नेवताळा 8
8
ईसुन मंडळीक वेला पाड़नु
1सावुल स्तीफनुसेन हत्याम राजी हतलु। तीने दाहड़े सी माणसे यरुसलेमेन मंडळी काजे बेसका वेला पाड़नु सुरु कर देदा, ने ईसुन नेवताळा काजे छुड़ीन आखान-आखा यहुदीया जीला मां ने सामर्या जीला मां रावण्या-तीवण्या हय गुया। 2ईसुन भगत माणसे स्तीफनुसेन लास काजे बेसका रड़ता जाय्न वगे कर देदा।
3सावुल तीनी टेमे ईसुन मंडळी काजे वेला पाड़ी रवला; ने चु ईसुन आखा माणसेन घर-घर जाय्न अदमीक ने बायराक घीसड़ी-घीसड़ीन लाय्न जेल मां नाखतेलु।
सामर्या मां खुस-खबरेन परचार
4जे माणसे अथा-अथान रावण्या-तीवण्या हय गुयला चे हींडी-हींडीन ईसुन खुस-खबर सामळावणे बाजी गुया। 5ने फीलीप्पुस, सामर्या जीलान एक सहर मां जाय्न चां ईसु मसीन बमदीन परचार करने बाजी गुया। 6जत्यार माणसे फीलीप्पुसेन वात सामळीन ने तेरे हाते हवतेली वारु कामेन सहलाणी देखीन, एक मन्या हय्न बेसका मन लागाड़्या। 7काहाकी बेसका जणाम सी वीटेळ्ळा भुतड़ा आयड़ीन नीकळी गुयला, ने बेसका लखवान मांदवाड़ वाळा ने लंगड़ा वारका हय गुयला। 8अळी तीना सहर मां खुसी आय गुई।
9सीमोन नावेन एक अदमी फीलीप सी पेहलेत ईना सहरेम आय रवलु। चु जादुन खेल देखाड़ीन सामर्या सहर वाळाक चकराड़ रवलु, ने आपसा काजे मे बेसकु-भारी माणुस छे, करीन आपसा काजे बेसकु मटु समजतेलु। 10नानला सी मटला लग आखा माणसे तेरी वात मान्ता हतला, ने कवतेला, “जु माणुस भगवानेन ची ताकत छे, जी बेसकी-भारी कवाये।” 11चु बेसका दाहड़ा सी जादुन खेल-खेलीन आखाक चकराड़ रयु, आखा माणसे तीनाक बेसका मानतेला। 12बाकुन जत्यार चे माणसे फीलीप्पुसेन साहरे भगवानेन राजेन खुस-खबर ने ईसु मसीन नाव सामळ्या, ईसु पर भुरसु कर्या ने बायरा ने अदमी बपतीस्मा लेणे बाजी-गुया। 13ने सीमोन बी ईसु पर भुरसु कर्यु ने बपतीस्मा ली लेदु ने अळी फीलीप्पुस पुठ्ये रवणे बाजी गुया। ने फीलीपन साहरे वारु कामेन सहलाणी ने मटा-मटा बेसका वारु कामे देख्यु, ती चकराय गुया।
14जत्यार यरुसलेम मां रवण्या ईसुन नेवताळा ज सामळ्या की सामर्या वाळा भगवानेन बुल काजे मान लेदा, ती चे पतरस ने युहन्ना काजे तींद्रेन्चां मकल्या। 15चे जाय्न सामर्यान भुरसु करने वाळा वाटे भगवान धड़े दुवा कर्या की ईनुक चुखली-आत्मा जड़नु चाहजे। 16काहाकी हय लग तीनु काजे चुखली-आत्मा नी जड़्यु, तीनुक मालीक ईसुन नावे बपतीस्मा अतरोत आप्ला हतला। 17अतरे पतरस ने युहन्नु तींद्रे पर हात मेक्या ने तीनुक चुखली-आत्मा जड़ गुय।
18सीमोन ज देख्यु की ईसुन नेवताळा माणसे पर हात मेके अतरात ने तीनुक चुखली-आत्मा जड़ जाय। तेरेसी चु तींद्रेन्चां रुप्या लावीन कह्यु। 19“मे तेरे पर बी हात मेको तीनाक चुखली-आत्मा जड़ जाणु चाहजे, असु हक मेसेक बी आपु।”
20बाकुन पतरस तीनाक जपाप आप्यु, “तारे पुठ्ये तारा रुप्या बी सर जाणु चाहे, काहाकी तु भगवानेन वाटा काजे रुप्या आपीन हात करनेन हेर कर्यु। 21ईनी वातेम तारु हीस्सु बी नी हय, ने हक बी नी हय। काहाकी भगवान अगळ तारो मन सुदो नी हय। 22हेरे सी तु तारा ईना भुंडा मन सी फीरीन भगवान सुदु वळ ने मालीक ईसु सी वीन्ती कर। कांखुर मायन भगवान तारा मनेन वीच्यारेन माफी आप देय ते आप देय। 23काहाकी मेसेक चुखोझण देखाव पड़ रयो की तु आखी भातीन पाप मां फांदायलु छे।”
24जी वात सामळीन सीमोन जपाप देदु, “तु जी बी वात कवलु छे, तसों मार धड़े नी हवणु चाहे, करीन तुहुं मालीक भगवान धड़े मारे वाटे वीन्ती करु!”
