यूहन्ना 12
12
बेथानियामे येशू
(मत्ती. 26:6-13; मर्क. 14:3-9)
1यहूदीनको निस्तार तेवहारके छय दिन अग्गु येशू फिरसे बेथानिया गाउँमे आओ। बहे गाउँमे येशू लाजरसके मरो भओ मैसे जिन्दा करी रहए। 2जब येशू आओ तओ खुसीसे मार्था और मरियम बाके ताहीं खाना तयार करीं। और मार्था येशूको सम्मान करनके ताहीं सेवा करत रहए। और लाजरस येशूके सँग खानु खान बारो मैसे एक रहए। 3बहे बेरा मरियम लगभग आधो लिटर शुद्ध जटामासीको तेल येशूके पाउँमे अख्नाइ, और अपन बारसे बाको टाँग पोँछी, और जटामसीको तेलसे पुरो घर महाकीगओ। 4तओ येशूको चेला मैसे एक जनै, बाके पकणान ढुँणन बारो यहूदा इस्करियोत कही, 5“जा जटामसीको तेल तीन सओ चाँदीको सिक्कामे बेँचके जा रकम गरीबके दएसे हुइजैतो, काहे नाए दए?” 6पर यहूदा इस्करियोत गरीबके प्रेम करके अइसो नाए कही रहए, पर चुट्टाके कारणसे अइसो कही रहए और रुपैयाकी थैली बहेके धरन दओगओ रहए और बो थैलीसे रुपैया निकारे करत रहए। 7येशू कही, “हुइगओ, बोसे कुछ मत् कहाओ! बो पहिलीयए मोके दफ्नानके तयारीके ताहीं अइसो करी हए। 8काहेकी गरीब त सब दिन तुमर सँग रएहएं, पर मए त सब दिन तुमर सँग नाए रएहओं।”
लाजरसके मारनके षडयंत्र
9जब यहूदीन मैसे साधारण आदमी सुनिं, कि येशू हुवाँ हए। तओ आदमीको एक बणी भिड बो ठिहामे आइ। बे केबल येशूके नाए बल्कि लाजरसके फिर देखन आए रहएं, जौनके येशू मरो भओ मैसे जिन्दा करी रहए। 10जहेमारे मुखिया यहूदी पुजारी लाजरसके फिर मारनके ताहीं फैसला करीं। 11काहेकी लाजरसके मारे बहुतसे आदमी, यहूदी अगुवनके अस्वीकार करके येशूमे बिश्वास करन लागे रहएं।
यरूशलेममे येशूको स्वागत
(मत्ती. 21:1-11; मर्क. 11:1-11; लूक. 19:28-40)
12आन बारो कलके दिन यहूदीनके निस्तार तेवहारमे आइभइ बणी भिड येशू यरूशलेम सहरमे आत हए, करके सुनीं। 13बे आदमी खजुरियाक हँगा लैके बाके स्वागत करत चिल्लान लागे, “होसन्ना! प्रभु परमेश्वरको नाउँमे आन बारो इस्राएल देशको महाराजा कित्नो धन्यको हए!” 14तओ यरूशलेम सहरमे पुगतए येशू गदहाको एक बछ्रा उपर चढके आओ। जैसे पबित्र-शास्त्रमे फिर अइसो लिखो रहए,
15“हे सियोनकी लौंणीया,
मत् डराए।
देख, तेरो राजा गदहाको बछ्राके उपर सवार
हुइके आएरहो हए!”
