Ofarameeraankonገi felo 2

Ayyaana K'ulluukkikokki dagano

1Kap'ent't'ek'ost't'e baala kakkogeyaare goorata, Yesuusakko oɂagaalssatareen dubbana raattoo banɂe tooyi kukkumeen gireen; 2Derɂana taɂatii huffo aanttitti yaaye daruurkko emeettedde kakkogireen min ammagantte. 3Lac'a kaɂeleenee aani kallaaro kalekaleekki errebjjool deen; kalekalee beete mete metee ibaaddo gutii dayidde. 4Dubbana Ayyaana K'ulluukki ammagameen, Ayyaanana goggoɂayeesinawun isoon kasiserokokki jilbbaa takkalee heɂii ayeesano haggaɂabeen.

5Usu goorata alamii kagiro gosa dubbakko kaɂemetere Waa kaɂabssatare Ayihuudi Iyyerusaalemi gire. 6Hitta yaaye kakkomaalaren goorata gosa kamooggan raattoo kukkume; kakukkuɂamera gosana, metemeteeyi kakukkuɂamero gosakotti heɂii iso ayeesaa giraan maalere saade. 7Gosa mamaanna saadaa haa ame, «Hikki kaɂayeesara ibaaddo dubba la kagaliilayolla? 8Hayya no mete metee kakkoɂalannenno ulkotti heɂitaani iso ayeesaa giraan kamaalanna hikki misiiya? 9Noo ul kap'arttenayi, ul kameedi, ul kaɂilamiyayi, ul kamesip'et'oomiyayi, ul kayihudaayi, ul kak'ep'edok'iyayi, ul kap'ant't'oosi, ul kaɂisiyaayi, 10ul Firggiyayi, ul kap'inifiliyayi, ul kagibis's'i, ul kak'ereenayi dollee kagiro taliibiya awuraajjaayi oginnonna; Roomikko oɂemennenno; 11Ayihuudina kaɂayihuudi ammano tos otabnnena noo, kak'ert't'esina kaɂarebi ibaaddo gollenno, ibaaddona oɂatii felo owaa heɂitttaani goɂayeesiro maalanna.» 12Haanssun dubba mamaanna girddiɂamenen, «Hikki ayees misi linnara!» ameen.

13Kookkoo ibaaddo ade, «Habeenoni kagiro t'amo kawoyinii t'amereen seteeraan» amaa k'ac'c'ifate.

P'et'iroosa gosaan ayeese

14Hassu goorata P'et'iroosana tomonkko koonne wota kee aalleere, yaayee t'ok'k'ise haa ame gosaan ayeese, «Isin ibaaddo kayihuuda Iyyerusaalemii ogittan dubba hikka ayees koo addeesa, madaara c'ak'asa. 15Goorata ganaa barikko saatii seed mankkollee maraan isin goggohedattan malee hikki ibaaddo lakkoseteero. 16Ayesuun goɂameen hikki kahegeroo Iyyuɂeelii haa amame goggoɂayeesameroya;

17« ‹Waa haa amara, kagachchoo arrijjoolii haa linnara,

Ayyaanakkee soo kasarsatero ibaaddo dubbaa gutii dagisinara,

Babbaar yiiskkisinna deeleel yiiskkisin hegero ayeesnaran;

Wadallakkisinna raaga dinnara,

Jaarsoleettisinna hisilloyinatta.

18Usu goorata

Iin ohanadaaraan babbaarnna heleelnna gutii

Ayyaanakkee dagisinara,

Isona hegero ayeesinaran.

19Elenne daruurii kasaadisiro kooko tusinara,

Hegelle ulnna baasana malaataal tusinara,

Iigi, eleenna, iyyoottena linnara.

20Tanjiinttina takabajaantte tagootta arri emeetokko horene,

Arriti mugud tos

Diginninna iigi tos iggilissaminaran.

21Kagoottaa mege kaɂuumatara dubba fayyinara.›

22«Isin kaɂisiraɂeel ibaaddo! Hikka haafura maala; isin metekkisinuun goggokassaanii, Goottaa isin orroo baasana kasaadisiro kookona malaataal felanooyi gara kanaazireti Yesuusakokki ayyonnati addeesisera. 23Usu metekkeessawun Waa t'aye ohederona omalabero felokokki malee isinuun roore sisame; isinna, ibaaddo kameellankotti genee goggosuwaamironna goggogooro yeltteen. 24Waa ade goyikokki abboosa tiregure usu keese, aalanttina goyiinna usu abi haasin lakkodaanddee. 25Daawutena garakkeessa haa amera,

« ‹Gootta arggetto horetteeyi ani diyaara;

Usuna merggetteeyi gira; duuddo ani lakkoshalagaminaro.

