LUKA 6

1YI ku dituku dia Sabado amubidi kwakadiyi mu kudika mu bibidi bia miebele, yi beyi banci bakanyowa mbusu yi bakadya, badi mu kusisa mitongu mu bianca biabo. 2Yi banga baFalixi bakabambila ene, Kukai nwencenca bwalo butasolelekyela yi bwadi kwencebwa ku dituku dia Sabado ? 3Yi Yisu akabapingasa ene, Nonu kanwabala isanga noku, mwakakwenca Dafidi pakadiyi yi ncala, yei yi bobo bakadi yinanci ; 4mwakabwelayi mu ncibo a Ncembi, yi akangata mampa madisa yi akadya, yi akapa kabidi bobo bakadi yinanci ; atasolelekyela yi bwadi kudya kutena kudi makanda matupu ? 5Yi akabambila ene, Mwana a Muntu udi Fumu a Sabado kabidi.

6Yi ku munga Sabado kwakabwelayi mu kixingidilu yi akakweyesa. Yi momu mwakadi muntu yi kianca kienci kia kidyo kiamakwoma. 7Yi bafundi ba mikanda yi baFalixi bakatebela ndo uxepandisa ku Sabado, bixesañanabo bwalo bwa kumusanya. 8Mo yei akalubukwa nkanyi yabo ; yi akatôyela muntu akadi yi kianca kiomu ene, Bika, emana pakacikaci. Yi akakwombuluka yi akakwemana. 9Yisu lolo akabambila ene, Meme nwapangusa ndo kwalelekyela yi bwadi kwenca kunengela ku Sabado, ndo kwenca bubi ? Ndo kupandisa môyo, ndo kuncimisa môyo ? 10Yi akabatebela bungi bwabo bakamudinga, yi akamutôyela ene, Xombola kianca kiebe. Yi akakwenca noku, yi kianca kienci kiakancincidixibwa. 11Kaninga bakakwolubixibwa yi bisusu, yi bakakwelañana nkanyi muxekwencabo kudi Yisu.

12Yi ku matuku yia kwakabatukayi ku lupongo kuya lomba, yi akakyesa butuku yi ndombu kufomba kudi Ncembi. 13Yi pakaiwa munyinya pakabikilayi beyi banci, yi akasungula disangi yi babidi kudibo bakabikilayi kabidi ene, Batumibwi ; 14Ximono, akabikilayi kabidi ene, Pita, yi Andelo mwakunyenci ; yi Yakobo yi Yoano, Filipi yi Batolomo, 15Mateyo yi Tomasa, Yakobo a Alifayo yi Ximono akabikidibwa ene, Seloto, 16Yude a Yakobo, yi Yudaxi a Ixikalioto, akadi mwengi akamwsnga.

17Yi akapweka yinabo yi akakwemana ku kidi kia makalikali, yi kibumbu kinene kia beyi banci ; yi kimbukuma kinene kia bantu ba ku bungi bwa Yudiya yi Yelusaleme, yi ba ku mwanca a mai manene ku Tile yi Xidono, bakalwa ndo kumwombwa yi kupandixibwa masama abo ; 18yi bobo bakafinibwa kudi bidimu bia mbindu bakapandixibwa. 19Yi bungi bwa kimbukuma kia bantu bakapalala kumubaka bianca biabo, bwalo bwakancuka ngulu kudiyi yakapandisa bungi bwabo.

20Yi akasangola meso anci ndo kutebela beyi banci, yi akatôya ene, Balwangwasanibwi nonu bakombi, bwalo budi bufumu bwa Ncembi bwenu. 21Balwangwasanibwi nonu bombombwa ncala nkyekyu bwalo bununakwokutixibwa. Balwangwasanibwi nonu badila nkyekyu, bwalo bununaxeka. 22Balwangwasanibwi ndo nonu, oka bantu bananunyafiana yi bananunamuna kudibo, yi bananudidika yi banapaula dina dienu luna ndo dibi, ku mucwe ă Mwana a Muntu ; 23nuxekyeleli ku dituku dedi, nuditambisi kulu bwalo bwa kiango ; bwalo budi sayi yenu minene mu diulu, bwalo bwakakwenca bateteabo nako kudi badimuxi.

24Kaninga mpeya kunudi, bena madidi, bwalo bunwamangata kibondelu kienu. 25Mpeya kunudi bamakwokutixibwa nkyekyu, bwalo bununakwombwa ncala. Mpeya kunudi baxeka nkyekyu, bwalo bununadila bidilu yi nunancula masonci. 26Mpeya kunudi pananusosola bantu boso, bwalo bwakakwenca bateteabo nako kudi badimuxi ba mancanga.

