लुका 15
15
खुवायला गाडरान दाखलान साहरे ईसु माणसेक सीकाड़े
(मत्ती 18:12-14)
1एक दाहड़ु ईसु माणसेक सीकाड़ने बाजी रवलु, सामळन्या मां बेसका फाळु उकाळन्या हकदार्या ने पापी माणसे बी हतला, चे यहुदी धरमेन कायदाक नी पाळतेला। 2ने यहुदी धरमेन फरीसी माणसे ने यहुदी-सास्तुर सीकाड़न्या वात करता जाय्न कह्वणे बाजी गुया, “जु माणुस ते पापी साते बसीन मजा करे ने तींद्रे साते रुटा बी खाय।” 3तत्यार ईसु तीनुक एक दाखलु कय्न सामळायु,
4मान लेवु तुंद्रे मायन कुय धड़े सोव गाडरा हय, ने तीनु मायन एक खुवाय जाय। ती चु काय करसे? चु दीसरा एक कम सोव गाडराक बयड़ा मां रहणी देसे, ने तीना खुवायला गाडरा काजे तत्यार लग हेरसे, जत्यार लग च जड़ी नी जाय।#यहेजकेल 34:11,12,16 5ने जत्यार च जड़ जाय, ती चु तीनाक खांदा पर बठाड़ीन घर ली आवसे। 6ने घर आवीन आपसा दुस्तीदार्या ने पुठ्ये वाळा काजे पंगत मां बुलावसे ने खावाड़से ने चु तीनाक कवसे, मेसेक खुवायलो गाडरो जड़ गुयो। अतराम मारे साते भेसकायन खुस हय जावु। 7मे तुहुंक कहो की, “ईनी रीते भगवान तीना पापीन करता बेसकु खुस हवसे, जु पाप करनु छुड़ देय ने भगवानेन मरजीन अनसारे काम करने बाजी जाय। बाकुन तीनु एक कम सोव धरमी माणसेन करता अतरो जबर खुस नी हवे, चे ज वीच्यारे की हामु धरमी छे, ने हामुक पापेम सी मन फेरवीन भगवान भीणी वळनु जरुड़ी नी हय।”
खुवायला सीक्कान दाखलान साहरे ईसु माणसेक सीकाड़े
8ईसु एक दीसरु दाखलु सामळायु, मान लेवु काहनी बायर धड़े चांदीन दस सीक्का हय ने तींद्रे मायन एक खुवाय जाय ती। ची काय करसे? ची दिवु धपाड़से ने खुवायला सीक्का काजे हेरने करीन आखो घर बाहरसे। ची आखे जागे धीरी रवीन हेरसे। जत्यार लग चु सीक्कु नी जड़े तत्यार लग हेरसे। 9जड़ जासे ती ची आपसा दुस्तीदार्याक ने घर धड़े वाळाक बुलावसे ने तीनुक कवसे, मे बेसकी खुस छे, काहाकी मेसेक खुवायलु रुप्यु जड़ गुयु। 10मे तुहुंक कहो ईनी रीते जत्यार एक पापी पाप करनु छुड़ देय, ने भगवानेन मरजीन अनसारे काम करने बाजी जाय ती भगवान आपसा सरग वाळा काहवाळ्या भेळ खुस हये।
उजाड़्या पुर्यान दाखलान साहरे ईसु माणसेक सीकाड़े
11अळी ईसु एक दीसरु दाखलु सामळायु, काहनाक एक माणसेन दुय पुर्या हतला। 12एक दाहड़ु नानलु पुर्यु हेरा बास सी आवीन कह्यु, ए बास! माल धनेन जु मारु वाटु छे, चु मेसेक आप दे। अतराम तेरु बास दुय पुर्याम तींद्रु वाटु पाड़ देदु। 13थुड़ाक दाहड़ा हय गुया ने अळी नानलु पुर्यु आपसा आखा धनेन हीस्सु वेच देदु, ने पयस्या भेळा करीन काहनाक दीसरा देसेम लांबेत जाती र्यु, ने चां चु आपसा आखा पयस्या गलत काम मां उजाड़ देदु।#नीतीवचन 29:3 14जत्यार चु आखो काय उजाड़ देदु, ती तीना देसेम बेसकु काळ पड़्यु, ने चु भुकलु घाबराय गुयु; काहाकी तेरे धड़े पयस्या नी हतला। 15हेरे सी चु तीना देसेम एक अमीर माणसेन चां काम करने गुयु। चु तीनाक आपसा खेते मां सुहर्या चारने करीन मकली देदु। 16चु अतरु भुकलु घाबराय गुयु, की ज खळ सुहर्या खात्ला, च खळ खाणे हींडतेलु, बाकुन चु खळ बी तीनाक खाणे करीन नी आपतेला। 