MATEYO 17

1YI kunyuma kwa matuku asambomo Yisu akangata yinanci Pita yi Yakobo yi Yoano mwakunyenci, yi akabacwala kulu kwa lupongo mikyeabo batupu. 2Yi akatulolebwa ku meso abo. Mpala anci lolo akasusuka luna diba, yi bilamba bienci biakapiluka susu bea obo ; 3yi mona, Mosese yi Eliya bakamoneka kudibo, batanakwambilafiana yinanci. 4Yi Pita akakulumuna, akakwambila Yisu ene, Fumu, kudi kunengela ndo kwakala kunu. Ndo wananga, nakukisa kunu bitanda bisatu ; kimo kiebe, kimo kia Mosese, kimo lolo kia Eliya.

5Pakadi ukiatôya, mona dibaxi dia susu obo diakababukila, yi mona. diyi munda mwa dibaxi, ene, You udi Mwanami munangibwi, unapuxekyelela ; numwombweli yei. 6Yi pakakwombwa beyi bakapona ku mpala yabo, yi bakacina kungi. 7Yi Yisu akalwa babaka kianca, yi akatôya ene, Nubiki, kanucini. 8Yi pakasangolabo meso abo bakadi kabasomona muntu ; mo Yisu mutupu.

9Biakapwekabo ku lupongo, Yisu akabatôyela ene, Kanwambidi muntu munwapumona pôi kikondo kinakala Mwana a Muntu amabika kudi bafu. 10Yi beyi banci bakamwapangusa ene, Kukai lolo bena mikanda batôya ene, Eliya uxelwa buxi ? 11Yi yei akabapingasa ene, Eliya ulolwa buxi sôsôlwo, yi unapingasa bintu bioso. 12Kaninga nwatôyela ene, Eliya amalwa buxi yi kabamulubukwa, kate bamakwenca yinanci mwoso mwakanangabo. Nako kabidi Mwana a muntu unalwa tata kudibo. 13Beyi lolo bakalembetela ene, amabatôyela dia Yoano Munumeyi.

14Yi pakafikabo kudi kimbukuma, pakalwa muntu kudiyi, akakuma binu paxi ku mpala anci ene, 15Fumu ombwelapo mwanami mwengo, bwalo budiyi muna mwombi, atata kungi. Bwalo bwapona ponayi mu mudilu mapona mangi, yi munda mwa mai. 16Yi nakamucwala kudi beyi bebe, yi bakadi kabasoponya yi kumupandisa. 17Yisu akapingasa ene, Mwociya utena kwetabusa, ămaunga unga, nakwakala y nenu kikondo beci ? nakwekyela yinenu kikondo beci ? Numucwali kunu kundi. 18Yi Yisu akamulanga, yi kidimu kibi kiakamuncuka, yi mwana akapandixibwa pôi ola you.

19Kunyuma beyi bakalwa kudi Yisu ku dituku ene, Kukai coco twakadi katusoponya yi kukipaula ? 20Akabambila ene, Bwalo bwa kusaka kwenu kwa kwetabusa ; bwalo bunwatôyela sôsôlwo, ene, Nonu ndo nwakala yi kwetabusa kwa luna mutongu ă mutadi, nunatôyela lupongo lolo ene, Tutuka kunu kuya yikwa, lunaditutula ; yi kintu kakinako kinanupidila. 21Kaninga butonga bwa noku kabusobatuka kutena kudi kulomba yi kuncila kwa bidya luncilu.

22Pakasalabo mu Ngalili Yisu akabambila ene, Mwana a muntu unakwengebwa ku bianca bia bantu, 23yi banamuxipa ; yi ku dituku diamusatu kunabixibwayi. Yi bakakwombwa buxitu bungi.

24Pakalwabo ku Kapenaumu, bobo bakasanga mpalata ya tempelo bakalwa kudi Pita yi bakatôya ene, Mweyexi enu amalambula mpalata ya tempelo ? 25Akatôya ene, Sôsôlwo. Pakabwelayi munda mwa ncibo, Yisu akamwambila buxi, ene, Owe wencenca beci, Ximono ? Bafumu ba loboko bangata angata ndo bima ndo mulambu kudi banani ? kudi bana babo mikyeabo, sungu kudi banga bantu ? 26Pita akamwambila ene, Kudi banga bantu. Yisu akamwambila ene, Mbwôso bana bendenda kanana. 27Kaninga ximbi tuxebanyungudisa, yaka ku mai, ela lolo dilopo ; angata yixi ulolwa buxi, yi panakala wamadipula musuku ănci unasañana mpalata (luna Ngiliki, “ stater ”) ; angata you noku, ubapi ku micwe yecu, yi meme yinebe.

Currently Selected:

MATEYO 17: Luna_NT

Highlight

Copy