لوقا 9

لماسيح يوزن ءيمحضارن‑نس س‑سين د‑مراو

1ءيغر‑د ياسوع ءي‑يمحضارن‑نس س‑سين د‑مراو س‑دارس، ءيفك‑اسن تاحكيمت د‑تژضّارت اد‑سّوفوغن كولّو لجنون ار‑جّوجّين تيموضان. 2يازن‑تن ا‑تّيدون ار‑تبرّاحن ف‑تگلديت ن‑ربّي ار‑جّوجّين مدّن. 3ييني‑اسن: «ا‑ور‑تاسيم يات ءي‑وغاراس. ا‑ور‑تاويم اعمود نغد اقُراب نغد اغروم نغد ءيقاريدن نغد سين ءيقشبان. 4تيگمّي نّا‑س‑تكشمّ، گاورات گيس ار اكود نّا‑را‑تمودّوم زغ‑تمدينت‑ان. 5تامدينت نّا‑كُن‑ور‑يرين، فّوغات زغ‑گيس تسّوسم اگدرور ن‑يضارن‑نّون، اد‑اسن‑يگ تاماتارت ما‑غ‑ا‑سوينگيمن.» 6غاكودان اد‑فتان ءيمحضارن ار‑تكّان ءيدوران ار‑تبرّاحن س‑لخبار ءيفولكين ار‑جّوجّين مدّن غ‑كرايگاتّ ماني.

ادوهدو ن‑هيرودوس

7ءيسفلد‑وگلّيد هيرودوس ف‑كولّو ما‑يسكار ياسوع، ءيدوهدو اشكو ار‑تّينين كرا ن‑مدّن: «يوحانّا امسدّام اياد، ءينكر‑د زغ‑لموت.» 8ار‑تّينين وييّاض: «ءيبان‑د‑داغ نّابي ءيليّا.» ار‑تّينين وييّاض: «يوورّي‑د كرا ن‑يان زغ‑لانبيا ن‑زمان.» 9ءيمّا هيرودوس ءينّا: «يوحانّا بّيغ‑اس ءيخف، والاينّي ما‑يگا غواد ف‑سفلدغ ءي‑تغاوسيوين‑اد؟» ييري باهرا ا‑يژر ياسوع.

لماسيح ءيشّوشا سمّوس ءيد‑والف

10لّيغ‑د‑وورّين ءيرقّاسن س‑دار ياسوع ءينين‑اس ف‑كولّو ماد‑سكرن. ياوي‑تن واحدوتن دّون س‑تسگا ن‑يات‑تمدينت لّي‑مي‑تّينين بيتصايدا. 11سفلدن مدّن گّوتنين ف‑مانيس ءيدّا ضفورن‑ت. ءيفرح سرسن ياسوع ار‑اسن‑يساوال ف‑تگلديت ن‑ربّي، ءيجّوجّي غويلّي ءوضنّين. 12لّيغ ءيدّا‑واسّ اشكين‑د دارس ءيمحضارن‑نس س‑سين د‑مراو ءينين‑اس: «ازن مدّن اد‑دّون س‑يدوران د‑يگران‑اد اكمورنين اد‑افن ماد‑شتّان ءولا مانيغ ا‑نسّان، اشكو ءور‑يلّي يات غ‑لخلا‑ياد.» 13ءيمّا ياسوع ءيرور‑اسن: «فكات‑اسن كونّي ماد‑شتّان.» ءينين‑اس: «ءور‑دارنّغ غير سمّوست‑تنگُال د‑سنات‑تسلمين. ءيس‑زگينّغ‑تريت ا‑ندّو ا‑د‑نسغ امشّو ءي‑مدّن‑اد كولّوتن؟» 14اشكو ءيلّا غين ما‑يتگّان سمّوس ءيد‑والف ن‑ورگاز. ءيساول‑داغ ياسوع ييني ءي‑يمحضارن‑نس: «سّگاورات مدّن، تگم‑تن د‑تغاماتين. اد‑يلين سمّوس ءيد‑مراو غ‑كرايگاتّ تاغامت.» 15سكرن ما‑س‑اسن‑ينّا سّگاورن‑تن كولّوتن. 16ياسي ياسوع سمّوست‑تنگُال‑لّي د‑تسلمين‑لّي س‑سنات، يالّ الّن‑نس س‑يگنوان ءيشكر ربّي ءيبّي‑تنت، ءيفك ءي‑يمحضارن‑نس ا‑ن‑سراسن ءي‑مدّن. 17شّن كولّوتن ايلّيغ شبعان. سّمونّ‑د توفّاژ لّي‑د‑قامانين، عمّرن سنات د‑مراوت ن‑تاسلّيت.

