लूका 10
10
ईसु दुआरा बहत्तर चेलौ को भेजो जानो
1इन घटना के बाद परभु नै अगल सै बहत्तर चेला चुने और जिस जिस सैहर और गाम मै ईसु कै खुद जानो हो, बहाँ दो-दो करकै बे अपने अग्गे भेजे। 2#मत्ती 9:37,38बौ उनसै बोलो, “पके खेत तौ भौत हैं, पर मजदूर थोड़े हैं, इसताँई फसल के मालिक सै बिनती करौ कै बौ अपने खेत मै फसल काटनै के ताँई मजदूरौ कै भेजै।
3 #
मत्ती 10:16
“जाऔ, मैं तुमकै भिड़ियौ के बीच, भेड़ौ के हाँई भेज रओ हौं 4इसताँई ना बटुआ, ना झोला, ना जूता लो, और ना रस्ता मै किसी कै नमस्कार करौ। 5जिस किसी घर मै जाऔ, सबसै पैले कैऔ, ‘जा घर के लोगौ कै सान्ति मिलै।’ 6अगर बहाँ कोई आसीरबाद के लायक होगो, तौ बाके ऊपर तुमरो आसीरबाद रुकैगो, ना तौ बौ तुमरे धौंरे लौहट आगो। 7#1 कुर 9:14; 1 तीमु 5:18उसई घर मै ठैरे रौह और जो कुछ उनसै मिलै बौई खाऔ-पिऔ कैसेकै मजदूर कै अपनी मजदूरी मिलनी चँईऐ, पर एक घर सै दूसरे घर मै ना घूमौं, 8और जिस सैहर मै जाबौ हौ, और बहाँ के लोग तुमरी इज्जत करैं, तौ जो कुछ तुमरे सामने परोसो जाय, बौई खाऔ। 9बहाँ के बेमारौं कै ठीक करौ, और उनसै कैऔ, कै ‘परमेसर को राज तुमरे धौंरे आ पौंचो है।’
10 #
चेलौ 13:51
“पर जिस सैहर मै जाऔ, और बहाँ के लोग तुमरी इज्जत ना करैं, तौ बहाँ के गलिऔं मै जाकै कैऔ, 11#मत्ती 10:7–14; मरकु 6:8–11; लूका 9:3–5‘कै तुमरे सैहर की धूदर बी, जो हमरे पाँऐऔं मै लगी है, हम उसकै तुमरे बिरोद मै झाड़ दे रए हैं, तौबी जौ जानलो, कै परमेसर को राज तुमरे धौंरे आ पौंचो है।’ 12#मत्ती 11:24; मत्ती 10:15मैं तुमसै जौ कैरओ हौं, नियाय के दिन उस सैहर के लोगौ की हालत सदोम की हालत सै खराब होगी।
अबिसवासिऔं कै ईसु की चितौनी
(मत्ती 11:20–24)
13 “ऐ खुराजिन तेकै धिक्कार! बैतसैदा तेकै बी धिक्कार! जो चमत्कार तुम्मै करै गए, अगर बे सूर और सैदा सैहर मै करै जाते, तौ ना जानै कब को मन फिरा लेते। और बे मन फिरानै के चिन्न के रूप मै टाट के सोक-लत्ता पैहरकै छार मै बैठ जाते। 14पर नियाय के दिन सूर और सैदा की हालत तुमसै कहीं अच्छी होगी। 15अरे कफरनहूम तू का सुरग तक ऊँचो उठाओ जागो? तू तौ नीचे नरक मै पड़ैगो।
16 #
मत्ती 10:40; मरकु 9:37; लूका 9:48; यहून 13:20 “जो तुमरी सुनै है, बौ मेरी सुनै है और जो तुमरी बेजती करै है, बौ मेरी बेजती करै है। जो मेरी बेजती करै है, बौ पिता परमेसर की बेजती करै है, जिसनै मैं भेजो हौं।”
बहत्तर चेलौ को बापस आनो
17फिर बे बहत्तर चेला खुसी के संग बापस लौहटे और बोले, “हे परभु, तेरे नाम सै दुसट आत्मा बी हमरी आगियाँ मानै हैं।”
18इस बात मै ईसु नै उनसै कैई, “मैं सैतान कै बिजली के हाँई सुरग सै गिरो भओ देख रओ हो। 19सुनौ, मैंनै तुमकै साँपौ और बिच्छुऔ कै किचलनै को, और बैरी की सैरी सकतिऔं के ऊपर अधकार दओ है, तुमकै कोई कुछ नुकसान ना पौंचा सकैगो। 20तौबी इस्सै खुस मत होओ, कै दुसट आत्मा तुमरी आगियाँ मानै है, पर इस्सै खुस होओ कै तुमरे नाम सुरग मै लिखे हैं।”
ईसु की खुसी
(मत्ती 11:25–27; 13:16,17)
21उसई घड़ी बौ पबित्तर आत्मा मै होकै खुसी सै भर गओ, और कैई, “हे अब्बा, सुरग और धरती के परभु, मैं तेरो धन्नबाद करौं हौं, तैनै जे बात गियानिऔ और समजदारौं सै छिपाई रक्खीं, और सीदे सादे लोगौं कै बताई हैं, हे अब्बा, तेकै जौई अच्छो लगो।
22 #
यहून 3:35;
यहून 10:15
“मेरे अब्बा नै मैंकै सब कुछ सौंप दओ है। अब्बा कै छोड़कै जौ कोई बी ना जानै है कै लौंड़ा कौन है और लौंड़ा कै छोड़कै जौ कोई बी ना जानै है कै अब्बा कौन है। सिरप बौई जानै है, जिसके ऊपर लौंड़ा नै, अब्बा कै जान्नै की किरपा करी है।”
23तब बानै अपने चेलौ की ओर मुड़कै इकले मै उनसै कैई, “धन्न हैं बे आँख, जिनकै तुम देख रए हौ! बे उसकै देखैं हैं, 24कैसेकै मैं तुमसै कैरओ हौं तुम जो बात देख रए हौ, उनकै भौत से नबी और राजा देखनो चाँहै हे, पर उनौनै बे ना देखीं और जो बात तुम सुन रए हौ, बे उनकै सुन्नो चाँहै हे, पर उनौनै बे बात ना सुनी।”
भले सामरी की दासतान
25 #
मत्ती 22:35–40; मरकु 12:28–34 तब एक सास्तरी खड़ो भओ और ईसु कै परखनै के ताँई उस्सै पूँछी, “गुरू, हमेसा की जिन्दगी को बारिस होनै के ताँई मैं का करौं?”
