मरकुस 9
9
1ईसु, चेला ने माणसेन अगळ ज कह्यु, “मे तुहुंक छाचलीन कहं की, जे जां उबा हय र्या, तींद्रेम सी काहना काहनाक असा बी छे, की जत्यार लग भगवानेन राज काजे ताकत भेळु आवतेला देख नी लेय, तत्यार लग चे नी मरे ने नी माने।”
ईसुन सीक्कु बदलनु
(मत्ती 17:1-13; लुका 9:28-36)
2छव दाहड़ा हय गुया ने पछेन ईसु, पतरस ने याकुप ने युहन्ना काजे पुठ्ये लीन एक मटला बयड़ा पर गुयु। चां चे एखलात हतला; ने चां चेलान अगळ ईसुन सीकु बदली गुयु। 3ने तेरा पुथल्या उजाळा हय्न जग-जग पप्लने बाजी गुया ने अतरा बेसका उजाळा हय गुया की धरती पर काहनु बी धुबी अतरा नवा नी कर सके। 4ने तीनु चेला, एलीयु ने अळी मुसु देखाव पड़्या; ने चे ईसु साते वात करने बाजी रवला। 5पतरस ईसु काजे वात करतु जाय्न कह्यु, “ए मास्तर, जां रहणु हामरे वाटे बेसको वारु छे: तेरेमां हामु जां तीन खपड़ी बणावजे। एक तारे वाटे ने एक मुसा वाटे ने एक एलीया वाटे।” 6काहाकी पतरस नी जाणतेलु की काय जपाप आपो, काहाकी हयु बेसकु बीही गुयलु।
7तत्यार एक आदळो आवीन तीनुक टुप लेदो, ने तीना आदळा मां सी जी अवाज सामळाय “जु मारु लाटेक्लु पुर्यु छे; हेरी वात सामळु!” 8तत्यार चां चेला तत्यारुत चारे मेर भाळ्या, बाकुन चां ईसु काजे छुड़ीन कुय नी, देखाव पड़्यो।
9बयड़ा पर सी उतरतु जाय्न ईसु तीना चेला काजे ज हुकुम आप्यु जत्यार लग माणसेन पुर्यु मरला मां सी पछु जीवतु हय्न बठु नी हवे, तत्यार लग ज काय तुहुं देखला छे, च कुय काजे घुण कहुं।
10चेला ईसुन वात मानीन जी वात तींद्रा मन मां राख्या; ने चे आंबा-सांबा वीच्यार कर्या की, “मरला मां सी जीवतु हय्न बठु हवणेन मतलब काय छे?” 11ने चेला ईसु काजे पुछ्या, “असो हय ती, यहुदी नीयमेन मास्तर्या काहा कहें की पेहेल एलीयान आवणु टाकायलो छे?”
12ईसु तीनुक कह्यु “हव छाचलीन, असोत लिखलो छे की एलीयु पेहेल आवीन आखो कय्न सुदारीन तीयार करसे, बाकुन माणसेन पुर्यान बारामां असो काहा लिखायलो छे, की तीनाक बेसकु दुख झेलनु पड़से, ने माणसे तीनाक नानु समजीन तेरो नाव-बद्दी करसे। 13बाकुन मे तुहुंक कहं, एलीयु ते आय गुयलु छे, ने जत्यार चु आयु तत्यार माणसे जसों बी मन मां आयो तसों तेरे साते वेहवार कर्या। ने तेरा बारामां लिखलो छे।”
ईसु भुतड़ो भरायला पुर्याक वारु कर्यु
(मत्ती 17:14-21; लुका 9:37-43)