بطرُس ءيفكا توگّا‑نس ف‑لماسيح

18يان‑واسّ ار‑يتژالّا ياسوع واحدوت، اشكين‑د دارس ءيمحضارن‑نس. ءيسقسا‑تن: «ما‑فلّا‑تّينين مدّن، ماد‑گيغ نكّي؟» 19ءينين‑اس: «كرا گيسن ار‑يتّيني تگيت يوحانّا امسدّام. كرا ار‑يتّيني تگيت نّابي ءيليّا. كرا ار‑يتّيني تگيت كرا ن‑يان زغ‑لانبيا ن‑زمان ءينكر‑د يوورّي‑د.» 20ييني‑اسن ياسوع: «ءيمّا كونّي، ما‑فلّا‑تّينيم؟ ماد‑گيغ نكّي؟» ءيساول‑د بطرُس ييني‑اس: «تگيت لماسيح ن‑ربّي.» 21يوصّا‑تن س‑لمعقول اد‑ور‑ينين ماياد ءي‑يان.

ءيساول لماسيح ف‑لموت‑نس

22ييني‑اسن: «ها‑نكّي لّي‑يگان يوس ن‑بنادم ءيقّان‑يّي‑د اد‑باهرا‑رفوفنغ. را‑يّي‑ن‑لوحن ءيمغارن ن‑تمازيرت د‑ينمغورن ن‑تگمّي ن‑ربّي د‑يمسلمدن ن‑شّرع. را‑يّي‑نغن، والاينّي ويس كراض‑ووسّان را‑د‑نكرغ زغ‑لموت.»

23ييني‑اسن كولّوتن: «وانّا ءيران اد‑ديدي‑ييلي، ءيقّان‑ت‑يد ا‑يتّو ءيخف‑نس ار‑يتاسي اگّجدي‑نس كرايگاتّ اسّ ار‑ديدي‑يتمونو. 24اشكو وانّا ءيران ا‑يجّنجم تودرت‑نس را‑ستّ‑يجلو، ءيمّا وانّا ءيجلان تودرت‑نس ف‑سّيبت‑ينو را‑ستّ‑يجّنجم. 25ما‑را‑ييلي ءي‑بنادم ءيغ‑يوورّي ءيطّاف دّونيت كولّوتّ ءيجلو ءيخف‑نس ءيخسر‑ت؟ 26وانّا ءيتّينين غ‑گر مدّن ءور‑يّي‑يسّين ءولا ءيسّن اوال‑ينو، راد‑ينيغ ءور‑ت‑سّينغ ءولا نكّي لّي‑يگان يوس ن‑بنادم، غاكود لّيغ راد‑د‑اشكغ س‑لمجد‑ينو ءولا لمجد ن‑بابا ربّي ءولا وين لمالايكا‑نس ن‑يگنّا. 27لحقّ ا‑راد‑اون‑ينيغ، ءيلّا غ‑غويد بيدّنين غيد ما‑ور‑را‑يمّت ارد ءيژر تاگلديت ن‑ربّي توشكا‑د.»

