YOANO 20

1YI ku dituku dia buxi dia Lumingu, kwakalwa Mali a Mangadala ku lukita ku butwatuku pexe, pakadi mwedima ukidiko, yi akamona dibwe diamancudibwa ku lukita. 2Biakadikayi lubilu yi akalwa kudi Pita, yi kudi munga mweyi akananga Yisu, yi akabambila ene, Bapuncula Fumu mu lukita, yi katubiyi kwapumuladikabo. 3Mbwôso Pita akabatuka yi munga mweyi, yi bakaya ku lukita. 4Yi bubidi bwabo bakaya mbilu ; yi munga mweyi akadika Pita lubilu, akafika buxi ku lukita. 5Pakakwenamayi lolo akamona mbuxa ya susu yamaxembama paxi, kaninga kabweleli. 6Ximono Pita lolo akalwa, udi mu kumulabela, yi akabwela mu lukita ; yi akamona mbuxa ya susu yamaxembama, 7yi kitambala, kiakadi ku mucwe ănci, kakisoxembama yi mbuxa ya susu, kate kiamabotakibwa mu kidi pabwakio. 8Kunyuma lolo kwakabwela munga mweyi kabidi akalwa ku lukita buxi, yi akamona, yi akakwetabusa ; 9bwalo butalubukwabo mukanda ă Ncembi pôi nkyekyu ene, uxebika kudi bafu. 10Mbwôso beyi bakancuka kabidi kuya kunci kwabo.

11Mo Mali akakwemana ku lukita, udi mu kudila kunci ; pakadilayi lolo akakwenama kabidi mu lukita, 12yi akamona bangele babidi, bamaxikama yi bilamba bia susu, munga ku mucwe, munga ku makasa, ku kidi kiakalala mumbidi ă Yisu. 13Bobo lolo bakamwambila ene, Mwamukaxi, wadila kukai ? Yei akabambila ene, Bwalo bwapunculabo Fumwami, yi kibiyi kwapumuladikabo. 14Pakadi amatôya noku, akakulumuka kunyuma, yi akamona Yisu amakwemana, yi akadi kasolubukwa ene, udi Yisu. 15Yisu akamwambila ene, Mwamukaxi, wadila kukai ? Wapalala nani ? You udi mu kwenca ene, utani mudimi a kibidi, akamutôyela ene, Mukyelengi, owe ndo wapumuncula kunga, ungwambilipo kwapumuladika, yi meme nakumuncula. 16Yisu akamwambila ene, Mali. You akakulumuka, akamutôyela luna Ebeleo ene, Laboni ; bea kutôya ene, Mweyexi. 17Yisu akamwambila ene, Kungukwaci, bwalo bunkidi kiximunini kudi Tetemi ; mo yaka kudi bakunyi bamene, ubambili ene, Ngwaximuna kudi Tetemi, yi Tetenu ; kudi Ncembi amene yi Ncembi enu. 18Mali a Mangadala akalwa cwala diyi kudi beyi, ene, amamona Fumu, yi ene, amamutôyela malo aa.

19Mbwôso ku butuku bwa dituku dedi, dia buxi dia lumingu, yi pakancibikibwa nkuki ya ncibo akadi beyi ku bowa bwa bena Yuda, kwakalwa Yisu yi akakwemana pakacikaci yi akabambila ene, Polo akali yinenu. 20Yi pakadi amatôya noku, akabebesa bianca bienci yi lubalu lwanci. Ndo biakaxekyelela beyi, pakamonabo Fumu. 21Yisu akabambila kabidi lolo ene, Polo akali yinenu ; byekyene biakangutuma Tete ndo binwatuma nonu kabidi. 22Yi pakadi amatôya noku, akabapupuyila, yi akabatôyela ene, Nwangati Mwoxixi a babala ; 23mabi a bantu boso anunabalekyela nonu, amabalekyelebwa ; mabi a bantu boso anunababamba, amababambibwa.

24Kaninga Tomasa, muntu a disangi yi babidi, abikilabo ene, Didimusu, akadi kiena yinabo pakalwa Yisu. 25Banga beyi lolo bakamwambila ene, Twapumona Fumu. Mo akabambila ene, Kutena nakumona makolo ku makaci anci a misumanyi, yi nakubwesa lulembu lwamene mu makolo a misumanyi, yi nakubwesa kianca kiamene mu lubalu lwanci, kinakwetabusa pô. 26Yi kunyuma kwa matuku yenana, kwakadi beyi banci munda kabidi, yi Tomasa yinabo. Yisu akalwa yi mbelo mincibika, yi akakwemana pakacikaci, yi akatôya ene, Polo akali yinenu. 27Kunyuma akatôyela Tomasa ene, Petesa lulembu lwebe kunu yi mona bianca biamene ; yi petesa kianca kiebe, ukibwesi mu lubalu lwamene ; yi kwakadi kutena kwetabusa, kate yi kwetabusa. 28Tomasa akapingasa yi akamwambila ene, Fumwami yi Ncembi amene. 29Yisu akamwambila ene, Bwalo bwapungumona ndo bwapwetabusa ; balwangwasanibwi bobo batamoneni mo bamakwetabusa.

30Bimo bilayixilu bingi lolo ndo biakakwenca Yisu ku mpala a beyi banci, bitafundibwa mu mukanda ou ; 31mo bebi biamafundibwa binuxekwetabusa ene, Yisu udi Kalistu, Mwana a Ncembi ; yi binuxeakala yi môyo ku dina dienci pa kwetabusa.

Currently Selected:

YOANO 20: Luna_NT

Highlight

Copy