यहून्ना 1
1
ईसु को आनो
1सुरू मै बचन#1:1 हिंया बचन को मतलब ईसु है। हो और बचन परमेसर के संग हो और बचनई परमेसर हो। 2जौई सुरू मै परमेसर के संग हो। 3सब कुछ उसई नै बनाओ है और जो कुछ बनाओ है, उसके बिना कुछ बी ना बनाओ गओ। 4उसमै जिन्दगी ही और बौ जिन्दगी आदमिऔ की जोती ही। 5और जोती इन्धेरे मै चमकै है, पर इन्धेरो बाकै जीत ना सको।
6 #
मत्ती 3:1; मरकु 1:4; लूका 3:1,2 परमेसर की ओर सै भेजो भओ एक आदमी आओ जिसको नाम यहून्ना हो। 7बौ उस जोती की गभाई दैनै आओ हो, ताकि सब उसके दुआरा बिसवास कर सकैं। 8यहून्ना खुद तौ जोती ना हो, पर इसताँई आओ हो कै बौ जोती की गभाई दे। 9बचन बौ सच्ची जोती हो जो सब आदमिऔ कै उज्जेरो देवै है, बौ दुनिया मै आ रओ हो।
10बौ दुनिया मै हो और दुनिया बाके दुआरा बनाई गई और दुनिया नै बौ ना पैचानो। 11बौ अपनौ के धौंरे आओ और उसके अपने लोगौं नैई बौ ना अपनाओ। 12पर जितनौ नै बाकै अपनाओ, और जो लोग बाके नाम मै बिसवास करैं हैं, उन सबकै बानै परमेसर की औलाद होनै को हक दओ। 13बौ ना तौ खून सै, ना सरीर की इच्छा सै और ना आदमी की इच्छा सै, पर परमेसर सै पैदा भओ है।
14और बचन आदमी बनकै हमरे बीच मै रैहओ, और बौ किरपा और सच्चाई सै भरो भओ हो और हमनै उसकी ऐंसी महिमा देखी जैसी अब्बा के इकलौते लौंड़ा की महिमा। 15यहून्ना नै बाके बारे मै जोर सै चिल्लाकै गभाई देई और कैई, “जौ बौई है जिसके बारे मै मैंनै तुमसै कैई ही, ‘बौ जो मेरे बाद आनै बारो है, बौ मैंसै बढ़कै है, कैसेकै मैंसै पैले बौ हो।’” 16कैसेकै बाकी दया और सच्चाई की भरपूरी मै सै हम सबनै किरपा के ऊपर किरपा पाई है। 17कैसेकै नियम मूसा दुआरा देए गए, पर किरपा और सच्चाई तौ ईसु मसी के दुआरा मिली है। 18परमेसर कै किसी नै कबी ना देखो, परमेसर को इकलौतो लौंड़ा जो खुद परमेसर है और अब्बा के संग है, बाई नै बौ परकट करो है।
ईसु के बारे मै यहून्ना की गभाई
(मत्ती 3:1–12; मरकुस 1:1–8; लूका 3:1–18)
19यहून्ना की गभाई जौ ही, कै जब यहूदिऔं नै बाके धौंरे ऐरूसलेम सै पुजारिऔं और लेबिऔं कै जौ पूँछनै के ताँई भेजो, “तू कौन है?”
20उसनै सच्च कैई, और साप-साप बोलो, “मैं मसी ना हौं।”
21तब उनौनै यहून्ना सै पूँछी, “तौ फिर तू कौन है? का तू एलिया है?”
बानै कैई, “मैं ना हौं।”
“का तू बौई नबी है?”
बानै जबाब देओ, “ना।”
22तब उनौनै बासै पूँछी, “तौ फिर तू है कौन? ताकि हम अपने भेजनै बारौं कै जबाब दे सकैं? तू अपने बारे मै का कैबै है?”
23यहून्ना नै कैई,
“मैं बाकी अबाज हौं बौ जो रेगिस्तान मै बुला रओ है,
‘परभु के ताँई रस्ता सीदी बनाऔ।’”#यसा 40:3
जैसो यसाया नबी नै कैई है। 24बे लोग फरीसिऔं की ओर सै भेजे गए हे। 25तब उनौनै बासै पूँछी, “अगर तू मसी ना है, ना एलिया और ना बौ नबी, तौ तू काए जल संस्कार देवै है?”
