प्रेरित 20

मकिदुनिया, यूनान ए त्रोआसारि पोलुस

1इफिसुसो मीहतु दि दंगा बंद शुहबिमी थल, पोलुसे चेला तिंङ बुलाके दोतिंङ याहब रेंई, दोऊ थल दोई दोतिंङ बिदा लहरी दंङ मकिदुनिया प्रदेशो हखा इबिमी थल्जी दोतु दोरच़ी हुंच़ा इलि। 2दुह मकिदुनिया प्रदेशो इच्च़ा ठहरि ओ अई ठहरि यात्रा लहज़ा दंङ चेला तंङ दोआ दंङ दोतिंङ छा कुट्रीमी दोरच़ी याहब रंड्री लेहती। दोऊ थल दुह यूनान प्रदेशो हखा अच़ा अति। 3दोर्तिंङ षुमु लाह बंङज़िमी थल पोलुस समुंद्रो दोरच़ी सीरिया प्रदेशो हखा इबिमी तहरे, पर दोई रेड्रिर कि रेह यहुदी सेंहणारे दोबि अमरिंङ सच़िमी थल्जी सोचेकच़ी लेहकी तोतोर, दंङ दिऊ थल्जी दोई मकिदुनिया प्रदेशंङ च़ि शुहचे सीरिया प्रदेशो हखा इबिमी फेंसला लहरी। 4दिह यात्रा रिंङ बिरयो नगरङ बंङज़ा पुरूर्सो योह सोपत्रुस, थिस्लुनीकिया शहर ओ अरिस्तखुर्स ए सिकुन्दुस, दंङ दिरबे नगरो गयुस, दंङ तीमुथियुस, ए असिया प्रदेशो तुखिकुस दंङ त्रुफिमुस असिया प्रदेश तचेक हेंदंङ साते यात्रा रिंङ साते तोईरे। 5दिहरे साथी यात्री रे ञेंहतु तुंखा अच़ा इलिर दंङ दोरे त्रोआस इलाकाङ पिचे दोतिंङ रुमज़ी लेहतिर। 6दंङ ञेंहरे सुम मेह रोटी ऊ त्याहरो थल फिलिप्पी शहरो दोरच़ी समुंद्रो अमज़ि ङा ध्याड़ारिंङ त्रोआस इलाका रिंङ पिचे इलि, दंङ निज़ा ध्याड़ा तचेक दोर्तिंङ ए बंङज़ा इलि।

त्रोआसारि युतुखुस श्रींङमी लहच़ी

7हप्तो मुन्डा ध्याड़ा रिंङ अपेहल ञेंहरे रोटी थक्च़िमी (प्रभु भोज) थल्जी ठ्रोहका शुईरे, ता पोलुसे अंऊ ऊईरग इबिमी तोहई, दोतंङ साते गप्पा लहरी, दंङ आधा राता रिंङ तचेक शिक्षा रंड्री लेहती। 8अंऊ अटारीरिंङ ञेंहरे ठ्रोहका तोहनि, दोर्तिंङ महसे छंङी तुपसी तोईरे। 9दंङ युतुखुस मिंदंङ इच्च़ा छ़ोकरा तोहई दंङ काल्डु टोकठे बंङज़ा तोहई दंङ महस इम ज़ि योंखा शुहबी लेहकी तोहई, दंङ अपेहल पोलुसे महस टेम तचेक गप्पा लहज़ी लेहती दंङ इमो बहज़ा ज़ि षुमु मंज़िलो कल्डु दोरच़ी योंखा दह्चे इलि, दंङ सिए इलि। 10पर पोलुस योंङ दोऊ कछंङ इलजे दंङ दोरंङ साते ग्वाक्षा इलि, दंङ ग्वाक्षा ते कुई, बेऊ थाह; छना कुचे दुह हेंतेग ला श्रींङी तोह। 11दोई यह्च़ा तोरिंङ इलजे रोटी थक्चीरि (प्रभु भोज) दंङ दोच़ी ठ्रोहका शुहचे बगत ज़हरिर, दंङ मुन्जे शुहतर तचेक दोतंङ साते गप्पा लहज़ी लेहती; दिऊ थल अच़ा इलि। 12दंङ दुह छ़ोकरा बि श्रींङे चुंङ हतिर दंङ दोरे महस खुश शुहचे इलिर।

