प्रेरित 16
16
पोलुस तीमुथियुसबि साते शिलज़ी
1पोलुस ए सिलास दिरबे शहरंङ इलिर दंङ दोरकी विशवासी तंङ दोआ दंङ दोरच़ी लुस्त्रो शहरो हखा इलिर। दंङ दोहर इच्च़ा विशवासी बंङज़ाते अतु मिन तीमुथियुस तोहई। दोऊ याह इच्च़ा यहुदी विशवासी तोहई, पर दोऊ बाह ऊई जातिऊ तोहई। 2दोऊ लुस्त्रा शहर दंङ इकुनियुम शहरारिंङ विशवासी तु बिचंङ रुठे मिन तोहई। 3पोलुसे जुंज़ाते कि तिमुथियुस दोहरंङ साते योतो। पर दोरकी भत्ते मीहच़ी ञेंहच़ातेर कि दोऊ बाह इच्च़ा ऊई जातिऊ तोहई, दिऊ थल्जी पोलुसे भत्ते बे तुहई दोऊ खतना लहरी ताकि अंऊ नगरंङ दोतिंङ इबि जुंज़ातेर दोऊ साथी यहुदी तु भावना रिंङ ठेस लेहपि माह जूंस। 4पोलुस ए दोऊ साथीरे नगर-नगर रंङ इलजे दुरे दुह कानून अंऊ यरूशलेम शहर प्रेरित ए कलीसिया ओ सेंहणा ज़ि ठहराएसी तोहई। 5झांह लेह कलीसिया रे विशवास रंङ पक्का शुहबी लेहती दंङ गिनती रिंङ बड़ेक्च़ी लेहती।
त्रोआसङ पोलुसो दर्शन
6पोलुस, सिलास ए तीमुथियुस फ्रुगिया ए गलातिया प्रदेशंङ ज़ि इच्च़ा नगरंङ ज़ि अई नगरंङ इलिर, दंङ दोरे आसिया प्रदेश रिंङ प्रचार लहज़ी जुंज़ातेर पर पवित्र आत्मा ज़ि दोतिंङ दोर इबिमी थल्जी इंकार लेह च़रति। 7दंङ दोच़ी मुसिया प्रदेशो कछंङ पिचे, बितुनिया प्रदेशो हखा इबिमी जुन्ज़ातेर; पर यीशु आत्माज़ि दोतिंङ इबी मा रेंई 8दंङ दोरे मुसिया प्रदेशो दोरच़ी जोज़ा त्रोआस#16:8 लूका अच़ि दि कताब च़ेहसी शुह पोलुस सिलास ए तीमुथियुसा रंङ जुड़ेकी इलि। बंदरगाह पिचे इलिर। 9दोहर पोलुसे रातारिंङ इच्च़ा दर्शन खंणी कि मकिदुनिया प्रदेशो इच्च़ा मीह दोहर खड़े तोहई, दंङ दोतंङ साते विनती लहज़ी कुट्री लेहती, “मकिदुनिया प्रदेशो हखा जहाज़ंङ अतंई दंङ ञेंहतु मदत लोहू।” 10दोऊ दि दर्शन खंड्रिमी थल ञेंहच़ी मकिदुनिया प्रदेश इबिमी विचार लहरी, दि ञेंए कि परमेश्वरे दोतिंङ रूठे खबर सुनाएच़िमी थल्जी बुलाच़ी शुह।
फिलिप्पीरि लुदियाओ सेहम किरच़ी
11दिऊ थल्जी त्रोआसो बंदरगाहो थल्जी ञेंरे इच्च़ा जहाज़ो टोईच़ी अच़ा इलांई दंङ सुमत्राके टापू इलांई दंङ दोर्तिंङ पूरा राता रिंङ बंङज़ा इलांई, दंङ ऊईरग बंदरगाह नियापुलिस शहर इबिमी थल्जी जहाज़ो टोईच़ी बंङज़िनि। 12नियापुलिसो दोरच़ी जोज़ा ञेंरे फिलिप्पी शहरंङ पिच़ि इलि, अंऊ मकिदुनियो प्रदेशो इच्च़ा मोह्ड़े नगर, दंङ रोमी तु बस्ती तोहई; दंङ ञेंहरे दुह नगरंङ थोड़े अरे ध्याड़ा तचेक बंङज़िनि। 13अरामो ध्याड़ा रिंङ ञेंरे बेंड़ीऊ मुखारिंङ शहरो मोह्ड़े पेतंङ धकते इलजे दि सोचेके इलिर कि यहुदी मीहतु थल्जी प्रार्थना लहज़िमी ठहरि शोतो। दंङ रैह मेच़िमी दोहर प्रार्थना लहज़िमी ठ्रोहका तोईरे, दंङ ञेंहच़ी बंङज़ा ते दोतिंङ यीशु पाहठी कंड्रेतेंई। 