ଲୁକ 7
7
ଶଏଗଟ୍ ସେନାପତିର୍ ମ୍ନ୍କାର୍ ଅପିସରାର୍ ଚାକର୍ ବ୍ଲ୍ ଅଇଲା
(ମାଥି. ୮:୫-୧୩)
1ଯୀଶୁ ଲକ୍ମ୍ନ୍କେ ଇ ସ୍ବୁକ୍ତା କ୍ଇ ସ୍ର୍ଲା ହ୍ଚେ, ସେ କପର୍ନାହୁମ୍ ସ୍ହରେ ହଚ୍ଲା।
2ସେତି ଗଟେକ୍ ରୋମୀୟ ସେନାପତିର୍ ଚାକର୍ ଦୁର୍ବ୍ଳ୍ ଅଇ ମ୍ଲାହର୍ ଅଇରିଲା, ଆର୍ ସେ ଚାକର୍କେ ସେ ବେସି ଲାଡ୍ କ୍ର୍ତିରିଲା। 3ଜ୍ଡେବ୍ଳ୍ ସେ ସେନାପତି ଯୀଶୁର୍ ବିଷୟ୍ ଶୁଣ୍ଲା, ସେ କ୍ତେକ୍ ଯିହୁଦିମ୍ନ୍କାର୍ ପାରାଚିନ୍ମ୍ନ୍କେ, ତାର୍ ଚାକର୍କେ ବ୍ଲ୍ କ୍ର୍ତାର୍ ଗିନେ, ଯୀଶୁକେ ଜାଇକ୍ରି କୁଦିଆଣା ବ୍ଲି ତାକେ ଗ୍ଉଆରୁକେ ଲାଗ୍ଲା। 4ସେମ୍ନ୍ ଯୀଶୁର୍ ଲ୍ଗେ ଆଇଲାଇ ଆର୍ ଗ୍ଉଆରିକ୍ରି କଇଲାଇ, “ଅମାର୍ ସେନାପତି ତର୍ ତ୍ଇହ୍ଣି ସାଇଜ ହାଉତା ଦ୍ର୍କାର୍ ଆଚେ। 5କାଇତାକ୍ ସେ ଅମାର୍ ଯିହୁଦି ଲକ୍ମ୍ନ୍କେ ଲାଡ୍ କ୍ରୁଲା ଆର୍ ସେ ନିଜେ ଅମାର୍ ଗିନେ ଗଟେକ୍ ପାର୍ତେନା ଗ୍ର୍ ତିଆର୍ କ୍ରିଦେଇ ଆଚେ।”
6ତ୍ବେ ଯୀଶୁ ସେମ୍ନ୍କାର୍ ସ୍ଙ୍ଗ୍ ଗ୍ଲା। ସେମ୍ନ୍ ସେନାପତିର୍ ଗ୍ରେ ନ୍ହ୍ଚ୍ତା ଆଗେ, ଅଳ୍କ୍ ଦୁରିକେ ହ୍ଣି ସେନାପତି ତାର୍ ସ୍ଙ୍ଗୁଆଳିକେ କ୍ଇକ୍ରି ହ୍ଟାଇଲା, “ଗୁରୁ, ମ୍ର୍ ଗ୍ରେ କ୍ଷ୍ଟ ହ୍ଳିକ୍ରି ଆଉ ନାଇ, ତୁଇ ମର୍ ଗ୍ରେ ଆସ୍ତାର୍ ଅନ୍କ୍ରି ମୁଇ ଯଗ୍ୟ ନାଇ। 7ତ୍ବେ ମୁଇ ନିଜେ ତର୍ଲ୍ଗେ ଆସୁକେ ସାହାସ୍ ନ୍କେଲେ। ମ୍ତର୍ ସେତିହ୍ଣି ହ୍ଦେକ୍ ଆଦେଶ୍ ଦେ, ମର୍ ଚାକର୍ ବ୍ଲ୍ ଅଇଦ୍। 8କାଇତାକ୍ ମୁଇ ଅଦିକାରିମ୍ନ୍କାର୍ ତ୍ଳେ ରିଲେକ୍ ହେଁ, ମର୍ ତ୍ଳେ ସନିଅମ୍ନ୍ ଆତ୍ତି। ଆର୍ ମୁଇ ଗଟେଲକ୍କେ ଯା କଇଲେ ସେ ଯାଇଦ୍। ଆର୍ ଗଟେଲକ୍କେ ଆସ୍ କଇଲେ ସେ ଆସେଦ୍। ଆରେକ୍ ମର୍ ଚେଲାକେ ଇରିକ୍ର୍ ବ୍ଲି କଇଲେକ୍, ସେ ସେରି କ୍ରେଦ୍।”
