युहन्ना 18
18
ईसुन धरायणु
(मत्ती 26:47-56; मरकुस 14:43-50; लुका 22:47-53)
1ईसु आपसा भगवान बास धड़े दुवा करीन नवराय गुयु, ने तेरा चेला पुठ्ये एक खुदराक एणकीन एक वाड़ी मां गुयु। तीना खुदरान नाव कीदरोन हतलो। 2ईसु आपसा चेला पुठ्ये ईनी वाड़ी मां एकदम जाया करतेलु। ने ईसुक धुकुदीन धराड़ने वाळु चेलु यहुदा, बी ईनी वाड़ीक देख रवलु। 3अळतेन यहुदा, रोमी सीपायड़ान टुळा काजे लीन, ने मंदीरेन डाहला पुजारा ने फरीसी माणसेन साहरे मकेल्ला मंदीरेन राखवाळ्या सीपायड़ा काजे लीन तीनी वाड़ी मां आय गुयु। चे कंदल्या, बेर्या ने हत्यार लीन आवला। 4मारे पर काय-काय वीतसे च आखो जाणीन ईसु अघु गुयु। ने तीनु काजे कह्यु, “तुहुं कुणीक हेर र्या?” 5चे तीनाक जपाप आप्या “ईसु नासरी काजे, ईसु तीनुक कह्यु मे छे।” तीनाक धराड़ने वाळु यहुदा बी तींद्रे धड़े उबु हय रवलु। 6जत्यार ईसु कह्यु की, “मेत छे” ती चे पछास हय्न धरती पर हीट पड़्या। 7ईसु तीनुक अळी पुछ्यु, “तुहुं कुणीक हेर र्या?” चे कह्या, “नासरत सहर वाळा ईसु नासरी काजे हेर र्या।”
8ईसु जपाप आप्यु मे तुहुं काजे पेहलुत कय देदु की चु मे हयुत छे, “कदी तुहुं मेसेक हेर र्या ती तुहुं मारा ईनु चेला काजे जाणी देवु।” 9ज असो काहा हयो की ज चु कह्यु पुरो हवणु चाहजे, “तीनुक चु मारे सुपरुत करलु छे, मे तीनु मायन एक काजे बी खुवायणी नी दम।”
10तत्यार सीमोन पतरस आपसी तलवार मीयान मां सी नीकाळीन मंदीरेन डाहला पुजारा मुख्यान पावर्यान देदु। ने तेरो जेवड़्यु कान्टु काट नाख्यु तीना पावर्यान नाव मलखुस हतलो। 11ने ईसु पतरस काजे कह्यु, “तलवार मीयान मां पछी भर ले। ज दुखेन पीयालु भगवान बास मेसेक पीणे करीन आप्लु छे च दुखेन पीयालु मां पीये करीन तु अड़चन काहा नाख र्यु?”
ईसु काजे हन्ना अगळ धरीन लावे
12अळतेन रोमी सीपायड़ान टुळु, ने तींद्रु सुबेदार, ने यहुदी डाहला सी मकेल्लु मंदीरेन राखवाळ्या सीपायड़ा ईसु काजे धरीन बांद लेदा। 13ने ईसु काजे धरीन पेहेल मेहेल ते हन्ना धड़े लीजा, जु मंदीरेन डाहला पुजारान मुख्यी पुजारु हतलु, काहाकी चु हन्ना, काइफान सेसरुस हतलु, चु काइफा तीने साल मंदीरेन डाहला पुजारान मुखी हतलु। 14जु हयुत काइफा हतलु, चु यहुदी मुख्याक असु कय्न अगवाय करलु की आपणा माणसे भीणी एक माणुस मरनु वारु छे।
पतरस ईसु काजे नी उळखो करीन कवे
(मत्ती 26:69,70; मरकुस 14:66-68; लुका 22:55-57)