त्रोआसारि मिलेतुसो यात्रा

13पोलुसे अस्सुस शहरा इबिमी थल्जी पैदल यात्रा लहज़िमी फेंसला लहरी। ञेंहतु बिचंङ ज़ि ऊई मीहच़ी त्रुआस शहरंङ ज़ि जहाज़ो दोरच़ी तुंखा अच़ा इलिर, दंङ दोरच़ी ञेंरे अस्सुसो दोरच़ी पोलुसा बि जहाज़ो दोरच़ी शिलज़िमी योजना लहरिर। 14अपेहल ञेंरे अस्सुस शहरंङ पिचे इलि, दंङ दुह हेंदु किशती रिंङ सवार शुचि इलि दंङ हेंदु किशती मितुलीन शहरो हखा अच़ा अति। 15ऊईरग, अस्सुसो दोरच़ी यात्रा लहज़ा, ञेंहरे खियुसो टापू कछंङ पूरा रातारिंङ बंङज़ा इलिन। ऊईरग ञेंहतु किशती ज़ारी तोहई दंङ सामुस टापू रिंङ रूहम्ज़ा इलि। ऊईरग ञेंरे मीहरे मीलेतुस शहरंङ पिचे इलिन। 16पोलुसे इफिसुस शहरंङ माह तकसिमी फेंसला लहरी छना कुचे दुह आसिया प्रदेशारिंङ ऊई ध्याड़ा बंङज़ी माह तहरे, कि झांह शुबी मेस, कि दोबि असिया प्रदेशारिंङ ख्राये शुहचे योतो; छना कुचे दुह बल्ज़ा तोहई, कि अगर शुहचे तरपोतो ता दुह पिन्तेकुस्तो त्याहरो थल्जी यरूशलेम शहरारिंङ बंङज़ोतो।