9ସେଡେବ୍ଳ୍ ଯୀଶୁ ଇ ସ୍ବୁ କ୍ତାଶୁଣି ଚାନିଆ ଅଇଲା, ଆର୍ ହ୍ଚ୍ବାଟ୍ ବୁଲିକ୍ରି ତାର୍ ହ୍ଚେ ଆସ୍ତିରିଲା ଲକ୍ମ୍ନ୍କେ କଇଲା, “ମୁଇ ତୁମୁକ୍ମ୍ନ୍ କ୍ମ୍ଲେ, ଇସ୍ରାଏଲ୍ ଦେଶାର୍ ଲକ୍ମ୍ନ୍କାର୍ ବିତ୍ରେ ଅନ୍କ୍ରି ବିଶ୍ବାସ୍ କ୍ର୍ତା କୁଇଲକେ ମୁଇ ଦ୍କି ନ୍କେରି।” 10ହ୍ଚେ ସେ କୁଦୁକେ ଆସିରିଲା ଲକ୍ମ୍ନ୍ ସେନାପତିର୍ ଗ୍ରେ ଲେଉଟି ଗ୍ଲାଇ, ଆର୍ ତାର୍ ଚେଲାକେ ବ୍ଲ୍ ଅଇରିଲାର୍ ଦ୍କ୍ଲାଇ।
ଯୀଶୁ ରାଣ୍ଡି ମାଇଜିର୍ ମ୍ଲା ହଇସିକେ ଜୀବନ୍ କ୍ଲା
11ତାର୍ ହ୍ଚେ ଯୀଶୁ ନାଇନ ନାଉର୍ ସ୍ହରେ ଜ୍ମ୍କେ ବାଟ୍ ଦ୍ର୍ଲା, ଆରେକ୍ ତାର୍ ଚେଲାମ୍ନ୍ ଆର୍ ଗାଦି ଲକ୍ମ୍ନ୍ ତାର୍ସ୍ଙ୍ଗ୍ ଗ୍ଲାଇ। 12ଜ୍ଡେବ୍ଳ୍ ସେ ସ୍ହର୍ ଲ୍ଗେ ହ୍ଚ୍ଲାଇ, ଦ୍କା, ସେଡେବ୍ଳ୍ ଗଟେକ୍ ମ୍ଲା ମ୍ଳ୍କେ ଲକ୍ମ୍ନ୍ ବଇକ୍ରି ଆଣ୍ତି ରିଲାଇ, ସେ ମ୍ଲା ମ୍ଳ୍ ଗଟେକ୍ ରାଣ୍ତିର୍ ଏକ୍ଲା ହ୍କା ହଇସି ରିଲା, ସେ ଗାମାର୍ ଗାଦି ଲକ୍ମ୍ନ୍ ସେତି ତାର୍ସ୍ଙ୍ଗ୍ ଜାତିରିଲାଇ। 13ଜ୍ଡେବ୍ଳ୍ ଯୀଶୁ ମାପ୍ରୁ ସେ ରାଣ୍ତିକେ ଦ୍କ୍ଲା ତାର୍ ମ୍ନେ ବେସି ଜୀବନ୍ ଦୁକାଇ ତାକେ କଇଲା, “ଆର୍ କାନ୍ଦ୍ ନାଇ।” 14ଆରେକ୍ ସେ ମ୍ଳ୍ ଲ୍ଗେ ଗ୍ଲା ଆର୍ ମ୍ଳା ଡ୍ଣ୍ତିଆକେ ଚୁଇଲା, ଆରେକ୍, ମ୍ଳ୍କେ ବଇକ୍ରି ନେତିରିଲା ଲକ୍ମ୍ନ୍ ଟିଆ ଅଇଲାଇ, ଯୀଶୁ କଇଲା, “ଏ ଦ୍ଙ୍ଗ୍ଳା ହିଲା, ମୁଇ ତକେ କ୍ମ୍ଲେ ଉଟ୍।” 