ماتّا 7

ا‑ور‑تحكامّ ف‑يان

1«ا‑ور‑تينيم ف‑يان ءيس‑يُخشن، ا‑ور‑فلّاون‑ييني ربّي ءيس‑تُخشنم. 2اشكو غايلّي تّينيم ف‑وييّاض ا‑را‑فلّاون‑يتياونّا، ءولا لعبرت لّي‑س‑ا‑تّعبّارم ءي‑وييّاض ا‑س‑راد‑اون‑يتياوعبّار. 3ماخ ا‑ن‑تّمنادت ارفتوس ءيمژّين لّي‑ن‑يلّان غ‑تيط ن‑گماك، ءور‑تّ‑اكُّ‑تيويت غ‑تگّجديت لّي‑يلّان غ‑تيط‑نّك؟ 4مامنك ا‑تريت ا‑تينيت ءي‑گماك ‹ادج‑يّي اد‑اك‑د‑سّيتّيغ ارفتوس‑ان ا‑ك‑يلّان غ‑تيط،› ءيمّا كيّي تلّا‑ياك‑تگّجديت غ‑تيط؟ 5وا‑بو‑سين‑وودماون، سّيتّي زوار تاگّجديت زغ‑تيط‑نّك، باش ا‑تژرت مامنك ا‑دي‑تسّيتّيت ارفتوس زغ‑تيط ن‑گماك.

6«ا‑ور‑تاكّام ءي‑يضان ما‑يگان وين ربّي، ا‑ور‑نكرن اكُين‑د فلّاون. ا‑ور‑تّلوحم لجوهر‑نّون غ‑لگدّام ن‑والفان، ا‑ور‑ت‑اضّرن س‑يضارن‑نسن.

ضالبات، سيگّلات، سّضوقّرات

7«ضالبات ربّي راد‑اون‑يفك، سيگّلات دارس را‑تافم، سّضوقّرات‑ن سرس راد‑اون‑يرژم. 8اشكو كولّو وانّا‑ت‑يضالبن راد‑اس‑يفك، د‑وانّا دارس ءيسيگّيلن را‑دارس‑ياف، د‑وانّا‑ن‑يسّضوقّورن راد‑اس‑يرژم. 9ءيس‑گيگون‑يلّا ما‑مي‑يضالب يوس اغروم ءيفك‑اس اژرو؟ 10نغد ءيضالب‑اس اسلم ءيفك‑اس الگمّاض؟ 11ژرات كونّي، واخّا دا‑تسكارم ما‑يُخشنّ تيسّانم ا‑تفكم تيميخار فولكينين ءي‑تاروا‑نّون. ءوگُّار ن‑مايان ا‑را‑ياكّا باباتون ن‑يگنّا ما‑يفولكين ءي‑ويلّي‑تي‑تضالابنين. 12سكارات د‑كولّو‑مدّن غمكنّا ترام ا‑ت‑ديدون‑سكارن. اوال‑اد ا‑يسّمونّ كولّو ما‑يتياران غ‑شّرع ءولا لانبيا.

لمعنا ن‑يمي ءينوكمان

13«كشمات غ‑يمي ءينوكمان. هان يوسعا ءيمي ياضني لّي‑يتاوين س‑لهالاك، ءيرخو‑وغاراس‑نس، ءيگّوت ما‑گيس‑يكشّمن. 14والاينّي ءينوكما ءيمي لّي‑يتاوين س‑تودرت، ءيشقو‑وغاراس‑نس، ءيدروس ما‑ت‑يتافان.

لمعنا ن‑تسغارين د‑لغلّت‑نسنت

15«رارات لعاقل اشكو راد‑د‑دارون‑اشكين كرا ن‑مدّن ار‑تّينين ءيس‑گان لانبيا والاينّي ار‑سّكيركيسن. ءوشّانّ اد‑گان، لسن‑د سرون تيملسيت ن‑وولّي باش ا‑كُن‑غوين. 16ءيمّا نتني زغ‑لغلّت‑نسن ا‑زغ‑را‑تن‑تّيسّانم، اشكو ءور‑ا‑ياكّا‑وزگُّار اضيل، ءولا‑دا‑تاكّا‑تسكرا ءيكوزارن. 17تاسغارت ءيفولكين ار‑تسكار لغلّت ءيفولكين. تاسغارت يُخشنّ ار‑تسكار لغلّت يُخشنّ. 18ءور‑تژضار‑تسغارت ءيفولكين ا‑تفك لغلّت يُخشنّ، ءولا تژضار‑تسغارت يُخشنّ ا‑تفك لغلّت ءيفولكين. 19والاينّي كرايگاتّ تاسغارت نّا‑ور‑ياكّان لغلّت ءيفولكين، را‑ستّ‑يبّي‑وفلّاح ءيلوح‑تّ‑ين غ‑لعافيت. 20غمكان ا‑راد‑گن ءولا نتني، زغ‑لغلّت‑نسن ا‑زغ‑را‑تن‑تّيسّانم.

ما‑را‑يكشم س‑تگلديت ن‑يگنّا؟

21«هان ءورد كولّو وانّا‑يّي‑يتّينين ‹وا‑سيدي، وا‑سيدي› ا‑را‑يكشم س‑تگلديت ن‑يگنّا. ءور‑را‑سرس‑يكشم ابلا غويلّي سكارنين ما‑يتّيري بابا لّي‑يلّان غ‑يگنّا. 22ءيگّوت ما‑راد‑يّي‑ييني غ‑واسّ لّحساب ‹وا‑سيدي وا‑سيدي، ها‑ياغ س‑يسم‑نّك ا‑س‑نساول س‑يواليون ن‑ربّي. س‑يسم‑نّك ا‑س‑نسّوفغ لجنون. س‑يسم‑نّك ا‑س‑نسكر كيگان د‑لمعجيزات.› 23غاكودان راد‑اسن‑ينيغ ‹ءور‑اكُّ‑كُن‑سّينغ. ءيتّيات‑ن زغ‑گيگي كونّي لّي‑يسكارن لخُشانت.›

لمعنا ن‑سنات‑تگُمّا

24«كولّو وانّا ءيسفلدن ءي‑يواليون‑اد‑ينو ار‑سرسن‑يسكار، ءيرواس ارگاز ءيطّافن لعاقل، ءيبنا تيگمّي‑نس ف‑يسلي. 25ار‑يصواض‑واضو ار‑يطّار‑ونژار ءينگي‑د‑واسيف ار‑كّاتن تيگمّي، والاينّي ءور‑تّ‑سّضيرن اشكو ءيزگا لّساس‑نس ف‑يسلي. 26ءيمّا كولّو وانّا ءيسفلدن ءي‑يواليون‑اد‑ينو ءور‑ا‑سرسن‑يسكار، ءيرواس ارگاز ءينوفلن، ءيبنا تيگمّي‑نس ف‑وملال. 27ءيصوض‑واضو ءيضر‑ونژار ءينگي‑د‑واسيف ءوتن تيگمّي تضر‑د، تخلو كولّوتّ.»

28لّيغ ءيكمّل ياسوع ءيواليون‑اد، ار‑باهرا‑تعجّابن مدّن غ‑ولمّود‑نس، 29اشكو ار‑سرسن‑يساوال غمكلّي دارس لحقّ اد‑اسن‑يتّيني ما‑تن‑د‑يقّانّ ا‑ت‑سكارن. ءور‑يگي نتّا زوند ءيمسلمدن‑نسن ن‑شّرع.

Currently Selected:

ماتّا 7: SHINT10

Highlight

Copy