प्रेरित 7

स्तिफनुसो भाषण

1दंङ यहुदी महापुरोहिते रुहक्ती “छि दिह भत्ते दोष हेले शुह आ?”

2“स्तिफनुस ए कुड़ी, हे न्वारे, हे सेंहणारे रेड्रुंई, ञेंहतु बाह-मेमे अब्राहम हारान नगरंङ बसेक्‌पि बे तुहई अपेहल मेसोपोटामिया प्रदेश मिंदंङ ठहरि रिंङ तोहई; ता महिमा रंङ परमेश्वरे दोबि दर्शन रांई, 3दंङ दोई कुड़ी, कांह केनोह देश ए केनोह खानदानो दोरच़ी हुंच़ाते दुह देशंङ अच़ा इल अंऊ गेह कनिंङ कमोग।” 4दंङ दुह कसदियों तु देशंङ च़ि हुंच़ा हारान नगरंङ इलजे बसेकी इलि; दंङ दोऊ बाहऊ सिमी थल परमेश्वरे दुह दोरच़ी दिह देशारिंङ हंजेते बसाएति, अंऊर हेंतेग ञेंहरे बसेकी तोतोंई, 5दुह मुक्का परमेश्वरे दोबि छले ज़मीन जयदात माह रेंई, देर तचेक कि कोंज़ा केट्रिमी ला ठहरि माह रांई। तांला परमेश्वरे वाईदा लहरी कि, गेह दिह देश केहतु अधिकार ए दंङ कांह थल कांह खानदाना ओ अधिकारंङ रेह च़रपोग। परमेश्वरे दि वाईदा दुह मुक्का लहरी दोऊ अरिला सन्तान माह तोहई। 6दंङ परमेश्वरे दि ला कुहतो, कांह कटुरे पराये देशा रिंङ परदेशी शोरे। दुह देशो मीहरे दोतिंङ गुलाम बणाएके च़रपोर दंङ पी राह साल तचेक मदम व्यवहार लोहर। 7दंङ परमेश्वरे कुहतो, अंऊ जातिऊ दोरे गुलाम शोरे, दोबि गेह सज़ा रमोग, दोहथल कांह खानदान दुह देशंङ ज़ि हुंज़ा दिह ठहरि रिंङ गिऊ अराधना लोहर। 8परमेश्वरे अब्राहम बि हुकुम रांई दंङ दोरंङ साते कुई कि दुह एनोह चुंङी भत्ते गंङमी तु वाईदा ओ निशानी ऊ हिसाबे खतना लोहू। इसहाको जन्मो थल दोऊ बाह ज़ि दि रिवाज़ पूरा लहरी। दोई एनोह योह खतना दोऊ जेह्कपिमी रे थल ध्याड़ो थल लहरी। दोऊ थल इसहाके दि रिवाज़ एनोह योह याकूबा रंङ साते ला लहरी। दंङ याकूबे दिए रिवाज़ एनोह सनी योह तंङ साते लहरी अंऊ थले हेंदु जाति ओ बाह-मेमेर बणेंके इलिर।

