Mateu 24

Yesu Ahandeka hakunonga ca Njivo ya Njambi

(Mako13:1; Luka21:5-6)

1Yesu uahumine mu njivo na kuya, kaha vandongisi vendi vezile kuli ikeye nakumumuesa vinjivo via Njambi. 2Vuno honi uavakumbuluile nguendi, “Munamono viuma vioshe evi, indi kuahi? Muavusunga njihandeka kuli yeni nguange, kukuesi cipue livue limo likasala halikuavo, lije kuvakombila ha mavu.”

Tuyando na Mapakeso

(Mako13:3-13; Luka21:7-19)

3Kaha omo Yesu uatumamene ha munkinda ua Oliveta, vandongisi vendi vezile kuli ikeye muvusueke nakuhandeka nguavo, “Tuleke ntsimbu muka eci cikalingika, kaha cimueso muka cikalingiua hakuija cove na ha ntsimbu ya kuhua ca mavu?” 4Kaha Yesu uavakumbuluile nguendi, “Zangameni linga keti umo akamikuise. 5Omuo vavengi vakeja mu lizina liange, nguavo, ‘Yange Kilistu!’ kaha vakakuisa vavengi. 6Kaha mukevua vinzita nakalua ka vinzita, keti mukakomoke, omuo evi viapande kulingiua, vuno honi eci keti cikeco kukotoka ca mavu. 7Omuo lifuti likatengulukila lifuti likuavo, vumuene vukatengulukila vumuene vukuavo, ku kakala njala ya liangangala na mandunduma ku mitambela ya kuliseza seza. 8Evi vinapu ngue kuputuka ca mushongo uakusema.

9“Ambahoni vakamituala mukuyanda, nakumitsiha, kaha vaka mafuti voshe vaka mizinda omuo ya lizina liange. 10Kaha ambahoni vavengi lutsilielo luavo lukahua, kaha vakalienda vungungu umo na mukuavo na kulizinda umo na mukuavo. 11Kaha tunanguizi va Njambi va makuli vavengi vakeja na kukuisa vavengi. 12Omuo kulivuezelela ca vupi cinapu cakama, kaha cizango ca vantu vavengi cikatontola. 13Vuno honi uoshe uje akakateya nankuma manusuilo a kovoka. 14Kaha muzimbu uacili ou ua vumuene vaka uambulula ha mavu oshe, kupua ngue vukaleho ku mafuti oshe, ambahoni mamanusuilo akeja.

Cimueso ca Shuama

(Mako13:14-23; Luka21:20-24)

15“Nankuma omo mukamona cimueso ca shuama cije cahandekele kananguizi Ndaniele cinemana mu cihela ca kulela,” (Yove uli na kutanda uvuisisa muvinalumbunukila!) 16Kaha eceleni vaje vali mu Yundeya vateuele ku minkinda, 17uoshe uje hali helu lia njivo keti ashuluke ha mavu, linga ambate vije vili mu njivo yendi, 18kaha uoshe hali mu lihia keti ahiluke kunima nakuambata cikovelo cendi. 19Caluvinda kuli vaje vali navana na kuli vaje vajamuesa mu matangua aje! 20Lombeleni linga keti cikalingike mu cisika cipue ha litangua lia sapalalo. 21Omuo honi ha matangua aje kukakala tuyando, tuje kutuakeleko hume kuputuka ca lifuti kuheta na lelo, kuahi, kaha ku cikakalako naua. 22Kaha nga aje matangua kauakehesele nga na muntu uahi akovoka, vuno honi omuo ya vantu vendi vaje vahanguile, matangua aje vaka akehesa.

23“Vuno honi, nga umo ahandeka kuli yeni nguendi, ‘Taleni Kilistu uno!’ cipue ‘Uje ali kuje!’ keti mucitsiliele.” 24Omuo Vakilistu va makuli na tunanguizi va Njambi va makuli vakasholoka nakulinga vitantekeyeso na vikomouesa, linga vamizimbalese, nga casiua nakuli vaje vavanahangula. 25Vuno honi njamileke ntsimbu kanda ihete.

