MAKU 7

1YI baFalixi yi banga bafundi ba mikanda bakakokama kudiyi bamalwa ku Yelusaleme ; 2yi bakamona beyi banci banga batanadya bidya yi makaci amapinda, kulexi yi kutôya ene, atena makusula. 3Bwalo bwa baFalixi yi bena Yuda boso, kutena bamakusula makaci abo dyendeli, kabasodya ; badi mu kunama muxiyilu ă bateteabo. 4Yi pa kupifiana ku dibanca dia kisalu kabasodya kutena bamakwowa mai ; yi minga miesambu idiko mingi yamangatabo ndo kuyinama, bwalo bwa kukusula kwa mpamba yi mabungu, yi sala ya mwiyabolo. 5Yi baFalixi yi bafundi ba mikanda bakamwapangusa ene, Kukai beyi bebe kabasokwenda yi muxiyilu ă babakulu ? kate badedya bidya yi makaci amapinda. 6Yei akabapingasa ene, Esaya akadimusa sôsôlwo ku bwalo bwenu, bena mancanga, bea biakafundibwa ene, Bantu baba bangwanemeka ku milomo yabo, mo mucima ăbo udi kulekule yinami ; 7kaninga bangwaxingila mo kanana, beyesa kweyesa kwabo kwa milangu ya bantu. 8Nonu nwakadeya mulangu ă Ncembi yi nwanama muxiyilu ă bantu. 9Yi akabatôyela ene, Sôsôlwo, nwamakwatola mulangu ă Ncembi binuxenama muxiyilu ěnu. 10Bwalo bwakatôya Mosese ene, Nemeka tetebe yi mabebe ; yi ene, You atangola ndo tetenci ndo mamanci afwi. 11Mo nonu ene, Ndo muntu amatôyela tetenci ndo mamanci ene, Kidi Kôbana, (kulexi yi kutôya ene, Kiamalongebwa dilongi), ku bwalo bwa kintu kioso kixetetowa owe yinakio kundi ; 12nonu lolo kanusomusadidisa ndo tetenci ndo mamanci mudimo mwoso kabidi ; 13nako nwamalengola diyi dia Ncembi ku muxiyilu enu unwamalongolañana ; yi nwencenca malo a noku mangi mangi.

14Yi akabikila kimbukuma kabidi yi akabatôyela ene, Nungwombwi bungi bwenu ; yi nulembeteli. 15-16Kakuna kintu kidi kunci kwa muntu ndo kiamabwela munda mwanci kiamalubukwa kumupindisa ; kate bintu biabatuka munda mwanci, kabebi ndo biapindisa muntu. 17Yi pakadi amancuka ku kimbukuma yi amabwela munda mwa ncibo, beyi banci bakamwapangusa bwalo bwa mwele ou. 18Yi akabatôyela ene, Nonu kabidi nwasaka yi kilubukilu nako ? Kanusolembetela ene, kintu kioso kia kunci, aka kiamabwela munda mwa muntu kakibiyi kumupindisa, 19bwalo butasobwelakio mu mucima ănci, kate mu difu dienci ; kiamakwelebwa kunci lolo, bwalo bwa kukupulula bidya bioso mbindu. 20Yi akatôya ene, Kintu kiamabatuka munda mwa muntu, kakieki ndo kiamapindisa muntu. 21Bwalo bwa munda, mu mucima ă bantu ndo mwabatuka nkanyi mibi, madibi, 22misaka, monda, mendela, xindilu, mabi, ncimi, nkolwa, disombo, mietangu, disasa, kiobe ; 23bungi bwa bintu bebi bibi ndo biabatuka munda, yi biamapindisa muntu.

24Yi akakwemana, yi akancuka koku kuya ku mbata ya Tile yi Xidono. Akabwela lolo mu ncibo umoumwe, akadi ene, muntu kalubukwi, kaninga kabiyi kusokokyebwa. 25Kate mwamukaxi akadi yi mwana mubende a babakaxi udi yi kidimu kia mbindu, pakakwombwayi mwoximo ănci, akalwa mangwoso, akapona ku makasa anci. 26Mwamukaxi lolo akadi muna Ngiliki, a bubila bwa Silia-Feniki. Yi akamulomba apaulipo kidimu munda mwa mwananci. 27Mo Yisu akamutôyela ene, Bana bokutixibwi buxi ; bwalo butasolelekyela, bidya bia bana kwangata kwela kudi yimbwa. 28Mo yei akapingasa yi akamwambila ene, Sôsôlwo Fumu ; isanga yimbwa idi muxi mwa mesa yidedya mangungu a bana. 29Yi akamutôyela ene, Ku bwalo bwa diyi dedi, yaka ; kidimu kiamabatuka munda mwa mwanebe. 30Yi akancuka kuya ku ncibo anci, yi akasañana mwana ulele pa ntangi, yi kidimu kiamapauka.

31Yi akancuka kabidi ku mbata a Tile yi akalwa mu ncila a Xidono, pôi ku mai a Ngalili, pakacikaci pa mbata ya Dekapolo. 32Yi bakacwala muna bicu kudiyi, muna kalangu ; yi bakamulomba abaki kianca kienci kulu kwanci. 33Yi akamuncula ku kimbukuma kuya ku dituku ; yi akabwesa ndembu yenci mu macu anci ; akakwela mati, akabaka ludimi lwanci kianca ; 34yi pakadi amasangola meso anci lwa diulu, akakabana, yi akamutôyela ene, Efata, kulexi yi kutôya ene, Dipudibwa dyendeli. 35Yi macu anci akadipudibwa mangwoso, yi musisa ă ludimi lwanci ăkasudibwa, yi akasakola kutôya loko. 36Yi akabalanga ene, kabambidi muntu mwoso ; mo pakalekolayi yi kubalanga, bobo biabo bakalekola yi kusakola bwalo, 37yi bakakama kukama kungi ene, Apwenca bintu bioso loko ; amakwombwesa isanga bena bicu, yi amatôyesa isanga bena bimeme.

Currently Selected:

MAKU 7: Luna_NT

Highlight

Copy