9“दंङ दि याकूबो सनी योहज़ि एनोह न्वा यूसुफ रंङ साते रोह्षेक्च़े दुह मिस्त्र देशो हखा इलज़ा मीहतिंङ लंङे च़रति, पर परमेश्वर दोरंङ साते तोहई।” 10परमेश्वरे यूसुफ बि भत्ते तकलीफो दोरच़ी बचाएति। दंङ दोबि बुद्धिमान बणाएति अंऊ वहज़ा ज़ि मिस्त्र देशो रज्ज़ा फिरोन दोऊ पाहठी रूठे विचार लहज़ी लेहती। दिऊ थल्जी रज्ज़ा फिरोन ए यूसुफ बि मिस्त्र देशो ए एनोह भत्ते चुंङो अधिकार रेंई। 11अपेहल यूसुफ अधिकारी तोहई, दोहपल भत्ते मिस्त्र देश ए कनान देशा रिंङ अकाल शुई; अतु बजह च़ि मीहतु टोईच़ी महस मुशकिल अति, दंङ ञेंहतु बाह-मेमे तिंङ ज़ेइमी थल्जी अनाज माह खोकसते। 12पर याकूबे दि ला रेड्री कि मिस्त्र देशंङ अनाज तोह, दोई हेंदु बाह-मेमेतु तिंङ अनाज हपि दंङ दोरे युसूफ रंङ साते दोईरे दंङ अनाज च़ुमरिर पर दोच़ी युसूफ सेहच़ी मरतिर। 13अई फेरा ञेंहतु बाह-मेमेर अनाज च़ुमज़िमी थल्जी मिस्त्र देशो इलिर दोहपल यूसुफे एनोह पाहठी एनोह न्वातिंङ कंड्रिरी, दोहपल रज्ज़ा फिरोन बि पता लेहती, कि अंऊ मीहरे अंज़े तोतोर दोरे यूसुफो ओ टबरार शुरे। 14दंङ यूसुफ ए एनोह बाह याकूब ए एनोह भत्ते खानदानो मीहतिंङ अंऊ षुमु निह्जो संङ मीहरे तोईरे, मिस्त्र देशंङ एनोह कछंङ बुलाएती। 15दोहथर याकूब मिस्त्र इलि; थोडे़ टेमो थल दोर्तिंङ याकूब ए ञेंहतु बाह-मेमेर सिए इलिर। 16हेंदु बाह-मेमेतु लाशा तिंङ शेकेम नगरंङ रैंज़ा शिलिर दंङ दुह कब्रो अन्द्रेग पथेक्तिर अतिंङ अब्राहमे इच्च़ा सही लस रें हामोरो योह दोरच़ी च़ुमने च़रते।

17अपेहल दुह वाईदा ओ पुरा शुहबिमी टेम अति अंऊ परमेश्वरे अब्राहम रंङ साते लहते, दंङ मिस्त्र देशंङ हेंदु बाह-मेमेतु गिनती महसे शुहबी लेहती, दंङ महसे बेहसा इलिर। 18दोहथल मिस्त्र देशंङ अई रज्ज़ा शुई अंऊ यूसुफो पाहठी छल्ले माह ञेंहच़ाते। 19दोई ञेंहतु जातिऊ मीहतंङ साते मदम व्यवहार लहरी, कि दोतु याह-बाह तिंङ कवचि कटुरे सच़िमी थल्जी छंङी च़रतिर कि दोरे सिए योर। 20दुह मुक्का मूसा ऊ जन्म शुई, दुह परमेश्वरो नज़रा रिंङ महसे सलटे तोहई दंङ दोऊ याह बाह ज़ि दोबि षुमु लाह तचेक ब्याके दोऊ पालन पोषण लहरिर। 21पर अपेहल दोरे दोबि महसे ध्याड़ा तचेक ब्याके मरतिर, ता दोच़ी दुह चुंङो धह्कते केहच़ी च़रतिर, ता रज्ज़ा फिरोन ओ मियोई दुह गोद लेहप्ती, दंङ एनोह योह कुचे दोऊ पालन पोषण एनोह कटु ठ्रोह लहरी। 22दंङ मूसा बि मिस्त्र जातिऊ भत्ते बिद्या सिखाएतिर, दंङ दुह सामर्थी तरीका रंङ साते गप्पा ए सामर्थी तरीका रंङ साते कम लहज़ाते।