इफिसुसो पुराना दोतिंङ उपदेश

17अपेहल ञेंरे मीलेतुस शहरंङ अतिनि, दंङ पोलुसे इफिसुसो कलीसिया ओ सेंहणा तिंङ दोतु कछंङ अपिमी थल्जी बुलाएति। 18दोरे दोऊ कछंङ अतिर दंङ दोतंङ साते कुई, “केरे गेरंङ साते बंङज़िमी मुक्का गिऊ जीवन ओ तरीका ञेंहनि, अंऊ कि गिऊ मुन्डा ध्याड़ा रिंङ आसिया प्रदेशा रिंङ अपिमी थल शुरू शुह्ते।” 19केहच़ी ञेंहच़ातंई कि गेह प्रभु यीशु अंयों दीनता रंङ साते सेवा लहज़ातेग, दंङ गेह अपेहला-अपेहला मीहतु थल्जी सोचेक्गी छना क्रापतेग। केहच़ी दि ला ञेंहनि कि गेह छना मुसीबता रिंङ अतिगा छना कुचे यहुदी अंऊ विशवास माह लहज़ा तोईरे, हमेशा गिह्बी सच़िमी कोशिश लहज़ातेर। 20दंङ अंऊ-अंऊ गप्पा केहतु फायदो थल्जी तोह, दोतिंङ कंड्रिमी थल्जी ए मीहतु तुहई ज़ि सिखाच़िमी थल्जी षेहद माह लहरी। 21गेह यहुदी मीहरे ए ऊईजाति मीहतिंङ शिक्षा रेंईगा, दुह भत्ते तंङ साते कुईगा कि दोरे एनोह पापो दोरच़ी सेहम किरच़ी च़रतुंई, दंङ ञेंहतु प्रभु यीशु मसीहू टोईच़ी विशवास लंहि। 22दंङ हेंतेग गेह पवित्र आत्माओ आज्ञा रंङ साते यरूशलेम शहरो हखा यवातग, दंङ ऊई माह ञेंच़ातग, कि दोहर गेरंङ साते छि-छि शोतो। 23पर दिह कि पवित्र आत्मा च़ि भत्ते इलाका रिंङ गवाही रंड्रा-रंड्रा गेरंङ साते दिह कुट्रा कि बंधन ए कलेश कांह थल्जी त्यार तोह। 24पर गिह्बी दि गप्पो छल्ले फर्क माह पढेक्पा, कि मीहच़ी गिह्बी घाह केट्रातोर, अगर गेह तुहई बेहच़ी दुह कम पूरा लोहग अंऊ प्रभु यीशु ज़ि गिह्बी लहज़िमी थल्जी कुहषी ततो। दोई गिह्बी मीहतिंङ रूठे खबर सुनाएच़िमी थल्जी अंङषी ततो। परमेश्वरे हेंदु थल्जी दुह कम लहज़ा हेंदिंङ बचाएच़ा अंऊ दोऊ हेनर जोगे माह तोईनि। 25दंङ हेंतेग गेह ञेंच़ातग, कि केरे भत्ते र अच़ि परमेश्वरो राजो प्रचार लहज़ा तंई गिऊ मोह्द यह्च़ा माह खमोंई। 26झांह लेह गेह तोग कि ध्याड़ा रिंङ केतंङ साते गवाही रंड्रा कुट्रातग, अगर केहतु बिचंङ अरिया यीशु ऊ टोकठे विशवास मेह सिए यवात, दंङ दुह गिऊ ज़िम्मेवारी माह शुह। 27छना कुचे गेह केतिंङ दोहर भत्ते धिर कंङे चरच़ातग, अंऊ परमेश्वरे चेहच़ा कि केहच़ी ञेंहनि। 28झांह लेह केरे केनातु ध्यान तंही दंङ दुह झुण्ड़ो ला, अतु पोहाल केतिंङ पवित्र आत्मा ज़ि अंङषी ततो कि केरे परमेश्वरो मीहतु देखभाल लंहि, अपि दोई एनोह शुई रें च़ुमसी शुह। 29गेह ञेंच़ातग कि, गिऊ इबिमी थल केहतु बिचंङ हप्सी कुट्रार अपोर, दंङ विशवासी तिंङ महस नुकसान लोहर, दिरे दुह फ्राक्चा ओमो ठ्रोह शोहर अंऊ त्रेंईतिंङ सचे चरच़ातोर। 30देहर तचेक कि केहतु केनातु विशवासी झुंडो दोरच़ी झांह ठ्रोह मीहरे अपोर, अंऊ चेला तिंङ एनोह थलेसी लहज़िमी थल्जी नोखे गप्पा लहज़ातोर। 31हिद तंही कि निरा ए राता रिंङ षुमु साल तचेक लगातार केतिंङ गेह दुह खबर घड़ी-घड़ी सिखाएकातग, दंङ केतिंङ टिरारिंङ मिक्ति बहाके केतिंङ खबरदार लहरिगा कि ऊई अंऊला खबरो टोईच़ी विशवास थालंही। 32दंङ हेंतेग गेह केतिंङ परमेश्वरा बि सौपेंकाच़ातग दंङ दोऊ मोह्ड़े दाह खबर अंऊ केतिंङ विशवासा रिंङ पक्‍का लहज़िमी जोगे तोह दंङ केतिंङ दुह भत्ते मीहतिंङ विरासत रंड्री अंऊ दोरे दोऊ एनोह शुरे। 33गेह अतुआ मुल, ज़ंङ दंङ खमज़े तु लालच माह लहरिगा। 34केहच़ी केनाच़ि ए दिह ञेंएनि कि दिह गुह्ट्र गिऊ ए गिऊ साथी तु मदत लह्सी शुह। 35गेह केहतु थल्जी लगातार इच्च़ा उदाहरण बणेंके तोतोग दि कंड्रीमी थल्जी कि छना मेहनत लहज़ी केरे ज़रूरत मंद मीहतु मदत लेह तरपोंई। केतिंङ प्रभु यीशु बचन हिद तहज़ी जूंस छना कुचे दोई एनाह ए कुहषी ततो कि, लेहपच़िमी बदला रंड्रीरी महस खुशी खोकसी।

36दिह कुचे थल दुह पुष्टू भारे बंङज़ा दोतंङ साते प्रार्थना लहज़ी लेहती। 37दोहथर दोरे भत्तेरे महस क्रपि लेहतिर दंङ पोलुसा रंङ साते ग्वाक्षा दोबि उकू रंड्री लेहतिर। 38दोरे खास लहज़ी दिह गप्पो ध्यान शोक लहज़ातेर, अंऊ दोई कुहषी तहरे, कि केहच़ी गिऊ मोह्द यह्च़ा माह खमोंई, दंङ दोच़ी दुह जहाज़ा तचेक पिपि लहरिर।

Currently Selected:

प्रेरित 20: LBFNT

Highlight

Copy