15ତ୍ବେ ମ୍ରିରିଲା ସେ ଦ୍ଙ୍ଗ୍ଳା ହିଲା ଜୀବନ୍ ହାଇ ଉଟିକ୍ରି ବ୍ସ୍ଲା, ଆର୍ କ୍ତାବାର୍ତା କ୍ରୁକେ ଦ୍ର୍ଲା, ଯୀଶୁ ସେ ଦ୍ଙ୍ଗ୍ଳା ହିଲାକେ ତାର୍ ଆଇସିର୍ ଆତେ ସ୍ହ୍ରିଦିଲା।
16ସେମାଡେ ସେତିରିଲା ସ୍ବୁ ଲକ୍ମ୍ନ୍ ବେସି କାବାଅଇଲାଇ ଆର୍ ଇଶ୍ଵରାର୍ ଦନ୍ୟବାଦ୍ କ୍ରି କ୍ରି କ୍ମ୍କେ ଦ୍ର୍ଲାଇ, “ଇଶ୍ୱର୍ ଗଟେକ୍ ବ୍ଡ୍ ବବିଶତ୍ କ୍ତା କ୍ଉତା ଲକ୍କେ ଅମାର୍ ଲ୍ଗେ ହ୍ଟାଇଲା ଆଚେ, ଆର୍ ଇଶ୍ୱର୍ ତାକାର୍ ଲକ୍ମ୍ନ୍କେ ଉଦାର୍ କ୍ରୁକେ ଆସିଆଚେ।” 17ଆରେକ୍, ଯୀଶୁର୍ ଇ ବିଷୟାର୍ କ୍ତାସ୍ବୁ ଯିହୁଦା ଜିଲା ଆର୍ ସେ ଚାରିହାକାର୍ ସ୍ବୁବାଟ୍ ଆଉଜି ଅଇଲି।
ଡୁବେନ୍ ଯୋହନ୍ ଯୀଶୁକେ ହ୍ଚାରୁକେ ହ୍ଟାଇଲା
(ମାର୍କ ୧୧:୨-୧୯)
18ଜ୍ଡେବ୍ଳ୍ ଡୁବେନ୍ ଦେତା ଯୋହନାର୍ ଚେଲାମ୍ନ୍ ଇ ସ୍ବୁ ବିଷୟାର୍ କ୍ତା ତାକେ କଇଲାଇ। 19ତ୍ବେ ସେ ସେ ବିତ୍ରାର୍ ଜଳେକ୍ ଚେଲାମ୍ନ୍କେ କୁଦ୍ଲା। ଆର୍ ଯୀଶୁର୍ ଲ୍ଗେ ଇରି ହ୍ଚାରୁକେ ହ୍ଟାଇଲା, ଯେ ଜୁଇଲକ୍ ଇ ହୁର୍ତିବିକେ ଆସ୍ତାର୍ ରିଲି, କାଇରି ତୁଇ ସେ ଲକ୍? କି ଅମି ଆର୍ କୁଇ ଅଲ୍ଗା ଲକ୍କେ ଜାଗି ରେମ୍ନ୍ଦ୍? 20ଯୀଶୁର୍ ଲ୍ଗେ ସେମ୍ନ୍ ଆସି ହ୍ଚାର୍ଲାଇ, “ଡୁବେନ୍ ଦେତା ଯୋହନ୍ ଅମୁକେ ତର୍ଲ୍ଗେ ହ୍ଚାରୁକେ ହ୍ଟାଇଲା ଆଚେ, ‘ଜୁଇଲକ୍ ଇ ହୁର୍ତିବିକେ ଆସ୍ତାର୍ ରିଲି, ତୁଇ କାଇରି ସେ ଲକ୍? କି ଅମି ଆର୍ କୁଇ ଅଲ୍ଗା ଲକ୍କେ ଜାଗୁନ୍ଦ୍?’”