23अपेहल मूसा झुह्ट निह्ज साल ओ शुई, ता दोऊ सेहमरिंङ अति कि गेह घेंङौ इस्राएली न्वा तंङ साते दोअ्ग। 24दोर्तिंङ दोई इच्च़ा इस्राएली मीहतंङ साते अन्याय शुहबी खांई, दंङ दुह बचाती, दंङ दुह मिस्त्री मीह सचे दोऊ बदला लेहप्ती। 25दोई सोचेक्ती कि दोऊ न्वारे समझेक्पोरे कि परमेश्वरे दोऊ दोरच़ी दोतिंङ गुलामी ऊ दोरच़ी आज़ाद लोहतो, पर दोरे झांह माह समझेक्तिरे। 26ऊईरग ध्याड़ा अपेहल झुह्ट इस्राएली मीहरे ऐनातु बिचंङ झगड़ा लहज़ी लेह्की तोईरे, ता मूसा दोर्तिंङ अंज़े दोतिंङ मेल मिलापो थल्जी समझाएक्ती, कि “हे गंङमी रे, केरे ता केनातु बिचंङ न्वारे शुई, इदि-अई दिऊ टोईच़ी अन्याय छिले लहज़ातंई?” 27पर अंऊ एनोह पड़ोसी टोईच़ी अन्याय लहज़ाते, दोई दि कुजी मूसा बि धक्का रें च़रति, कनिंङ अच़ि ञेंहतु टोईच़ी अधिकारी ए न्याय लहज़ा ठेहराएक्तो? 28छि छना ठ्रोह केई एरेग मिस्त्र जातिऊ मीह बि सचे च़रतातेन ध्वांए गिह्बी ला सच़िमी तातन? 29दिह गप्पा रेड्रा मूसा बेवा इलि दंङ दुह मिस्त्र देशा च़ि पोक्शी मिद्यान देशा रिंङ परदेशी शुहचे बंङज़ी लेहती: दंङ दोर्तिंङ दोऊ झुह्ट योह जेह्कतिर।