26ईसु नै उस्सै कैई, “पबित्तर सास्तर की किताब मै का लिखो है? तू कैसे पढ़ै है?”
27बानै जबाब दओ, “कै तू अपने परभु परमेसर सै अपने सैरे दिल, और अपने सैरे पिरान और अपनी सैरी सकति और अपनी सैरी बुद्धि के संग पियार रख, और अपने पड़ोसी सै अपने जैसो पियार रख।”
28ईसु नै उस्सै कैई, “तैनै ठीक जबाब दओ, ऐंसोई कर तौ तू हमेसा की जिन्दगी पागो।”
29पर उसनै अपने आपकै धरमी ठैरानै की इच्छा सै ईसु सै पूँछो, “तौ मेरो पड़ोसी कौन है?”
30ईसु नै जबाब दओ, “देखौ, एक आदमी ऐरूसलेम सैहर सै यरीहो सैहर कै जा रओ हो, और बौ डाँकुऔं नै घेर लओ। उनौनै बाको सब कुछ छीनकै बौ नंगो कर दओ और मारपीट कै बाकै अदमरो छोड़कै चले गए।
31 “तबई ऐंसो भओ कै उसई रस्ता सै एक पुजारी # 10:31 यहूदी पुजारी जा रओ हो। बौ बाकै देखकै कतरा कै दूसरी ओर चलो गओ। 32इसई रीती सै एक लेबी बी उस जघै मै आओ बौ बी उसकै देखकै कतरा कै दूसरी ओर चलो गओ, 33इसके बाद एक सामरी यातरी बहाँ सै लिकरो और उसकै देखकै बाके ऊपर तरस आओ 34और बानै उसके धौंरे जाकै उसके घाबौ मै तेल और दारू डारकै पट्टी बांधी, और अपने गधा मै चढ़ाकै एक सराय मै ले गओ, जहाँ बाकी सेवा टहल करी। 35दूसरे दिन बानै दो चाँदी के सिक्का लिकारकै सराय के मालिक कै दए, और कैई, इसकी सेवा टहल करिए, और इस्सै जादा जो खरच आए, बौ मैं लौहटने मै तेकै चुका दंगो।”
36ईसु नै उस्सै कैई, “बता तेरे बिचार सै डाँकुऔं के बीच घिरे आदमी को पड़ोसी इन तीनौ मै सै कौन भओ?”
37सास्तरी नै जबाब दओ, “बौई जिसनै बाके ऊपर दया करी।”
ईसु बोलो, “जा तू बी ऐंसोई कर।”
मरियम और मारथा
38 #
यहून 11:1
तब ईसु और बाके चेला यातरा करते करते एक गाम मै आए और मारथा नाम की एक बईयर नै अपने घर मै उनको सुआगत करो। 39बाकी मरियम नाम की एक बहन ही, जो परभु के चरनौ के धौंरे बैठकै उसको बचन सुन रई ही। 40पर मारथा सेवा करते करते परेसान हो गई और बाके धौंरे आकै कैललगी, “हे परभु, का तेकै जौ ठीक लगै है कै मेरी बहन नै सेवा-पानी की सैरी जिम्मेदारी मेरे ऊपरई छोड़ दई है? बासै कैह, कै बौ मेरी मदत करै।” 41परभु नै बाकै जबाब दओ, “मारथा, हे मारथा, तू भौत सी बातौं के ताँई चिन्ता करै है और परेसान होवै है। 42फिर बी एकई बात जरूरी है। मरियम नै सबसै अच्छो हिस्सा चुन लओ है, जो बासै छीनो ना जागो।”
Currently Selected:
लूका 10: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