15सीमोन पतरस ने एक अळी दीसरु चेलु ईसुन पछळ-पछळ चाल पड़्यु, चु दीसरु चेलु डाहला पुजारान मुख्यु हन्नान उळखायतु हतलु, ने चु चेलु ईसु पुठ्ये मंदीरेन डाहला पुजारान मुखीन घरेन आंगणाम लग गुयु, हीनाक कुय बी नी रुक्यो। 16बाकुन पतरस झपले उबु रय गुयु, ने डाहला पुजारान उळखायतु, चु दीसरु चेलु तीने आंगणे सी पछु खयड़े जाय्न झपलान राखवाळ्या काजे पुछीन पतरस काजे माहें आंगणाम ली आयु। 17ची झपलान राखवाळी पावरनी पतरस काजे कह्यी, “तु बी तीनु ईसुन चेला मायन नी हय काय?” पतरस कह्यु, “नी हय।”
18सींगेन दाहड़ा हतला, ने घरेन पावर्या ने मंदीरेन राखवाळ्या सीपायड़ा आकठे तापणे बाजी रवला ने पतरस बी तींद्रे पुठ्ये तापतेलु।
मंदीरेन जुन्लु मुखी पुजारु ईसु सी पुछताछ करे
(मत्ती 26:59-66; मरकुस 14:55-64; लुका 22:66-71)
19अळतेन मंदीरेन डाहला पुजारान मुखी हन्ना ईसु काजे चेलान बारामां ने तेरी सीकाड़ली वातेन बारामां पुछ्यु। 20ईसु जपाप आप्यु, “मे मनेन काय बी, नी सीकाड़्यु, मे माणसे अगळ उजेंतु कळी मां सीकाड़लु छे; ने मे जलम तुंद्रा भक्तीन घर मां ने मंदीर मां जां आखा यहुदी भेळा हया करे चां सीकाड़तु रयु। 21ती तु मेसेक काहा पुछ र्यु? सामळन्याक असु पुछु की, हयु तुहुंक काय सीकाड़लु छे मे तीनुक काय कहंलु तीनुक मालुम छे।”
22जत्यार ईसु जी वात कह्यु ती चां उबा हय रवला मंदीरेन राखवाळ्या सीपायड़ा मायन एक जणु ईसुन एक थापड़#18:22 थप्पड़ देदु। ने कह्यु, “तु ते मंदीरेन मुखी पुजारा काजे असु जपाप काहा दी र्यु?” 23ईसु तीनाक जपाप आप्यु, “कदी मे काय गलत वात कह्यु हय, ती पुरावु दीन देखाड़; बाकुन छाचली वात कह्यु हय ती मारे काहा देय?” 24अळतेन हन्ना ईसु काजे असुत बांदायलुत मंदीरेन डाहला पुजारान मुखी काइफान्चां मकली देदु।
पतरस ईसुन बारामां नी जाणो करीन कह्वे
(मत्ती 26:71-75; मरकुस 14:69-72; लुका 22:58-62)
25तीने टेमे सीमोन पतरस, आकठा धड़े उबु-उबु तापणे बाजी रवलु। तत्यार थुड़ाक माणसे पतरस काजे कह्या, “तु बी तेरा चेला मायन एक छे काय?” पतरस ईसुन नीकारु करतु जाय्न कह्यु मे नी हय।
26मंदीरेन मुखी पुजारान एक पावर्यु, चु तीना पावर्यान दुस्ती बी हतली, तेरु कान्टु#18:26 कान पतरस काट नाखलु, “चु पतरस काजे कह्यु मे तुसेक तीना ईसु पुठ्ये वाड़ी मां देखलु?” 27पतरस ईसुन अळी नीकारु करतु जाय्न कह्यु, “मे नी हय” ने तत्यारुत कुकड़ु वास देदु।
ईसु काजे पीलातुस अगळ उबु करे
(मत्ती 27:1,2,11-14; मरकुस 15:1-5; लुका 23:1-5)