26Haanssun wodanatti geggelaatte,

Hiɂittina geggelaanjjee ammagantte

Sooɂoottina abddii girnnaraan.

27Neefotteenna kagoye ibaaddo takkogiro banɂee (Bowwaa) lakkoɂiisinatto,

k'ulluukkikkaanna shami goggohesiroon lakkoyelatto.

28Raa kaneefoo ani goggoɂaddeesiroon yelttetta;

In ku hore geggelooyi ammaginatta.›

29«Abbilaalttee! Odolaal kat'awookko Daawute goye goggok'amalameroo, k'amalkkeessana hittaari taageeroon no orroo giranokokki jabuuyi ani ayeesin daanddaara. 30Daawute hikka kakkoonɂayyeesera kahegeroo laanona Waa sanniitteessakko kaalaal korffinjjekkeessaa gutii goggohamas'iroon kaɂammatokokki haafura usuun katabero laano malabe. 31Hitta aalanttii Kiristoosa goyigure kagoye ibaaddo takkogiro banɂee kahesoon laanona sooɂoottessana gumbbi orroo shami ohesoon laano Daawute t'aye deegure goyikko keyaanokkessakokki gara ayeese. 32Hikka Yesuusa Waa goyikko keese, no dubbana hikka ayesuun atojjoolnna. 33Haanssun usu mergge tawaayi hamas's'iin t'ok'k'i kakkoɂamare gooratana, Ayyaana K'ulluukkikotti abddi odokko atatere gidda kadeyaattaanna kamaalattan dagise. 34-35Daawute daruur lakkobeero usuna metekkeesswun ade haa amera,

«Gootta, Goottakkeewun

«Ani diinakkaa lukittaayi taadaddarisiroo

Merggetteeyi hamas's'ii» ame.

36«Goortta, Waa hikka isin kasuyitettan Yesuusa Goottanna Kiristoosa yelano Isiraɂeelkokki gosa dubba haɂaddeeso!»

37Gosana hikka kakkomaalare goorata wodanattiso aaloo dinanttedde, P'et'iroosana okkalee ofarameeraawun, «Abbilaalttee, hayya me yelnna?» ame. 38P'et'iroosana isone, «C'ubbokko gula gala, c'ubbokkisinna haheso goggoɂamamiroon, mete metekkisinuun Yesuusa Kiristoosakokki megee t'ammak'ama; ilabo kawaa kalleero Ayyaana K'ulluukki atayinattaan. 39Kaɂabddii haafura isinuunna yiiskisinuun usumaleenna Goottaa Hedokkaani isiɂootteessa tos oɂuumaro, ebbaa ogiraan dubbaawunya» ame.

40Kakkalee kamooggan haafura isoon atotaa, «Hitta tawoc'ac'c'antte alattaan gutii kaɂemeetaro bayikko isiɂoottisin haasayeen!» amaa gorssee. 41Haafura oɂatateeraanna t'ammak'ameen; eserri kuma seed kalleera ibaaddo tootoɂoottiso gutii adame.

Waa oɂammanaraankokki raattokki giri

42Isona ofarameeraankokki agaalssisii isiɂaata, raattoo babo aamaanna ebii ataataa gireen. 43Ofarameeraankotti genee omooggan osaadamiraanna baasanɂi feloo felamaa mankkogireen maraan ibaaddo dubbaan abissi bariite. 44Amaniil dubba raattoo koollee gire, kaɂabanaayen dubba rattookki yelateen. 45Durummattisona urrawoɂoottiso daddalateen ibaaddon mete metee kadootisaro gitakki sisaa gireen. 46Arggetto k'ulluukki min kawaayi raattoo eselaa, minjjolkkisooyinna babo aamaa geggelooyinna taɂidantti wodanaayi aamaa gireen, 47Waa galataanna gosa dubbaayi horee gaashana abanaayen; Goottanna ofayyaraan arri arrii tootoɂoottisoo gutii adaa gire.

Currently Selected:

Ofarameeraankonገi felo 2: BayNT

Highlight

Copy