26यहून्ना नै उनकै जबाब दओ, “मैं तौ पानी सै जल संस्कार देवौ हौं, पर तुमरे बीच मै एक आदमी खड़ो है, जिसकै तुम ना जानौ हौ। 27जौ बौई है जो मेरे बाद आनै बारो है, और जिसके जूता के फीता खोलनै के बी मैं लायक ना हौं।”
28जे बात यरदन नद्दी जहाँ यहून्ना जल संस्कार देवै हो उसके पार बैतनिया गाम मै भंई।
ईसु परमेसर को मैमना
29दूसरे दिन यहून्ना नै ईसु कै अपनी ओर आते देख कैई, “देखौ परमेसर को मैमना जो दुनिया के पाप उठा ले जावै है। 30जौ बौई है, जिसके बारे मै मैंनै तुमसै कैई ही, ‘मेरे पीछे एक आदमी आवै है जो मैंसै बढ़कै है, कैसेकै मैंसै पैले बौ हो।’ 31और मैंनै बी बौ ना पैचानो हो, पर मैं इसताँई पानी सै जल संस्कार देतो भओ आओ हो जिस्सै ईसराइल के लोग उसकै जान लैं।” 32और यहून्ना नै अपनी जौ गभाई दई “मैंनै आसमान सै आत्मा कै कबूतर के रूप मै उतरते और उसके ऊपर ठैरते देखो। 33और मैं तौ बाकै ना पैचानै हो, पर जिसनै मैंकै पानी सै जल संस्कार दैनै भेजो, बाई नै मैंसै कैई, ‘जिसमै तू आत्मा कै उतरते और ठैरते देखै, पबित्तर आत्मा सै जल संस्कार दैनै बारो बौई है’। 34और मैंनै देखो और गभाई देई कै जौई परमेसर को लौंड़ा है।”
ईसु कै अपने चेलौ कै चुननो
35दूसरे दिन यहून्ना अपने दो चेलौ के संग फिर बहाँ खड़ो भओ हो, 36और बानै ईसु कै धौंरे सै जाते देखो, तौ बानै कैई, “देखौ, परमेसर को मैमना।” 37और दौनौ चेलौ नै बाकी जौ बात सुनी तौ बे ईसु के पीछे चल पड़े। 38ईसु नै मुड़कै उनकै अपने पीछे आते देखो और उनसै पूँछी, “तुमकै का चँईऐ?” उनौनै कैई, “हे गुरू, तू कहाँ रैहबै है?” 39ईसु नै उनसै कैई, “आऔ और देखौ।” तब उनौनै जाकै देखो कै बौ कहाँ रैहबै है, और बा दिन बे बाके संग रुके, कैसेकै उस टैम साँज के चार बज रए हे।
40बे दो आदमी जो यहून्ना की बात सुनकै ईसु के पीछे गए हे उनमै सै एक समौन पतरस को भईया अन्दरयास हो। 41बानै अपने सगे भईया समौन सै पैले मिलकै बासै कैई, “हमकै मसी मिल गओ है।” मसी को मतलब है, “चुनो भओ राजा।”#1:41 जब राजा बनाओ जावै हो तौ बाके ऊपर तेल उड़ेलो जावै हो। 42फिर अन्दरयास समौन कै ईसु के धौंरे लाओ। ईसु नै बौ देखो और कैई, “तू यहून्ना को लौंड़ा समौन है। तू कैफा यानी पतरस#1:42 अरामीक भासा को सब्द कैफा को मतलब चट्टान है, यूनानी भासा मै इसकै पतरस कैबै हैं। कैलागो।”
43दूसरे दिन ईसु नै गलील मै जानो चाँहो और बौ फिलिप्पुस सै मिलो और कैई, “मेरे पीछे चलो आ।” 44फिलिप्पुस तौ अन्दरयास और पतरस के सैहर बैतसैदा को रैहनै बारो हो। 45फिलिप्पुस नतनैल सै मिलो और बासै कैई, “जिसके बारे मै मूसा नै नियम मै और दूसरे नबिऔ नै बी लिखो है, बौ हमकै मिल गओ और बौ यूसप को लौंड़ा ईसु, जो नासरत सैहर सै है।” 46नतनैल नै बासै पूँछी, “का कोई अच्छी चीज नासरत सै बी लिकर सकै है? फिलिप्पुस नै बासै कैई आकै देख ले।” 47ईसु नै नतनैल कै अपनी ओर आते भए देखो और बाके बारे मै कैई, “देखौ, जौ है एक सच्चो ईसराइली जिसमै कोई कपट ना है।” 48नतनैल नै बासै कैई, “तू मैंकै कैसे जानै है? ईसु नै बाकै जबाब देते भए कैई, फिलिप्पुस नै तेकै बुलानै सै पैले, जब तू अंजीर के पेड़ के नीचे हो, तब मैंनै तू देखो।” 49नतनैल नै बाकै जबाब दओ, “हे गुरू तू परमेसर को लौंड़ा है, तू ईसराइल को महाराजा है।” 50ईसु नै बासै कैई, “मैंनै तेसै कैई कै मैंनै तू अंजीर के पेड़ के नीचे देखो, का तू जाई मारे बिसवास करै है? तू इस्सै बी बड़ी-बड़ी बातौं कै देखैगो।” 51ईसु नै फिर उस्सै कैई, “मैं तुमसै सच-सच कैरओ हौं कै तुम सुरग कै खुलो भओ और परमेसर के दूतौ कै आदमी के लौंड़ा के धौंरे उतरते और चढ़ते भए देखौगे।”
Currently Selected:
यहून्ना 1: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