21ସେଡେବ୍ଳ୍ ଯୀଶୁ ରଗ୍, କ୍ଷ୍ଟ ଆର୍ ବୁତ୍ଆତ୍ମା ଡ୍ସିରିଲା ବେସି ଲକ୍ମ୍ନ୍କେ ବ୍ଲ୍କ୍ଲା, ଆରେକ୍, ଗାଦି ନ୍ଦେକ୍ତା କାଣା ମ୍ନ୍କେ ଦ୍କୁକେ ଶ୍କ୍ତିଦିଲା। 22ଯୀଶୁ ଡୁବେନ୍ ଦେତା ଯୋହନାର୍ ଚେଲାମ୍ନ୍କେ କଇଲା, “ଜୁଇରି ଜୁଇରି ତୁମିମ୍ନ୍ ଦ୍କି ଆଚାସ୍ ଆର୍ ଶୁଣିଆଚାସ୍, ସେସ୍ବୁ ତୁମି ଜାଇକ୍ରି ଯୋହନ୍କେ କ୍ଉଆ, କାଣା ଲକ୍ମ୍ନ୍ ଆକି ଦ୍କ୍ଲାଇ, ଚଟା ଲକ୍ମ୍ନ୍ ଇଣ୍ଡୁଲାଇ, କୁଷ୍ଟରଗି ମ୍ନ୍ ବ୍ଲ୍ ଅମ୍ଲାଇ, ନ୍ଶୁଣ୍ତା ଲକ୍ମ୍ନ୍ ଶୁଣୁଲାଇ, ମ୍ଲା ଲକ୍ମ୍ନ୍ ଆରେକ୍ ଜୀବନ୍ ହାଇକ୍ରି ଉଟୁଲାଇ, ଆର୍ ଗ୍ରିବ୍ ଲକ୍ମ୍ନ୍କାର୍ ଲ୍ଗେ ଇଶ୍ଵରାର୍ ସୁବ୍କ୍ବର୍ ପର୍ଚାର୍ ଅମ୍ଲି। 23ଆର୍, ଜ୍ତେକ୍ ସ୍ବୁ ଲକ୍ମ୍ନ୍ ମକେ ବିଶ୍ବାସ୍ କ୍ରୁଲାଇ ସେମ୍ନ୍ ଦନ୍ୟ।”
24ଡୁବେନ୍ ଦେତା ଯୋହନାର୍ ଡ୍ଣ୍ତାସିମ୍ନ୍ ସେତିହ୍ଣି ଗ୍ଲାହ୍ଚେ ଯୀଶୁ ଡୁବେନ୍ ଦେତା ଯୋହନାର୍ ବିଷୟ୍ ଲକ୍ମ୍ନ୍କେ କ୍ମ୍କେ ଦ୍ର୍ଲା, “ତୁମି ଶୁନ୍ସାନ୍ ବ୍ଟାଲ୍ଗେ କାଇରି ଦ୍କୁକେ ଜାଇରିଲାସ୍, କାଇରି ହ୍ବନେ ଜ୍ଲ୍ତିରିଲା ର୍ନ୍ ଦ୍କୁକ୍ ଜାଇରିଲାସ୍? 25ସେରି ନ୍ଇଲେକ୍ ତୁମିମ୍ନ୍ କାଇରି ଦ୍କୁକ୍ ଜାଇରିଲାସ୍? ବୁତେକ୍ ଟ୍କାର୍ ହ୍ଚିଆ ହ୍ଜିରିଲା ଗଟେକ୍ ଲକ୍କେ ଦ୍କୁକେ ଜାଇରିଲାସ୍ କି? ଦ୍କା, ଜୁଇ ଲକ୍ମ୍ନ୍ ଅନ୍କ୍ରି ବୁତେକ୍ ଟ୍କାର୍ ହ୍ଚିଆ ହ୍ଜ୍ତି ଆର୍ ସୁକେ ରେତି, ସେମ୍ନ୍ ର୍ଜାର୍ ଗ୍ରେ ରେତି। 26ତ୍ବେ ତୁମି କାଇରି ଦ୍କୁକେ ଜାଇରିଲାସ୍? ସେରି ମକେ କ୍ଉଆ, ଗଟେକ୍ ବବିଶତ୍ କ୍ତା କ୍ଉତା ଲକ୍କେ ଦ୍କୁକ୍ ଜାଇରିଲାସ୍ କି? ମୁଇ ତୁମୁକ୍ ସ୍ତ୍ କ୍ମ୍ଲେ, ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ତ୍ଇହ୍ଣି ବେସିବ୍ଡ୍ ବବିଶତ୍ କ୍ତା କ୍ଉତାଲକ୍ ଡୁବେନ୍ ଦେତା ଯୋହନ୍କେ ତୁମି ଦ୍କୁକେ ଜାଇରିଲାସ୍।
