प्रेरित 26
26
अग्रिप्पा ओ तुईज़ी पोलुसो साफ-साफ कुट्री
1रज्ज़ा अग्रिप्पा ज़ि पोलुसरंङ साते कुतोह, “कनिंङ कनु बचावो थल्जी कुट्रिमी हुकुम तोह।” दिरंङ पोलुसे एनोह गुह्ट्र खेका लेह दोतिंङ चुपे बंङज़िमी इशारा रंड्री लेहती, दंङ एनोह बचावो थल्जी कुट्री शुरू लहरी।
2“हे रज्ज़ा अग्रिप्पा, अंयों गप्पो पाहठी यहुदी अगुवा ज़ि गिऊ टोईच़ी दोष लगाएच़ातोर, तोग कनु तुईज़ी दोतु जबाब रंड्रीमी थल्जी गेह घेंङौ बि धन्य चेहच़ातग”
3छना कुचे केहच़ी यहुदी तु भत्ते प्रथा ए कुवाद रूठे रंङ ञेंच़ातेंई। “झांह लेह गेह केतंङ धीरज़ तहज़िमी बिनती लहज़ातग। शबस अंऊ गप्पा गेह कुट्रातग, दोबि रेड्रुंई।”
4भत्ते यहुदी गिह्बी बाड़ेकतर बेहच़ी ञेंहच़ातोर। दोच़ी दि ला ञेंहच़ातोर छना कुचे गेह लगातार घेंङौ प्रदेशा रिंङ ए यरूशलेम शहरा रिंङ दोतंङ साते बंङज़ातेग।
5अगर दोरे गवाही रंड्री जुन्ज़ातोर, दंङ दोच़ी कुहच़ी तरपोर कि गिऊ बाड़ेकतर बेहच़ी गेह घेंङौ धर्म ए रीति-रिवाज़ो महस भाषे लहज़ातग छना कुचे गेह फरीसी तु शुगाह, अंऊ ञेंहतु धर्मो भत्ते बे कट्टर दल तोह।
6तोग दिह मुकदमा गिऊ टोईच़ी शुहबी लेहकी तोह छना कुचे दुह उम्मीदो वहज़ा ज़ि कि परमेश्वर दुह वाईदा बि हेंदु बाह-मेमेतंङ महसे तुहई लहसी ताहरे दोबि पूरा लोहतो कि दोई सिए दोतिंङ यह्च़ा श्रींङमी लेह च़रपोतो।
7ञेंहतु सनी गोत्र एनोह भत्ते सेहमंङ ज़ि रात-दिन परमेश्वरो सेवा लहज़ी लेहकी तोतोर। परमेश्वरा रंङ साते इच्च़ा वाईदा पूरा लहज़िमी उम्मीद तोह। हे रज्ज़ा, दि झांह तोह छना कुचे गिऊ विशवास तोह कि परमेश्वरे यीशु बि यह्च़ा श्रींङमी लेह च़रति दंङ दिए हेंदु आधार शुह, उम्मीद तोह कि दुह ला सिए दोतिंङ श्रींङे लेह च़रपोतो, ठीक दिए उम्मीद ओ यहुदी गिऊ टोईच़ी दोष लगाएच़ातोर।
8दोहपल पोलुसे रूहक्ति, “केहतु थल्जी दि विशवास लहज़ी छना खरे तोह कि परमेश्वरे सिए मीहतिंङ यह्च़ा श्रींङमी लहज़ा?”
