यहून्ना 9
9
जलम के अन्धे को ठीक होनो
1जाते भए ईसु नै एक आदमी देखो जो जलम सै अन्धो हो। 2और बाके चेलौ नै जौ कैते भए बासै पूँछी, “हे गुरूजी किसनै पाप करो, जा आदमी नै या जाके अईया-अब्बा नै, कै जौ अन्धो पैदा भओ?”
3ईसु नै जबाब दओ, “ना तौ जा आदमी नै पाप करो, नाई जाके अईया-अब्बा नै पर जौ इसताँई अन्धो पैदा भओ कै परमेसर के काम जामै दिखाए जांऐ। 4जिसनै मैं भेजो हौं, हम बाके काम दिनई दिन मै निपटा दैं, बौ रात आनै बारी है जिसमै कोई काम ना कर सकै है। 5#मत्ती 5:14; यहून 8:12जब तक मैं दुनिया मै हौं, मैं दुनिया को उज्जेरो हौं।” 6इतनो कैह कै ईसु नै जमीन मै थूको और बा थूक सै मट्टी सनाकै बा अन्धे की आँख के ऊपर लगाई, 7और बासै कैई, “जा सीलोम नाम के तलाब मै धोले” (सीलोम को अरथ है “भेजो भओ।”) तब बानै बहाँ जाकै आँख धोईं और देखतो भओ बापस आओ।
8तब पड़ोसी और जिनौनै पैले बाकै भीक माँगते देखो हो, कैललगे, “का जौ बौई ना है जो बैठे भए भीक माँगे करै हो?”
9कुछ कैललगे, “जौ बौई है।” दूसरौं नै कैई “ना, पर जौ बाके जैसो है।”
बौ आदमी कैतो रैहओ, “मैं बौई हौं।”
10तब बे बासै पूँछल लगे, “तेकै कैसे दिखाई देल लगो?”
11बानै जबाब दओ, “ईसु नाम को एक आदमी नै मट्टी सनाकै मेरी आँखौ मै लगाई और मैंसै कैई, जा और सीलोम नाम के तलाब मै धोकै आ और मैं धोकै आओ, और मैं देखल लगो।”
12फिर आदमिऔ नै बासै पूँछी, “बौ कहाँ है?”
बानै जबाब दओ, “मैंकै ना पतो।”
फरीसिऔं दुआरा चंगाई की खोजबीन
13और बा आदमी कै जो पैले अन्धो हो, बे फरीसिऔं के धौंरे लिआए। 14जिस दिन ईसु नै मट्टी सै सनाकै बाकी आँख खोली हीं बौ आराम कन्नै को दिन हो। 15फिर फरीसिऔं नै बी बासै पूँछी कै तू कैसे देखल लगो।
बानै फरीसिऔं सै कैई, “उसनै मेरी आँख मै गीली मट्टी लगाई, और मैंनै आँख धोईं और अब मैं देखौ हौं।”
16इसताँई फरीसिऔं मै सै कुछ कैललगे, “जौ आदमी परमेसर की ओर सै ना है, कैसेकै बौ आराम कन्नै बारे दिन कै ना मानै है।”
पर दूसरे कैललगे, “एक पापी आदमी ऐंसे चमत्कार के चिन्नौ कै कैसे दिखा सकै है?” और उनमै फूट पड़ गई।
17बे एक दफै फिर बा अन्धा सै बोले, “बाके बारे मै तू का कैबै है? कैसेकै तू जा बात कै जानै है कै बानै तेरी आँख ठीक करीं हीं।” तब बानै कैई, “बौ नबी है।” 18इसताँई यहूदिऔं नै बाकी बात को बिसवास ना करो कै बौ अन्धो हो और देखल लगो, जब तक कै उनौनै बा आँख ठीक होनै बारे आदमी के अईया-अब्बा कै बुलाकै। 19उनसै जौ ना पूँछ लई कै, “का जौ तुमरो लौंड़ा है, जिसकै तुम कैबै हे कै बौ अन्धो पैदा भओ हो? तौ अब बौ कैसे देख सकै है?” 20बाके अईया-अब्बा नै उनकै जबाब देते भए कैई, “हम जानै हैं कै जौ हमरो लौंड़ा है और जौ अन्धो पैदा भओ हो। 21पर अब बौ कैसे देखल लगो, हम ना जानै हैं, कै किसनै बाकी आँखौ कै ठीक करो, हमकै पतो ना है। बाई सै पूँछ लो बौ सिआनो है, और बौ अपने बारे मै खुद बता सकै है।” 22बाके अईया-अब्बा नै ऐंसो इसताँई कैई कैसेकै बे यहूदिऔं सै डरै हे। यहूदी पैलेई सै एक संग हो चुके हे कै अगर कोई बाकै मसी मानैगो तौ पिराथना घर सै लिकार दओ जागो। 23इसई कारन सै बाके अईया-अब्बा नै कैई कै, “बौ सिआनो है, बाई सै पूँछौ।”