27ଯାର୍ ବିଷୟେ ଦ୍ର୍ମ୍ ଶାସ୍ତର୍ ଲ୍ଗେ ଇରି ଲେକା ଅଇଲିଆଚେ, ‘ଦ୍କା, ମୁଇ ତର୍ ଆଗେ ତର୍ବାଟ୍ ଜ୍ତୁନ୍ କ୍ରୁକେ ମର୍ ଡ୍ଣ୍ତାସିକେ ହ୍ଟାମ୍ଲେ’ ଇରି ସେ ଲକ୍। 28ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ହୁର୍ତିବି ଲ୍ଗେ ଜ୍ର୍ନ୍ ଅଇରିଲା ସ୍ବୁ ଲକ୍ମ୍ନ୍କାର୍ ତ୍ଇହ୍ଣି ଡୁବେନ୍ ଦେତା ଯୋହନାର୍ ଜ୍ର୍ନ୍ ଅଲ୍ଗା। ମ୍ତର୍ ଜୁଇଲକ୍ ଇଶ୍ଵରାର୍ ରାଜିଏ ସାନ୍ ଅଇଦ୍, ସେ ଇ ଯୋହନାର୍ ତ୍ଇହ୍ଣି ଅଦିକ୍ ବ୍ଡ୍।”
29ଯୀଶୁର୍ ଇ ସ୍ବୁ କ୍ତାଶୁଣି, ସିସ୍ତୁ ଗେନ୍ତା ଲକ୍ମ୍ନ୍ ହେଁ ଯୋହନାର୍ ତ୍ଇହ୍ଣି ଡୁବେନ୍ ନିଲାଇ ଆର୍ ଇଶ୍ଵରାର୍ କାମ୍କେ ସ୍ତ୍ବ୍ଲି ଜାନ୍ଲାଇ। 30ମ୍ତର୍ ଫାରୂଶୀମ୍ନ୍ ଆର୍ ମୋଶାର୍ ନିଆଇ ଶିକାଉତା ଲକ୍ମ୍ନ୍ ଇଶ୍ଵରାର୍ ଇଚା ସେମ୍ନ୍କାର୍ ଜିବ୍ନେ ନ୍ମାନ୍ଲାୟ୍ ଆର୍ ଯୋହନାର୍ ତ୍ଇହ୍ଣି ଡୁବେନ୍ ନ୍ନିଲାଇ।
31ଯୀଶୁ ଆରେକ୍ କଇଲା, “ତ୍ବେ ମୁଇ କାର୍ ସ୍ଙ୍ଗ୍ ଅବାର୍ ଲକ୍ମ୍ନ୍କେ ସ୍ମାନ୍ କ୍ରିନ୍, ଆର୍ ସେମ୍ନ୍ କାର୍ହର୍ ଅଉତି? 32ସେମ୍ନ୍ ଆଟେ ବ୍ଜାରେ ବ୍ସିରେତା ସେ ହିଲାମ୍ନ୍କାର୍ ହର୍, ଜୁଇମ୍ନ୍ ଗଟେକ୍ ଜାଗାଇ କୁଦିଅଇ କ୍ଉତି ଅମି ତୁମାର୍ ଗିନେ ମରିବାଜା ବାଜାଇଲୁ, ମ୍ତର୍ ତୁମିମ୍ନ୍ ନାଚି ନ୍କେଲାସ୍, ଆର୍ ଅମି ଦୁକାର୍ ଗିତ୍ କଇଲୁ, ମ୍ତର୍ ତୁମିମ୍ନ୍ କାନ୍ଦି ନ୍କେରାସ୍।
33କାଇତାକ୍ ଡୁବେନ୍ ଦେତା ଯୋହନ୍ ଆସିକ୍ରି ରୁଟି କି ଅଙ୍ଗୁର୍ ର୍ସ୍ ନ୍କାଇଲା, ତ୍ବେ ତାକେ ତୁମି ବୁତ୍ଆତ୍ମା ଡ୍ସ୍ଲିଆଚେ ବ୍ଲି କ୍ମ୍ଲାସ୍। 