14दंङ लुदिया मिंदंङ थुआतीरा नगरो पोरलो खमज़े लंङज़ा अंऊ परमेश्वरो अराधना लहज़ार तोहई, रेड्राते, दंङ प्रभु ज़ि दोऊ सेहम अल्ज़े च़रति, कि दोई पोलुसो गप्पारिंङ ध्यान रमोतो। 15दंङ अपेहल दोई एनोह भत्ते खानदाना रंङ साते बपतिस्मा लेह्प्ती, दंङ दोई विनती लहरी, “अगर केहच़ी गिह्बी परमेश्वरो विशवासिनी चेहच़ातंई, दंङ अंज़े गिऊ चुंङ बंङज़ुंई, दंङ दोई ञेंहरे मानाके रेंज़ा शिली।”
पोलुस ए सीलास बंदीगृहरिङ
16इच्च़ा ध्याड़ा अपेहल ञेंरे रोज प्रार्थना लहज़िमी ठहरि यवातेंई, दंङ ञेंहतिंङ अमरिंङ इच्च़ा दासी ञेंतंङ साते दोई अति अतु अन्द्रेग इच्च़ा झांह ठ्रोह मांजी आत्मा तोहई, अतु मदत रंङ साते दोई भविष्य कंड्राते; दंङ भविष्य कंड्रिमी रंङ साते एनोह मालिको थल्जी महस ढबाह कमाएक्चाते। 17दुह पोलुस ए ञेंहतु थल्जी अंज़े हाऊष रंड्री लेहती, “दिह मीह परमप्रधान परमेश्वरो दास शुह, अंऊ केतिंङ उद्धारो अमो पाहठी कंड्रा।” 18दोई महस ध्याड़ा तचेक दिह लोहवा लहते, पर पोलुस दुखी शुहचे इलि, दंङ किरज़ा दुह मांजी आत्मा रंङ साते कुहई, “गेह कनिंङ यीशु मसीह मिंदंङ दिह आज्ञा रंड्रातग, कि दिउ दोरच़ी हुंच़ा ईला,” दंङ दू ए मुक्का हुंच़ा इलि।
19अपेहल दोऊ मालिक ए दुह खांई, कि ञेंहतु कमाईऊ साधन योह्सा इलि, दंङ पोलुस ए सीलास बि च़ुमने चोको प्राधनो कछंङ षोह्के हतिर। 20दंङ दोच़ी दोतिंङ रोमीओ अधिकारी दोहर रेंज़ा शिलिर दंङ कुहई, दी मीहरे अंऊ यहुदी तोतोर, ञेंहतु नगरंङ दंगा फसाद लहच़ी च़रतिर। 21छना कुचे अंऊ दोच़ी रीति-रिवाज़ सिखाएच़ातोर, दोरे ञेंहतु कानूनो खिलाप तोतोर, दंङ दि योह्च़े माह कि ञेंहरे रोमीर दोतु हिद माह लोहनि। 22दंङ भीड़ो मीहरे पोलुस ए सीलास ओ विरोधंङ ठ्रोहका शुहचे अतिर, दंङ रोमी अधिकारी ज़ि सेनिकातिंङ हुकुम रेंईरे कि दोतु खमज़ेर फ्रक्शे युप्शी च़रतिर, दंङ दोतिंङ कोड़े लगाएच़ी मी हुकुम रेंई। 23दंङ महस कोड़े लगाके दोच़ी दोरे जेलंङ केहच़ी च़रतिर दंङ ठाणेदार बि हुकुम रेंई कि सोटेकी तौऊ। 24दोई झांह ठ्रोह हुकुम खोकसिमी थल दोतिंङ तोंखी इच्च़ा कोठरी रिंङ केह्चे च़रति दंङ दोतु कोन्ज़ार षंङणी रें छ़ुह्च़ी च़रतिर।
पोलुस ए सिलासो बंदीगृहो दोरच़ी मुक्ति