14ईसु तीनु तीन चेलाक लीन दीसरा चेलान चां पछु गुयु ती, चां चे देख्या की दीसरा चेलान चारे मेर बेसकु माणसेन टुळु भेळु हय र्यु, ने थुड़ाक यहुदी नीयमेन मास्तर्या तींद्रे साते वात मां जखड़ी पड़ी र्या। 15ने उचकान ईसु काजे देख्या तत्यार आखा माणसे देखतात रय गुया। ने तेरो आव-भाव करने करीन दवड़ीन आया। 16ने ईसु तीनुक पुछ्यु, “तुहुं तींद्रे साते काहनी वात मां जखड़ी र्या?” 17टुळा मां सी एक जणु जपाप आप्यु, “ए मास्तर, मे मारा पुर्या काजे तारे धड़े लावणे करीन लावलु, हेरे मां भुतड़ु भराय र्यु, चु बुबड़ु छे। 18ने काहनी बी जागा पर भुतड़ु चस्टी जाय चांहान पाड़ देय, ने हीना पुर्यान मुंहडा मां फेसकड़ु आवे ने करकेड़ु हय जाय, ने दात बी ककड़ावे ने आकड़ाय जाय तेरे सी मे तारा चेला काजे कह्यु की, हेरे मां सी भुतड़ु नीकाळ दे करीन कह्यु बाकुन तीनाक चे नीकाळ्यु नी सक्या।”
19ने असो सामळीन ईसु तीनुक कह्यु, “ए नी भुरसु करने वाळा माणसे, मे कत्यार लग तुंद्रे पुठ्ये रवीस ने तुहुंक सेण करीस? हीना पुर्या काजे मारे धड़े लावु।” 20तत्यार चे तीना पुर्याक ईसु धड़े लाया।
ने जत्यार ईसु तीनाक देख्यु ती चु भुतड़ु तीना पुर्या काजे मुयड़ी देदु, ने चु पुर्यु भुयमां पड़ी गुयु। ने मुंहडा मां सी फेसकड़ु नीकाळतु जाय्न वारु हवणे बाजी गुयु। 21तत्यार ईसु तीना पुर्यान बास काजे पुछ्यु, “जु असु हवलु कतरा दाहड़ा हय गुयु।”
ने चु कह्यु “नानलु हतलु ती सी छे। 22भुतड़ु हीना काजे मारने करीन कांखुर आकठा मां ने कांखुर पाणी मां नाख देय; बाकुन कदी तुसेक बणे, तत्यार हामरे पर दया करीन हामरो भलो कर!”
23ने ईसु तीनाक कह्यु, “कदी तुसेक बणे जाय ती! असु मेसेक काय लेणे कहें? भुरसु करने वाळा वाटे आखो हय सके।”
24तत्यारुत तीना पुर्यान बास कलेप्तु जाय्न कह्यु, “मे भुरसु करो ने अळी बी मदत करीन मारा भुरसाक बड़ाव!”
25तत्यार माणसे दवड़ीन आवीन भेळा हवणे बाजी गुया। ती ईसु तीना भुतड़ाक असु कय्न लड़्यु, ए बेहरा ने बुबड़ा भुतड़ा, मे तुसेक हुकुम आपो की हीना पुर्या मां सी नीकळी जां, ने पछु आवीन हेरे मां घुण भराये।
26तत्यार भुतड़ु आयड़ीन, तीना पुर्या काजे बेसकु मुयड़तुत नीकळी गुयु। ने पुर्यो मरलोत हय गुयो ने आखा माणसे कह्णे बाजी गुया की, ज पुर्यु मर गुयु। 27बाकुन ईसु पुर्यान हात धरीन उठाड़्यु ने पुर्यु उबु हय गुयु।
28जत्यार ईसु घर आयु, ती ईसु एखलुत हतलु चां तेरा चेला तीनाक पुछ्या, “हामरे सी भुतड़ु काहा नी नीकळयु?” 29चु चेलाक कह्यु, “असा भुतड़ान जात भगवान सी दुवा करे, पाखुर नी नीकळे।”
ईसु अळी आपसान मरनेन बारामां कहें
(मत्ती 17:22-23; लुका 9:43-45)
30पछेन ईसु ने चेला चां सी गलील ईलाका मायन जाणे बाजी रवला। ने चु नी चाहतेलु की काहनाक मेसेक उळखी लेय, 31काहाकी चु आपसा चेला काजे सीकाड़ने बाजी रवलु ने तीनुक कवतेलु, “माणसेन पुर्यु माणसेन हाते धराय जासे, ने चे तीनाक मार देसे; ने चु मरनेन तीन दाहड़ा मां पछु जीवतु हय जासे।”
32बाकुन चेला ची वात नी समज्या नी, ने चे ईसु काजे जी वात पुछने बीहतेला।
सरग राज मां मटो कुण छे?