34ମ୍ତର୍ ଜ୍ଡେବ୍ଳ୍ ମୁଇ ମାନାଇ ହିଲା ଆସି କାଇଲେ ଶକ୍ଲେ ବ୍ଲି ତୁମିମ୍ନ୍ ମକେ କ୍ମ୍ଲାସ୍, ‘ଦ୍କା, ଏ ଗଟେକ୍ କାଉରା ଆର୍ ମ୍ଦୁଆ ଆରେକ୍ ରିବ୍ନି ଆର୍ ପାପି ଲକ୍ମ୍ନ୍କାର୍ ବନ୍ଦୁ।’ 35ମ୍ତର୍ ଜୁଇସ୍ବୁ ଲକ୍ମ୍ନ୍କାର୍ ଲ୍ଗେ ଇଶ୍ଵରାର୍ ବୁଦି ଗିଆନ୍ ଆଚେ, ସେମ୍ନ୍ ଇଶ୍ଵରାର୍ ର୍ସ୍ତା ହ୍କା ସ୍ତ୍ବ୍ଲି କ୍ଉତି।”
ପାପି ମାଇଜିର୍ ପାପାର୍ କେମା
36ଗଟେକ୍ ଫାରୂଶୀ ତାର୍ ଗ୍ରେ ବ୍ଜି କାମ୍କେ ଯୀଶୁକେ କୁଦ୍ଲା, ଯୀଶୁ ତାର୍ ଗ୍ରେ ଗ୍ଲା ଆର୍ ବ୍ଜି କାମ୍କେ ବ୍ସ୍ଲା। 37ସେ ସ୍ହରେ ଦାରିକାମ୍ କ୍ର୍ତିରିଲା ଗଟେକ୍ ମାଇଜି ରିଲି, ଯୀଶୁ ଫାରୂଶୀର୍ ଗ୍ରେ ବଜି କାତାର୍ ଶୁନ୍ଲି ଆର୍ ବେସିଦାମାର୍ ବାସ୍ନା ଚିକାଣ୍ କାଚେକ୍ ଆନ୍ଲି। 38ଆର୍ ଯୀଶୁର୍ ହ୍ଚ୍ବାଟ୍ ଆସିକ୍ରି ତାର୍ ହାଦ୍ ଲ୍ଗେ ଟିଆଅଇ କାନ୍ଦି କାନ୍ଦି କ୍ରି ତାର୍ ଆସୁ ଲ୍ଗେ ଯୀଶୁର୍ ହାଦ୍କେ ବିଜାଇଲି, ଆର୍ ହ୍ଚେ ସେ ତାର୍ ମୁଣ୍ତାର୍ ବାଳ୍ସ୍ଙ୍ଗ୍ ତାର୍ ହାଦ୍କେ ହୁଚ୍ଲି ଆର୍ ଚୁମ୍ଲି, ତାର୍ ହ୍ଚେ ସେ ବାସ୍ନା ଚିକାଣ୍ ତାର୍ ହାଦେ ଲାଗାଇ ଦିଲି।
39ଜ୍ଡେବ୍ଳ୍ ସେ ଫାରୂଶୀ ଇରି ଦ୍କ୍ଲା, ସେ ମ୍ନେ ମ୍ନେ ବାବ୍ଲା, “ଯଦି ଇ ମାନାଇ ସ୍ତ୍କ୍ରି ଗଟେକ୍ ବବିଶତ୍ କ୍ତା କ୍ଉତାଲକ୍ ଅଇରିଲେକ୍, ତାକେ ଚୁଉତି ରିଲା ଇ ମାଇଜିର୍ ବିଷୟେ ସେ କେ, ଆର୍ କ୍ନ୍କା ମାଇଜି, ବ୍ଲେକ୍ ସେ ଗଟେକ୍ ପାପି ମାଇଜି ବ୍ଲି ଜାନ୍ଲା।” 40ଯୀଶୁ ତାକେ କଇଲା, “ଶିମୋନ୍, ମୁଇ ତକେ ଗଟେକ୍ କ୍ତା କଇନ୍ଦ୍।” ସେ କଇଲା, “ହେଁ ଗୁରୁ, କ୍ଉ।”
