प्रेरित 4

यहूदी सभाघरके अग्गु पत्रुस और यूहन्ना

1पत्रुस और यूहन्ना आदमीनके सँग मस्कत रहएं, तब्ही यहूदी पुजारी, मन्दिरके कप्तान और सदुकीनको समुह उनके ठिन आए। 2बे दिक्काने रहएं, काहेकी दुई चुनेभए चेला आदमीनके सिखात रहएं, कि जो आदमी मरिगओ हए परमेश्वर बाके फिर जिन्दा करदेबैगो, जैसे बा येशूके मरो भओ मैसे फिर जिन्दा करी। 3तओ बे उनके पकणीं, और दुस्रे दिनतक थानामे धरेरहे, काहेकी बो बेरा संझा हुइगओ रहए। 4तओ बचन सुनन बारे मैसे येशूमे बहुत बिश्वास करीं, और हुवाँ जम्मा मिलाएके लगभग: पाँच हजार लोग आदमी रहएं जो येशूमे बिश्वास करन बारे हुइगए। 5दुस्रे दिन भोरभए उनको यहूदी अगुवनको समुह, पुर्खा और मोशाको नियम कानुन सिखान बारे महाट्टर यरूशलेम सहरमे एक ठाउँमे जमा भए। 6जा सभामे भए आदमी हन्नास कहान बारो प्रधान यहूदी पुजारीके भेँट करीं और बोके नातेदार पणन बारे कैयाफा, यूहन्ना, अलेक्जेन्डर और हन्नासके घरानाके औ आदमी फिर जमा भए रहएं। 7बे पत्रुस और यूहन्नाके बीचमे ठणबाएके पुँछन लागे, “जा आदमीके अच्छो करनके ताहीं कौन तुमके शक्ति और अधिकार दइ?”

8तओ पबित्र आत्मासे भरके पत्रुस बिनसे कही, “आदमीनके सासक और यहूदी अगुवनको समुहओ, 9हम एक कमजोर आदमीको भलाइ करेहएं और आज हमसे पुछो जाए रहो हए, कि बो कैसे अच्छो भओ। 10तुम सबए और सारा इस्राएल देशके आदमीनके पता होए, कि जा नासरत गाउँमे रहान बारो येशू ख्रीष्टके नाउँमे करोगओ हए। बहे येशू ख्रीष्टके तुम क्रूसमे टाँग दएरहओ, पर परमेश्वर बोके मरे मैसे फिरके जिन्दा करी। आज बाके नाउँके द्वारा जा आदमी तुमर अग्गु अच्छो हुइके ठाणो हए। 11ख्रीष्ट येशू बो पत्थर हए, जौनके तुम राजमिस्त्री इन्कार करे रहओ, बहे पत्थर जगको मुख्य पत्थर बनो।

12और येशू बाहेक औ कोइमे मुक्ति नाए हए, काहेकी येशूको नाउँ बाहेक बादर तरे औ कोइ नाउँ नाए दइ हए, जौनके द्वारा हम मुक्ति पान सकएं।”

येशूको नाउँके ताहीं चेलनको धम्की

13जब बे पत्रुस और यूहन्नाको हिम्मत देखीं और जे, अनपड और साधारण आदमी हएं करके पता पाइं, तओ बे अचम्मो मानिगए। तओ पत्रुस और यूहन्ना फिर येशूके सँगमे रहात रहएं करके बे पता पाइं। 14पर बो अच्छो भओ लंगणाके पत्रुस और यूहन्ना सँग ठाणो देखके बे उनसे कुछु नाए कहीपाइं। 15तभीमारे बे पत्रुस और यूहन्नाके, यहूदी सभाघरसे बाहिर जानके आज्ञा करीं और बे मिलके अइसे सल्लाहा करन लागे, 16“जे आदमीनके अब हम का करएं? काहेकी नेहात्तओ जिनसे एक चमत्कारको काम भओ हए करके यरूशलेम सहरमे रहान बारे सबके पता हुइगओ हए, और हम जाके इन्कार नाए करपएहएं। 17पर जा बात आदमीमे नाए फैलए करके ‘येशूके बारेमे अबसे कुछु बात फिर कोइसे मत् बुलियओ’ कहिके हमएं उनके चेतावनी देन पणैगो।”