ءيبان‑د موسا ءولا ءيليّا ءي‑لماسيح

28ءيزري ما‑يتگّان تام‑ووسّان تيگيرا ن‑مايان، ءيفتو ياسوع ءيغلي س‑يان‑وورير ا‑يژّالّ، ياوي ديدس بطرُس د‑يوحانّا د‑ياعقوب. 29لّيغ ا‑يتژالّا تبدّل سّيفت ن‑وودم‑نس، وورّينت‑تملسا‑نس ملّولنت باهرا ايلّيغ ا‑سّمرقيقيينت. 30بيدّن‑د ديدس سين ءيرگازن ار‑ديدس‑ساوالن، گان نّابي موسا ءولا نّابي ءيليّا. 31بانّ‑د س‑تيفاوت لّمجد، ار‑ساوالن د‑ياسوع ف‑مامنك ا‑را‑يفّوغ دّونيت ءيكمّل ما‑گيس‑يقصاد ربّي غ‑وروشاليم. 32ءيمّا بطرُس د‑ويلّي ديدس لّانين، ييوي‑تن‑ييطس. لّيغ‑د‑فاقن ژرن لمجد ن‑ياسوع نتّا د‑سين ءيرگازن لّي‑ديدس‑بيدّنين. 33ءيفتو موسا د‑يليّا اد‑فلن ياسوع س‑يساول بطرُس ييني‑اس: «وا‑سيدي، ءيفولكي ا‑نيلي غيد. اد‑اون‑نسكر كراض ءيحشاش، يان‑نّك د‑يان ن‑موسا د‑يان ن‑يليّا؟» نتّا ءور‑يسّين ما‑يتّيني. 34سول ا‑يساوال س‑د‑فلّاسن‑تگّوز يات‑تمدلوت تدل‑تن. ءيكساضن ءيمحضارن لّيغ‑د‑فلّاسن‑يضر‑ومالو. 35غاكودان ءيساول‑د يان‑واوال زغ‑تمدلوت ييني‑اسن: «غواد ءيگا ءيوي امژلاي. سفليدات سرس.» 36غير ءيفسّا‑واوال‑ان س‑ژران ياسوع ءيقاما واحدوت. غ‑ووسّان‑ان ءور‑ساولن ءيمحضارن ف‑ماد‑ژران ءولا نّان‑ت ءي‑يان.

لماسيح ءيجّوجّي افروخ امجنون

37نديد ازكّا گّوزن‑د زغ‑وورير، مناگّارن‑ت‑ين مدّن گّوتنين. 38ءينكر يان‑ورگاز غ‑گراتسن ءيغر‑د ءي‑ياسوع ييني‑اس: «واي‑امسلمد، اشك‑يد اد‑يّي‑تژرت ءيوي. ءور‑داري ابلا نتّان، 39ييلي گيس يا‑لّجنّ. اكود نّا‑ت‑يغوي لجنّ ار‑باهرا‑يسّغويّو، ار‑سرس‑يكّات ار‑ت‑يبرّي ارد‑اس‑د‑يك‑وكشكوش ءيمي، ءور‑سول‑ا‑يتّيري اد‑اس‑يرژم. 40ضالبغ باهرا زغ‑يمحضارن‑نّك ا‑ت‑زگيس‑سّوفغن، والاينّي ءور‑ژضارن.» 41ءيساول ياسوع ييني‑اسن كولّوتن: «وا‑تاسوت‑اد ءيجلان، ءور‑اكُّ‑تريت ا‑تامنت. منشك ا‑را‑سول‑ديدون‑قاماغ؟ منشك ا‑راد‑ديدون‑صبرغ؟ اوي‑د يوك س‑داري.» 42ءيفتو‑د‑وفروخ س‑دار ياسوع س‑سرس‑يوت لجنّ اكال ءيسّمحاكّا‑ت. ءيساول‑داغ ياسوع يامر لجنّ ا‑زگيس‑يفّوغ، ءيجّوجّي‑ت ءيرار‑ت ءي‑باباس. 43تعجّبن مدّن‑ان كولّوتن ار‑تّينين: «منشك ايد‑س‑تگّوت‑تژضّارت ن‑ربّي.»

ءيساول‑داغ لماسيح ف‑لموت‑نس

سول ا‑تعجّابن مدّن غ‑كولّو مايد ءيسكر ياسوع، س‑يساول س‑يمحضارن‑نس ييني‑اسن: 44«سفلدات ءي‑ما‑راد‑اون‑ينيغ. ها‑نكّي لّي‑يگان يوس ن‑بنادم، را‑يّي‑ن‑دحين س‑گر ءيفاسّن ن‑مدّن.» 45والاينّي ءيمحضارن ءور‑سّينّ ما‑يرا اد‑اسن‑يمل س‑واوال‑اد. تنتل فلّاسن لمعنا‑نس ايلّيغ ءور‑ت‑فهيمن، ءيكساضن ءور‑ژضارن ا‑ت‑فلّاس‑سقسان.

