मर्कूस 2

नेँग फिर नाए करपान बारो आदमी अच्छो भओ

(मत्ती. 9:1-8; लूक. 5:17-26)

1बहुत दिन पिच्छु, येशू कफर्नहुम सहरमे लौटो। और आदमीनके पता चलो, कि बा घरमे लौटके आओ हए। 2और इतनो आदमी जमा भए, कि बे हुवाँ अपाने नाए, हियाँतककी फाटकके बाहिर फिर ठाउँ नाए भओ, और बा बिनके बीचमे परमेश्वरको बचनसे परचार करत रहए। 3और एक नेँग फिर नाए करपान बारो मनैके, चार आदमी बोकके येशू ठिन लैके आए। 4पर भिडके मारे येशूके ढिँगै बो मनैके नाए पुगाएपाइं। तओ बे, घरको उपरकी छानीके उतकीं, और छानी उतको ठाउँसे, बोके गुन्द्री सहित तरे लरकाएके पुगाए दइं। 5येशू अपने उपर बिनको बिश्वास देखके बो मनैसे कही, “ए लौंणा, तेरे पाप क्षमा हुइगए।” 6तओ हुवाँ कुछ मोशाको नियम कानुन सिखान बारे बैठे रहएं। और अपन मनमे अइसे कहिके सोँचन लागे, 7“जा आदमी अइसो बात काहे कहात हए? जा त परमेश्वरको बदनाम करत हए। केबल परमेश्वरसँग इकल्लो पापनको क्षमा करनको अधिकार हए!”

8तओ बहे बेरा येशू उनको मनको बातके बुझलै, कि बे का सोँचनडटे हएं। तओ बा उन्से कही, “तुमके अइसो नाए सोँचन रहए। 9नेँग फिर नाए करपान बारो मनैसे ‘तेरे पाप क्षमा हुइगए’ काहन सजिलो हए, कि ‘उठ, अपन गुन्द्री उठाएके नेँग’ काहन सजिलो हए? 10पर मए चाँहत हओं, मए आदमीको लौंणाके पृथ्वीमे आदमीनको पाप क्षमा करनके अधिकार हए करके तुम जानओ।” तओ येशू बो मनैसे कही, 11“मए तोसे कहात हओं, उठ, अपन गुन्द्री उठा, और घरे जा।” 12बो उठो, और तुरन्त गुन्द्री उठाएके सबके अग्गुसे घरए चलोगओ। हियाँतककी, सब आदमी जा देखके अचम्मो मानीं, और “हम त अइसो कभु नाएदेखे रहएं” कहातए बे परमेश्वरको महिमा करीं।

चेला बननके ताहीं लेबीको बुलावट

(मत्ती. 9:9-13; लूक. 5:27-32)

13येशू एक चोटी फिरसे समुन्दरके किनारे गओ। और बहुत आदमी बाके ठिन आए, और बिनके परमेश्वरको बचनसे शिक्षा देन लागो। 14जातएजात येशू अल्फयसको लौंणा, जौनको नाउँ लेबी रहए, बहेके कर उठान बारेनके ठिहामे बैठो देखी और बोसे कही, “आ, और मिर चेला बननके ताहीं मिर पिच्छु लाग।” बो उठो, अपनो काम छोड दइ, और येशूको चेला बनिगओ।

15पच्छु येशू लेबीके घरमे पाहुना बनके चेलनके सँग खानु खान बैठो। तओ येशूके पिच्छु लागन बारे बहुत आदमी कर उठान बारे और बे, जौनके पापी मानत रहएं बेहुँ येशूके सँग बैठे, काहेकी बे फिर येशूके चेला रहएं। 16येशूके, कर उठान बारेनके सँग देखके, जौनक पापी मानो जात रहए, फरिसीनको समुह और मोशाको नियम कानुन सिखान बारे बाके चेलनसे कहीं, “बा काहे कर उठान बारे और पापीनके सँग बैठके खात हए?”

17जा सुनके येशू बिनसे कही, “स्वस्थ आदमीके बैदाको जरुरत नाए पणतए, पर रोगीनके पणत हए। मए बे आदमीनके ताहीं नाए आओ हओं, जौन अपनएके धर्मी मानत हएं। पर मए बे आदमीनके ताहीं आओ हओं जौन पापी हएं, ताकी बे पाप करन छोडके परमेश्वर घेन घुमएं।”

उपवास बैठन बारेमे प्रश्‍न

(मत्ती. 9:14-17; लूक. 5:33-39)

18बप्तिस्मा देन बारो यूहन्नाके चेला और फरिसीनको समुह उपवास बैठत रहएं। एक दिन, कुछ आदमी आएके येशूसे कहीं, “बप्तिस्मा देन बारो यूहन्नाके चेला और फरिसीनको समुहके चेला उपवास बैठत हएं, तओ तुमर चेला काहे उपवास नाए बैठत हएं?”

19येशू बिनसे कही, “मिर चेला और मए एक दुल्हा और बोको बरैतिया हानी हएं। का दुलहाके सँग होत पेती बरैतिया उपवास बैठत हएं? 20पर बे दिन फिर आमंगे जब दुल्हा बिनसे छुटैगो, तओ बिनके उपवास बैठन पणैगो। 21कोइ फिर पुरानो लत्तामे नयाँ कुर्ताको थिगरा नाए लगात हए। काहेकी नयाँ थिगरा धुइहएं तओ बो सुकरजएहए और पुरानो कुर्ताके और जद्धा फारदेहए, तओ पुरानो लत्ताको भार बहुत बडो हुइजएहए। 22उइसी, कोइ फिर नयाँ अंगुरको रसा पुरानी चमडाकी थैलीमे नाएडारत हए। अगर बे अइसे करंगे तओ, जब अंगुरको रसा फैलैगो, पुरानो चमडाकी थैली नाए तन्हैगो पर चमडाकी थैलीके फारदेबैगो, तओ अंगुरको रसा और चमडाकी थैली खराब हुइजएहए। पर नयाँ अंगुरको रसा नयाँ चमडाकी थैलीमे डारन पणतहए।”

पबित्र दिनको प्रभु

(मत्ती. 12:1-14; लूक. 6:1-11)

23कोइ एक पबित्र दिनमे, येशू और बाके चेला अन्नके खेत हुँइँके जात रहएं। हुवाँ जात पेती येशूके चेला नेँगतए-नेँगत अन्नके बाली तोरके खान लागे। 24जा देखके फरिसीनको समुह येशूसे कहीं, “देखओ, बे पबित्र दिनमे मोशाको नियम कानुन काहे तोणत हएं? का तुमए उनके बतान नाए रहए, कि उनके अइसे नाए करनके रहए?”

25येशू बिनसे कही, “जब राजा दाऊद और बक सँग होन बारे भुखाने रहएं, तओ बो का करी करके तुम कभीनाए पढे हओ? 26जब अबियाथार प्रधान यहूदी पुजारी रहए तओ राजा दाऊद परमेश्वरको आराधना करन बारो तम्भुमे घुसो, और परमेश्वरको चढाओ भओ रोटी खाइ, जो पुजारी बाहेक औरेनके खान नाए रहए, और बहे रोटी बक् सँग होन बारेनके फिर दइ।”

27तओ उनसे येशू कही, “पबित्र दिन आदमीनके ताहीं बनोहए, आदमी पबित्र दिनके ताहीं नाए। 28जहेमारे मए आदमीको लौंणाके अइसो कहान अधिकार हए, कि यहूदीनको पबित्र दिनमे आदमीके का करन अनुमति हए।”

Currently Selected:

मर्कूस 2: THRNT

Highlight

Copy