30मिद्यान देशा रिंङ मूसा ओ झुह्ट निह्ज साल बंङज़िमी थल, परमेश्वरे स्वर्ग दूतो रूपा रिंङ मूसा बि सीने मिंदंङ इच्च़ा गोहू टोहकठे सुनसान ठहरि रिंङ मेह लेह्की छ़वक्तु दोरच़ी दर्शन रेंई। 31अपेहल मूसा ज़ि मेह लेहकी छ़वाक खांई अंऊ नाश शुहबी माह शवाते, ता दुह हेरान शुहचे इलि। दंङ छना ए खंड्रिमी थल्जी कछंङ इलि, ता प्रभु ऊ दिह सग शुई, 32गेह कांह बाह-मेमे तु परमेश्वर शुगाह। अब्राहमो परमेश्वर शुगाह, इसहाको परमेश्वर शुगाह दंङ याकूबो परमेश्वर शुगाह। दंङ मूसा बेह्द च़ि डकेकपी लेहती, दंङ दुह मेह लेहकी छ़वाक बि दोबारा खंड्रिमी याहब लेह मरति। 33दोहथर प्रभु ज़ि दोरंङ साते कुंई, केनोह कोन्ज़ो दोरच़ी बुट युप्शी च़रतु छना कुचे अंऊ ठहरि रिंङ कांह खड़े तोतोन, दुह पवित्र ठहरि शुह। 34गेह हेले घेंङौ मीहतु दुर्दशा, अंऊ मिस्त्र देशा रिंङ तोतोर खांषी तातग; दंङ दोतु ऊषकार ए दोतु क्रपि थाक्शी केहतग; दिऊ थल्जी दोतिंङ छुड़ाएच़िमी थल्जी तकसा तोतोग, हेंतेग अता, गेह कनिंङ मिस्त्र देशा च़रपोग। 35दिह दुह ए मूसा शुह अतु इस्राएली मीहज़ी इन्कार लहतेर, दंङ अंऊ दोच़ी कुहतेर, कनिंङ अच़ि ञेंहतु टोईच़ी अधिकारी ए न्याय लहज़ा ठेहराक्तो? परमेश्वरे दिए मीहबी केहतु टोईच़ी राज लहज़िमी थल्जी ठहरासी तते दंङ दुह स्वर्गदूतो दोरच़ी केतिंङ आज़ाद लहज़िमी थल्जी अंऊ मुसा बि छ्वाक्तु बिचंङ प्रकट शुह्ते। 36दिह ए मीह मिस्त्र देशंङ ए शेहई समुंद्र दंङ सुनसान ठहरि झुह्ट निह्ज साल तचेक हेरानी ऊ कम ए चमत्कार कंड्रा दंङ दोतिंङ दोरच़ी धकतेखा हुंच़े हति। 37दिह दुह ए मूसा शुह, अच़ि इस्राएल ओ मीहतंङ साते कुई, परमेश्वरे केहतु बिशवासी न्वा तु बिचंङ च़ि केहतु थल्जी गिऊ ठ्रोह भविष्यवक्ता बि खड़े लोहतो। 38दंङ दिह ए मूसा भविष्यवक्ता ओ रुपंङ हेनातु बाह-मेमे तंङ साते तोहई अपेहल दोरे सुनसान ठहरि इच्च़ा साते ठ्रोहका तोईरे, दोर्तिंङ मूसा बि परमेश्वरो दोरच़ी अनंत जीवनो बचन खोकसिरी, दंङ दोई दोरे बचन ञेंहतु कछंङ तचेक पिपि लहरी। 39पर हेनातु बाह-मेमे मूसा ओ गप्पा मनेक्च़ी माह जुंज़ातेर; पर दोऊ इन्कार लेह मिस्त्र देशो हखा वापिस इबि तातेर। 40दंङ मूसा ओ न्वा हारून ओ हखा कुहतोर, ञेंहतु थल्जी झांह ठ्रोह सद बणाएतु, अंऊ मिस्त्र देशो हखा वापिस इबिमी थल्जी ञेंहतु तुईज़ी जोहतो; छना कुचे दिह दू मूसा अंऊ ञेंतिंङ मिस्त्र देशंङ च़ि रेंज़ा हति, ञेंतिंङ पता माह दोबि छि शुहचा। 41दुह ध्याड़ारिंङ दोच़ी इच्च़ा रेंज़ा ओ मुर्ति बणेंके, दोऊ मुर्ति ऊ तुईज़ी बलि चढातिर; दंङ एनोह गुहड़ो कमो दोरच़ी मगन शुहबी लेहतिर। 42दिरंङ परमेश्वरे दोतु दोरच़ी मोह्द किरच़ा, दोतिंङ सर्गंङ एके, लछ़ंङ दंङ कर तिंङ एनोह सगतु रुपंङ पूजा लहज़िमी थल्जी केह केहरी। छना भविष्यवक्ताऊ कताबंङ परमेश्वरे कुंई, हे इस्राएलो मीहरे, छि केहरे सुनसान ठहरि रिंङ निह्ज साल तचेक त्रैंई बलि ए अन्नबलि गिह्बी ए चढ़ाएकातेंई? 43दंङ केहरे दुह तम्बू कुरच़ा जोज़ातेन, अंऊर केहतु सद मोलेकओ मुर्ति ए केहतु सद रिफानो करओ मुर्ति तोहई, मतलब दोरे मुर्तिर अंऊ केहच़ी अराधना लहज़िमी थल्जी बणाएकातेंई। झांह लेह गेह केतिंङ बेबीलोन देश नुरेच़ि शिलज़ी बसाएपोग। 44गवाही ऊ तम्बू सुनसान ठहरि रिंङ ञेंहतु बाह-मेमेतु बिचंङ तोहई, छना परमेश्वरे ठेहराएते, अच़ि मूसा ओ हखा कुई; अंऊ अंज़े ते केई खांहषी तातन, दोऊ हिसाबे दिह्बी बणाएक्तु। 45दुह गवाही तम्बू बि मूसा ज़ि यहोशू बि रें च़रति दंङ दोबि हेंदु बाह-मेमे ज़ि यहोशू रंङ साते देर्तिंङ रेंज़ा हतिर। दोरे दुह गवाही तम्बू बि साते शिलज़ातेर अपेहल दोच़ी ऊईजाति मीहतिंङ अंऊ दि देशा रिंङ बंङज़ातेर दोतिंङ पोक्पी लेह च़रति, अतिंङ परमेश्वरे दोतु तुईज़ी ऊईतार लेह चरच़ाते। दंङ दुह तम्बू बि अई खानदान बि रें च़रति रज्ज़ा दाऊदो टेमा रिंङ तचेक। 46रज्ज़ा दाऊदो टोहकठे परमेश्वरे मोह्ड़े दाह लहरी; दिऊ थल्जी रज्ज़ा दाऊदे याकूबो परमेश्वरो थल्जी बंङज़िमी गवाही ओ तम्बू बि बणाएट्रिमी बिनती लहरी। 47पर दोऊ योह सुलेमान ज़ि दोऊ थल्जी मंदिर बणाएति। 48पर परमप्रधान परमेश्वर गुह्ट्री बणाएषी मंदिरा माह बंङज़ी, छना कि यशायाह भविष्यवक्ताओ कताबंङ च़ेहसी तोह,