24यहूदी नेताऔं नै बा आदमी कै जो अन्धो हो दूसरी दफै बुलाओ और बासै कैई, “परमेसर की इज्जत कर। हम जानै हैं कै बौ आदमी पापी है।”
25तब बानै जबाब दओ, “मैं ना जानौ हौं कै बौ पापी है या ना। मैं तौ एक बात जानौ हौं, कै मैं अन्धो हो और अब मैं देख सकौ हौं।”
26उनौनै फिर बासै पूँछी, “बानै तेरे संग का करो? तेरी आँख बानै कैसे ठीक करीं?”
27बानै उनकै जबाब दओ, “मैं तौ तुमसै पैलेई कै चुको, और तुमनै ना सुनी, फिर दूसरी बार का सुन्नो चाँहौ हौ? का तुम बी बाके चेला बन्नो चाँहौ हौ?”
28और उनौनै बाकै गारी देते भए कैई, “तूई बाको चेला है, पर हम तौ मूसा के चेला हैं। 29हम जानै हैं कै परमेसर नै मूसा सै बात करीं, पर जा आदमी के बारे मै हम ना जानै हैं कै जौ कहाँ को है।”
30बा आदमी नै जबाब देते भए उनसै कैई, “अरे, जौ तौ बड़ी अजीब बात है कै तुम ना जानौ हौ कै बौ कहाँ को है, फिर बी बानै मेरी आँख ठीक कर दंई। 31हम जानै हैं कै परमेसर पापिऔं की ना सुनै है, पर जो कोई परमेसर को डर मानै है, और बाकी इच्छा पूरी करै है, तौ बौ उसकी सुनै है। 32कबी ऐंसो सुनो ना गओ कै किसी नै जलम के अन्धे आदमी की आँख ठीक कर दंई। 33अगर जौ आदमी परमेसर की ओर सै ना होतो तौ बौ कुछ करई ना सकतो।” 34उनौनै जबाब देते भए बासै कैई, “तू तौ सुरू सैई पापी हो ठीक तब सै जब सै तू पैदा भओ हो। और का तू हमकै सिकानै आओ है?” और उनौनै बौ लिकारकै बाहार कर दओ।
आत्मिक अन्धोपन
35ईसु नै सुनी कै उनौनै बाकै लिकारकै बाहार कर दओ है, तौ बासै मिलकै ईसु नै कैई, “का तू आदमी के लौंड़ा मै बिसवास करै है?”
36बानै जबाब देते भए कैई, “बौ कौन है परभु, कै मैं बाके ऊपर बिसवास करौं?”
37ईसु नै बासै कैई, “तैनै बौ देखो बी है, और बौई है जो अबी तेरे संग बात कर रओ है।”
38और बानै कैई, “परभु, मैं बिसवास करौ हौं।” और झुक्कै बानै परनाम करो।
39तब ईसु नै कैई, “मैं इस दुनिया मै नियाय कन्नै के ताँई आओ हौं कै जो ना देखै हैं बे देखंगे और जो देखै हैं बे अन्धे हो जांगे।”
40जो फरीसी लोग बाके संग हे। जौ बात सुनकै उनौनै बासै कैई, “का हम बी अन्धे हैं?”
41ईसु नै उनसै कैई, “अगर तुम अन्धे होते तौ तुम्मै कोई पाप ना होतो। पर अब तुम कैबौ हौ, हम देखै हैं, इसताँई तुमरो पाप बनो रैहबै है।”
Currently Selected:
यहून्ना 9: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