18तओ पत्रुस और यूहन्नाके बुलाएके अब उप्रान्त येशूके नाउँमे मत् बुलियओ और कोइ शिक्षा मत् दियओ करके कडा चेतावनी दइ। 19तओ पत्रुस और यूहन्ना बिनके जबाफ दइके कहीं, “तुमर कही बात मानएं, कि परमेश्वरकी कही बात मानएं, परमेश्वरके अग्गु का ठिक हए? तुम अपनए बिचार करओ। 20काहेकी हम त अपन आँखीसे देखी और कानसे सुनी बात कहे बिना हम चुप नाए बैठंगे।” 21बिनके सजाय देनके कोइ उपाए नाए हुइके बिनके औ जद्धा धमकाएके छोडदइं, काहेकी जो घटना घटो रहए बहेके ताहीं सब आदमी परमेश्वरके आदर करत रहएं। 22काहेकी जौन आदमी चमत्कारको काम द्वारा अच्छो भओ रहए, बोको उमर चालिस बर्षसे जद्धा रहए।

सहास पानके ताहीं चेलनको प्राथना

23पत्रुस और यूहन्ना छुटके अपन सँगीनके ठिन आए, और जो कुछ मुखिया यहूदी पुजारी और यहूदी अगुवनको समुह कही रहएं, बे सब बात बिनके बताए दइं। 24जब बे जा सुनीं, तओ बे एक सँग परमेश्वर घेन उँचो अबाज निकरके कहीं, “हे प्रभु, तुम बहे हओ जौन बादर, पृथ्वी, समुन्दर और बिनमे भए सबए चीज बनाए। 25जौन, पबित्र आत्मासे अपन सेवक हमर पुर्खा दाऊदके मुँहुँसे कही,

‘गैर-यहूदी काहे दिक्कात हएं,

और देश-देशके आदमी काहे बिना कामको षड़यन्त्र बनात हएं?

26मुक्ति देन बारो ख्रीष्ट प्रभु और बाके अभिषेक करेभए आदमीके बिरोधमे पृथ्वीके राजा एकजुट भए,

और सासक एक ठाउँमे इकट्ठा हुइगए।’

27काहेकी नेहात्तओ तुमर द्वारा अभिषेक करोभओ पबित्र सेवक येशूके बिरुद्धमे राजा हेरोद और पन्तियस पिलातस फिर गैर-यहूदी और इस्राएल देशके आदमीनके सँग जा सहरमे इकट्ठा भए। 28पर बे बहे करीं जो तुमर सामर्थ्य और इच्छासे पहिलीए तयार करलै रहए, कि होनए पणो। 29अब हे प्रभु बिनको धम्कीके सुनओ और तुमर सन्देशके सहाससे परचार करन अपने सेवकनके शक्ति देओ। 30और अच्छो करनके ताहीं अपनो हात बढाओ ताकी चमत्कारी चिन्हा और चमत्कारको काम तुमर पबित्र सेवक येशूके द्वारा करे जाएं।”

31जब बे प्राथना करडारीं तओ जहाँ बे जमा भए रहएं, बो ठाउँ हालिगओ। और बे सब जनै पबित्र आत्मासे भरिगए और बे परमेश्वरको बचन हिम्मतसे सुनातए रहे।

बिश्वासीनको साझा सम्पति

32“बिश्वास करन बारेनको समुह, सबए एक ह्रदय और एक आत्माके रहएं, और बे मैसे एकफिर अपन सम्पति ‘जा मिर हए’ करके नाए कहात रहएं, पर बिनके सँगमे भओ सब चीज साझा रहए। 33बे चुनेभए चेला बडो शक्तिसे ‘प्रभु येशू मरके जिन्दा भओ’ कहिके गवाही देतरहे, और बिनके सबके उपर बडो अनुग्रह रहए। 34बिन मैसे कोइके कुछु चीजको कमी नाए पणत रहए, काहेकी जित्तो जनै जग्गाजमिनके और घरके मालिक रहएं, बे सब बेँच-बेँचके बोको रुपैया ल्यात रहएं, 35और बो रुपैयाके चुनेभए चेलनके दइ देत रहएं और जौन-जौनके जो-जो चीजको कमी पणत रहए, बोके अनुसार सबएके बाँटदेओ करत रहएं। 36योसेफ नाउँ भओ एक आदमी रहए। बो लेबी घरानाको रहए और साइप्रसके टापूसे रहए। चुनेभए चेला बोसे बारनाबास कहिके बुलात रहएं, जौनको अर्थ हए, एक अइसो आदमी जो दुस्रेनके उत्साहित करत हए। 37बे अपन जमिन बेँचके रकम ल्याइं और आदमीनके बाँटनके ताहीं चुनेभए चेलनके दइ दइं।”

Currently Selected:

प्रेरित 4: THRNT

Highlight

Copy