɓaʼa ambaha babgi nengaʼa ɓai, sèi a preda ma a sulai. Aman a slaha a mprèʼa a ndohi a dala azbai, te man nzlara ma. 9Aman a da va na kra na, da tsaka na skwi ara dem na. 10Aman a da cè ngwoz a vaʼa, da helama na skwa auda a va bai, da jèka na skwi nʼndai, a maslaka, da mana a vna lèmèlèmè ara mpats giɗè. 11Aman a da gi skwi makar haha azɓai, nengaʼa mpra te ɓèlè ma, ambalai, da pul gèɗ ɓai.

Nkéɗ ndo

12Ndo man a tsi ndo ngiɗè, a ndo a mʼmets na, sèi ta keɗaʼa. 13Aman ndo a ga na a ri ara mazlarai, a gu ara skwi Zhiklè, i da ngra ka sam man a slaha a nhi a pa. 14Ndo man a gi mali a sam nslamagi na, a nkeɗaʼa a metsar, ka ngazla na auda a sam mvi skwi a Zhiklè, aman ta keɗaʼa. 15Ndo man a tsi bab na a mam na, sèi ta keɗaʼa. 16Ndo man a gi metsar ndo, ko a preda ma, ko a feda a tsagi nengaʼa, sèi ta keɗaʼa. 17Ndo man a derde mam na a bab na, sèi ta keɗaʼa.

Mbèzl va

18Aman ndohi cèw ta gi ndzoan, a staɗ a kèl ngiɗè a kwa, a ɗuko a rai, a ndo sa a metsi azɓai, aman a mènèhi a ɗish va, 19ta gada na ndo ntsu bai. Aman ngiɗè a slèmbèɗè zaʼa, a ndukè va a gada, sèi ndo ntsau a pil ndo madzaf, a Suli te di mizlinè man a vak auda te pa. 20Ndo man a tsi ɓèl na, ko nguraʼa ko ngwozaʼa, a gada, a ntsi na a mets na, da ga na kita. 21Aman ta da nzi a nshèffè mʼmèn staɗ, man cèw dai, ta ga na kita azɓai, te man ɓèl na. 22Aman ndohi ta bèzl va, a ta ga na mblè a va ngwoz man kra tʼhwaɗ, a nengaʼa a mʼmèndè kra aussa, aman skwi ngiɗè a nga ná ɓai, sèi ta pilèʼa a sulai. Skwi man baki ngwoz a woya ndohi kita ta jhèdèʼa a sam ndo ntsau, da vau, te di man a mèndè kra a hai. 23Aman skwi ngiɗè a ga na ngwoz a vaʼa, sèi ta pilè te di ndo. 24Ta pil di a dai, zlèʼèn a zlèʼèn, ri a rai, sak a sak. 25Mblè vogwa a mblè vogwa, mblè a mblè, vovi mènèwèɗ a vovi mènèwèɗ. 26Ndo man a tsu ɓèl na a dai, a di a ngedas na, sèi a praʼa a géɗ di na. 27Aman a ncèma na zlèʼèn auda a ɓèl na, sèi ta praʼa a géɗ zlèʼèn na.

28Aman zlè a tsi ndo, man bai ngwoz, a drom, a ndo a mʼmets na, sèi ta keɗa zlè a kwa, ta ndi zluèɗèʼa azɓai. Aman ta ga na kita a bab zlè azɓai. 29Aman zlè a ntsu ndo pèc pècèk, a ta ngra na va a hi a bab zlè, a nengaʼa a mɓür zlè na bai, a zlè a ntsu ndo, man ɓai ngwoz, a ta metsi ta, sèi ta keɗa zlè, a ta keɗa na bab zlè a va. 30Aman ta jhèdè a mpil gèɗ a sulai, da pul gèɗ na a Suli ngama ngama man ta jhèdèʼa. 31Lèmèlèmè aman zlè a ntsu kra nguraʼa a demaʼa. 32Aman zlè a ntsu ɓèlè, ko nguraʼa ko ngwozaʼa, bab zlè da pela na bab ɓèlè a gurso 30. Zlè sèi ta kédèʼa a kwa. 33Ndo man a mpizlè thal ɓai, ndo man a ri thal, a mpizlè maʼa ɓai, a marai, man ɓai kɗèh, a kèlè a pa, 34bab ndo nra thal a pilèʼa. A pil bab zlè a sulai, aman skwi mʼmetsaʼa a nengaʼa. 35Aman zlè ndo staɗ a nkeda zlè ndo ngiɗè, a zlè a mʼmets na, sèi ta preda zlè man a nshèffè dai a ma, a ta kezla suliaʼa. A zlè mʼmetsaʼa ba ta kezlia te va. 36Aman ndo a suna, a ntsu zlè ngiɗè pèc pècèk, a bab zlè a mɓer skwi na ɓai, da va na zlè te di man a nengaʼa man a mʼmets na. Aman zlè mʼmetsaʼa, a nengaʼa.

Currently Selected:

Exode 21: MOF89

Highlight

Copy