9“गेह ला दि चेहतिगा कि यीशु पाहठी शिक्षा ओ विरोध लहज़िमी थल्जी गिह्बी महस धिर लेह लेहपोतो अंऊ कि नासरतो नगर बंङज़ा तोह।”
10दंङ गेह यरूशलेमंङ झांह ए लहरिगा; दंङ यहुदी मोह्ड़े पुरोहिता तु दोरच़ी अधिकार खोक्शे महसे परमेश्वरो मीहतिंङ कैदा रिंङ केहच़ी च़रतिगा, दंङ अपेहल दोरे सचे केट्रातेर, दंङ गेह ला दोतु विरोधा रिंङ शामिल शुहचे यवातेग।
11दंङ भत्ते यहुदी सभो घरबारंङ गेह दोतिंङ ताड़ना रें यीशु बुराई लहज़ा तेग, देर तचेक कि रोहष झांह ठ्रोह अपाते कि गेह रोहषे बमज़े ते दोतु नगरंङ इलजे दोतु टोईच़ी अत्याचार लहज़ातेग।
12“दिए मकसदे गेह इच्च़ा फेरा यहुदी मोह्ड़े पुरोहित दोरच़ी अधिकारो डाक लेहपच़े दमिश्को नगरंङ इलिगा;
13दंङ हे रज्ज़ा, अमरिंङ नीरो टेमारिंङ गेह सर्गंङ ऐके बे महस छंङी, घेंङौ ए गेरंङ साते ज़ोआ दोतु पिलाहासी खंणीग।”
14दंङ अपेहल ञेंरे भत्ते धरतीऊ टोईच़ी दह्चे इलि, दंङ गेह इब्रानी भाषा रिंङ, गेरंङ साते कुट्रा दि सग रेड्रीगा, हे शाऊल, हे शाऊल, केई गिह्बी छिल्ले तंग लहज़ातन? केई गिह्बी चोट रंड्रीमी कोशिशे केनाबि चोट रंड्रातन, छना इच्च़ा बंङ एनोह मालिको पैना ओ खिलाप लते केट्रा।
15गेह कुईगा हे प्रभु, कांह अरि शुनाह? प्रभु ज़ि कुतोह, गेह यीशु शुगाह, अंऊ दोबि केई तंग लहज़ातन।
16पर केरे अच़ुई, केनातु कोंज़ो टोईच़ी खड़े शुई; छना कुचे गेह केतिंङ घेंङौ सेवक बणाषिमी थल्जी प्रकट शुहसी शुगाह। केतिंङ कंड्री जुंशी तोह कि केहच़ी गेह तंङषे शुई, दंङ दि ला कंड्रुंई कि गेह केतिंङ तुंखा अंजा ध्याड़ा रिंङ छि कमोग।
17दंङ गेह कनिंङ ए कनु मीहतु दोरच़ी ए ऊईजाति दोरच़ी कनु टोईच़ी हमला लहज़िमी दोरच़ी बचाएपोग, अंऊ दोतु कछंङ गेह केतिंङ चरच़ातग।
18कि केरे दोतिंङ दि समझेक्सिमी थल्जी मदत लंहि कि छि सही शुह, कि दोरे हंयारो दोरच़ी छंङीरिंङ किरज़ा योर, दंङ शेतानो अधिकारो अधीन बेहच़ी परमेश्वरो अधिकारो अधीन बंङज़ी शुरू लेह तरपोर; दोहपल परमेश्वर दोतु पाप माफ लेह च़रपोतो, दंङ दुह दोतिंङ दुह भत्ते मीहतंङ विरासत रमतो अंऊ गिऊ टोईच़ी विशवास लहज़ातोर। दिए गप्पा यीशु ज़ि गिऊ हखा कुई।
19“दंङ हे रज्ज़ा अग्रिप्पा, गेह दू स्वर्गीय दर्शनों भाषे लहरिगा।”
20पर गेह तुहई दमिश्क शहरा रिंङ यहुदी तिंङ प्रचार लहरिगा, दोहथल यरूशलेम शहरो बंङज़ा तिंङ, दंङ भत्ते यहूदिया प्रदेशारिंङ रिंङ दंङ ऊईजाति मीहतु बिचंङ गेह प्रचार लहरिगा, कि केनातु पापो दोरच़ी सेहम किर्ज़ुंई दंङ परमेश्वरो हखा किरज़ा केनातु व्यवहारो दोरच़ी दि साबित लंहि कि केहच़ी पापो दोरच़ी केनातु सेहम किरज़े चरच़ातंई।
