मत्ती 9
9
फालस बारे आदमी कै ठीक कन्नो
(मरकुस 2:1–12; लूका 5:17–26)
1फिर ईसु एक किसती मै जा चढ़ो और झील के पार अपने सैहर मै आ गओ। 2और देखौ, कई आदमी एक फालस के मारे भए कै खटिया मै रक्कै बाके धौंरे लाए, ईसु नै उनको बिसवास देखकै, उस फालस बारे आदमी सै कैई, “बेटा हिम्मत रख, तेरे पाप माफ हो गए हैं।” 3और देखौ, कुछ यहूदी सास्तरिऔं नै सोचो कै, “जौ तौ परमेसर की बुराई कर रओ है।” 4ईसु नै उनके मन की बात जानकै उनसै कैई कै, “तुम लोग अपने अपने मन मै बुरो बिचार काए कर रए हौ? 5जादा आसान का है? जौ कैनो कै ‘तेरे पाप माफ भए’ या जौ कैनो कै ‘उठ और चल फिर’? 6पर इसताँई कै तुम लोग जानलो कै आदमी के लौंड़ा कै इस धरती मै पाप माफ कन्नै को हक है।” तब ईसु नै फालस के मारे भए सै कैई, “उठ अपनी खटिया उठा और अपने घर चलो जा।” 7बौ उठकै अपने घर चलो गओ। 8जब भीड़ मै लोगौ नै जौ देखो तौ बे डर गए और परमेसर की महिमा करल लगे जिसनै आदमिऔ कै ऐंसो हक दओ है।
मत्ती को बुलाओ जानो
(मरकुस 2:13–17; लूका 5:27–32)
9ईसु बहाँ सै अग्गे बढ़ो, उसनै मत्ती नाम को आदमी चुंगी की चौकी मै बैठो भओ देखो, और उस्सै कैई, “मेरे पीछे चलो आ।” बौ उठकै उसके पीछे हो लओ।
10 #
लूका 15:1,2 एक दिन ईसु अपने चेलौ के संग मत्ती के घर रोटी खानै बैठो, तौ भौस्से चुंगी लैनै बारे और पापी आकै उसके संग रोटी खानै बैठे। 11जौ देखकै फरीसिऔं नै उसके चेलौ सै कैई, “तुमरो गुरू चुंगी लैनै बारौं और पापिऔं के संग काए खावै है?” 12ईसु नै जौ सुनकै उनसै कैई, “भले चंगौ कै बैद की जरूरत ना, पर बेमारौं कै है। 13#मत्ती 12:7तुम जाऔ और सीक लो कै इसको अरथ का है कै, ‘मैं बलि ना पर दया चाँहौ हौं।’ कैसेकै मैं धरमिऔं कै ना पर पापिऔं कै बुलानै आओ हौं।”
बरत को सबाल
(मरकुस 2:18–22; लूका 5:33–39)
14तब जल संस्कार दैनै बारे यहून्ना के चेलौ नै ईसु के धौंरे आकै कैई, का कारन है कै, “हम और फरीसी इतने बरत रक्खैं हैं, पर तेरे चेला बरत ना रक्खैं हैं?” 15ईसु नै उनसै कैई, “जब तक दूलाह बरातियौ के संग है, का बे दुखी हो सकैं हैं? पर बे दिन आंगे, जब दूलाह उनसै बिछड़ जागो, और तब उन दिनौ बे बरत रखंगे।
16 “कोई पुराने लत्ता मै कोरे लत्ता को थिकरा ना लगाबैं हैं। ना तौ नओ थिकरा पुराने लत्ता कै सकोड़ लेगो और पुरानो लत्ता पैले सै जादा फट जागो। 17नए अंगूरौं के रस कै पुरानी मटकिऔ मै कोई ना भरै है, कैसेकै नओ अंगूरौं को रस पुरानी मटकिऔ कै फाड़ देगो और अंगूरौं को रस बैह जागो और मटकिऔ को नास हो जागो; इसताँई नए अंगूरौं को रस कै नई मटकिऔ मै भरो जावै है जिस्सै बे दौनौ बची रैहबैं हैं।”
मरी भई लौंड़िया और बेमार बईयर
(मरकुस 5:21–43; लूका 8:40–56)