17आकरी मां, चु वीच्यार कर्यु की मे कतरु गांडु छे। चु आपसाक कह्यु, मारा बासेन घर मां आखा दाहड़क्या काजे पेट भरीन रुटा जड़े, ने मे जां भुकलु मर र्यु। 18मे मारा बासेन्चां पछु जायस ने तीनाक कवीस, “बास मे तारा वीरुद मां ने भगवानेन वीरुद मां पाप करलु छे।#भजन सहीता 51:7 19मे तारु पुर्यु कवायणेन हकदार्यु, नी हय। बाकुन मेसेक तारा एक दाहड़क्यान तसु मेसेक राख ले।” 20ती चु असु वीच्यार करीन आपसा बासेन घर भीणी चाल पड़्यु। हय चु आपसा बासेन घर सी छेटेस हतलु, की तेरु बास तीनाक देख लेदु,
ने चु गीण-दया सी भराय गुयु। ने आपसा पुर्या काजे भेळु हवणे करीन चु दवड़ीन गुयु ने तीनाक गळे लागाड़्यु, ने तीनाक बेसकु गुळा देदु। 21ती पुर्यु तीनाक कह्यु, बास! मे सरग वाळा भगवानेन वीरुद मां ने तारे वीरुद मां पाप करलु छे। मे तारु पुर्यु कवायणेन हकदार्यु नी हय। 22बाकुन बास आपसा पावर्याक बुलायु, ने तीनुक कह्यु, उतवाळास जाय्न आखाम सी वारु पुथल्या लाय्न ईना मारा पुर्याक पेहरावु, एक मुंदी हातेन आंगळी मां पेहरावु ने पाये मां खासड़ा पेहरावु। 23ने अळी आपणु आखाम वारलु केवड़ु लाय्न मारु। ने एक मट्ली पंगत देसु, ने खुसी मनावसु। 24काहाकी मारु जु पुर्यु मर गुयलु, बाकुन हय जीवतु हय गुयु। चु खुवाय गुयलु, बाकुन हय जड़ गुयु। ती अळी खुसीन पाल्टी सुरु हय गुय।
25तीनी टेमे तेरु मट्लु पुर्यु खेतेम हतलु। ने जत्यार चु मट्लु भायस खेतेम सी घर आवीन घर धड़े आयु, ती चु वाजा-गाजा सामळीन ने माणसे काजे नाचतेला देखीन चकराय गुयु। 26ने चु एक पावर्याक बुलायु, ने तीनाक पुछ्यु की ज काय हय र्यो। 27चु पावर्यु जपाप आप्यु, तारु नानलु भायस वारु पछु घर आवती र्यु, करीन तारु बास हामुक आखाम मट्लु केवड़ु मांगाड़ीन माराल्लु छे। 28जी वात सामळीन चु मट्लु भायस बेसकु रीसवाय गुयु, ने घर मां लग नी गुयु; बाकुन तेरु बास बाहर आयु ने तीनाक घर मां ली जाणे करीन आयु ने मनावणे बाजी गुयु। 29बाकुन चु आपसा बासेक कह्यु, देख, मे अतरा साल लग तारी सेवा करतु आय र्यु, ने कदी तारी वात नी टाळ्यु। बाकुन तु मेसेक मारा दुस्तीदार्या पुठ्ये मारीन खाणे ने खुसी मनावणे करीन तु मेसेक एक बुकड़ो लग नी आप्यु। 30बाकुन तारु जु नानलु पुर्यु घर छुड़ीन जाती रवलु, ने तारा आखा पयस्या रंडीन्चां जाय्न उजाड़ देदु, ने हय चु पछु घर आयु, ती तु तेरे धड़े आखाम मट्लु केवड़ु मांगाड़ीन मार्यु! 31मटला पुर्यान वात सामळीन तेरु बास तीनाक कह्यु, मारा बेटा, तु जां जलम सी मारे पुठ्ये रवे। ने मारो आखो तत्रो तारोत छे। 32बाकुन हय खुस हवणु चाहजे, ने पंगत मां बसीन खाणान मजा लेणु चाहजे काहाकी तारु भायस मर गुयलु, “बाकुन हय जीवतु हय गुयु। चु खुवाय गुयलु बाकुन हय जड़ गुयु।”
Currently Selected:
लुका 15: NTBSP23
Highlight
Share
Copy
Want to have your highlights saved across all your devices? Sign up or sign in
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