49परमेश्वरे कुट्रा, स्वर्ग गिऊ सिहासन दंङ धरती गिऊ कोंज़ो पोयंङ चौकी शुह, गिऊ थल्जी केहरे छना ठ्रोह मंदिर बड़ाएपोंई? दंङ गिऊ नहच़िमी थल्जी अंऊ संङ ठहरि शोतो? 50छना कुचे गेह घेंङै ए स्वर्ग ए धरती रिंङ भत्ते धिर बणाएषी तातग।

51“हे ज़िद्दी ए सेहमो बिधर्मि दंङ रेड्रो टंऊंणे मीहरे, केहरे हमेशा पवित्र आत्माओ विरोध लहज़ातन, छना केहतु बाह-मेमेर लहज़ातेर, ध्वांए केहच़ी ला लहज़ातोनि। 52छि अपेहला अरिया झांह ठ्रोह भविष्यवक्ता शुंईआ, अतिंङ केहतु बाह-मेमेज़ि परेशान लहसी माह शोहर? देर तचेक कि दोच़ी दुह भविष्यवक्ताऊ ला हत्या लेह च़रतिर, अंऊ दोच़ी मसीहू अपिमी पाहठी तुईए कांहषी तरेर। अच़ि हमेशा दुह ए कम लहज़ाते अंऊ परमेश्वरा बि खुश लहज़ा। दंङ अपेहल मसीह अति, दोऊ हत्या लेह, केरे बिशवासघाती ए हत्यारे शुहचे इलिन। 53केहच़ी स्वर्गदूता तु दोरच़ी ठहरासी कानून ता खोक्शतंई, पर दोऊ भाषे माह लहरिन।”

स्तिफनुस ओ हत्या

54दिह गप्पारे रेड्राते यहुदी सेंहणार रोषेक्च़ा इलिर, दंङ स्तिफनुसो थल्जी महसे रोहष लहज़ी लेहतिर। 55पर स्तिफनुसे पवित्र आत्मारिंङ परिपूर्ण शुहचे स्वर्गो हखा खांई दंङ परमेश्वरो महिमा ए यीशु बि परमेश्वरो सुचंङ हासी खड़े खंड्रा ते कुंई,। 56“खंणुई, गेह स्वर्गा बि अलसा, ए मीहू योह बि परमेश्वरो सुचंङ हासी खड़े खंड्री लेहकी तोतोग।” 57दोहथल दोच़ी मोह्ड़े सगा रिंङ हाऊष रेह रेहट्रा बन्द लेह केहरिर, दंङ दोच़ी भत्ते ज़ि ठ्रोहका शुहचे स्तिफनुस बि च़ुमने च़रतिर, 58स्तिफनुस बि च़ुमनिर दंङ दोबि षोह्के यरूशलेम शहरंङ च़ि धह्तेका हुंच़े रह्घ द्रले केट्री लेहतिर, दंङ स्तिफनुस ओ टोईच़ी दोष लगाएच़ा मीहज़ी एनातु धह्कतेकी खमज़ेर युप्शी ते शाऊल मिंदंङ इच्च़ा छ़ोकरा ओ कछंङ केह्चे च़रतिर। 59दोरे स्तिफनुस ओ टोईच़ी रघ द्रले केट्री लेहकी तोईरे, दंङ दुह दिह कुट्रा ते प्रार्थना लहज़ी लेहकी तोहई, “हे प्रभु यीशु, गिऊ आत्माबि ग्रहण लोह।” 60दंङ पुष्टू भारे बंङज़ा ते जोरे हाऊष रेह कुई, “हे प्रभु, दिह पापो थल्जी दितिंङ माफ लेह च़रतु।” दंङ दिह कुचे थल दुह सिए इलि।

Currently Selected:

प्रेरित 7: LBFNT

Highlight

Copy