ءيساول لماسيح د‑يمحضارن‑نس

46بدون ءيمحضارن ار‑تمجاحادن ءي‑نگراتسن ف‑مانوا گيسن ا‑را‑يگ انمغور. 47ياسوع ءيسّن مامنك اد‑سوينگيمن، ياوي‑د يان‑وارّاو ءيمژّين ءيسّبيدّ‑ت غ‑تاما‑نس 48ييني‑اسن: «وانّا ءيقبلن ارّاو‑اد ءيمژّين س‑يسم‑ينو، هاتي ءيقبل‑يّي. د‑وانّا‑يّي‑يقبلن، ءيقبل غوالّي‑يّي‑د‑يوزنّ. اشكو وانّا كولّو گيگون ءيمژّين، نتّان ا‑يگان واد ءيمقّورن.» 49ييني‑اس يوحانّا: «وا‑سيدي، نژرا يان‑ورگاز ار‑يسّوفوغ لجنون س‑يسم‑نّك. ءور‑ت‑نودجي اشكو ءور‑ا‑ديدنّغ‑يتمونو.» 50ءيرار‑اس ياسوع: «ا‑ت‑ور‑تحصارم، اشكو وانّا‑كُن‑ور‑يتضاضّان، هاتين ءيگا زغ‑گيگون.»

ايت‑ساميرا ءور‑رين لماسيح

51لّيغ‑د‑ياكمور‑وزمز لّي‑غ‑را‑يتياتّاي ياسوع س‑يگنّا، ءيغوي غ‑يخف‑نس ءيسكر ف‑وروشاليم. 52يازن كرا ن‑يرقّاسن ا‑ت‑زوورن س‑تمازيرت ن‑ساميرا، باش اد‑كشمن س‑يان‑ودوّار اد‑اس‑گيس‑جّوجادن مانيغ ا‑ينسّا. 53والاينّي ايت‑تمازيرت‑ان ءور‑ت‑رين اشكو سّنّ ءيزد ءوروشاليم ا‑ف‑يسكر. 54ءيمّا ءيمحضارن‑نس ياعقوب د‑يوحانّا، لّيغ ژران غايان ءينين‑اس: «وا‑سيدي، ءيس‑تريت ا‑نغر س‑يگنوان ا‑د‑فلّاسن‑تگّوز لعافيت تهلك‑تن؟» 55ءيگراول گيسن ياسوع ءيسّفسّا‑تن. 56فتون ءيلمّا س‑يان‑ودوّار ياضني.

ما‑را‑يمون د‑لماسيح؟

57لّيغ ا‑تّيدون غ‑وغاراس ييني‑اس يان‑ورگاز: «راد‑ديدك‑مونغ س‑ينّاس را‑تدّوت.» 58ءيرار‑اس ياسوع: «ءيبوغاغ دارسن تانسيوين‑نسن، ءولا ءيگضاض ن‑يگنوان دارسن ءوسودن‑نسن، ءيمّا يوس ن‑بنادم ءور‑دارس مانيغ ا‑يسراس اگايّو‑نس.» 59ييني ياسوع ءي‑يان ياضني: «اشك‑يد، مون ديدي.» ءيمّا نتّا ءينّا‑ياس: «ا‑سيدي، ادج‑يّي زوار اد‑وورّيغ ارد‑ن‑مضلغ بابا.» 60ءيرار‑اس ياسوع: «فل غويلّي ءور‑طّافنين تودرت ا‑ن‑مضلن وينّا‑ياسن‑مّوتنين. زايد كيّي، ار‑تّاويت لخبار ءي‑مدّن ف‑تگلديت ن‑ربّي.» 61ياشك‑يد يان ياضني ييني‑اس: «راد‑ديدك‑مونغ ا‑سيدي، والاينّي ادج‑يّي زوار ا‑ن‑مسافاضغ د‑ايت‑تگمّي.» 62ءيرار‑اس ياسوع: «وانّا يومژن غ‑ووالّو ءيسّماقّل‑ن تيغوردين ءور‑اكُّ‑يگي ءي‑تگلديت ن‑ربّي.»

Currently Selected:

لوقا 9: SHINT10

Highlight

Copy