41ଯୀଶୁ ତାକେ ଇକ୍ତା କଇଲା, “ଗଟେକ୍ ମାଜନ୍ ଲକାର୍ ତ୍ଇହ୍ଣି ଦୁଇ ଲକ୍ ରୁଣ୍ ମାଗି ଆଣିରିଲାଇ। ଗଟେକ୍ ଲକ୍ ହାଁଚ୍ ଶଅ ରୁହାର୍ ଟ୍କା ଆରେକ୍ ଗଟେକ୍ ଲକ୍ ପଚାଷ୍ ରୁହାର୍ ଟ୍କା। 42ରୁଣ୍ ସୁଜୁକେ ସେମ୍ନ୍କାର୍ ଲ୍ଗେ ଟ୍କା ନ୍ରିଲି ଲାଗି, ସେ ମାଜନ୍ ଲକ୍ ସେ ଦୁଇଲକାର୍ ରୁଣ୍ ଚାଡିଦିଲା। ତ୍ବେ ସେ ଦୁଇଲକାର୍ ବିତ୍ରେ କେ ମାଜନ୍କେ ଅଦିକ୍ ଲାଡ୍ କ୍ରେଦ୍?” 43ଶିମୋନ୍ ଉତର୍ଦିଲା, “ମର୍ ଚିନ୍ତା ହ୍ର୍ ଜାର୍, ବେସି ରୁଣ୍ ଚାଡିଦିଲା ସେ ଲକ୍ ତାକେ ଅଦିକ୍ ଲାଡ୍ କ୍ରେଦ୍” ଯୀଶୁ କଇଲା, “ତୁଇ ଟିକ୍ କଇ ଆଚ୍ସି।”
44ତାର୍ ହ୍ଚେ ଯୀଶୁ ସେ ମାଇଜିକ୍ ଦ୍କିକ୍ରି ଶିମୋନ୍କେ କଇଲା, “ଇ ମାଇଜିକେ ଦ୍କୁ ହାରୁଲିସ୍? ମୁଇ ତର୍ ଗ୍ରେ ଆଇଲେ ମ୍ତର୍ ତୁଇ ମର୍ ଗଡ୍ ଦ୍ମ୍କେ ହାଣି ଗୁଳିକ୍ ହେଁ ନ୍ଦିଲିସ୍, ମ୍ତର୍ ଇ ଟକି ତାର୍ ଆସୁ ଲ୍ଗେ ମର୍ ହାଦ୍କେ ଦଇଲି ଆର୍ ମୁଣ୍ତାର୍ ବାଡେ ହୁଚ୍ଲି। 45ତୁଇମକେ ଚୁମି ନ୍କେଲିସ୍, ମ୍ତର୍ ଇ ମାଇଜି ମୁଇ ଇଗ୍ର୍ ବିତ୍ରେ ଆଇଲା ବ୍ଳ୍ହ୍ଣି ମର୍ ହାଦ୍କେ ଚୁମୁକ୍ ଦ୍ର୍ଲି ଆଚେ।
46ତୁଇ ମର୍ ମୁଣ୍ଡେ ଲାଗାମ୍କେ ଚିକାଣ୍ ହେଁ ନ୍ଦିଲିସ୍? ମ୍ତର୍ ଇ ମାଇଜି ମର୍ ହାଦେ ବାସ୍ନା ଚିକାଣ୍ ଲାଗାଇ ଦିଲି। 47ମୁଇ ତୁମୁକ୍ କ୍ମ୍ଲେ ଇ ମାଇଜି ମକେ ବେସି ଲାଡ୍ କ୍ଲିଲାଗି, ତାର୍ ବେସି ପାପ୍ କେମା ଅଇଲିଆଚେ, ଯେ ଅଳକ୍ ଲାଡ୍ କ୍ରେଦ୍ ତାର୍ ଅଳକ୍ ପାପ୍ କେମା ଅଇଦ୍।
48ତାର୍ ହ୍ଚେ ଯୀଶୁ ସେ ଟକିକେ କଇଲା, ତର୍ ପାପ୍ସ୍ବୁ କେମା ଅଇଲିବେ।” 49ସେତି କାମ୍କେ ବ୍ସିରିଲା ବିନ୍ସ୍ବୁ ଲକ୍ମ୍ନ୍ ତାକାର୍ ତାକାର୍ ବିତ୍ରେ କ୍ଉଆ କୁଇ ଅମ୍କେ ଲାଗ୍ଇ, “ପାପ୍କେ କେମା କ୍ରୁଲା ଏ ତ୍ବେ କେ?” 50ମ୍ତର୍ ଯୀଶୁ ସେ ମାଇଜିକେ କଇଲା, “ତର୍ ବିଶ୍ବାସ୍ ତକେ ଉଦାର୍ କ୍ଲିଆଚେ। ସୁସ୍ତା ସ୍ଙ୍ଗ୍ ଯାଆ।”
Currently Selected:
ଲୁକ 7: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