26“Cipue nga vahandeka kuli yeni nguavo, ‘Taleni ali mu mpambo,’ keti muyeko, cipue nga vahandeka nguavo, ‘Taleni, ali mu mulili ua mukati!’ keti mucitsiliele. 27Omuo ngue mulengi ukahuma ku ngangela nakatua ceke kuheta na ku kangombe ka yambi, eci cikapua kuija ca Muna Muntu.

28“Kuoshe kuje kuli civimbi kukeko kukalikunguluila makuvi.

Kuija ca Muna Muntu

(Mako13:24-27; Luka21:25-28)

29“Hanima ya tuyando hamatangua aje litangua likalava, kaha ngonde kuikatu ceke, na vintanga ntanga vikaua kuhuma kuilu, kaha nzili ya melu ikaninganga. 30Ambahoni kukasholoka cimueso ca Muna Muntu muilu, kaha miyati yoshe ya hamavu ikalila, kaha vakamona Muna Muntu eja mu mashuela amuilu na nzili na vumpau vuakama. 31Kaha akatuma tungelo vendi na mutambi ua lipenga, kaha akakungulula vantu vendi vahanguile kuhuma ku vimpunzi viuana, kuhuma ku mamanusuilo a muilu nakukuavo.”

Cilongesa ca Muti ua Mukuyu

(Mako13:28-31; Luka21:9-33)

32“Lilongeseni cilongesa ca muti ua mukuyu, omuo mintango yauo ishoshela nakuhaka maputa, kaha muatantekeya ngueni ntondue ili muyehi. 33Kaha omo mumona viuma vioshe evi, kaha mutantekeye ngueni ntsimbu ili muyehi, ku vikolo. 34Muavusunga njimileka nguange, vantu va ntsimbu ino kuvakatsi kuvanga vuima vioshe evi vinalingiua. 35Melu na mavu vioshe vikahita, vuno honi mezi ange kuuakahu.”

Naumo uahi Atantekeya Litangua cipue Hola

(Mako13:32-37; Luka17:26-30;34-36)

36“Vuno honi ha litangua lije cipue hola naumo uahi atantekeya, cipue vene tungelo va muilu, cipue Muana, vuno honi kuvanga lika Tate. 37Ngue mucafuile ku matangua a Noua, mukemo vene mucikafua hakuija ca Muna Muntu. 38Omuo ngue mu matangua aje tele livazi kanda lije vantu valile na kunua, kuambata na kushombuesa, kutuala na ha litangua Noua uakovelele mu vuato, 39Kaha kuvatantekeyele noho livazi liezile nakuvanongesa voshe, kaha mukemo mu cikafua akuija kua Muna Mutu. 40Kaha vamala vavali vakapua mulihia, kaha umo vakamuambata umo vakamuseza. 41Kaha vampuevo vavali vakatua mucini cimo, kaha umo va kamuambata, mukuavo vakamuseza. 42Zangameni omuo kumutantekeya litangua lije Muene yeni akeja. 43Vuno honi tantekeyeni eci, nga liavenia njivo akatantekeya ntsimbu muka ya vutsiki muizi akeja, kaha nga akavandamena, nakumona nguendi njivo yendi kuvaituvu. 44Nankuma neni naua munapande kulivuahesela, omuo Muna Muntu akeja ha hola ije kumutantekeya.”

Ngamba Uakulongua cipue Uakuhona kulongua

(Luka12:41-48)

45“Iya honi ngamba ua kulongua na mana uje muene uendi uamuhakele kuendesa vakuavo vangamba nakuvahana viakulia ha ntsimbu ya kupuamo? 46Nakuisuliua uje ngamba omo muene uendi omo ahiluka amuuana hali nakulinga mujevene. 47Muavusunga njimileka nguange, akamupuisa kupua mukuluntu ua vufuko vuendi vioshe. 48Vuno honi nga uje ngamba uendi uamupi ahandeka kuli ikeye vavenia nguendi, ‘Muene uange neshuala kuhiluka,’ 49kaha aputuka kupupa vangamba vakuavo, na kulia na kunua na vaka kupenda, 50muene ua uje ngamba akeja ha litangua olio ka muvandamenene na hola ije katantekeya, 51kaha akamuhana kashitiko na kumuhaka hamo nava kacivembulu, vantu vaje vakalila na kulishumanga ku mazo.”

Currently Selected:

Mateu 24: nkn

Highlight

Copy