LUKA 5

1YI pakadi bantu badi mu kumufina mpika, yi badi mu kwombwa diyi dia Ncembi, yei akadi mu kwemana pepe yi kitelenena kia Ngenesalete ; 2yi akamona bibusu bibidi bidiko mu kitelenena, mo bena bibusu bakadi bamasabuka mu bibusu, badi mu kukusula matei abo. 3Yi akabwela mu kinga kibusu kiakadi kia Ximono, yi akamulomba akinamuni kabende ku mwanca ă mai. Yi akaxikama yi akakweyesa bantu ku kibusu. 4Mo pakadi amalekyela kutôya, akakwambila Ximono ene, Fikisa kibusu kutani ngidi, pwesa matei enu ndo kukwata yixi. 5Yi Ximono akapingasa ene, Fumu, twapuiyomba iyomba butuku buncimancima, yi katuxindili yixi umoumwe ; kaninga ku diyi diebe ka kunapwesa matei. 6Yi pakadi bamakwenca nako, bakakwata kibumbu kinene kia yixi, yi matei abo akalanda kupandika. 7Yi bakabikila bena kwabo bakadi mu kinga kibusu kulwa bakwacisa. Yi bakalwa yi bakakwolubisa bibusu bubidi bwabio, biakabangabio kudiya. 8Mo Ximono Pita, pakamonayi nako, akapona ku binu bia Yisu ene, Ncuka kundi, bwalo bundi muntu a bubi Fumu. 9Bwalo bwakamukwata bowa yi bungi bwabo bakadi yinanci, bwaio bwa kibumbu kia yixi yakakwatabo ; 10yi mo nako kabidi Yakobo yi Yoano, bana ba Sebede, bakasangiia yi Ximono ku mudimo. Yi Yisu akatôyela Ximono ene, Kucini ; pôi nkyekyu panakwata bantu. 11Yi pakadi bamafikisa bibusu ku mbata, bakaxiya bintu bioso yi bakamulandudila.

12Yi pakadiyi mu bunga bula, mona, muntu akadiko akakwolubila yi kusama kwa sudi ; yi pakamonayi Yisu, akapona ku mpala anci, yi akamulomba ene, Fumu, ndo wananga, ubili kungukusula babala. 13Yi akaxombola kianca kienci yi akamubaka kianca ene, Ngwananga ; ukusuki. Yi kusama kwa sudi kwakamuncuka mangwoso. 14Yi yei akamulanga kambidi muntu ; kate ene, Yaka ya diebesi mikyebe kudi bokanda, longola lolo difongi diakatôya Mosese bwalo bwa kukusudibwa kwebe, ndo kubatôbôlela ntôbô. 15Yi mwoximo ănci ăkadika kucakana, yi bimbukuma binene biakasangila ndo kwombwa yi kupandixibwa masama abo. 16Yi yei akadisokola kuya ku bidi biakadi kanana, yi akalomba.

17Yi ku dinga dituku kwakadiyi mu kweyesa. Yi banga baFalixi yi beyexi ba bwadi bakaxikama koku, bamalwa ku bula bwoso bwa Ngalili yi bwa Yudiya, yi ku Yelusaleme ; yi ngulu ya Fumu yakadiko ndo kubapandisa. 18Yi mona, babalumi bakacwala muna mbôyaponde pa bolelo ; yi bakapalala kumubwesa yi kumuteka ku mpala anci. 19Yi pakadi kabasomona mubwexelu ă kumubwesa bwalo bwa kimbukuma kia bantu, bakabanda kulu kwa ncibo, yi bakamufundusa ku bikidi bia samba, yi bakamupwesa pa bolelo bwanci pakacikaci ku mpala a Yisu. 20Yi pakamonayi kwetabusa kwabo, akatôya ene, Muntu, mabi ebe amakulekyelebwa. 21Yi i bafundi ba mikanda yi baFalixi bakabanga kwelesa mbata ene, Ñani you atangola Ncembi ? Ñani ubili kulekyela mabi utena Ncembi mutupu ? 22Mo Yisu akalubukwa mbata yabo akapingasa yi akabambila ene, Nwelesa mbata mu micima yenu kukai ? 23Kinani kiamadika lungwoso, ndo kutôya ene, Mabi ebe adi malekyela ; ndo kutôya ene, Bika, enda ? 24Kaninga binuxelubukwa ene, Mwana a Muntu udi yi bumanya pa loboko bwa kulekyela mabi,—akatôyela muna mbôyaponde ene, Nkwatôyela ene, Bika, ongula bolelo bwebe, yi yaka ku ncibo ebe. 25Yi akakwombuluka mangwoso ku mpala kwabo, yi akakwombulula bolelo bwakalalayi kulu kwabu, yi akancuka ku ncibo anci udi mu kutumbisa Ncembi. 26Yi bakakama kama bungi bwabo, yi bakatumbisa Ncembi, yi bakakwolubixibwa yi bowa ene, Twamamona bikamakama lelo.

27Kunyuma kwa bintu bebi kwakabatukayi, yi akamona musangi a milambu, dina dienci ene, Lebi, uxikamini ku ncibo a milambu, yi akamwambila ene, Ungulandudili. 28Yi akaxiya bintu bioso, akakwombuluka, yi akamulandudila. 29Yi Lebi akamwencela lubaki lunene mu ncibo anci ; yi momu mwakadi kimbukuma kinene kia basangi ba milambu yi kia banga bantu bakadi yinabo ku bidya. 30Yi baFalixi yi bafundi babo ba mikanda bakapindudila beyi banci mapindu ene, Kukai nudedya yi nunonwa yi basangi ba milambu yi boni ? 31Yi Yisu akapingasa yi akabambila ene, Bobo badi yi mpinyu kabasokwabila nanga ; kate bobo badi yi masama. 32Meme kiluli kulwa bikila bena nkwami, kate boni, badibeli.

33Yi bakamwambila ene, Beyi ba Yoano bancila ncilu ya bidya yi balomba ndombu matuku mangi, yi mo nako kabidi beyi ba baFalixi, mo bebe badedya yi banonwa. 34Yi Yisu akabambila ene, Nubili kuncidika bana ba ncibo a dibakwa bidya pakala mwangaci a dibakwa ukidi yinabo ? 35Mo matuku analwa anabancudibwa mwangaci a dibakwa, kunyuma banancila ku matuku yia. 36Yi akabambila kabidi mwele ene, Kakuna muntu apanda kinkutu kipyakipya ndo kutombola kinkutu kia kalikali ; ximbi uxepanda kieki kipyapipya, yi kicini kipyakipya kakinalelekyela yi kinkutu kia kilikali. 37Yi kakuna muntu ateka malufu a finyo mapyamapya mu bixeba bia kalikali ; ximbi malufu mapyamapya axetondosa bixeba, yi mikyeao anakwecikila yi bixeba binaxipibwa. 38Kate malufu mapyamapya axebwexebwa mu bixeba bipyabipya. 39Yi kakuna muntu ndo apunwa malufu a finyo a kalikali unakyeba mapyamapya ; bwalo bwatôyayi ene, Aa a kalikali adi anengela.

Currently Selected:

LUKA 5: Luna_NT

Highlight

Copy