(मत्ती 18:1-5; लुका 9:46-48)
33पछेन चे कफरनहुम मां आया; ने ईसु घर मां आय्न तीनुक पुछ्यु, “वाट्ये तुहुं काहनी वात मां जखड़ी र्या?” 34बाकुन आखा हुगात हय रवला, काहाकी वाटे चे ईनी वात मां जखड़ी पड़ी रवला की आपणे मां सी मटु कुण छे। 35तत्यार ईसु बठी गुयु ने बारे चेला काजे बुलायु ने तीनुक कह्यु, “कदी काहनुक मटु बन्नु हय ती तीना काजे आखा सी नानु ने आखान पावर्यु बन्नु पड़से।” 36ने चु एक नानला पुर्या काजे बुलायन तींद्रे ईचमां उबु कर्यु, ने तीना काजे खुळा मां लीन तीनुक कह्यु, 37“ज कुय मारा नाव सी असा नानला पुर्या मायन काहनाक एकेन बी आव-भाव करे; चु मारी आव-भाव करे ने जे कुय मारी आव-भाव करे चु मारी अतरी नी बाकुन मेसेक मकलने वाळान बी आव-भाव करे।”
कुण आपणे वळु छे ने कुण नी हय
(लुका 9:49,50)
38युहन्नु ईसु काजे कह्यु, “ए मास्तर, हामु एक माणुस काजे तार नाव सी भुतड़ाक नीकाळ तेलान देख्या ने हामु तीनाक कह्या, तु हामरे पुठ्ये चाल बाकुन चु हामरे पुठ्ये आवणे नी हींडी रवलु, अतरा मां हामु तीनाक कह्या ईसुन नाव सी भुतड़ा मां नीकाळे।”
39बाकुन ईसु कह्यु तीनाक मारे नाव सी भुतड़ा काजे मां नीकाळे करीन घुण कहुं, काहाकी असो कुय नी हय जु काहनुक मारा नावेन ताकुतेन काम करीन थुड़ीक वार मां मारु वाक नीकाळतु हय। 40काहाकी जु कुय आपणी वीरुद मां नी हय, चु आपणे वळु छे। 41मे तुहुं काजे ईसु मसीन चेला छे करीन, असु कहं की ज कुय एक कळस्यु पाणी पावे ती मे छाचलीन कहं, “चु तेरा कामेन फळ कदी नी खुवे।”
काय चीज पाप मां पाड़े
(मत्ती 18:6-9; लुका 17:1,2)
42“जे कुय ईनु नानला मां सी मार पर भुरसु करे ने काहनाक काजे पाप मां पाड़े ने तीनुक पाप कराड़े, ती तेरे वाटे ज वारु छे की तेरा गळा मां घट्टीन पुड़ बांदीन तीना काजे समुदरेन पाणी मां नाख देणु चाहजे। 43कदी तारु हात पापेन उत्तर बणीन तुसेक पाप कराड़े, तीना हात काजे काटीन नाख दे; काहाकी दुय हात रवतात बी तु असी नरक आकठाम जाती रवसी, बाकुन ठटळ्यु#9:43 टुण्डा हय्न अमर-जीवन हात करने सरगेम जासी। 44काहाकी नरकेन आकठी मायन कीड़ा कदी नी मरे ने चां वाळो आकठो कदी नी उल्हायें#9:44 यह सभी दस्तावेज मे नहीं पाया गया। 45कदी तारु पाय तुसे पाप कराड़े, तत्यार#9:45 तब तीना पाय काजे तुड़ीन नाख देजी, काहाकी दुय पाय रवतात बी नरक-आकठी मां जाती रवसी, बाकुन लंगड़ु हय्न बी अमरेन जीवन हात करीन सरग मां जाणु वारु छे। 46काहाकी नरक-आकठी मायन कीड़ा कदी नी मरे ने चां वाळो आकठो कदी नी उल्हायें#9:46 यह सभी दस्तावेज मे नहीं पाया गया। 47कदी तारु डुळु उत्तर बणीन तुसेक पाप कराड़े, तत्यार तीना डुळा काजे नीकाळीन नाख दे। काहाकी दुय डुळा रवतात बी नरकेन आकठी मां नाखायसी, बाकुन काणु बणीन भगवानेन राज मां जाणु वारु छे। 48काहाकी नरकेन-आकठी मायन कीड़ा कदी नी मरे ने चां वाळो आकठो कदी नी उल्हायें#9:48 यह सभी दस्तावेज मे नहीं पाया गया।”
49काहाकी हर एक माणुस आकठा सी पारखायसे। जसों चड़ावु नण सी पारखाये।
50नण ते वारलु चीज छे, बाकुन कदी नणुत मुळो हय जाय ने सवाद खुय देय, तत्यार च पछो काय सी ने कसों खारो करसु? “तेरेसी तुहुं आंबा-सांबा हेळी-मेळीन रय्न आपसान नणेन सवाद समाळीन राख्जु।”
Currently Selected:
मरकुस 9: NTBSP23
Highlight
Share
Copy
Want to have your highlights saved across all your devices? Sign up or sign in
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