21छना कुचे गेह दि गप्पो प्रचार लहज़ी लेहकी तोईगा, यहुदी ज़ि गिह्बी यरूशलेम मंदिरंङ चुमज़े सचे केट्रिमी कोशिश लहज़ातेर।
22पर परमेश्वरे गिऊ मदत लहज़ी लेहकी तोह दोई गिह्बी दि ध्याड़ा तचेक बचाके तहसी ततो। दिऊ थल्जी गेह देर खड़े शुचि कुट्रातग दुह भत्ते मीहतिंङ अंऊ कवचि तोतोर या मोह्ड़े कि अरि यीशु शुह, दंङ गेह दू गप्पा छोड़ेके ऊई छिल्ला माह कुट्रातग, अंऊ भविष्यवक्ता ए मूसा ओ कानूने ला कुई कि शुहबिमी तोह,
23कि मसीह बि दुख उठाएच़ीमी शोतो, दंङ दू ए भत्ते बे तुहई सिए दोतु बिचंङज़ि श्रींङे शुहचे, यहुदी ए ऊईजाति तु बिचंङ दि घोषणा लहज़िमी थल्जी कि दोरे बचेके योर, अंऊ कि छंङी ओ ठ्रोह तोतोर।
24अपेहल पोलुस झांह ठ्रोह जबाब रंड्री लेहकी तोहई, दोहपल फेस्तुस जोरे सग रंङ साते कुतोह, “हे पोलुस, कांह बमजी शुनाह। महस विद्याज़ि कांह बमजी लेह केहतो।”
25पर दोई कुई, “हे महामहिम फेस्तुस, गेह बमजी माह शुगाह, पर सच्चाई ए बुद्धि ओ गप्पा कुट्रातग।
26रज्ज़ा ला अतु तुईज़ी गेह निडर शुहचे कुट्री लेहकी तोतोग, दि गप्पारे ञेंहच़ा; दंङ गिह्बी विशवास तोह, कि दि गप्पा ज़ि छिल्ला दोऊ दोरच़ी व्याके माह, छना कुचे दिरे घटना गुप्तारिंङ माह शुई।
27हे रज्ज़ा अग्रिप्पा, छि केई भविष्यवक्तातु दोरच़ी कुहषी गप्पा ओ टोईच़ी विशवास लहज़ातन आ? वोई, गेह ञेंच़ातग, कि केई विशवास लहज़ातन।”
28दोहपल अग्रिप्पे पोलुसरंङ साते कुई, “छि केई गिह्बी थोड़े अरे समझाएक्ची रंङ साते केहच़ी गिह्बी मसीह बणाएषी थल्जी मज़बूर लेह जुंज़ातंई आ?”
29पोलुसे कुई, “परमेश्वरो हखा गिऊ प्रार्थना दि तोह कि छि थोड़े रिंङ, छि महसे रिंङ, सिर्फ कांह ए मशत, पर अंयों मीहच़ी तोग गिऊ रेड्रातोर, गिऊ दि बन्धन केट्रा दोरे गिऊ ठ्रोह मसीह विशवासी बणेंके योर।”
30दोहपल रज्ज़ा अग्रिप्पा ए राज्यपाल फेस्तुस दंङ दोऊ कवचि रिंङ बिरनीके दंङ दोतंङ साते बंङज़ा दोरे खड़े शुहचे अच़ा इलिर;
31अपेहल दोरे धकते इबि लेहतिर, दोरे इदि-अई दिरंङ साते कुट्री लेहतिर, “दि मीह मौतो सज़ा या जेलंङ केट्रिमी जोगे छल्ले अपराध लहसी माह।”
32अग्रिप्पा ज़ि फेस्तुस रंङ साते कुई, “अगर दि मीहज़ी दि मांग लहसी माह शुचंङ कि महाराजा ज़ि दोऊ फेंसला लोहतो, दंङ दि रिहा शुहबी तरच़ाते।”
Currently Selected:
प्रेरित 26: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