18ईसु उनसै जे बात कैई रओ हो कै, तबई यहूदी पिराथना घर को एक मुखिया उसके धौंरे आओ और घूंटे टेक्कै बोलो, “मेरी लौंड़िया अबी-अबी मरी है पर तू चलकै अगर अपनो हात उसके ऊपर रख देगो तौ, बौ जिन्दी हो जागी।” 19ईसु उठकै अपने चेलौ समेत बाके पीछे चल दओ।
20उसई टैम एक बईयर नै, जो बारैह साल सै खून बहनै की बेमारी सै परेसान ही, पीछे सै आकै ईसु के लत्ता को एक धोरो छूँ लओ। 21कैसेकै बौ मनई मन कैबै ही कै अगर मैं उसके लत्ता कैई छूँ लंगो तौ ठीक हो जांगो। 22ईसु नै मुड़कै देख लओ और कैई, “बेटी हिम्मत रख, तेरे बिसवास नै तू ठीक कर दई है।” और बौ बईयर उसई घड़ी ठीक हो गई।
23जब ईसु उस यहूदी पिराथना घर के मुखिया के घर पौंचो तौ, सोक धुन बजानै बारौ कै और लोगौ कै रोते पीटते देखो, तौ उनसै कैई, 24“हट जाऔ, लौंड़िया मरी ना है, पर सो रई है।” इस बात मै बे उसकी हसी उड़ाल लगे। 25जब भीड़ बाहार कर दई गई, तब ईसु नै भीतर जाकै लौंड़िया को हात पकड़ो, और बौ जी उठी। 26इस बात की खबर उस इलाके के कौने कौने मै फैल गई।
दो अन्धौ कै रौसनी मिलनी
27जब ईसु बहाँ सै अग्गे बढ़ो, तौ दो अन्धे उसके पीछे जौ पुकारते भए चले, कै “हे दाऊद की औलाद, हमरे ऊपर दया कर।” 28जब बौ घर मै पौंचो, तौ बे अन्धे बाके धौंरे आए और ईसु नै उनसै पूँछी, “का तुमकै बिसवास है कै मैं जौ कर सकौ हौं?” उनौनै उस्सै कैई, “हाँ परभु!” 29तब ईसु नै उनकी आँख छूँते भए कैई, “जैसो तुमनै बिसवास करो बैसोई हो जाय।” 30और उनकी आँख खुल गंई, तब ईसु नै जौ कैते भए कड़ी चितौनी दई, “जौ बात कोई ना जान्नै पाय।” 31पर घर सै लिकरकै उनौनै उस पूरे इलाके मै ईसु को नाम फैला दओ।
गूँगा को ठीक होनो
32जब बे बाहार जाई रए हे, तौ देखौ, लोग एक गूँगा कै जिसमै दुसट आत्मा ही ईसु के धौंरे लाए। 33और जब दुसट आत्मा लिकार दई गई, तौ गूँगा बोलल लगो, और लोगौ की भीड़ नै अचम्बो करकै कैई, “ईसराइल मै बी ऐंसो चमत्कार कबी ना देखो गओ।” 34#मत्ती 10:25; 12:24; मरकु 3:22; लूका 11:15पर फरीसिऔं नै कैई, “जौ तौ दुसट आत्माऔ के मुखिया की मदत सै दुसट आत्माऔ कै लिकारै है।”
35 #
मत्ती 4:23; मरकु 1:39; लूका 4:44 और ईसु सब सैहरौं और गामौ मै फिरतो रैहओ और उनकी पिराथना घरौं मै उपदेस देतो और परमेसर के राज की अच्छी खबर को परचार करतो, और हर तरै की बेमारी ठीक और कमजोरिऔं कै दूर करतो रैहओ। 36#मरकु 6:34जब ईसु नै भीड़ देखी तौ उन लोगौ के ऊपर तरस आओ, कैसेकै बे उन भेड़ौ के हाँई हे जिनको कोई रखबालो ना हो, सताए भए और भटके भए से हे। 37#लूका 10:2तब उसनै अपने चेलौ सै कैई, “पके खेत तौ भौत हैं पर मजदूर थोड़े हैं। 38इसताँई खेत के मालिक सै बिनती करौ कै बौ अपने खेत काटनै के ताँई मजदूरौ कै भेजै।”
Currently Selected:
मत्ती 9: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