25अधा राता रिंङ लगभग पोलुस ए सीलास प्रार्थना लहज़ी दंङ परमेश्वरो भजन कुट्री लेह्की तोहरे, दंङ कैदी रे दोतु रेड्री लेह्की तोईरे। 26दिरंङ इच्च़ा मोह्ड़े भुयंल शुई, देहर तचेक कि जेलो मुयांद त्रुलजी लेहती, दंङ ध्वांए भत्ते पेतंङ अलसा इलिर; दंङ भत्ते तु षंङणी युप्सा इलि। 27दंङ ठाणेदार चेहके इलि, दंङ जेलो पेतंङ अलसा तंङे दिह चेहती कि भत्ते कैदी रे पोक्शे इलिर, दोई तलवार म्यानो दोरच़ी हुंज़ि एनाबि सच़िमी पाहठी सोचेक्सी लेहती। 28पर पोलुसे जोरे हाऊष रें दोरंङ साते कुई, “केनाबि छल्ले नुकसान थाह लौऊ, छना कुचे ञेंहरे भत्ते देहर तोतोंई।” 29दोहपल दुह लम्प पेट्री ज़रका रें तोंखा अति, दंङ डकेके पोलुस ए सीलासो तुईज़ी दह्चे इलि; 30दंङ दोई दोतिंङ धह्कते का शिली कुई, हे रुठे मीहरे, उद्धार खोकसिमी थल्जी गेह छि लोहग? 31दोच़ी जुबाब रेंई, प्रभु यीशु ऊ टोहकठे विशवास लोहू, दंङ कांह ए कांह घराना बि उद्धार खोकसोतो। 32-34दोहपल ठाणेदारे पोलुस ए सिलासा बि एनोह चुंङ रेंज़ा हति, दंङ दोतु घाव शुल्ज़े च़रति, दंङ दोतिंङ बगत रांई। दोई एनोह चुंङी भत्ते मीहतिंङ चेहपि लहरी दंङ पोलुस ए सिलासे दुह भत्ते तिंङ प्रभु यीशु पाहठी कंङे च़रति। दुह भत्ते मीहच़ी यीशु टोईच़ी विशवास लहरिर। ध्वांए, पोलुस ए सिलासे ठाणेदारे ए दोऊ भत्ते टबरातिंङ बपतिस्मा रें च़रतिर। दोरे महस खुश तोईरे, छना कुचे हेंतेग दोरे भत्तेरे प्रभु यीशु टोईच़ी विशवास लहज़ातेर।
35ऊईरग मुंजे रोमी अधिकारी ज़ि सेनिका तिंङ दि हुकुम रंङ साते ठाणेदारो कछंङ च़रतिर कि पोलुस ए सिलासा बि छोड़ेके च़रतुंई। 36ठाणेदार ज़ि दिह गप्पारे पोलुस रंङ साते कुई, “अधिकारी ज़ि केतिंङ छोड़ेके केट्रिमी हुकुम रेह चरच़ातोर। दंङ देहर च़ि हुंच़ा रूठे रंङ साते अच्च़ा इलांई।” 37पर पोलुसे सेनिकातिंङ साते कुई, “दोच़ी ञेंतिंङ अंऊ रोम शहरो तोईरे, छाह गलती मेह, मीहतु तुईज़ी घाह केट्रिमी हुकुम रेंईर दंङ जेलंङ केहच़ी च़रतिर, दंङ हेंतेग ञेंहरे छि चुपे देरच़ी अच़ा योंई आ?” पर दोरे अंज़े ञेंतिंङ धह्तेका रेंज़ा शिलिरी। 38सैनिका ज़ि दिह गप्पा रोमी अधिकारी तंङ साते कुईर, दंङ दोरे दिह रेड्रीमी थल कि दोरे रोम शहरो तोईरे, वेवा इलिर#16:38 दोरे दिऊ थल्जी वेवा इलिर छना कुचे छल्ले गलती मेह पोलुस ए सिलासा बि घाह केहतेर दंङ झांह लेह रंङ साते अधिकारी तिंङ सज़ा खोकसिमी तोहई।। 39रोमी अधिकारी जेलंङ अतिर, दंङ पोलुस ए सिलासो दोरच़ी माफी पेट्री लेहतिर। दोहपल दोच़ी दोतिंङ जेलो धह्कते हुंच़े च़रतिर दंङ घड़ी-घड़ी दोतंङ साते शहरो धहकते इबिमी भीख पेट्री लेहतिर, 40दोरे जेलो दोरच़ी हुंच़ा लुदिया ओ दोर इलिर, दंङ विशवासी न्वा तंङ साते दोवा दोतिंङ शांति रेंई, दंङ अच़ा इलिर।
Currently Selected:
प्रेरित 16: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