16येशूके चेला जा बात पहिले नाए समझ पाइं, पर जब येशूको महिमा प्रकट भओ, तओ बिनके समझमे आओ, कि जो कुछ फिर येशूके सँग भओ, बो ठिक रहए, जैसो कि पबित्र-शास्त्रमे कहोगओ रहए।
17तओ भिडके आदमी, जौन बो बेरा बाके सँग रहएं, जा गवाही देन लागे, कि बा लाजरसके चिहान मैसे बुलाइ, और बोके जिन्दा करदइ। 18बहुतसे आदमी येशूके मिलनके ताहीं आए, काहेकी बे जा शक्तिशाली चमत्कारके बारेमे सुनी रहएं। 19जहेमारे फरिसीनको समुह एक-दुस्रेनसे कहान लागे, “देखओ, हम कछु नाए करपए हएं। बक देखओ, पुरा संसार बाके पिच्छु चलदइ हए।”
अपनी मृत्युको बारेमे येशूकी भबिष्यबाणी
20हुवाँ पर कुछ, ग्रीक भाषा मस्कन बारे फिर रहएं, जो यहूदीनको निस्तार तेवहारको समयमे आराधना करनके ताहीं यरूशलेम सहरमे आए रहएं। 21बे गालील परदेशके बेथसेदा गाउँके रहान बारे फिलिपके ठिन आएके अइसे कहिके बिन्ती करीं, “देखओ सँगी, हम येशूके भेँटन चाँहत हएं।” 22फिलिप जाएके अन्द्रियाससे कही, और अन्द्रियास और फिलिप, दोनौ जाएके येशूके जा बात सुनाए दइं।
23जा बातमे येशू बिनके जबाफ दइ, “बो समय आइगओ हए, कि आदमीको लौंणाको महिमा, प्रकट होए। 24नेहात्तओ, मए तुमसे कहात हओं, गेहुँको दाना मट्टीमे पणके नाए मरो कहेसे बो उइसीयए रहात हए। पर अगर मट्टीमे पणके दाना मरिगओ कहेसे बो बहुत फरा फरात हए। 25उइसीयए करके, अपनो प्राणके बहुत प्रेम करन बारो बो खोए देतहए। पर अपनो प्राणके जा संसारमे तुच्छ मानन बारे कभी फिर नाश नाए होन बारो जीबनके ताहीं बो सुरक्षित रखात हए। 26कोइ मिर सेवा करहए कहेसे बो मिर चेला बननके ताहीं मिर पिच्छु लागए, तओ जहाँ मए हओं हुवाँ मिर चेला फिर हुइहए। अगर कोइ मिर सेवा करहए कहेसे दौवा परमेश्वर बोके आदर करैगो।
27अब मिर प्राण बहुत दुखी हुइगओ हए, और मए का कहामओं? ‘हे दौवा परमेश्वर, हुइहए कहेसे मोके जा दुखके समयसे बचाओ?’ पर मए जहेक ताहीं जा संसारमे आओ ताकी मए दुख सहामओं। 28हे दौवा परमेश्वर, प्रकट करओ, कि तुम कित्नो महान हओ।” तओ स्वर्गसे अइसो एक अबाज आओ, “मए प्रकट करो हओं, कि मए कित्नो महिमामय हओं, और मए जाके फिरसे प्रकट करंगो।” 29हुवाँ ठाणे भए आदमीको भिड जा अबाज सुन्त रहएं और कहीं, “जा बादर गरजो हए!” औ दुस्रे आदमी कहीं, “बाके सँग स्वर्गदूत बोली हुइहए!”