25अळतेन चे ईसुन नेवताळा, मालीक ईसुन गवाय दीन ने भगवानेन बुल सामळावीन यरुसलेम पछा जात रया, ने वाट्ये-वाट्ये बेसका सामर्या जीलान गांव मां ईसुन खुस-खबर सामळावता गुया।
फीलीपुस कुस देसेन मंत्री काजे बपतीस्मा आपे
26अळतेन मालीक भगवानेन एक सरग वाळु काहवाळ्यु फीलीप्पुस काजे कह्यु, “उठ यरुसलेम सी गाजा सहर भीणी जाणे वाळी वाट पर दाखणाव जां।” जी वाट उजाड़ी बयड़ा मां छे। 27सरग वाळा भगवानेन अघली वात बताड़ने वाळान वात सामळीन फीलीप्पुस उठीन चाल पड़्यु। चां वाट्येत कुस देसेन एक माणुस जाणे बाजी रवलु, चु गतराड़ु हतलु ने कुस देसेन कंदाके राणीन एक मंत्री ने पयस्या टकान हीसाब राखण्यु हतलु, ने चु भगवानेन पुजा-पाट करने करीन यरुसलेम आवलु हतलु, ने पुजा-पाट करीन पछु जाणे बाजी रवलु। 28चु आपसी घुड़ागाडी पर बस रवलु, ने भगवानेन अघली वात बताड़ने वाळु यसायान किताप भन्ने बाजी रवलु। 29भगवानेन चुखली-आत्मा फीलीप्पुस काजे कह्यु, “अगु जां, ने घुड़ागाडी पुठ्ये चाल पड़।” 30फीलीप्पुस दवड़ीन तेरेन्चां गुयु ने चु तीनाक भगवानेन अघली वात बताड़ने वाळु यसायान किताप भणतेलु सामळ्यु, ने तीनाक पुछ्यु, “तु जी वात भन्ने बाजी रयु, जी वात समजी रयु काय?” 31चु अधीकारी जपाप आप्यु, “जत्यार लग कुय मेसेक नी समाजड़े, ती लग मे कसु समजो?” ज कयदीन चु फीलीप्पुस काजे आपसी घुड़ागाडी पर चड़ावीन बठाड़ लेदु। 32खरला सास्तुरेन ज पाठ चु भन्ने बाजी रवलु,
च पाठ ज हतलो तीना काजे गाडरान तसा मारने करीन ली गुया,
ने जसों गाडरो तेरा कान्या काटणेन टेमे हुगो हय रवे, तसुत चु हुगु हय रयु,
ने आपसो मुंहडो लग नी उगाड़्यु।
33चु भुळु बणीन रयु, बाकुन ईने टेमे तेरु नीयाव
नी हयु, ने तीनी टेमेन माणसेन बारामां कुण कवसे,
काहाकी धरती पर सी तेरी जीवाय हाकलाय गुया।
34ईनी टेमे गतराड़ु फीलीप्पुस काजे पुछ्यु, “तु मेसेक दया करीन देखाड़ की भगवानेन अघली वात बताड़ने वाळु माणुस जी वात कुणीन बारामां कय रयु, आपसा बारामां कय रयु की काहना दीसरान बारामां कय रयु?” 35ती फीलीप्पुस ईनी खरली सास्तुरेम सी सुरु करीन ईसुन खुस-खबर सामळायु। 36वाटे चालता-चालता चे पाणी हतलो चां आखा पुग गुया। पाणीक देखीन गतराड़ु कह्यु, “देख, पलो हयो पाणी। हय मेसेक बपतीस्मा लेणेम काय रुक छे?” 37फीलीप्पुस कह्यु, कदी तु पुरो-पुरो मन लागाड़ीन भुरसु करे, ती ली सके। चु जपाप आप्यु, “हव, मे भुरसु करो की ईसु मसी भगवानेन पुर्यु छे।”
38तत्यार गतराड़ु घुड़ागाडी चालाड़न्याक घुड़ागाडीक उबराक दे कह्यु, ने फीलीप्पुस ने गतराड़ु दुय जणा पाणी मां भराया ने फीलीप्पुस तीनाक पाणी मां बपतीस्मा आप्यु। 39जत्यार चे पाणीम सी बाहर आया, ती मालीक चुखली-आत्मा फीलीप्पुस काजे ईछ ली गुय। गतराड़ु, तीना फीलीप्पुस काजे अळी नी देख्यु; ने चु गतराड़ु खुस हय्न आपसे वाटे-वाटे अगु चाल पड़्यु। 40ने फीलीप्पुस असदोद मां देखाव पड़्यु, ने चु जत्यार लग केसर्या नी पुग्यु, ती लग सहरे सहरेम ईसुन खुस-खबर सामळावतु गुयु।
Currently Selected:
नेवताळा 8: NTBSP23
Highlight
Share
Copy
Want to have your highlights saved across all your devices? Sign up or sign in
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
