मरकुसो 16
16
यीशु यह्च़ा श्रींङमी
(मत्ती 28:1-7; लूको 24:1-12; यहून्न 20:1-10)
1अपेहल यहुदी मीहतु अरामो ध्याड़ा योह्सा इलि, ता मगदल शहरो मरियम, दंङ याकूबो याह मरियम दंङ सलोमीज़ि यहुदी रीति-रिवाज़ो हिसाबे रुठे बासंङ साते चीज़ारेह लेहप्ती कि अंज़े यीशु लाशो टोईच़ी नुज़ातो। 2सप्ताहों पहला ध्याड़ा रिंङ मुंजे सरके अपेहल ऐके हुची लेहकी तोहई, दुरेह कब्रङ अति, 3दंङ दोरे एनातु बिचंङ दी गप्पा लहज़ी लेहकी तोहई कि “हेंदु थल्जी दुह रहग अच़ि एखा लोहतो?” अंऊ दुह कब्रो पेतंङ रिंङ लेहकी तोहई।
4अपेहल दोरच़ी टीरा खड़े लेह खंणी, ता खंणीर कि रहग ता तुईए एखा शुहचे तो दुह महस ए मोह्ड़े तोहई। 5कब्रों अंद्रेग इलजे दोरच़ी इच्च़ा जवान बि छंङसे खमज़े लेहच़ा सुचंङ हासी बंङज़े खंणी, दंङ महस ए हेरान शुहचे इलि। 6दोई दोतंङ साते कुतोह, “बैईन था, केहच़ी नासरतो यीशु बि, अंऊ क्रूसो टोईच़ी चढ़ाएतिरे, पेट्रातंई। दुह श्रींङे इलज़ा, देहर मा; खंणु दी दुह ए ठारी शुह, अंऊ दोरच़ी दुह देहर केतेर। 7केरे ईलांई, दंङ दोऊ चेला तङ साते कुड़ु दंङ खास लेह पतरस रंङ साते दी कुड़ु कि दुह श्रींङे इलज़ा। दुह केरे बे तुई गलील प्रदेशो हखा योतो। छना दोई केतंङ साते कुतेह, कि केहच़ी दोबि दोहर ए खमोंई।”
8दंङ दिह रेड्रा, दोरे दोहर ज़ि हुंच़ा पोक्शी इलिर; छना कुचे यीशु मिंदंङ डकेकपी ए बेह्द दोतु टोईच़ी केह्षा इलजी तोहई। दंङ दोच़ी अतंङ ला साते छलेह मा कुईर, छना कुचे दोरे बेवातेर।
मरियम मगदलीनी बि यीशु तंङफी
9सप्ताहों पहला ध्याड़ा रिंङ मुंजे सरके ए यीशु श्रींङे थल भत्ते बे मुन्डा मगदल शहरो मरियम अंऊ दोरच़ी दोई निज़िह मांजी आत्मा रेह हुन्ज्दे, दोबि तंङरिर। 10दोई इलजे यीशु सतिरेह अंऊ दुखंङ तोईरे, दंङ क्रपि लेहकी तोईरे, दी समाचार रेंई। 11दंङ दोरच़ी दोऊ दोहरची रेड्रा कि यीशु श्रींङे इलजी तोत दंङ दोई दुह खंणीरि, दोतिंङ दोऊ टोहकठे विशवास मा शुई।
झुह्ट चेला तिंङ यीशु तंङफी
(लूको 24:13-34)
12दुह ध्याड़ो थल, यीशु एनातु झुह्ट चेला तिंङ ला अपेहल दोरे यरूशलेम शहरो दोहरची एनोह नगरो हखा यवातेर, दोच़ी तंङरीरे। पर दोच़ी दोबि सेहषी मरतिर छना कुचे दुह शताह तंङपि लेहकी तोहई। 13अपेहल दोच़ी यीशुबि सेहषी च़रतिर दोहपल दोरच़ी यरूशलेम शहरंङ इलजे ऊई चेला तिंङ दी समाचार रेंहई, पर चेलाज़ि दोतु टोईच़ी ला विशवास मा लहरी
सैदिह बि यीशु तंङफी
14दोहथल यीशु दोरे सेईदि चेला तिंङ ला तंङसिरी, अपेहल दोरे बगत ज़ेह लेहकी तोईरे। यीशुज़ि दुह चेलार रैहच़ी च़रति छना कुचे दोतु सेहम ढिट शुहचे इलजी तोहई। अच़िला यीशु बि श्रींङमी थल खंञातेर, दोतु गप्पारिंङ चेलाज़ि विशवास माह लहरिर।
15दंङ यीशुज़ि दोतंङ साते कुतोह, “केहच़ी संसारारंङ इलजे भत्ते मीहतिंङ दी रूठे खबर सुनाएकी च़रतुंई। 16अंऊ ला गिऊ टोहकठे विशवास लोहतो दंङ बपतिस्मा लेहपतो दोऊ ए उद्धार शोतो, दंङ अंऊ विशवास मा लोहतो दुह परमेश्वरो दोहरची एनोह पापो सज़ा खोकसोतो। 17अच़ि गिऊ टोहकठे विशवास लहज़ा दोतु दी स्वर्गीय निशानी शोतो कि दुरेह गिऊ मिन्दिंङ मांजी आत्मा हुंपोर, दुरेह खरकोई-खरकोई भाषा कोहर, 18अगर दोच़ी गलती रंङ साते ओमड्रा ला पछ रें च़रपोर, अगर दोच़ी विष ला तुंङमोर ता ला दोऊ छ्हले नुकसान मा शोतो। दुरेह टेची दोतु टोईच़ी गुहड़ केहोतो, दंङ दुरेह ठीक शुहचे योतो।”
यीशु सर्गो हखा इलि
(लूको 24:50-53)
19प्रभु यीशुज़ि एनोह चेला तु हखा दि गप्पारे कुट्रिमी थल, दंङ परमेश्वरे प्रभु यीशुबि सर्गो हखा रेंज़ा शीलिरे। दंङ दुरेह इलजे दुह परमेश्वरो सुचंङ हासी इज्ज़त रंङ बंङज़ा इलि। 20दोऊ थल प्रभु यीशु ऊ चेलाज़ि दोहरची इलजी भत्ते ठाहरीरिंङ रुठे खबर सुनाएची लेहतिर। दंङ प्रभु यीशुज़ि दोतु दोहरची हेरानी ऊ कम लहज़ातेर। झांह लेह मीहतिंङ पता लेहती कि रुठे खबर सच्चे शुह। आमीन। (ध्वांए शुहबी जूंस)
Currently Selected:
मरकुसो 16: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.