27Kate nwatôyela nonu bombombwa ene, Nunangi bantu batanda yinenu ; nubenceli kunengela banwanyañana ; 28nubalwangwasani banwafinga ; nubalombeli banwakolomona. 29Muntu mwoso ukwakuma lupi ku ditama, umukulumunini dinga kabidi ; yi muntu uxencula kilamba kiebe, kumunyananini kinkutu kiebe kabidi. 30Longola kudi muntu mwoso ukwalomba ; yi you ancula bintu biebe, kumunani mbata. 31Luna binwakyeba bantu banukixili, nonu nubakixili nako kabidi. 32Yi nonu ndo nwananga bantu banwananga nonu, nuxexingibwa biloba kukai ? Bwalo bwananga isanga boni bantu babananga bobo. 33Yi ndo nubencela bobo kunengela banwencela kunengela nonu, nuxexingibwa biloba kukai ? Bwalo bwencenca isanga boni nako. 34Ndo nubasombwesa bintu banubadingidila bintu kabidi, nuxexingibwa biloba kukai ? Isanga boni basombwesa bintu kudi boni, bixeangatabo lwedi lolu kabidi. 35Kaninga nunangi bantu batanda yinenu, yi nwenci kunengela yi nusombwesi kutena kudingidila kintu kioso kabidi ; yi sayi yenu yinakala minene, yi nunakala bana ba You adika kulu ; bwalo budiyi yi bonkangi kudi bena nkolwa batasomuxinga, yi kudi bantu babi. 36Mbwôso nonu nwakali yi mwengo bea bidi Tetenu kabidi yi mwengo. 37Kanusambodi, yi kanunasambolebwa pô ; kanubedi, yi kanunabelebwa pô. Nulekyeli bantu mabi abo, yi nunalekyelebwa. 38Nupi, yi nunapebwa ; lwedi lwa tô, lunyaka, luntuntula, lutanapulowa, lunalongolabo mu mwopu ěnu. Bwalo bwa lwedi lolu lunwelekyesa yinalu nonu, lunanwelekyexebwa kabidi.

39Yi akabambila kabidi mwele ene, Mufofo ubili kuxiya xiya mufofo ? Ki banapona bubidi bwabo mu mulenda ? 40Mweyi kasodika mweyexi anci, mo muntu mwoso amakweyexebwa nya unakala luna mweyexi anci. 41Mo kukai owe watebela kangungu katani mu diso dia muna kwebe, kaninga kusoxixima kibambu kitani ku diso diebe mikyebe ? 42Owe unatôyela muna kwebe beci ene, Mbenculapo kangungu kadi mu diso diebe yi owe kusoxixima kibambu kidi mu diso diebe mikyebe. Muna mancanga, ncula kibambu buxi mu diso diebe, kunyuma lolo unaxingulula bimpe ndo kuncula kangungu kadi mu diso dia muna kwebe. 43Kakuna muci unengela akama bimoma bibi, yi kakuna muci mubi kabidi akama mamoma anengela. 44Bwalo bwamalubukibwa muci mwoso ku mamoma anci, bwalo butasokulabo mamoma a kikuyi kia maxika ku mieba, ndo mamoma a finyo ku kikwa. 45Muntu unengela ndo abatusa bwalo bunengela munda mwa ngombo unengela a mucima ănci ; yi muntu mubi ndo abatusa bwalo bubi munda mwa ngombo mubi ; bwalo bwasakola musuku ănci malo adi mu mucima ănci bungi tô.

46Yi kukai nungwatamba ene, Fumu, Fumu, yi kanusokwenca bintu bingwatôya ? 47Muntu mwoso ulolwa kundi, ombombwa meyi amene yi encenca, nakunwebesa muntu afwanayi. 48Amafwana muntu amakwabaka ncibo, akakwemba yi akakitelesa mena kulekule, yi akabangola kibangolelu kia ncibo ku lubwe ; mo pakafika muyi ă bubi, mai akakyela ku ncibo you, yi akadi kasolubukwa kumunyingisa, bwalo bwakakwabakibwayi loko. 49Mo you amakwombwa kutena kwenca, ulexi yi muntu amakwabaka ncibo anci ku yimbwi kanana, kutena kibangolelu muxi ; yi mai akakyela kudiyi, yi akapona mangwoso, yi kubuka kwakabuka ncibo you kwakadi kwa bubi.

Currently Selected:

LUKA 6: Luna_NT

Highlight

Copy