यहून्ना 21
21
तिबिरियास झील के किनार ईसु को परकट होनो
1इन बातौं के बाद ईसु नै तिबिरियास झील के किनार चेलौ के सामने अपने आपकै इस तरै परकट करो। 2समौन पतरस और थौमा जो दिदुमस बी कैलाबै हो, और गलील के काना सैहर को नतनैल, और जबदी के लौंड़ा और ईसु के चेलौ मै सै दूसरे दो इखट्टे हे। 3#लूका 5:5समौन पतरस नै उनसै कैई, “मैं मच्छी पकड़नै जा रओ हौं।” उनौनै बासै कैई, “हम बी तेरे संग चलंगे।” बे जाकै किसती मै चढ़ गए, और बा रात उनके हात कुछ बी ना लगो। 4जब सुबे होल लगी तौ ईसु किनार मै खड़ो भओ हो, पर चेलौ नै ना पैचानो कै जौ ईसु है। 5फिर ईसु नै उनसै कैई, “बालकौ, तुमरे धौंरे मच्छी हैं?” उनौनै जबाब दओ, “ना।” 6#लूका 5:6तब बानै उनसै कैई, “किसती के दाँय हात की ओर जार डारौ तौ तुमकै कुछ मिलैगो।” इसताँई उनौनै जार फैंको मगर भौत जादा मच्छी होनै के कारन बे जार कै बापस खैंच ना सके। 7फिर ईसु के पियारे चेला नै पतरस सै कैई, “जौ तौ परभु है!” इसताँई जब समौन पतरस नै सुनो कै जौ परभु है तौ बानै अपनो ऊपर को पैहरनै बारो लत्ता कस लओ कैसेकै बानै लत्ता लिकार खाए हे और बौ झील मै कूद पड़ो। 8पर दूसरे चेला किसती मै मच्छी सै भरो भओ जार खैंचते भए आए कैसेकै बे किनार सै जादा दूर ना हे, पर करीब सौ मीटर की दूरी मै हे। 9जब बे किनार मै आए तौ उनौनै बहाँ धदकते अंगरा की आग पजरती भई देखी बामै मच्छी और रोटी बन्नै के ताँई रखी हीं। 10ईसु नै उनसै कैई, “जो मच्छी तुमनै अबी पकड़ी हैं, उनमै सै कुछ लाऔ।” 11समौन पतरस किसती मै गओ और एक सौ तिरेपन बड़ी मच्छिऔं सै भरो भओ जार कै किनार मै खैंच लाओ, और इत्ती जादा मच्छी होनै के बाद बी जार ना फटो। 12ईसु नै उनसै कैई, “हिंया आऔ और खाऔ!” चेलौ मै सै किसी कै जौ पूँछनै की हिम्मत ना भई कै, “तू कौन है?” कैसेकै बे जान गए हे कै बौ परभु है। 13ईसु नै आकै रोटी लंई और उनकै देईं और ऐंसेई मच्छी बी देईं। 14जौ तीसरी दफै है जब ईसु नै मरे भएऔं मै सै जिन्दो होनै कै बाद चेलौ कै दरसन दओ।
ईसु और पतरस
15जब बे रोटी खा चुके, तौ ईसु नै समौन पतरस सै कैई, “हे समौन, यहून्ना के लौंड़ा, का तू इनसै जादा बढ़कै मैंसै पियार करै है?” बानै बासै कैई, “हाँ परभु, तू तौ जानै है कै मैं तेसै पियार करो हौं।” ईसु नै पतरस सै कैई, “मेरे मैमनौ कै चुंगा।” 16बानै फिर दूसरी दफै बासै कैई, “समौन, यहून्ना के लौंड़ा, का तू मैंसै पियार करै है?” पतरस नै ईसु सै कैई, “हाँ परभु, तू तौ जानै है कै मैं तेसै पियार करौ हौं।” ईसु नै पतरस सै कैई, “मेरी भेड़ौ की रखबारी कर।” 17ईसु नै फिर तीसरी दफै पतरस सै कैई, “समौन, यहून्ना के लौंड़ा, का तू मैंसै पियार करै है?” पतरस उदास भओ कैसेकै बानै बासै तीसरी दफै ऐंसे कैई कै, “का तू मैंसै पियार करै है?” और पतरस नै ईसु सै कैई, “हे परभु तू सब कुछ जानै है, तू जौ बी जानै है कै मैं तेसै पियार करौ हौं।” ईसु नै बासै कैई, “तू मेरी भेड़ौ कै चुंगा। 18मैं तेसै सच-सच कैबौ हौं, जब तू जमान हो तौ अपनी कमर मै परना बांधकै जहाँ चाँहबै हो बहाँ फिरै हो, पर जब तू बुड्ढो होगो तौ तू अपने हात फैलागो और कोई दूसरो तेरी कमर बांधैगो और जहाँ तू ना चाँहैगो बहाँ तेकै ले जागो।” 19बानै ऐंसो जौ इसारो देते भए कैई, कै पतरस कैसी मौत सै परमेसर की महिमा करैगो। और जब बौ जौ कै चुको, तौ बानै बासै कैई, “मेरे पीछे चल!”
ईसु और उसको पियारो चेला
20 #
यहून 13:25
पतरस नै मुड़कै बौ चेला पीछे आते देखो, जिस्सै ईसु पियार करै हो, यानी बौई जिसनै खानै के टैम बाकी छाती की ओर झुकते भए पूँछी ही, “परभु, तेकै धोके सै पकड़बानै बारो कौन है?” 21बाकै देक्कै पतरस नै ईसु सै कैई, “हे परभु जा आदमी को का होगो?” 22ईसु नै बासै कैई, “अगर मैं चाँहौ कै बौ मेरे आनै तक जहीं रुको रैह, तौ तेकै इस्सै का? तू मेरे पीछे चलो आ।” 23इसताँई भईयौ मै जौ बात फैल गई कै बौ चेला ना मरैगो। पर ईसु नै बासै जौ ना कैई कै बौ ना मरैगो, बलकन जौ कैई ही, “अगर मैं चाँहौ कै बौ मेरे आनै तक जहीं रुको रैह, तौ तेकै इस्सै का?” 24जौ बौई चेला हो जो इन बातौं की गभाई देवै है जिसनै जे बात लिखी हैं और हम जानै हैं कै बाकी गभाई सच्ची है। 25और बी भौत काम हैं जो ईसु नै करे। अगर उनकै एक-एक करकै लिखो जातो, तौ मैं सोचौ हौं कै जिन किताबौ कै लिखो जातो बे दुनिया मै बी ना समाती।
Currently Selected:
यहून्ना 21: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