28अळतेन यहुदी मुख्या ने डाहला पुजारा ईसु काजे काइफान घर मां सी रोमी सरकारेन यरुसलेम राजवाड़ान हवेली वाळा कीलान आंगणाम ली गुया, ने तीने टेमे काय संदारो हय वाग्लो ईना रोमी राजवाड़ान राज करन्यु पीलातुस नी भुरसु वाळा यहुदी आड़जात्या बी हतला, ने यहुदी मुख्या ने पुजारा वीच्यार कर्या की हामु ईना आड़जात्या पीलातुसेन हवेली मां भरायसु ती हामु वीटळी जासुन। ने हामुक हामरा फसह तीहवारेन खाणो नी खावाये करीन चे यहुदी मुख्या ने पुजारा तीनी हवेली मां नी भराय। 29ने राज करन्यु पीलातुस हवेलीम सी बाहर नीकळीन तींद्रे अगळ आयु ने कह्यु, “तुहुं ईना माणुस पर काहनु गुनु लागाड़ र्या?” 30चे जपाप आप्या, “कदी जु गुनाळु नी रहतु, ती हामु हीनाक तारेन चां नी लावता।”
31पीलातुस तीनुक कह्यु, “तुहुंत ईनाक ली जावु, ने तुंद्रा कायदान अनसारे हेरु नीयाव करजु।”
यहुदी मुख्या कह्या “हामुक हक नी हय की काहनाकेन जीव लेणु।” 32मारी मोत कसी हवसे करीन ईसु पेहलुत तेरा चेला काजे कहंलु। ने ईसुन कहला बुलेन अनसारे आखो हयो ने तेरेत अनसारे हय बी यहुदी मुख्या तीनाक मुतेन डंड आपाड़ने करीन पीलातुस साते वात कर्या।
33अळतेन पीलातुस अळी पछु हवेली मां जात र्यु, ने ईसु काजे बुलायु ने तीनाक पुछ्यु, “तु यहुदी माणसेन राजु छे काय?” 34ईसु पीलातुस काजे जपाप आप्यु, “जी वात तु आपसे आवड़तेत कय र्यु की मार बारामां काहना दीसरा तुसेक कहंला छे?” 35पीलातुस ईसुक जपाप आप्यु, “मे यहुदी छे काय? तारीत जातीन माणसे, मंदीरेन डाहला पुजारा भेळा भेसकायन तुसेक धराय्न मारे सुपरुत करला छे। तु काहनु गुनु करलु छे?” 36ईसु कह्यु, “मारो राज ईनी कळीन राजान तसों नी हय। कदी मारो राज, ईनी कळीन राजा तसों रहतो, ती मारा राखवाळ्या सीपायड़ा मारे वाटे लड़ाय करता, ने मे यहुदी माणसेन हातेम नी धरायतु। बाकुन मारो राज ईनी कळीन राजान तसों नी हय।”
37च सामळीन पीलातुस ईसुक कह्यु, “ती, तु छाचलीन राजा छे काय?” ईसु पीलातुस काजे जपाप आप्यु, “तु वारुत कय र्यु काहाकी मे राजा छे ने मे छाचली वात ने गवा पुरावा आपणे करीन ईनी कळी मां पयदा हय्न आवलु छे ने जीत छाचली छे चु मारी वात सामळीन पाळे।”
38“पीलातुस ईसु काजे पुछ्यु छाचली काय छे?” ज पुछीन पीलातुस अळी हवेलीम सी बाहर नीकळीन यहुदी मुख्या अगळ आवीन कह्यु, मेसेक ते हीना माणुस मां काय बी गुनु नी देखायतु।
मोतेन डंडेन हुकुम
(मत्ती 27:15-31; मरकुस 15:6-20; लुका 23:13-15)
39बाकुन तुंद्री रीतीन अनसारे मे तुंद्रे वाटे फसह तीहवारेन टेमे एक केदड़ा काजे जेल मां सी छुड़तेलु, “ने तुंद्री मरजी हय ती तुंद्रे वाटे यहुदीन राजाक छुड़ दम?” 40ज सामळीन चे एक कावा अळी आयड़ीन कह्या, “हीनाक मां छुड़े, बाकुन बरअब्बा काजे छुड़ दे।” ने चु बरअब्बा एक डाकु हतलु।
Currently Selected:
युहन्ना 18: NTBSP23
Highlight
Share
Copy
Want to have your highlights saved across all your devices? Sign up or sign in
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