30पर येशू बिनके जबाफ दइके कही, “जा अबाज तुमके मदत करनके ताहीं बोलोगओ हए, मिर ताहीं नाए हए। 31अब येशूके द्वारा जा संसारको सासक शैतानकी शक्तिके न्याय करनको समय आइगओ हए। 32और जब मए जा संसारसे उठाओ जामंगो, तओ सब आदमीनके अपने घेन लामंगो।” 33अइसे कहिके येशू जा बताइ दइ, कि बा कैसे मरन बारो रहए।
34जा बातमे भिड बासे पुछी, “हमर पबित्र-शास्त्रमे हम जा बात सुनेहएं कि ‘ख्रीष्ट त सदाकाल बचो रहाबैगो’ फिर तुम काहे कहात हओ, कि आदमीको लौंणाके पृथ्वीसे ऊँचाए लैजानके जरुरी हए? जा कौन आदमीको लौंणा हए?” 35येशू बिनसे कही, “हबए थोरी देरतक उजियारो (येशू) तुमर सँग हए। उजियारो तुमरे सँग रहानतक तुम नेँगघुम करओ, ताकी अंधियारो तुमके नाए तोपए। अगर कोइ अंधियारोमे नेँगघुम करत हए कहेसे, बो नाए जान्त हए, कि बो कहाँ जाएरहो हए। 36जब तक उजियारो तुमर सँग हए, तबतक तुम उजियारोमे बिश्वास करओ, और तुम उजियारोके सन्तान बनओ।” जा बात कहिके, येशू हुवाँसे चुप्पएसे गइ भओ, और उनसे दुर रहो।
भबिष्यबाणी पुरा होनो
37येशू आदमीनके अग्गु इतनो शक्तिशाली चमत्कार करके दिखाइ, तहुँफिर आदमी बाके उपर बिश्वास नाए करीं। 38जा जहेमारे भओ, ताकी अगमबक्ता यशैया जो कही रहए बो नेहत्तओ हुइजाए। बो कही:
“हे परमप्रभु, हमर शिक्षामे कोइ बिश्वास नाए करो हए,
और कोइ नाए सम्झत हए, कि जा परमप्रभुको करो शक्तिशाली चमत्कार प्रकट भओ हए।”
39जहेमारे बे बिश्वास नाए करपाइं, काहेकी यशैया फिर दुस्रो चोटी अइसे कही,
40“परमेश्वर उनकी आँखीनके अन्धरा करदइ, ताकी बे नाए देख पामएं,
और बिनको मन कठोर करदइ, ताकी बे समझ नाए पामएं।
नत बे मिर घेन घुमजैते और मए उनके चंगाइ करदेतो।”
41यशैया जा बात जाकेमारे कही, कि बो येशूकी भबिष्यकी महिमा देखी, और यशैया बाके बारेमे बात करी। 42तहुँफिर बहुत यहूदी अगुवा येशू उपर बिश्वास करीं। पर फरिसीनको समुह डरके मारे बे जा बात कोइसे फिर नाए कहीं काहेकी औ आदमी जा बात पता पैते कहेसे फरिसीनको समुहके, यहूदी सभाघरसे निकार दित्ते। 43काहेकी बिनके त परमेश्वरसे जद्धा आदमीनसे पान बारो प्रसंसा अच्छो लगत रहए।
उजियारोमे नेँगनो
44येशू भिडके चिल्लाएके कही, “मोके बिश्वास करन बारे मोए उपर नाए, बल्कि मोके पठान बारो परमेश्वरमे बिश्वास करत हएं। 45और जौन मोके देखत हए, बो मोके पठान बारो परमेश्वरके देखत हए। 46संसारको उजियारो महीँ हओं। मोए उपर बिश्वास करन बारो कोइ फिर अंधियारोमे नाए रहाबए करके मए संसारमे आओ।
47अगर कोइ मिर बात सुनके बोको पालन नाए करत हए कहेसे मए बोके दोषी नाए ठहिरामंगो। काहेकी मए संसारके आदमीनके दोषी ठहिरानके ताहीं नाए, बल्कि संसारके बचानके ताहीं आओ। 48मिर बात सुनके फिर बिश्वास नाए करहए कहेसे बोके ताहीं एक जनै न्याय करन बारो हए। जौन बात कहो बहे बात अन्तके दिनमे न्याय करैगो। 49काहेकी मए अपन इच्छासे नाए बोलत हओं, पर मिर दौवा जो मोके पठाइ हए, बहे मोके अढाइ हए, कि मए का कहाओं और कैसे कहाओं। 50मए जान्त हओं, कि बाको आज्ञा कभी फिर नाश नाए होन बारो जीबन देतहए। बहेमारे, मए तुमके बेहीं बात बतात हओं जो दौवा परमेश्वर मोसे कही हए।”
Currently Selected:
यूहन्ना 12: THRNT
Highlight
Share
Copy
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
